| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஸங்கா²ரஸுத்தவண்ணனா
3. Saṅkhārasuttavaṇṇanā
23. ததியே ஸப்³யாப³ஜ்ஜ²ந்தி ஸது³க்க²ங். காயஸங்கா²ரந்தி காயத்³வாரே சேதனாராஸிங். அபி⁴ஸங்க²ரோதீதி ஆயூஹதி ராஸிங் கரோதி பிண்ட³ங் கரோதி. வசீமனொத்³வாரேஸுபி ஏஸேவ நயோ. ஸப்³யாப³ஜ்ஜ²ங் லோகந்தி ஸது³க்க²ங் லோகங். ஸப்³யாப³ஜ்ஜா² ப²ஸ்ஸா பு²ஸந்தீதி ஸது³க்கா² விபாகப²ஸ்ஸா பு²ஸந்தி. ஸப்³யாப³ஜ்ஜ²ங் வேத³னங் வேதி³யதீதி ஸது³க்க²ங் விபாகவேத³னங் வேதி³யதி, ஸாபா³த⁴ங் நிரஸ்ஸாத³ந்தி அத்தோ². ஸெய்யதா²பி ஸத்தா நேரயிகாதி யதா² நிரயே நிப்³ப³த்தஸத்தா ஏகந்தது³க்க²ங் வேத³னங் வேதி³யந்தி, ஏவங் வேதி³யதீதி அத்தோ². கிங் பன தத்த² உபெக்கா²வேத³னா நத்தீ²தி? அத்தி², து³க்க²வேத³னாய பன ப³லவபா⁴வேன ஸா அப்³போ³ஹாரிகட்டா²னே டி²தா. இதி நிரயோவ நிரயஸ்ஸ உபமங் கத்வா ஆஹடோ. தத்ர படிபா⁴க³உபமா நாம கிர ஏஸா.
23. Tatiye sabyābajjhanti sadukkhaṃ. Kāyasaṅkhāranti kāyadvāre cetanārāsiṃ. Abhisaṅkharotīti āyūhati rāsiṃ karoti piṇḍaṃ karoti. Vacīmanodvāresupi eseva nayo. Sabyābajjhaṃ lokanti sadukkhaṃ lokaṃ. Sabyābajjhā phassā phusantīti sadukkhā vipākaphassā phusanti. Sabyābajjhaṃvedanaṃ vediyatīti sadukkhaṃ vipākavedanaṃ vediyati, sābādhaṃ nirassādanti attho. Seyyathāpi sattā nerayikāti yathā niraye nibbattasattā ekantadukkhaṃ vedanaṃ vediyanti, evaṃ vediyatīti attho. Kiṃ pana tattha upekkhāvedanā natthīti? Atthi, dukkhavedanāya pana balavabhāvena sā abbohārikaṭṭhāne ṭhitā. Iti nirayova nirayassa upamaṃ katvā āhaṭo. Tatra paṭibhāgaupamā nāma kira esā.
ஸெய்யதா²பி தே³வா ஸுப⁴கிண்ஹாதி இதா⁴பி தே³வலோகோவ தே³வலோகஸ்ஸ உபமங் கத்வா ஆஹடோ. யஸ்மா பன ஹெட்டி²மேஸு ப்³ரஹ்மலோகேஸு ஸப்பீதிகஜ்ஜா²னவிபாகோ வத்ததி, ஸுப⁴கிண்ஹேஸு நிப்பீதிகோ ஏகந்தஸுகோ²வ, தஸ்மா தே அக்³க³ஹெத்வா ஸுப⁴கிண்ஹாவ கதி²தா. இதி அயம்பி தத்ர படிபா⁴க³உபமா நாமாதி வேதி³தப்³பா³.
Seyyathāpi devā subhakiṇhāti idhāpi devalokova devalokassa upamaṃ katvā āhaṭo. Yasmā pana heṭṭhimesu brahmalokesu sappītikajjhānavipāko vattati, subhakiṇhesu nippītiko ekantasukhova, tasmā te aggahetvā subhakiṇhāva kathitā. Iti ayampi tatra paṭibhāgaupamā nāmāti veditabbā.
வோகிண்ணஸுக²து³க்க²ந்தி வோமிஸ்ஸகஸுக²து³க்க²ங். ஸெய்யதா²பி மனுஸ்ஸாதி மனுஸ்ஸானங் ஹி காலேன ஸுக²ங் ஹோதி, காலேன து³க்க²ங். ஏகச்சே ச தே³வாதி காமாவசரதே³வா. தேஸம்பி காலேன ஸுக²ங் ஹோதி, காலேன து³க்க²ங். தேஸங் ஹி ஹீனதரானங் மஹேஸக்க²தரா தே³வதா தி³ஸ்வா ஆஸனா வுட்டா²தப்³ப³ங் ஹோதி, மக்³கா³ உக்கமிதப்³ப³ங், பாருதவத்த²ங் அபனேதப்³ப³ங், அஞ்ஜலிகம்மங் காதப்³ப³ந்தி தங் ஸப்³ப³ம்பி து³க்க²ங் நாம ஹோதி. ஏகச்சே ச வினிபாதிகாதி வேமானிகபேதா. தே ஹி காலேன ஸம்பத்திங் அனுப⁴வந்தி காலேன கம்மந்தி வோகிண்ணஸுக²து³க்கா²வ ஹொந்தி. இதி இமஸ்மிங் ஸுத்தே தீணி ஸுசரிதானி லோகியலோகுத்தரமிஸ்ஸகானி கதி²தானீதி வேதி³தப்³பா³னி.
Vokiṇṇasukhadukkhanti vomissakasukhadukkhaṃ. Seyyathāpi manussāti manussānaṃ hi kālena sukhaṃ hoti, kālena dukkhaṃ. Ekacce ca devāti kāmāvacaradevā. Tesampi kālena sukhaṃ hoti, kālena dukkhaṃ. Tesaṃ hi hīnatarānaṃ mahesakkhatarā devatā disvā āsanā vuṭṭhātabbaṃ hoti, maggā ukkamitabbaṃ, pārutavatthaṃ apanetabbaṃ, añjalikammaṃ kātabbanti taṃ sabbampi dukkhaṃ nāma hoti. Ekacce ca vinipātikāti vemānikapetā. Te hi kālena sampattiṃ anubhavanti kālena kammanti vokiṇṇasukhadukkhāva honti. Iti imasmiṃ sutte tīṇi sucaritāni lokiyalokuttaramissakāni kathitānīti veditabbāni.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸங்கா²ரஸுத்தங் • 3. Saṅkhārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. ஸங்கா²ரஸுத்தவண்ணனா • 3. Saṅkhārasuttavaṇṇanā
