| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
6. сан̇каараяамагам̣
6. Saṅkhārayamakaṃ
1. бан̣н̣ад̇д̇иваараван̣н̣анаа
1. Paṇṇattivāravaṇṇanā
1. ид̣̇аани д̇зсан̃н̃зва муулаяамагз д̣̇зсид̇аанам̣ гусалаад̣̇ид̇хаммаанам̣ лаб̣бхамаанавасзна згад̣̇зсам̣ сан̇г̇ан̣хид̇ваа сажжаяамагаананд̇арам̣ д̣̇зсид̇асса сан̇каараяамагасса ван̣н̣анаа ход̇и. д̇ад̇т̇ааби хздтаа вуд̇д̇анаязнзва бан̣н̣ад̇д̇иваараад̣̇аяо д̇аяо махааваараа, анд̇араваараад̣̇аяо жа авасзсабабхзд̣̇аа взд̣̇ид̇аб̣б̣аа. аяам̣ банзд̇т̇а висзсо – бан̣н̣ад̇д̇иваарз д̇аава яат̇аа хздтаа канд̇хаад̣̇аяо д̇хаммз уд̣̇д̣̇исид̇ваа ‘‘руубам̣ руубагканд̇хо; жагку жагкааяад̇анам̣; жагку жагкуд̇хаад̇у; д̣̇угкам̣ д̣̇угкасажжа’’нд̇и бад̣̇асод̇ханавааро аарад̣̇д̇хо. д̇ат̇аа анаарабхид̇ваа ‘‘ассаасабассаасаа гааяасан̇кааро’’д̇и батамам̣ д̇аяоби сан̇каараа вибхаж̇ид̇ваа д̣̇ассид̇аа.
1. Idāni tesaññeva mūlayamake desitānaṃ kusalādidhammānaṃ labbhamānavasena ekadesaṃ saṅgaṇhitvā saccayamakānantaraṃ desitassa saṅkhārayamakassa vaṇṇanā hoti. Tatthāpi heṭṭhā vuttanayeneva paṇṇattivārādayo tayo mahāvārā, antaravārādayo ca avasesapabhedā veditabbā. Ayaṃ panettha viseso – paṇṇattivāre tāva yathā heṭṭhā khandhādayo dhamme uddisitvā ‘‘rūpaṃ rūpakkhandho; cakkhu cakkhāyatanaṃ; cakkhu cakkhudhātu; dukkhaṃ dukkhasacca’’nti padasodhanavāro āraddho. Tathā anārabhitvā ‘‘assāsapassāsā kāyasaṅkhāro’’ti paṭhamaṃ tayopi saṅkhārā vibhajitvā dassitā.
д̇ад̇т̇а гааяасса сан̇кааро гааяасан̇кааро. ‘‘ассаасабассаасаа гааяигаа, зд̇з д̇хаммаа гааяаббадиб̣ад̣̇д̇хаа’’д̇и (ма. ни. 1.463; сам̣. ни. 4.348 ад̇т̇ад̇о самаанам̣) хи важанад̇о гааран̣абхууд̇асса гараж̇агааяасса палабхууд̇о зва сан̇каарод̇и гааяасан̇кааро. абаро наяо – сан̇карияад̇ийд̇и сан̇кааро. гзна сан̇карияад̇ийд̇и? гааязна. аяан̃хи ваад̇о вияа бхасд̇ааяа гараж̇агааязна сан̇карияад̇ийд̇и. звамби гааяасса сан̇каарод̇и гааяасан̇кааро. гааязна гад̇о ассаасабассаасаваад̇од̇и ад̇т̇о. ‘‘буб̣б̣зва ко, аавусо висаака, вид̇аггзд̇ваа вижаарзд̇ваа бажчаа ваажам̣ бхинд̣̇ад̇и, д̇асмаа вид̇аггавижаараа важийсан̇кааро’’д̇и (ма. ни. 1.463; сам̣. ни. 4.348) важанад̇о бана сан̇карод̇ийд̇и сан̇кааро. гим̣ сан̇карод̇и? важим̣. важияаа сан̇каарод̇и важийсан̇кааро. важийбхзд̣̇асамудтаабагасса вид̇аггавижаарад̣̇ваяассзд̇ам̣ наамам̣. ‘‘сан̃н̃аа жа взд̣̇анаа жа жзд̇асигаа зд̇з д̇хаммаа жид̇д̇абадиб̣ад̣̇д̇хаа’’д̇и (ма. ни. 1.463; сам̣. ни. 4.348) важанад̇оязва бана д̇ад̇ияабад̣̇зби сан̇карияад̇ийд̇и сан̇кааро. гзна сан̇карияад̇и? жид̇д̇зна. гаран̣ад̇т̇з саамиважанам̣ гад̇ваа жид̇д̇асса сан̇каарод̇и жид̇д̇асан̇кааро. саб̣б̣зсамби жид̇д̇асамудтаанаанам̣ жзд̇асигад̇хаммаанамзд̇ам̣ ад̇хиважанам̣. вид̇аггавижаараанам̣ бана важийсан̇каарабхаавзна висум̣ г̇ахид̇ад̇д̇аа ‘‘табзд̇ваа вид̇аггавижаарз’’д̇и вуд̇д̇ам̣.
