| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
9. ஸங்கா²ருபெக்கா²ஞாணனித்³தே³ஸோ
9. Saṅkhārupekkhāñāṇaniddeso
54. கத²ங் முஞ்சிதுகம்யதாபடிஸங்கா²ஸந்திட்ட²னா 1 பஞ்ஞா ஸங்கா²ருபெக்கா²ஸு ஞாணங்? உப்பாத³ங் முஞ்சிதுகம்யதாபடிஸங்கா²ஸந்திட்ட²னா 2 பஞ்ஞா ஸங்கா²ருபெக்கா²ஸு ஞாணங், பவத்தங் முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங், நிமித்தங் முஞ்சிதுகம்யதா…பே॰… ஆயூஹனங் முஞ்சிதுகம்யதா… படிஸந்தி⁴ங் முஞ்சிதுகம்யதா… க³திங் முஞ்சிதுகம்யதா… நிப்³ப³த்திங் முஞ்சிதுகம்யதா… உபபத்திங் முஞ்சிதுகம்யதா… ஜாதிங் முஞ்சிதுகம்யதா… ஜரங் முஞ்சிதுகம்யதா… ப்³யாதி⁴ங் முஞ்சிதுகம்யதா… மரணங் முஞ்சிதுகம்யதா… ஸோகங் முஞ்சிதுகம்யதா… பரிதே³வங் முஞ்சிதுகம்யதா…பே॰… உபாயாஸங் முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்.
54. Kathaṃ muñcitukamyatāpaṭisaṅkhāsantiṭṭhanā 3 paññā saṅkhārupekkhāsu ñāṇaṃ? Uppādaṃ muñcitukamyatāpaṭisaṅkhāsantiṭṭhanā 4 paññā saṅkhārupekkhāsu ñāṇaṃ, pavattaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ, nimittaṃ muñcitukamyatā…pe… āyūhanaṃ muñcitukamyatā… paṭisandhiṃ muñcitukamyatā… gatiṃ muñcitukamyatā… nibbattiṃ muñcitukamyatā… upapattiṃ muñcitukamyatā… jātiṃ muñcitukamyatā… jaraṃ muñcitukamyatā… byādhiṃ muñcitukamyatā… maraṇaṃ muñcitukamyatā… sokaṃ muñcitukamyatā… paridevaṃ muñcitukamyatā…pe… upāyāsaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
உப்பாதோ³ து³க்க²ந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். பவத்தங் து³க்க²ந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்…பே॰… உபாயாஸோ து³க்க²ந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்.
Uppādo dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
உப்பாதோ³ ப⁴யந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். பவத்தங் ப⁴யந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்…பே॰… உபாயாஸோ ப⁴யந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்.
Uppādo bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
உப்பாதோ³ ஸாமிஸந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். பவத்தங் ஸாமிஸந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்…பே॰… உபாயாஸோ ஸாமிஸந்தி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்.
Uppādo sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
உப்பாதோ³ ஸங்கா²ராதி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். பவத்தங் ஸங்கா²ராதி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்…பே॰… உபாயாஸோ ஸங்கா²ராதி – முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்.
Uppādo saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
உப்பாதோ³ ஸங்கா²ரா, தே ஸங்கா²ரே அஜ்ஜு²பெக்க²தீதி – ஸங்கா²ருபெக்கா². யே ச ஸங்கா²ரா யா ச உபெக்கா² உபோ⁴பேதே ஸங்கா²ரா, தே ஸங்கா²ரே அஜ்ஜு²பெக்க²தீதி – ஸங்கா²ருபெக்கா². பவத்தங் ஸங்கா²ரா…பே॰… நிமித்தங் ஸங்கா²ரா… ஆயூஹனா ஸங்கா²ரா… படிஸந்தி⁴ ஸங்கா²ரா… க³தி ஸங்கா²ரா… நிப்³ப³த்தி ஸங்கா²ரா… உபபத்தி ஸங்கா²ரா… ஜாதி ஸங்கா²ரா… ஜரா ஸங்கா²ரா… ப்³யாதி⁴ ஸங்கா²ரா… மரணங் ஸங்கா²ரா… ஸோகோ ஸங்கா²ரா… பரிதே³வோ ஸங்கா²ரா…பே॰… உபாயாஸோ ஸங்கா²ரா, தே ஸங்கா²ரே அஜ்ஜு²பெக்க²தீதி – ஸங்கா²ருபெக்கா². யே ச ஸங்கா²ரா யா ச உபெக்கா² உபோ⁴பேதே ஸங்கா²ரா, தே ஸங்கா²ரே அஜ்ஜு²பெக்க²தீதி – ஸங்கா²ருபெக்கா².
