| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૩. સઙ્ખારસુત્તવણ્ણના
3. Saṅkhārasuttavaṇṇanā
૨૩. તતિયે વિવિધેહિ આકારેહિ આબાધનતો બ્યાબાધોવ બ્યાબજ્ઝં, કાયિકં ચેતસિકઞ્ચ દુક્ખં. સહ બ્યાબજ્ઝેન વત્તતીતિ સબ્યાબજ્ઝં. તેનાહ ‘‘સદુક્ખ’’ન્તિ. ચેતનારાસિન્તિ પુબ્બચેતનાદિરાસિં. ચેતનં પુનપ્પુનં પવત્તેન્તો ‘‘રાસિં કરોતિ પિણ્ડં કરોતી’’તિ ચ વુત્તો. સદુક્ખન્તિ નિરન્તરદુક્ખં. તેનાહ ‘‘સાબાધં નિરસ્સાદ’’ન્તિ. અત્થીતિ ઉજુકં દુક્ખવેદના નત્થીતિ અવત્તબ્બત્તા વુત્તં. અનિટ્ઠસભાવત્તા અનિટ્ઠારમ્મણત્તા ચ દુક્ખપક્ખિકાવ સા દટ્ઠબ્બા. ન હિ અકુસલવિપાકા ઇટ્ઠા નામ અત્થી, કુસલવિપાકા પન ઉપેક્ખાવેદના તત્થ અપ્પાવસરા. અટ્ઠકથાયં પન નિરયસ્સ દુક્ખબહુલત્તા દુક્ખસ્સ ચ તત્થ બલવતાય સા અબ્બોહારિકટ્ઠાને ઠિતાતિ વુત્તં. ઉપમં કત્વા આહટો વિસેસો વિય સામઞ્ઞસ્સ યથા અયોપિણ્ડિરોહિનો વિય રૂપાનન્તિ. પટિભાગઉપમાતિ પટિબિમ્બઉપમા.
23. Tatiye vividhehi ākārehi ābādhanato byābādhova byābajjhaṃ, kāyikaṃ cetasikañca dukkhaṃ. Saha byābajjhena vattatīti sabyābajjhaṃ. Tenāha ‘‘sadukkha’’nti. Cetanārāsinti pubbacetanādirāsiṃ. Cetanaṃ punappunaṃ pavattento ‘‘rāsiṃ karoti piṇḍaṃ karotī’’ti ca vutto. Sadukkhanti nirantaradukkhaṃ. Tenāha ‘‘sābādhaṃ nirassāda’’nti. Atthīti ujukaṃ dukkhavedanā natthīti avattabbattā vuttaṃ. Aniṭṭhasabhāvattā aniṭṭhārammaṇattā ca dukkhapakkhikāva sā daṭṭhabbā. Na hi akusalavipākā iṭṭhā nāma atthī, kusalavipākā pana upekkhāvedanā tattha appāvasarā. Aṭṭhakathāyaṃ pana nirayassa dukkhabahulattā dukkhassa ca tattha balavatāya sā abbohārikaṭṭhāne ṭhitāti vuttaṃ. Upamaṃ katvā āhaṭo viseso viya sāmaññassa yathā ayopiṇḍirohino viya rūpānanti. Paṭibhāgaupamāti paṭibimbaupamā.
તે અગ્ગહેત્વાતિ હેટ્ઠિમબ્રહ્મલોકે અગ્ગહેત્વા. વોમિસ્સકસુખદુક્ખન્તિ વિમિસ્સકસુખદુક્ખં પીતિમિસ્સકભાવતો. કમ્મન્તિ પાપકમ્મં. કમ્મસીસેન ફલં વદતિ. કામઞ્ચેત્થ ‘‘અબ્યાબજ્ઝં લોકં ઉપપજ્જતી’’તિ આગતં, ‘‘અબ્યાબજ્ઝા ફસ્સા ફુસન્તી’’તિ પન વચનેન લોકુત્તરફસ્સાપિ સઙ્ગય્હન્તીતિ ‘‘તીણિ સુચરિતાનિ લોકિયલોકુત્તરમિસ્સકાનિ કથિતાની’’તિ વુત્તં.
Te aggahetvāti heṭṭhimabrahmaloke aggahetvā. Vomissakasukhadukkhanti vimissakasukhadukkhaṃ pītimissakabhāvato. Kammanti pāpakammaṃ. Kammasīsena phalaṃ vadati. Kāmañcettha ‘‘abyābajjhaṃ lokaṃ upapajjatī’’ti āgataṃ, ‘‘abyābajjhā phassā phusantī’’ti pana vacanena lokuttaraphassāpi saṅgayhantīti ‘‘tīṇi sucaritāni lokiyalokuttaramissakāni kathitānī’’ti vuttaṃ.
સઙ્ખારસુત્તવણ્ણના નિટ્ઠિતા.
Saṅkhārasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૩. સઙ્ખારસુત્તં • 3. Saṅkhārasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૩. સઙ્ખારસુત્તવણ્ણના • 3. Saṅkhārasuttavaṇṇanā