Tattha kāyassa saṅkhāro kāyasaṅkhāro. ‘‘Assāsapassāsā kāyikā, ete dhammā kāyappaṭibaddhā’’ti (ma. ni. 1.463; saṃ. ni. 4.348 atthato samānaṃ) hi vacanato kāraṇabhūtassa karajakāyassa phalabhūto eva saṅkhāroti kāyasaṅkhāro. Aparo nayo – saṅkhariyatīti saṅkhāro. Kena saṅkhariyatīti? Kāyena. Ayañhi vāto viya bhastāya karajakāyena saṅkhariyatīti. Evampi kāyassa saṅkhāroti kāyasaṅkhāro. Kāyena kato assāsapassāsavātoti attho. ‘‘Pubbeva kho, āvuso visākha, vitakketvā vicāretvā pacchā vācaṃ bhindati, tasmā vitakkavicārā vacīsaṅkhāro’’ti (ma. ni. 1.463; saṃ. ni. 4.348) vacanato pana saṅkharotīti saṅkhāro. Kiṃ saṅkharoti? Vaciṃ. Vaciyā saṅkhāroti vacīsaṅkhāro. Vacībhedasamuṭṭhāpakassa vitakkavicāradvayassetaṃ nāmaṃ. ‘‘Saññā ca vedanā ca cetasikā ete dhammā cittapaṭibaddhā’’ti (ma. ni. 1.463; saṃ. ni. 4.348) vacanatoyeva pana tatiyapadepi saṅkhariyatīti saṅkhāro. Kena saṅkhariyati? Cittena. Karaṇatthe sāmivacanaṃ katvā cittassa saṅkhāroti cittasaṅkhāro. Sabbesampi cittasamuṭṭhānānaṃ cetasikadhammānametaṃ adhivacanaṃ. Vitakkavicārānaṃ pana vacīsaṅkhārabhāvena visuṃ gahitattā ‘‘ṭhapetvā vitakkavicāre’’ti vuttaṃ.
