Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
8. ஸஞ்ஜயத்தே²ரகா³தா²வண்ணனா
8. Sañjayattheragāthāvaṇṇanā
யதோ அஹந்தி ஆயஸ்மதோ ஸஞ்ஜயத்தே²ரஸ்ஸ கா³தா². கா உப்பத்தி? ஸோபி புரிமபு³த்³தே⁴ஸு கதாதி⁴காரோ தத்த² தத்த² விவட்டூபனிஸ்ஸயங் புஞ்ஞங் உபசினந்தோ விபஸ்ஸிஸ்ஸ ப⁴க³வதோ காலே மஹதி பூகே³ ஸங்கித்திவஸேன வத்து²ங் ஸங்க⁴ரித்வா ரதனத்தயங் உத்³தி³ஸ்ஸ புஞ்ஞங் கரொந்தோ ஸயங் த³லித்³தோ³ ஹுத்வா நேஸங் க³ணாதீ³னங் புஞ்ஞகிரியாய ப்³யாவடோ அஹோஸி. காலேன காலங் ப⁴க³வந்தங் உபஸங்கமித்வா வந்தி³த்வா பஸன்னமானஸோ பி⁴க்கூ²னஞ்ச தங் தங் வெய்யாவச்சங் அகாஸி. ஸோ தேன புஞ்ஞகம்மேன தே³வலோகே நிப்³ப³த்தோ அபராபரங் புஞ்ஞானி கத்வா ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ ராஜக³ஹே விப⁴வஸம்பன்னஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி ஸஞ்ஜயோ நாம நாமேன, ஸோ வயப்பத்தோ ப்³ரஹ்மாயுபொக்க²ரஸாதிஆதி³கே அபி⁴ஞ்ஞாதே ப்³ராஹ்மணே ஸாஸனே அபி⁴ப்பஸன்னே தி³ஸ்வா ஸஞ்ஜாதப்பஸாதோ³ ஸத்தா²ரங் உபஸங்கமி. தஸ்ஸ ஸத்தா² த⁴ம்மங் தே³ஸேஸி. ஸோ த⁴ம்மங் ஸுத்வா ஸோதாபன்னோ அஹோஸி. அபரபா⁴கே³ பப்³ப³ஜி. பப்³ப³ஜந்தோ ச கு²ரக்³கே³யேவ ச²ளபி⁴ஞ்ஞோ அஹோஸீ. தேன வுத்தங் அபதா³னே (அப॰ தே²ர 1.10.51-55) –
Yato ahanti āyasmato sañjayattherassa gāthā. Kā uppatti? Sopi purimabuddhesu katādhikāro tattha tattha vivaṭṭūpanissayaṃ puññaṃ upacinanto vipassissa bhagavato kāle mahati pūge saṃkittivasena vatthuṃ saṅgharitvā ratanattayaṃ uddissa puññaṃ karonto sayaṃ daliddo hutvā nesaṃ gaṇādīnaṃ puññakiriyāya byāvaṭo ahosi. Kālena kālaṃ bhagavantaṃ upasaṅkamitvā vanditvā pasannamānaso bhikkhūnañca taṃ taṃ veyyāvaccaṃ akāsi. So tena puññakammena devaloke nibbatto aparāparaṃ puññāni katvā sugatīsuyeva saṃsaranto imasmiṃ buddhuppāde rājagahe vibhavasampannassa brāhmaṇassa putto hutvā nibbatti sañjayo nāma nāmena, so vayappatto brahmāyupokkharasātiādike abhiññāte brāhmaṇe sāsane abhippasanne disvā sañjātappasādo satthāraṃ upasaṅkami. Tassa satthā dhammaṃ desesi. So dhammaṃ sutvā sotāpanno ahosi. Aparabhāge pabbaji. Pabbajanto ca khuraggeyeva chaḷabhiñño ahosī. Tena vuttaṃ apadāne (apa. thera 1.10.51-55) –
‘‘விபஸ்ஸிஸ்ஸ ப⁴க³வதோ, மஹாபூக³க³ணோ அஹு;
‘‘Vipassissa bhagavato, mahāpūgagaṇo ahu;
வெய்யாவச்சகரோ ஆஸிங், ஸப்³ப³கிச்சேஸு வாவடோ.
