| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၃. သင္ခာရသုတ္တဝဏ္ဏနာ
3. Saṅkhārasuttavaṇṇanā
၂၃. တတိယေ ဝိဝိဓေဟိ အာကာရေဟိ အာဗာဓနတော ဗ္ယာဗာဓောဝ ဗ္ယာဗဇ္ဈံ, ကာယိကံ စေတသိကဉ္စ ဒုက္ခံ။ သဟ ဗ္ယာဗဇ္ဈေန ဝတ္တတီတိ သဗ္ယာဗဇ္ဈံ။ တေနာဟ ‘‘သဒုက္ခ’’န္တိ။ စေတနာရာသိန္တိ ပုဗ္ဗစေတနာဒိရာသိံ။ စေတနံ ပုနပ္ပုနံ ပဝတ္တေန္တော ‘‘ရာသိံ ကရောတိ ပိဏ္ဍံ ကရောတီ’’တိ စ ဝုတ္တော။ သဒုက္ခန္တိ နိရန္တရဒုက္ခံ။ တေနာဟ ‘‘သာဗာဓံ နိရသ္သာဒ’’န္တိ။ အတ္ထီတိ ဥဇုကံ ဒုက္ခဝေဒနာ နတ္ထီတိ အဝတ္တဗ္ဗတ္တာ ဝုတ္တံ။ အနိဋ္ဌသဘာဝတ္တာ အနိဋ္ဌာရမ္မဏတ္တာ စ ဒုက္ခပက္ခိကာဝ သာ ဒဋ္ဌဗ္ဗာ။ န ဟိ အကုသလဝိပာကာ ဣဋ္ဌာ နာမ အတ္ထီ, ကုသလဝိပာကာ ပန ဥပေက္ခာဝေဒနာ တတ္ထ အပ္ပာဝသရာ။ အဋ္ဌကထာယံ ပန နိရယသ္သ ဒုက္ခဗဟုလတ္တာ ဒုက္ခသ္သ စ တတ္ထ ဗလဝတာယ သာ အဗ္ဗောဟာရိကဋ္ဌာနေ ဌိတာတိ ဝုတ္တံ။ ဥပမံ ကတ္ဝာ အာဟဋော ဝိသေသော ဝိယ သာမညသ္သ ယထာ အယောပိဏ္ဍိရောဟိနော ဝိယ ရူပာနန္တိ။ ပဋိဘာဂဥပမာတိ ပဋိဗိမ္ဗဥပမာ။
23. Tatiye vividhehi ākārehi ābādhanato byābādhova byābajjhaṃ, kāyikaṃ cetasikañca dukkhaṃ. Saha byābajjhena vattatīti sabyābajjhaṃ. Tenāha ‘‘sadukkha’’nti. Cetanārāsinti pubbacetanādirāsiṃ. Cetanaṃ punappunaṃ pavattento ‘‘rāsiṃ karoti piṇḍaṃ karotī’’ti ca vutto. Sadukkhanti nirantaradukkhaṃ. Tenāha ‘‘sābādhaṃ nirassāda’’nti. Atthīti ujukaṃ dukkhavedanā natthīti avattabbattā vuttaṃ. Aniṭṭhasabhāvattā aniṭṭhārammaṇattā ca dukkhapakkhikāva sā daṭṭhabbā. Na hi akusalavipākā iṭṭhā nāma atthī, kusalavipākā pana upekkhāvedanā tattha appāvasarā. Aṭṭhakathāyaṃ pana nirayassa dukkhabahulattā dukkhassa ca tattha balavatāya sā abbohārikaṭṭhāne ṭhitāti vuttaṃ. Upamaṃ katvā āhaṭo viseso viya sāmaññassa yathā ayopiṇḍirohino viya rūpānanti. Paṭibhāgaupamāti paṭibimbaupamā.
တေ အဂ္ဂဟေတ္ဝာတိ ဟေဋ္ဌိမဗ္ရဟ္မလောကေ အဂ္ဂဟေတ္ဝာ။ ဝောမိသ္သကသုခဒုက္ခန္တိ ဝိမိသ္သကသုခဒုက္ခံ ပီတိမိသ္သကဘာဝတော။ ကမ္မန္တိ ပာပကမ္မံ။ ကမ္မသီသေန ဖလံ ဝဒတိ။ ကာမဉ္စေတ္ထ ‘‘အဗ္ယာဗဇ္ဈံ လောကံ ဥပပဇ္ဇတီ’’တိ အာဂတံ, ‘‘အဗ္ယာဗဇ္ဈာ ဖသ္သာ ဖုသန္တီ’’တိ ပန ဝစနေန လောကုတ္တရဖသ္သာပိ သင္ဂယ္ဟန္တီတိ ‘‘တီဏိ သုစရိတာနိ လောကိယလောကုတ္တရမိသ္သကာနိ ကထိတာနီ’’တိ ဝုတ္တံ။
Te aggahetvāti heṭṭhimabrahmaloke aggahetvā. Vomissakasukhadukkhanti vimissakasukhadukkhaṃ pītimissakabhāvato. Kammanti pāpakammaṃ. Kammasīsena phalaṃ vadati. Kāmañcettha ‘‘abyābajjhaṃ lokaṃ upapajjatī’’ti āgataṃ, ‘‘abyābajjhā phassā phusantī’’ti pana vacanena lokuttaraphassāpi saṅgayhantīti ‘‘tīṇi sucaritāni lokiyalokuttaramissakāni kathitānī’’ti vuttaṃ.
သင္ခာရသုတ္တဝဏ္ဏနာ နိဋ္ဌိတာ။
Saṅkhārasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. သင္ခာရသုတ္တံ • 3. Saṅkhārasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. သင္ခာရသုတ္တဝဏ္ဏနာ • 3. Saṅkhārasuttavaṇṇanā