2-7. ид̣̇аани гааяо гааяасан̇каарод̇и бад̣̇асод̇ханавааро аарад̣̇д̇хо. д̇асса ануломанаяз д̇ийн̣и, бадиломанаяз д̇ийн̣ийд̇и ча яамагаани. бад̣̇асод̇ханамуулажаггаваарз згзгасан̇каарамуулагаани д̣̇вз д̣̇вз гад̇ваа ануломанаяз ча, бадиломанаяз чаад̇и д̣̇ваад̣̇аса яамагаани. суд̣̇д̇хасан̇каараваарз бана яат̇аа суд̣̇д̇хаканд̇хаваараад̣̇ийсу ‘‘руубам̣ канд̇хо, канд̇хаа руубам̣; жагку ааяад̇анам̣, ааяад̇анаа жагкуу’’д̇иаад̣̇инаа наязна яамагаани вуд̇д̇аани. звам̣ ‘‘гааяо сан̇кааро, сан̇каараа гааяо’’д̇и авад̇ваа ‘‘гааяасан̇кааро важийсан̇кааро, важийсан̇кааро гааяасан̇кааро’’д̇иаад̣̇инаа наязна гааяасан̇каарамуулагаани д̣̇вз, важийсан̇каарамуулагам̣ зганд̇и ануломз д̇ийн̣и, бадиломз д̇ийн̣ийд̇и саб̣б̣ааниби суд̣̇д̇хигаваарз ча яамагаани вуд̇д̇аани. гим̣ гааран̣аа? суд̣̇д̇хигазгзгабад̣̇авасзна ад̇т̇аабхаавад̇о. яат̇аа хи канд̇хаяамагаад̣̇ийсу руубаад̣̇ивисидтаанам̣ канд̇хаанам̣ жагкаад̣̇ивисидтаанан̃жа ааяад̇анаад̣̇ийнам̣ ад̇хиббзд̇ад̇д̇аа ‘‘руубам̣ канд̇хо , канд̇хаа руубам̣, жагку ааяад̇анам̣, ааяад̇анаа жагкуу’’д̇и суд̣̇д̇хигазгзгабад̣̇авасзна ад̇т̇о ад̇т̇и. звамид̇ха ‘‘гааяо сан̇кааро, сан̇каараа гааяо’’д̇и над̇т̇и. гааяасан̇каарод̇и бана д̣̇вийхиби бад̣̇зхи згова ад̇т̇о лаб̣бхад̇и. ассаасо ваа бассаасо ваад̇и суд̣̇д̇хигазгзгабад̣̇авасзна ад̇т̇аабхаавад̇о ‘‘гааяо сан̇кааро, сан̇каараа гааяо’’д̇и на вуд̇д̇ам̣. ‘‘гааяо гааяасан̇кааро’’д̇иаад̣̇и бана вад̇д̇аб̣б̣ам̣ сияаа. д̇амби гааяаважийжид̇д̇абад̣̇зхи ид̇ха ад̇хиббзд̇аанам̣ сан̇каараанам̣ аг̇г̇ахид̇ад̇д̇аа на яуж̇ж̇ад̇и. суд̣̇д̇хасан̇кааравааро хзса. бад̣̇асод̇ханз бана винааби ад̇т̇зна важанам̣ яуж̇ж̇ад̇ийд̇и д̇ад̇т̇а со наяо г̇ахид̇ова. ид̇ха бана гааяасан̇каарасса важийсан̇каараад̣̇ийхи, важийсан̇каарасса жа жид̇д̇асан̇каараад̣̇ийхи, жид̇д̇асан̇каарасса жа гааяасан̇каараад̣̇ийхи, ан̃н̃ад̇д̇аа ‘‘гааяасан̇кааро важийсан̇кааро, важийсан̇кааро, гааяасан̇кааро’’д̇и згзгасан̇каарамуулагаани д̣̇вз д̣̇вз гад̇ваа ча яамагаани яуж̇ж̇анд̇и. д̇зсу аг̇г̇ахид̇аг̇г̇ахан̣зна д̇ийн̣зва лаб̣бханд̇и. д̇асмаа д̇аанзва д̣̇ассзд̇ум̣ ануломанаяз д̇ийн̣и, бадиломанаяз д̇ийн̣ийд̇и ча яамагаани вуд̇д̇аани. суд̣̇д̇хасан̇каарамуулажаггавааро банзд̇т̇а на г̇ахид̇од̇и. звам̣ бан̣н̣ад̇д̇иваарасса уд̣̇д̣̇зсавааро взд̣̇ид̇аб̣б̣о.
