| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. སངྒྷཝནྡནཱསུཏྟཝཎྞནཱ
10. Saṅghavandanāsuttavaṇṇanā
༢༦༦. པཱུཏིམྷི དེཧེ མཱཏུ སརཱིརེ སཡནཏོ, ཨཏྟནོ ཨེཝ ཝཱ པཱུཏིདེཧཾ སརཱིརཾ ཏསྨིཾ ཋིཏཏཱཡ ཨཝཏྠརིཏྭཱ སཡནཏོ པཱུཏིདེཧསཡཱཏི ཡོཛནཱ། ཀུཎཔམྷེཏེཏི ཨེཏེ མནུསྶཱ ཨསུཙིདུགྒནྡྷཛེགུཙྪཔཊིཀྐཱུལེ མཱཏུཀུཙྪིསངྑཱཏེ ཀུཎཔསྨིཾ དས མཱསེ ནིམུགྒཱ། ཏེསཾ ཀིནྣཱམ ཏྭཾ པིཧཡསཱིཏི ཡོཛནཱ། ཨེཏེསཾ ཨེཏཾ ཝིཧཡཱམཱིཏི ཨེཏེསཾ ཨིསཱིནཾ ཨེཏཾ སམྨཱཔཊིཔཏྟིཾ ཝིཧཡཱམི། ཨིདཱནི ཏཾ པཊིཔཏྟིཾ དསྶེཏུཾ ‘‘ན ཏེ སཾ ཀོཊྛེ ཨོཔེནྟཱི’’ཏི ཝུཏྟཾ། དྷཉྙཾ ཀོཊྛེ ན པཀྑིཔནྟི པཀྑིཔིཏབྦསྶ ཙ ཨབྷཱཝཏོ། ཏེནཱཧ ‘‘ན ཧི ཨེཏེསཾ དྷཉྙ’’ནྟི། པརེསཾ ནིཊྛིཏནྟི པརེསཾ གཧིཏཾ སནྟཀཾ ཏེསཾ པཱཀཱཡ ནིཊྛིཏཾ། བྷིཀྑཱཙཱརཝཏྟེནཱཏི པིཎྜཱཙརིཡཱཡ། ཨེསམཱནཱ པརིཡེསནྟཱ། ཨེཝཾ པརིཡིཊྛེན། ཡཱཔེནྟི, ན ཨེསནྟི ཨནེསནཾ། སུསམཱདིནྣསུནྡརཝཏཱཏི སུཊྛུ སམཱདིནྣསོབྷནཝཏཱ།
266.Pūtimhi dehe mātu sarīre sayanato, attano eva vā pūtidehaṃ sarīraṃ tasmiṃ ṭhitatāya avattharitvā sayanato pūtidehasayāti yojanā. Kuṇapamheteti ete manussā asuciduggandhajegucchapaṭikkūle mātukucchisaṅkhāte kuṇapasmiṃ dasa māse nimuggā. Tesaṃ kinnāma tvaṃ pihayasīti yojanā. Etesaṃ etaṃ vihayāmīti etesaṃ isīnaṃ etaṃ sammāpaṭipattiṃ vihayāmi. Idāni taṃ paṭipattiṃ dassetuṃ ‘‘na te saṃ koṭṭhe opentī’’ti vuttaṃ. Dhaññaṃ koṭṭhe na pakkhipanti pakkhipitabbassa ca abhāvato. Tenāha ‘‘na hi etesaṃ dhañña’’nti. Paresaṃ niṭṭhitanti paresaṃ gahitaṃ santakaṃ tesaṃ pākāya niṭṭhitaṃ. Bhikkhācāravattenāti piṇḍācariyāya. Esamānā pariyesantā. Evaṃ pariyiṭṭhena. Yāpenti, na esanti anesanaṃ. Susamādinnasundaravatāti suṭṭhu samādinnasobhanavatā.
ཨེཝཾ སུབྷཱསིཏབྷཱསིནོཏི གནྠདྷུརཝིཔསྶནཱདྷུརཱནཾ ཝསེན གུཎཔརིམཱཎསུབྷཱསིཏསྶེཝ བྷཱསནསཱིལཱ ། ཨརིཡེན ཏུཎྷཱིབྷཱུཏེན ཏུཎྷཱིབྷཱུཏཱ། ཏཏོ ཨེཝ མནསྶ སཱཏིསཡཾ སམཉྩརཱ། གཧིཏདཎྜེསུ པརཱམཱསཱདིཔཡུཏྟེསུ དཎྜཱདཱནཱདིཧེཏུ ཨུཔྤཛྫནཀཀིལེསཔརིལཱ༹ཧཱབྷཱཝཏོ ནིབྦུཏཱ། ཏེནཱཧ ‘‘ཝིསྶཊྛདཎྜཱ’’ཏི། སཱདཱནེསཱུཏི སབྷཝཱདཱནེསུ། ཨནཱདཱནཱཏི ཏབྦིརཧིཏཱ། ཏེནཱཧ ‘‘བྷཝཡོནཱི’’ཏིཨཱདི།
Evaṃ subhāsitabhāsinoti ganthadhuravipassanādhurānaṃ vasena guṇaparimāṇasubhāsitasseva bhāsanasīlā . Ariyena tuṇhībhūtena tuṇhībhūtā. Tato eva manassa sātisayaṃ samañcarā. Gahitadaṇḍesu parāmāsādipayuttesu daṇḍādānādihetu uppajjanakakilesapariḷāhābhāvato nibbutā. Tenāha ‘‘vissaṭṭhadaṇḍā’’ti. Sādānesūti sabhavādānesu. Anādānāti tabbirahitā. Tenāha ‘‘bhavayonī’’tiādi.
སངྒྷཝནྡནཱསུཏྟཝཎྞནཱ ནིཊྛིཏཱ།
Saṅghavandanāsuttavaṇṇanā niṭṭhitā.
དུཏིཡཝགྒཝཎྞནཱ ནིཊྛིཏཱ།
Dutiyavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. སངྒྷཝནྡནཱསུཏྟཾ • 10. Saṅghavandanāsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. སངྒྷཝནྡནཱསུཏྟཝཎྞནཱ • 10. Saṅghavandanāsuttavaṇṇanā
