| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൧൦. സങ്ഘുപട്ഠാകത്ഥേരഅപദാനവണ്ണനാ
10. Saṅghupaṭṭhākattheraapadānavaṇṇanā
വേസ്സഭുമ്ഹി ഭഗവതീതിആദികം ആയസ്മതോ സങ്ഘുപട്ഠാകത്ഥേരസ്സ അപദാനം. അയമ്പി ഥേരോ പുരിമബുദ്ധേസു കതകുസലസമ്ഭാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ വേസ്സഭുസ്സ ഭഗവതോ കാലേ തസ്സാരാമികസ്സ പുത്തോ ഹുത്വാ നിബ്ബത്തോ വിഞ്ഞുതം പത്വാ സദ്ധോ പസന്നോ വിഹാരേസു ആരാമികകമ്മം കരോന്തോ സക്കച്ചം സങ്ഘം ഉപട്ഠാസി. സോ തേനേവ കുസലകമ്മേന ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം ഗഹപതികുലേ നിബ്ബത്തോ വുദ്ധിപ്പത്തോ വിഭവസമ്പന്നോ സുഖപ്പത്തോ പാകടോ സത്ഥു ധമ്മദേസനം സുത്വാ സാസനേ പസന്നോ പബ്ബജിത്വാ വത്തസമ്പന്നോ സാസനം സോഭയമാനോ വിപസ്സനം വഡ്ഢേന്തോ നചിരസ്സേവ സഹ പടിസമ്ഭിദാഹി അരഹത്തം പത്തോ ഛളഭിഞ്ഞോ പുബ്ബേ കതകുസലകമ്മവസേന സങ്ഘുപട്ഠാകത്ഥേരോതി പാകടോ അഹോസി.
Vessabhumhi bhagavatītiādikaṃ āyasmato saṅghupaṭṭhākattherassa apadānaṃ. Ayampi thero purimabuddhesu katakusalasambhāro anekesu bhavesu vivaṭṭūpanissayāni puññāni upacinanto vessabhussa bhagavato kāle tassārāmikassa putto hutvā nibbatto viññutaṃ patvā saddho pasanno vihāresu ārāmikakammaṃ karonto sakkaccaṃ saṅghaṃ upaṭṭhāsi. So teneva kusalakammena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ gahapatikule nibbatto vuddhippatto vibhavasampanno sukhappatto pākaṭo satthu dhammadesanaṃ sutvā sāsane pasanno pabbajitvā vattasampanno sāsanaṃ sobhayamāno vipassanaṃ vaḍḍhento nacirasseva saha paṭisambhidāhi arahattaṃ patto chaḷabhiñño pubbe katakusalakammavasena saṅghupaṭṭhākattheroti pākaṭo ahosi.
൪൫. സോ ഏകദിവസം ‘‘പുബ്ബേ മയാ കിം നാമ കമ്മം കത്വാ അയം ലോകുത്തരസമ്പത്തി ലദ്ധാ’’തി അത്തനോ പുബ്ബകമ്മം സരിത്വാ പച്ചക്ഖതോ ജാനിത്വാ സോമനസ്സജാതോ പുബ്ബചരിതാപദാനം പാകടം കരോന്തോ വേസ്സഭുമ്ഹി ഭഗവതീതിആദിമാഹ. തത്ഥ അഹോസാരാമികോ അഹന്തി അഹം വേസ്സഭുസ്സ ഭഗവതോ സാസനേ ആരാമികോ അഹോസിന്തി അത്ഥോ. സേസം ഹേട്ഠാ വുത്തനയത്താ ഉത്താനത്ഥത്താ ച സുവിഞ്ഞേയ്യമേവാതി.
45. So ekadivasaṃ ‘‘pubbe mayā kiṃ nāma kammaṃ katvā ayaṃ lokuttarasampatti laddhā’’ti attano pubbakammaṃ saritvā paccakkhato jānitvā somanassajāto pubbacaritāpadānaṃ pākaṭaṃ karonto vessabhumhi bhagavatītiādimāha. Tattha ahosārāmiko ahanti ahaṃ vessabhussa bhagavato sāsane ārāmiko ahosinti attho. Sesaṃ heṭṭhā vuttanayattā uttānatthattā ca suviññeyyamevāti.
സങ്ഘുപട്ഠാകത്ഥേരഅപദാനവണ്ണനാ സമത്താ.
Saṅghupaṭṭhākattheraapadānavaṇṇanā samattā.
അട്ഠാരസമവഗ്ഗവണ്ണനാ സമത്താ.
Aṭṭhārasamavaggavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൧൦. സങ്ഘുപട്ഠാകത്ഥേരഅപദാനം • 10. Saṅghupaṭṭhākattheraapadānaṃ