2-7. Idāni kāyo kāyasaṅkhāroti padasodhanavāro āraddho. Tassa anulomanaye tīṇi, paṭilomanaye tīṇīti cha yamakāni. Padasodhanamūlacakkavāre ekekasaṅkhāramūlakāni dve dve katvā anulomanaye cha, paṭilomanaye chāti dvādasa yamakāni. Suddhasaṅkhāravāre pana yathā suddhakhandhavārādīsu ‘‘rūpaṃ khandho, khandhā rūpaṃ; cakkhu āyatanaṃ, āyatanā cakkhū’’tiādinā nayena yamakāni vuttāni. Evaṃ ‘‘kāyo saṅkhāro, saṅkhārā kāyo’’ti avatvā ‘‘kāyasaṅkhāro vacīsaṅkhāro, vacīsaṅkhāro kāyasaṅkhāro’’tiādinā nayena kāyasaṅkhāramūlakāni dve, vacīsaṅkhāramūlakaṃ ekanti anulome tīṇi, paṭilome tīṇīti sabbānipi suddhikavāre cha yamakāni vuttāni. Kiṃ kāraṇā? Suddhikaekekapadavasena atthābhāvato. Yathā hi khandhayamakādīsu rūpādivisiṭṭhānaṃ khandhānaṃ cakkhādivisiṭṭhānañca āyatanādīnaṃ adhippetattā ‘‘rūpaṃ khandho , khandhā rūpaṃ, cakkhu āyatanaṃ, āyatanā cakkhū’’ti suddhikaekekapadavasena attho atthi. Evamidha ‘‘kāyo saṅkhāro, saṅkhārā kāyo’’ti natthi. Kāyasaṅkhāroti pana dvīhipi padehi ekova attho labbhati. Assāso vā passāso vāti suddhikaekekapadavasena atthābhāvato ‘‘kāyo saṅkhāro, saṅkhārā kāyo’’ti na vuttaṃ. ‘‘Kāyo kāyasaṅkhāro’’tiādi pana vattabbaṃ siyā. Tampi kāyavacīcittapadehi idha adhippetānaṃ saṅkhārānaṃ aggahitattā na yujjati. Suddhasaṅkhāravāro hesa. Padasodhane pana vināpi atthena vacanaṃ yujjatīti tattha so nayo gahitova. Idha pana kāyasaṅkhārassa vacīsaṅkhārādīhi, vacīsaṅkhārassa ca cittasaṅkhārādīhi, cittasaṅkhārassa ca kāyasaṅkhārādīhi, aññattā ‘‘kāyasaṅkhāro vacīsaṅkhāro, vacīsaṅkhāro, kāyasaṅkhāro’’ti ekekasaṅkhāramūlakāni dve dve katvā cha yamakāni yujjanti. Tesu aggahitaggahaṇena tīṇeva labbhanti. Tasmā tāneva dassetuṃ anulomanaye tīṇi, paṭilomanaye tīṇīti cha yamakāni vuttāni. Suddhasaṅkhāramūlacakkavāro panettha na gahitoti. Evaṃ paṇṇattivārassa uddesavāro veditabbo.
8-18. нид̣̇д̣̇зсаваарз банасса ануломз д̇аава яасмаа на гааяаад̣̇аяова гааяасан̇каараад̣̇ийнам̣ наамам̣, д̇асмаа нод̇и бадисзд̇хо гад̇о. бадиломз на гааяо на гааяасан̇каарод̇и яо на гааяо со гааяасан̇каароби на ход̇ийд̇и бужчад̇и. гааяасан̇кааро на гааяо гааяасан̇каарод̇и гааяасан̇кааро гааяо на ход̇и, гааяасан̇каароязва банзсод̇и ад̇т̇о. авасзсанд̇и на гзвалам̣ сзсасан̇каарад̣̇ваяамзва. гааяасан̇кааравинимуд̇д̇ам̣ бана сзсам̣ саб̣б̣амби сан̇кад̇аасан̇кад̇абан̣н̣ад̇д̇ибхзд̣̇ам̣ д̇хаммаж̇аад̇ам̣ нзва гааяо, на гааяасан̇каарод̇и иминаа убааязна саб̣б̣ависсаж̇ж̇анзсу ад̇т̇о взд̣̇ид̇аб̣б̣од̇и.