Veyyāvaccakaro āsiṃ, sabbakiccesu vāvaṭo.
‘‘தெ³ய்யத⁴ம்மோ ச மே நத்தி², ஸுக³தஸ்ஸ மஹேஸினோ;
‘‘Deyyadhammo ca me natthi, sugatassa mahesino;
அவந்தி³ங் ஸத்து²னோ பாதே³, விப்பஸன்னேன சேதஸா.
Avandiṃ satthuno pāde, vippasannena cetasā.
‘‘ஏகனவுதிதோ கப்பே, வெய்யாவச்சங் அகாஸஹங்;
‘‘Ekanavutito kappe, veyyāvaccaṃ akāsahaṃ;
து³க்³க³திங் நாபி⁴ஜானாமி, வெய்யாவச்சஸ்ஸித³ங் ப²லங்.
Duggatiṃ nābhijānāmi, veyyāvaccassidaṃ phalaṃ.
‘‘இதோ ச அட்ட²மே கப்பே, ராஜா ஆஸிங் ஸுசிந்திதோ;
‘‘Ito ca aṭṭhame kappe, rājā āsiṃ sucintito;
ஸத்தரதனஸம்பன்னோ, சக்கவத்தீ மஹப்³ப³லோ.
Sattaratanasampanno, cakkavattī mahabbalo.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
ச²ளபி⁴ஞ்ஞோ பன ஹுத்வா அஞ்ஞங் ப்³யாகரொந்தோ ‘‘யதோ அஹங் பப்³ப³ஜிதோ’’தி கா³த²ங் அபா⁴ஸி.
Chaḷabhiñño pana hutvā aññaṃ byākaronto ‘‘yato ahaṃ pabbajito’’ti gāthaṃ abhāsi.
48. தத்த² யதோ அஹங் பப்³ப³ஜிதோதி யதோ பபு⁴தி யதோ பட்டா²ய அஹங் பப்³ப³ஜிதோ. பப்³ப³ஜிதகாலதோ பட்டா²ய நாபி⁴ஜானாமி ஸங்கப்பங், அனரியங் தோ³ஸஸங்ஹிதந்தி ராகா³தி³தோ³ஸஸங்ஹிதங் ததோ ஏவ அனரியங் நிஹீனங், அரியேஹி வா அனரணீயதாய அனரியேஹி அரணீயதாய ச அனரியங் பாபகங் ஆரம்மணே அபூ⁴தகு³ணாதி³ஸங்கப்பனதோ ‘‘ஸங்கப்போ’’தி லத்³த⁴னாமங் காமவிதக்காதி³மிச்சா²விதக்கங் உப்பாதி³தங் நாபி⁴ஜானாமீதி, ‘‘கு²ரக்³கே³யேவ மயா அரஹத்தங் பத்த’’ந்தி அஞ்ஞங் ப்³யாகாஸி.
48. Tattha yato ahaṃ pabbajitoti yato pabhuti yato paṭṭhāya ahaṃ pabbajito. Pabbajitakālato paṭṭhāya nābhijānāmi saṅkappaṃ, anariyaṃ dosasaṃhitanti rāgādidosasaṃhitaṃ tato eva anariyaṃ nihīnaṃ, ariyehi vā anaraṇīyatāya anariyehi araṇīyatāya ca anariyaṃ pāpakaṃ ārammaṇe abhūtaguṇādisaṅkappanato ‘‘saṅkappo’’ti laddhanāmaṃ kāmavitakkādimicchāvitakkaṃ uppāditaṃ nābhijānāmīti, ‘‘khuraggeyeva mayā arahattaṃ patta’’nti aññaṃ byākāsi.
ஸஞ்ஜயத்தே²ரகா³தா²வண்ணனா நிட்டி²தா.
Sañjayattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 8. ஸஞ்ஜயத்தே²ரகா³தா² • 8. Sañjayattheragāthā