| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
(૨૫) ૫. આપત્તિભયવગ્ગો
(25) 5. Āpattibhayavaggo
૧. સઙ્ઘભેદકસુત્તં
1. Saṅghabhedakasuttaṃ
૨૪૩. એકં સમયં ભગવા કોસમ્બિયં વિહરતિ ઘોસિતારામે. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં આનન્દં ભગવા એતદવોચ – ‘‘અપિ નુ તં, આનન્દ, અધિકરણં વૂપસન્ત’’ન્તિ? ‘‘કુતો તં, ભન્તે, અધિકરણં વૂપસમિસ્સતિ 1! આયસ્મતો , ભન્તે, અનુરુદ્ધસ્સ બાહિયો નામ સદ્ધિવિહારિકો કેવલકપ્પં સઙ્ઘભેદાય ઠિતો. તત્રાયસ્મા અનુરુદ્ધો ન એકવાચિકમ્પિ ભણિતબ્બં મઞ્ઞતી’’તિ.
243. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘api nu taṃ, ānanda, adhikaraṇaṃ vūpasanta’’nti? ‘‘Kuto taṃ, bhante, adhikaraṇaṃ vūpasamissati 2! Āyasmato , bhante, anuruddhassa bāhiyo nāma saddhivihāriko kevalakappaṃ saṅghabhedāya ṭhito. Tatrāyasmā anuruddho na ekavācikampi bhaṇitabbaṃ maññatī’’ti.
‘‘કદા પનાનન્દ, અનુરુદ્ધો સઙ્ઘમજ્ઝે અધિકરણેસુ 3 વોયુઞ્જતિ! નનુ, આનન્દ, યાનિ કાનિચિ અધિકરણાનિ ઉપ્પજ્જન્તિ, સબ્બાનિ તાનિ તુમ્હે ચેવ વૂપસમેથ સારિપુત્તમોગ્ગલ્લાના ચ.
‘‘Kadā panānanda, anuruddho saṅghamajjhe adhikaraṇesu 4 voyuñjati! Nanu, ānanda, yāni kānici adhikaraṇāni uppajjanti, sabbāni tāni tumhe ceva vūpasametha sāriputtamoggallānā ca.
‘‘ચત્તારોમે, આનન્દ, અત્થવસે સમ્પસ્સમાનો પાપભિક્ખુ સઙ્ઘભેદેન નન્દતિ. કતમે ચત્તારો? ઇધાનન્દ, પાપભિક્ખુ દુસ્સીલો હોતિ પાપધમ્મો અસુચિ સઙ્કસ્સરસમાચારો પટિચ્છન્નકમ્મન્તો અસ્સમણો સમણપટિઞ્ઞો અબ્રહ્મચારી બ્રહ્મચારિપટિઞ્ઞો અન્તોપૂતિ અવસ્સુતો કસમ્બુજાતો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – દુસ્સીલો પાપધમ્મો અસુચિ સઙ્કસ્સરસમાચારો પટિચ્છન્નકમ્મન્તો અસ્સમણો સમણપટિઞ્ઞો અબ્રહ્મચારી બ્રહ્મચારિપટિઞ્ઞો અન્તોપૂતિ અવસ્સુતો કસમ્બુજાતોતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, પઠમં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.
‘‘Cattārome, ānanda, atthavase sampassamāno pāpabhikkhu saṅghabhedena nandati. Katame cattāro? Idhānanda, pāpabhikkhu dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto. Tassa evaṃ hoti – ‘sace kho maṃ bhikkhū jānissanti – dussīlo pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujātoti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, paṭhamaṃ atthavasaṃ sampassamāno pāpabhikkhu saṅghabhedena nandati.
‘‘પુન ચપરં, આનન્દ, પાપભિક્ખુ મિચ્છાદિટ્ઠિકો હોતિ, અન્તગ્ગાહિકાય દિટ્ઠિયા સમન્નાગતો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – મિચ્છાદિટ્ઠિકો અન્તગ્ગાહિકાય દિટ્ઠિયા સમન્નાગતોતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, દુતિયં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.
‘‘Puna caparaṃ, ānanda, pāpabhikkhu micchādiṭṭhiko hoti, antaggāhikāya diṭṭhiyā samannāgato. Tassa evaṃ hoti – ‘sace kho maṃ bhikkhū jānissanti – micchādiṭṭhiko antaggāhikāya diṭṭhiyā samannāgatoti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, dutiyaṃ atthavasaṃ sampassamāno pāpabhikkhu saṅghabhedena nandati.
‘‘પુન ચપરં, આનન્દ, પાપભિક્ખુ મિચ્છાઆજીવો હોતિ, મિચ્છાઆજીવેન જીવિકં 5 કપ્પેતિ. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – મિચ્છાઆજીવો મિચ્છાઆજીવેન જીવિકં કપ્પેતીતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, તતિયં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.
‘‘Puna caparaṃ, ānanda, pāpabhikkhu micchāājīvo hoti, micchāājīvena jīvikaṃ 6 kappeti. Tassa evaṃ hoti – ‘sace kho maṃ bhikkhū jānissanti – micchāājīvo micchāājīvena jīvikaṃ kappetīti, samaggā maṃ santā nāsessanti; vaggā pana maṃ na nāsessantī’ti. Idaṃ, ānanda, tatiyaṃ atthavasaṃ sampassamāno pāpabhikkhu saṅghabhedena nandati.
‘‘પુન ચપરં, આનન્દ, પાપભિક્ખુ લાભકામો હોતિ સક્કારકામો અનવઞ્ઞત્તિકામો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – લાભકામો સક્કારકામો અનવઞ્ઞત્તિકામોતિ, સમગ્ગા મં સન્તા ન સક્કરિસ્સન્તિ ન ગરું કરિસ્સન્તિ ન માનેસ્સન્તિ ન પૂજેસ્સન્તિ; વગ્ગા પન મં સક્કરિસ્સન્તિ ગરું કરિસ્સન્તિ માનેસ્સન્તિ પૂજેસ્સન્તી’તિ. ઇદં, આનન્દ, ચતુત્થં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ. ઇમે ખો, આનન્દ, ચત્તારો અત્થવસે સમ્પસ્સમાનો પાપભિક્ખુ સઙ્ઘભેદેન નન્દતી’’તિ. પઠમં.
‘‘Puna caparaṃ, ānanda, pāpabhikkhu lābhakāmo hoti sakkārakāmo anavaññattikāmo. Tassa evaṃ hoti – ‘sace kho maṃ bhikkhū jānissanti – lābhakāmo sakkārakāmo anavaññattikāmoti, samaggā maṃ santā na sakkarissanti na garuṃ karissanti na mānessanti na pūjessanti; vaggā pana maṃ sakkarissanti garuṃ karissanti mānessanti pūjessantī’ti. Idaṃ, ānanda, catutthaṃ atthavasaṃ sampassamāno pāpabhikkhu saṅghabhedena nandati. Ime kho, ānanda, cattāro atthavase sampassamāno pāpabhikkhu saṅghabhedena nandatī’’ti. Paṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૧. સઙ્ઘભેદકસુત્તવણ્ણના • 1. Saṅghabhedakasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧. સઙ્ઘભેદકસુત્તવણ્ણના • 1. Saṅghabhedakasuttavaṇṇanā