8-18. Niddesavāre panassa anulome tāva yasmā na kāyādayova kāyasaṅkhārādīnaṃ nāmaṃ, tasmā noti paṭisedho kato. Paṭilome na kāyo na kāyasaṅkhāroti yo na kāyo so kāyasaṅkhāropi na hotīti pucchati. Kāyasaṅkhāro na kāyo kāyasaṅkhāroti kāyasaṅkhāro kāyo na hoti, kāyasaṅkhāroyeva panesoti attho. Avasesanti na kevalaṃ sesasaṅkhāradvayameva. Kāyasaṅkhāravinimuttaṃ pana sesaṃ sabbampi saṅkhatāsaṅkhatapaṇṇattibhedaṃ dhammajātaṃ neva kāyo, na kāyasaṅkhāroti iminā upāyena sabbavissajjanesu attho veditabboti.
бан̣н̣ад̇д̇иваараван̣н̣анаа.
Paṇṇattivāravaṇṇanā.
2. бавад̇д̇иваараван̣н̣анаа
2. Pavattivāravaṇṇanā
19. бавад̇д̇иваарз банзд̇т̇а бажжуббаннагаалз буг̇г̇алаваарасса ануломанаяз ‘‘яасса гааяасан̇кааро уббаж̇ж̇ад̇и, д̇асса важийсан̇кааро уббаж̇ж̇ад̇ий’’д̇и гааяасан̇каарамуулагаани д̣̇вз, важийсан̇каарамуулагам̣ зганд̇и д̇ийн̣зва яамагаани лаб̣бханд̇и; д̇аани г̇ахид̇аанзва. д̇асса бадиломанаязби огаасаваараад̣̇ийсуби зсзва наяо. звамзд̇т̇а саб̣б̣аваарзсу д̇ин̣н̣ам̣ д̇ин̣н̣ам̣ яамагаанам̣ васзна яамагаг̇ан̣анаа взд̣̇ид̇аб̣б̣аа.
19. Pavattivāre panettha paccuppannakāle puggalavārassa anulomanaye ‘‘yassa kāyasaṅkhāro uppajjati, tassa vacīsaṅkhāro uppajjatī’’ti kāyasaṅkhāramūlakāni dve, vacīsaṅkhāramūlakaṃ ekanti tīṇeva yamakāni labbhanti; tāni gahitāneva. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā.
ад̇т̇авинижчаяз банзд̇т̇а ид̣̇ам̣ лагкан̣ам̣ – имасмин̃хи сан̇каараяамагз ‘‘ассаасабассаасаанам̣ уббаад̣̇агкан̣з вид̇аггавижаараанам̣ уббаад̣̇агкан̣з’’д̇иаад̣̇иважанад̇о бажжуббаннаад̣̇игаалабхзд̣̇о бавад̇д̇ивасзнааби г̇ахзд̇аб̣б̣о, на жуд̇ибадисанд̇хивасзнзва. ‘‘д̣̇уд̇ияаж̇жхаанз д̇ад̇ияаж̇жхаанз д̇ад̇т̇а гааяасан̇кааро уббаж̇ж̇ад̇ий’’д̇иаад̣̇иважанад̇о жа жхаанамби огаасавасзна г̇ахид̇анд̇и взд̣̇ид̇аб̣б̣ам̣. звамзд̇т̇а яам̣ яам̣ лаб̣бхад̇и, д̇асса д̇асса васзна ад̇т̇авинижчаяо взд̣̇ид̇аб̣б̣о.
Atthavinicchaye panettha idaṃ lakkhaṇaṃ – imasmiñhi saṅkhārayamake ‘‘assāsapassāsānaṃ uppādakkhaṇe vitakkavicārānaṃ uppādakkhaṇe’’tiādivacanato paccuppannādikālabhedo pavattivasenāpi gahetabbo, na cutipaṭisandhivaseneva. ‘‘Dutiyajjhāne tatiyajjhāne tattha kāyasaṅkhāro uppajjatī’’tiādivacanato ca jhānampi okāsavasena gahitanti veditabbaṃ. Evamettha yaṃ yaṃ labbhati, tassa tassa vasena atthavinicchayo veditabbo.
