| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
९. सङ्घसामग्गीसुत्तं
9. Saṅghasāmaggīsuttaṃ
१९. वुत्तञ्हेतं भगवता, वुत्तमरहताति मे सुतं –
19. Vuttañhetaṃ bhagavatā, vuttamarahatāti me sutaṃ –
‘‘एकधम्मो, भिक्खवे, लोके उप्पज्जमानो उप्पज्जति बहुजनहिताय बहुजनसुखाय बहुनो जनस्स अत्थाय हिताय सुखाय देवमनुस्सानं। कतमो एकधम्मो ? सङ्घसामग्गी। सङ्घे खो पन, भिक्खवे, समग्गे न चेव अञ्ञमञ्ञं भण्डनानि होन्ति, न च अञ्ञमञ्ञं परिभासा होन्ति, न च अञ्ञमञ्ञं परिक्खेपा होन्ति, न च अञ्ञमञ्ञं परिच्चजना होन्ति। तत्थ अप्पसन्ना चेव पसीदन्ति, पसन्नानञ्च भिय्योभावो होती’’ति। एतमत्थं भगवा अवोच। तत्थेतं इति वुच्चति –
‘‘Ekadhammo, bhikkhave, loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṃ. Katamo ekadhammo ? Saṅghasāmaggī. Saṅghe kho pana, bhikkhave, samagge na ceva aññamaññaṃ bhaṇḍanāni honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajanā honti. Tattha appasannā ceva pasīdanti, pasannānañca bhiyyobhāvo hotī’’ti. Etamatthaṃ bhagavā avoca. Tatthetaṃ iti vuccati –
‘‘सुखा सङ्घस्स सामग्गी, समग्गानञ्चनुग्गहो।
‘‘Sukhā saṅghassa sāmaggī, samaggānañcanuggaho;
समग्गरतो धम्मट्ठो, योगक्खेमा न धंसति।
Samaggarato dhammaṭṭho, yogakkhemā na dhaṃsati;
सङ्घं समग्गं कत्वान, कप्पं सग्गम्हि मोदती’’ति॥
Saṅghaṃ samaggaṃ katvāna, kappaṃ saggamhi modatī’’ti.
अयम्पि अत्थो वुत्तो भगवता, इति मे सुतन्ति। नवमं।
Ayampi attho vutto bhagavatā, iti me sutanti. Navamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ९. सङ्घसामग्गीसुत्तवण्णना • 9. Saṅghasāmaggīsuttavaṇṇanā