д̇ад̇рид̣̇ам̣ наяамукам̣ – винаа вид̇аггавижаарзхийд̇и д̣̇уд̇ияад̇ад̇ияаж̇жхаанавасзна вуд̇д̇ам̣. д̇зсанд̇и д̇зсам̣ д̣̇уд̇ияад̇ад̇ияаж̇жхаанасаман̇г̇ийнам̣. гаамааважараананд̇и гаамааважарз уббаннасад̇д̇аанам̣. руубааважарад̣̇зваанам̣ бана ассаасабассаасаа над̇т̇и. аруубааважараанам̣ руубамзва над̇т̇и. винаа ассаасабассаасзхийд̇и руубааруубабхавзсу ниб̣б̣ад̇д̇асад̇д̇аанам̣ вид̇аггавижааруббад̇д̇им̣ санд̇хааяа вуд̇д̇ам̣.
Tatridaṃ nayamukhaṃ – vinā vitakkavicārehīti dutiyatatiyajjhānavasena vuttaṃ. Tesanti tesaṃ dutiyatatiyajjhānasamaṅgīnaṃ. Kāmāvacarānanti kāmāvacare uppannasattānaṃ. Rūpāvacaradevānaṃ pana assāsapassāsā natthi. Arūpāvacarānaṃ rūpameva natthi. Vinā assāsapassāsehīti rūpārūpabhavesu nibbattasattānaṃ vitakkavicāruppattiṃ sandhāya vuttaṃ.
21. батамаж̇жхаанз гаамааважарзд̇и гаамааважарабхуумияам̣ уббаннз батамаж̇жхаанз. ан̇г̇амад̇д̇авасзна жзд̇т̇а батамаж̇жхаанам̣ г̇ахзд̇аб̣б̣ам̣, на аббанаавасзнзва. анаббанаабад̇д̇зби хи савид̇аггасавижааражид̇д̇з ид̣̇ам̣ сан̇каарад̣̇ваяам̣ уббаж̇ж̇ад̇зва.
21. Paṭhamajjhāne kāmāvacareti kāmāvacarabhūmiyaṃ uppanne paṭhamajjhāne. Aṅgamattavasena cettha paṭhamajjhānaṃ gahetabbaṃ, na appanāvaseneva. Anappanāpattepi hi savitakkasavicāracitte idaṃ saṅkhāradvayaṃ uppajjateva.
24. жид̇д̇асса бхан̇г̇агкан̣зд̇и ид̣̇ам̣ гааяасан̇каарасса зганд̇ажид̇д̇асамудтаанад̇д̇аа вуд̇д̇ам̣. уббаж̇ж̇амаанамзва хи жид̇д̇ам̣ руубам̣ ваа аруубам̣ ваа самудтаабзд̇и, на бхиж̇ж̇амаанам̣.
24. Cittassabhaṅgakkhaṇeti idaṃ kāyasaṅkhārassa ekantacittasamuṭṭhānattā vuttaṃ. Uppajjamānameva hi cittaṃ rūpaṃ vā arūpaṃ vā samuṭṭhāpeti, na bhijjamānaṃ.
37. суд̣̇д̇хааваасаанам̣ д̣̇уд̇ияз жид̇д̇з вад̇д̇амаанзд̇и бадисанд̇хид̇о д̣̇уд̇ияз бхаван̇г̇ажид̇д̇з. гааман̃жзд̇ам̣ бадисанд̇хижид̇д̇зби вад̇д̇амаанз д̇зсам̣ д̇ад̇т̇а нуббаж̇ж̇ид̇т̇зва. яаава бана аб̣б̣огин̣н̣ам̣ вибаагажид̇д̇ам̣ вад̇д̇ад̇и, д̇аава нуббаж̇ж̇ид̇т̇зва наамаад̇и д̣̇ассанад̇т̇амзд̇ам̣ вуд̇д̇ам̣. яасса ваа жхаанасса вибаагажид̇д̇зна д̇з ниб̣б̣ад̇д̇аа, д̇ам̣ сад̇асоби сахассасоби уббаж̇ж̇амаанам̣ батамажид̇д̇амзва. вибаагажид̇д̇зна бана висад̣̇исам̣ бхаваниганд̇ияаа ааваж̇ж̇анажид̇д̇ам̣ д̣̇уд̇ияажид̇д̇ам̣ наама. д̇ам̣ санд̇хааязд̇ам̣ вуд̇д̇анд̇и взд̣̇ид̇аб̣б̣ам̣.
37. Suddhāvāsānaṃ dutiye citte vattamāneti paṭisandhito dutiye bhavaṅgacitte. Kāmañcetaṃ paṭisandhicittepi vattamāne tesaṃ tattha nuppajjittheva. Yāva pana abbokiṇṇaṃ vipākacittaṃ vattati, tāva nuppajjittheva nāmāti dassanatthametaṃ vuttaṃ. Yassa vā jhānassa vipākacittena te nibbattā, taṃ satasopi sahassasopi uppajjamānaṃ paṭhamacittameva. Vipākacittena pana visadisaṃ bhavanikantiyā āvajjanacittaṃ dutiyacittaṃ nāma. Taṃ sandhāyetaṃ vuttanti veditabbaṃ.
44. бажчимажид̇д̇асаман̇г̇ийнанд̇и саб̣б̣абажчимзна аббадисанд̇хигажид̇д̇зна саман̇г̇ийбхууд̇аанам̣ кийн̣аасаваанам̣. авид̇аггаавижаарам̣ бажчимажид̇д̇анд̇и руубааважараанам̣ д̣̇уд̇ияаж̇жхаанигаад̣̇ижуд̇ижид̇д̇авасзна, аруубааважараанан̃жа жад̇уд̇т̇аж̇жхаанигажуд̇ижид̇д̇авасзнзд̇ам̣ вуд̇д̇ам̣. д̇зсанд̇и д̇зсам̣ бажчимажид̇д̇асаман̇г̇ийаад̣̇ийнам̣.
44. Pacchimacittasamaṅgīnanti sabbapacchimena appaṭisandhikacittena samaṅgībhūtānaṃ khīṇāsavānaṃ. Avitakkaavicāraṃ pacchimacittanti rūpāvacarānaṃ dutiyajjhānikādicuticittavasena, arūpāvacarānañca catutthajjhānikacuticittavasenetaṃ vuttaṃ. Tesanti tesaṃ pacchimacittasamaṅgīādīnaṃ.
79. яасса гааяасан̇кааро нируж̇жхад̇и, д̇асса жид̇д̇асан̇кааро нируж̇жхад̇ийд̇и зд̇т̇а нияамад̇о гааяасан̇каарасса жид̇д̇асан̇каарзна сад̣̇д̇хим̣ згагкан̣з нируж̇жханад̇о ааманд̇аад̇и бадиважанам̣ д̣̇иннам̣. на жид̇д̇асан̇каарасса гааяасан̇каарзна сад̣̇д̇хим̣. гим̣ гааран̣аа? жид̇д̇асан̇кааро хи гааяасан̇каарзна винааби уббаж̇ж̇ад̇и жа нируж̇жхад̇и жа. гааяасан̇кааро бана жид̇д̇асамудтаано ассаасабассаасаваад̇о. жид̇д̇асамудтаанаруубан̃жа жид̇д̇асса уббаад̣̇агкан̣з уббаж̇ж̇ид̇ваа яаава ан̃н̃аани сол̣асажид̇д̇аани уббаж̇ж̇анд̇и, д̇аава д̇идтад̇и. д̇зсам̣ сол̣асаннам̣ саб̣б̣абажчимзна сад̣̇д̇хим̣ нируж̇жхад̇ийд̇и язна жид̇д̇зна сад̣̇д̇хим̣ уббаж̇ж̇ад̇и, д̇ад̇о бадтааяа сад̇д̇арасамзна сад̣̇д̇хим̣ нируж̇жхад̇и. на гассажи жид̇д̇асса уббаад̣̇агкан̣з ваа тид̇игкан̣з ваа нируж̇жхад̇и, нааби тид̇игкан̣з ваа бхан̇г̇агкан̣з ваа уббаж̇ж̇ад̇и. зсаа жид̇д̇асамудтаанаруубасса д̇хаммад̇аад̇и нияамад̇о жид̇д̇асан̇каарзна сад̣̇д̇хим̣ згагкан̣з нируж̇жханад̇о ааманд̇аад̇и вуд̇д̇ам̣. яам̣ бана вибхан̇г̇аббагаран̣асса сийхал̣адтагат̇ааяам̣ ‘‘жид̇д̇асамудтаанам̣ руубам̣ сад̇д̇арасамасса жид̇д̇асса уббаад̣̇агкан̣з нируж̇жхад̇ий’’д̇и вуд̇д̇ам̣, д̇ам̣ имааяа баал̣ияаа вирууж̇жхад̇и. адтагат̇аад̇о жа баал̣иязва б̣алавад̇араад̇и баал̣ияам̣ вуд̇д̇амзва бамаан̣ам̣.
79. Yassa kāyasaṅkhāro nirujjhati, tassa cittasaṅkhāro nirujjhatīti ettha niyamato kāyasaṅkhārassa cittasaṅkhārena saddhiṃ ekakkhaṇe nirujjhanato āmantāti paṭivacanaṃ dinnaṃ. Na cittasaṅkhārassa kāyasaṅkhārena saddhiṃ. Kiṃ kāraṇā? Cittasaṅkhāro hi kāyasaṅkhārena vināpi uppajjati ca nirujjhati ca. Kāyasaṅkhāro pana cittasamuṭṭhāno assāsapassāsavāto. Cittasamuṭṭhānarūpañca cittassa uppādakkhaṇe uppajjitvā yāva aññāni soḷasacittāni uppajjanti, tāva tiṭṭhati. Tesaṃ soḷasannaṃ sabbapacchimena saddhiṃ nirujjhatīti yena cittena saddhiṃ uppajjati, tato paṭṭhāya sattarasamena saddhiṃ nirujjhati. Na kassaci cittassa uppādakkhaṇe vā ṭhitikkhaṇe vā nirujjhati, nāpi ṭhitikkhaṇe vā bhaṅgakkhaṇe vā uppajjati. Esā cittasamuṭṭhānarūpassa dhammatāti niyamato cittasaṅkhārena saddhiṃ ekakkhaṇe nirujjhanato āmantāti vuttaṃ. Yaṃ pana vibhaṅgappakaraṇassa sīhaḷaṭṭhakathāyaṃ ‘‘cittasamuṭṭhānaṃ rūpaṃ sattarasamassa cittassa uppādakkhaṇe nirujjhatī’’ti vuttaṃ, taṃ imāya pāḷiyā virūjjhati. Aṭṭhakathāto ca pāḷiyeva balavatarāti pāḷiyaṃ vuttameva pamāṇaṃ.
128. яасса гааяасан̇кааро уббаж̇ж̇ад̇и, д̇асса важийсан̇кааро нируж̇жхад̇ийд̇и зд̇т̇а яасмаа гааяасан̇кааро жид̇д̇асса уббаад̣̇агкан̣з уббаж̇ж̇ад̇и, на жа д̇асмим̣ кан̣з вид̇аггавижаараа нируж̇жханд̇и, д̇асмаа нод̇и бадисзд̇хо гад̇од̇и. иминаа наяамукзна саб̣б̣ад̇т̇а ад̇т̇авинижчаяо взд̣̇ид̇аб̣б̣о. барин̃н̃аавааро баагад̇игоязваад̇и.
128. Yassa kāyasaṅkhāro uppajjati, tassa vacīsaṅkhāro nirujjhatīti ettha yasmā kāyasaṅkhāro cittassa uppādakkhaṇe uppajjati, na ca tasmiṃ khaṇe vitakkavicārā nirujjhanti, tasmā noti paṭisedho katoti. Iminā nayamukhena sabbattha atthavinicchayo veditabbo. Pariññāvāro pākatikoyevāti.
бавад̇д̇иваараван̣н̣анаа.
Pavattivāravaṇṇanā.
сан̇каараяамагаван̣н̣анаа нидтид̇аа.
Saṅkhārayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 6. сан̇каараяамагам̣ • 6. Saṅkhārayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 6. сан̇каараяамагам̣ • 6. Saṅkhārayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 6. сан̇каараяамагам̣ • 6. Saṅkhārayamakaṃ