Uppādo saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā. Pavattaṃ saṅkhārā…pe… nimittaṃ saṅkhārā… āyūhanā saṅkhārā… paṭisandhi saṅkhārā… gati saṅkhārā… nibbatti saṅkhārā… upapatti saṅkhārā… jāti saṅkhārā… jarā saṅkhārā… byādhi saṅkhārā… maraṇaṃ saṅkhārā… soko saṅkhārā… paridevo saṅkhārā…pe… upāyāso saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā.
55. கதிஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? அட்ட²ஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி. புது²ஜ்ஜனஸ்ஸ கதிஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? ஸெக்க²ஸ்ஸ கதிஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? வீதராக³ஸ்ஸ கதிஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? புது²ஜ்ஜனஸ்ஸ த்³வீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி. ஸெக்க²ஸ்ஸ தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி. வீதராக³ஸ்ஸ தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி.
55. Katihākārehi saṅkhārupekkhāya cittassa abhinīhāro hoti? Aṭṭhahākārehi saṅkhārupekkhāya cittassa abhinīhāro hoti. Puthujjanassa katihākārehi saṅkhārupekkhāya cittassa abhinīhāro hoti? Sekkhassa katihākārehi saṅkhārupekkhāya cittassa abhinīhāro hoti? Vītarāgassa katihākārehi saṅkhārupekkhāya cittassa abhinīhāro hoti? Puthujjanassa dvīhākārehi saṅkhārupekkhāya cittassa abhinīhāro hoti. Sekkhassa tīhākārehi saṅkhārupekkhāya cittassa abhinīhāro hoti. Vītarāgassa tīhākārehi saṅkhārupekkhāya cittassa abhinīhāro hoti.
புது²ஜ்ஜனஸ்ஸ கதமேஹி த்³வீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? புது²ஜ்ஜனோ ஸங்கா²ருபெக்க²ங் அபி⁴னந்த³தி வா விபஸ்ஸதி வா. புது²ஜ்ஜனஸ்ஸ இமேஹி த்³வீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி. ஸெக்க²ஸ்ஸ கதமேஹி தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? ஸெக்கோ² ஸங்கா²ருபெக்க²ங் அபி⁴னந்த³தி வா விபஸ்ஸதி வா படிஸங்கா²ய வா ப²லஸமாபத்திங் ஸமாபஜ்ஜதி. ஸெக்க²ஸ்ஸ இமேஹி தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி. வீதராக³ஸ்ஸ கதமேஹி தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி? வீதராகோ³ ஸங்கா²ருபெக்க²ங் விபஸ்ஸதி வா படிஸங்கா²ய வா ப²லஸமாபத்திங் ஸமாபஜ்ஜதி, தத³ஜ்ஜு²பெக்கி²த்வா ஸுஞ்ஞதவிஹாரேன வா அனிமித்தவிஹாரேன வா அப்பணிஹிதவிஹாரேன வா விஹரதி. வீதராக³ஸ்ஸ இமேஹி தீஹாகாரேஹி ஸங்கா²ருபெக்கா²ய சித்தஸ்ஸ அபி⁴னீஹாரோ ஹோதி.
Puthujjanassa katamehi dvīhākārehi saṅkhārupekkhāya cittassa abhinīhāro hoti? Puthujjano saṅkhārupekkhaṃ abhinandati vā vipassati vā. Puthujjanassa imehi dvīhākārehi saṅkhārupekkhāya cittassa abhinīhāro hoti. Sekkhassa katamehi tīhākārehi saṅkhārupekkhāya cittassa abhinīhāro hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Sekkhassa imehi tīhākārehi saṅkhārupekkhāya cittassa abhinīhāro hoti. Vītarāgassa katamehi tīhākārehi saṅkhārupekkhāya cittassa abhinīhāro hoti? Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Vītarāgassa imehi tīhākārehi saṅkhārupekkhāya cittassa abhinīhāro hoti.
56. கத²ங் புது²ஜ்ஜனஸ்ஸ ச ஸெக்க²ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ ஏகத்தங் ஹோதி? புது²ஜ்ஜனஸ்ஸ ஸங்கா²ருபெக்க²ங் அபி⁴னந்த³தோ சித்தங் கிலிஸ்ஸதி, பா⁴வனாய பரிபந்தோ² ஹோதி, படிவேத⁴ஸ்ஸ அந்தராயோ ஹோதி, ஆயதிங் படிஸந்தி⁴யா பச்சயோ ஹோதி. ஸெக்க²ஸ்ஸபி ஸங்கா²ருபெக்க²ங் அபி⁴னந்த³தோ சித்தங் கிலிஸ்ஸதி, பா⁴வனாய பரிபந்தோ² ஹோதி, உத்தரிபடிவேத⁴ஸ்ஸ அந்தராயோ ஹோதி, ஆயதிங் படிஸந்தி⁴யா பச்சயோ ஹோதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ ஏகத்தங் ஹோதி அபி⁴னந்த³ட்டே²ன.
56. Kathaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti? Puthujjanassa saṅkhārupekkhaṃ abhinandato cittaṃ kilissati, bhāvanāya paripantho hoti, paṭivedhassa antarāyo hoti, āyatiṃ paṭisandhiyā paccayo hoti. Sekkhassapi saṅkhārupekkhaṃ abhinandato cittaṃ kilissati, bhāvanāya paripantho hoti, uttaripaṭivedhassa antarāyo hoti, āyatiṃ paṭisandhiyā paccayo hoti. Evaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti abhinandaṭṭhena.
கத²ங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ ஏகத்தங் ஹோதி? புது²ஜ்ஜனோ ஸங்கா²ருபெக்க²ங் அனிச்சதோபி து³க்க²தோபி அனத்ததோபி விபஸ்ஸதி. ஸெக்கோ²பி ஸங்கா²ருபெக்க²ங் அனிச்சதோபி து³க்க²தோபி அனத்ததோபி விபஸ்ஸதி. வீதராகோ³பி ஸங்கா²ருபெக்க²ங் அனிச்சதோபி து³க்க²தோபி அனத்ததோபி விபஸ்ஸதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ ஏகத்தங் ஹோதி அனுபஸ்ஸனட்டே²ன.
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti? Puthujjano saṅkhārupekkhaṃ aniccatopi dukkhatopi anattatopi vipassati. Sekkhopi saṅkhārupekkhaṃ aniccatopi dukkhatopi anattatopi vipassati. Vītarāgopi saṅkhārupekkhaṃ aniccatopi dukkhatopi anattatopi vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti anupassanaṭṭhena.
கத²ங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி? புது²ஜ்ஜனஸ்ஸ ஸங்கா²ருபெக்கா² குஸலா ஹோதி. ஸெக்க²ஸ்ஸபி ஸங்கா²ருபெக்கா² குஸலா ஹோதி. வீதராக³ஸ்ஸ ஸங்கா²ருபெக்கா² அப்³யாகதா ஹோதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி குஸலாப்³யாகதட்டே²ன.
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kusalā hoti. Sekkhassapi saṅkhārupekkhā kusalā hoti. Vītarāgassa saṅkhārupekkhā abyākatā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti kusalābyākataṭṭhena.
கத²ங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி? புது²ஜ்ஜனஸ்ஸ ஸங்கா²ருபெக்கா² கிஞ்சிகாலே ஸுவிதி³தா ஹோதி, கிஞ்சிகாலே ந ஸுவிதி³தா ஹோதி. ஸெக்க²ஸ்ஸபி ஸங்கா²ருபெக்கா² கிஞ்சிகாலே ஸுவிதி³தா ஹோதி, கிஞ்சிகாலே ந ஸுவிதி³தா ஹோதி. வீதராக³ஸ்ஸ ஸங்கா²ருபெக்கா² அச்சந்தங் ஸுவிதி³தா ஹோதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி விதி³தட்டே²ன ச அவிதி³தட்டே²ன ச.
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kiñcikāle suviditā hoti, kiñcikāle na suviditā hoti. Sekkhassapi saṅkhārupekkhā kiñcikāle suviditā hoti, kiñcikāle na suviditā hoti. Vītarāgassa saṅkhārupekkhā accantaṃ suviditā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti viditaṭṭhena ca aviditaṭṭhena ca.
கத²ங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி? புது²ஜ்ஜனோ ஸங்கா²ருபெக்க²ங் அதித்தத்தா விபஸ்ஸதி. ஸெக்கோ²பி ஸங்கா²ருபெக்க²ங் அதித்தத்தா விபஸ்ஸதி. வீதராகோ³ ஸங்கா²ருபெக்க²ங் தித்தத்தா விபஸ்ஸதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி தித்தட்டே²ன ச அதித்தட்டே²ன ச.
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ atittattā vipassati. Sekkhopi saṅkhārupekkhaṃ atittattā vipassati. Vītarāgo saṅkhārupekkhaṃ tittattā vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti tittaṭṭhena ca atittaṭṭhena ca.
கத²ங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி? புது²ஜ்ஜனோ ஸங்கா²ருபெக்க²ங் திண்ணங் ஸங்யோஜனானங் பஹானாய ஸோதாபத்திமக்³க³ங் படிலாப⁴த்தா²ய விபஸ்ஸதி. ஸெக்கோ² ஸங்கா²ருபெக்க²ங் திண்ணங் ஸஞ்ஞோஜனானங் பஹீனத்தா உத்தரிபடிலாப⁴த்தா²ய விபஸ்ஸதி. வீதராகோ³ ஸங்கா²ருபெக்க²ங் ஸப்³ப³கிலேஸானங் பஹீனத்தா தி³ட்ட²த⁴ம்மஸுக²விஹாரத்தா²ய விபஸ்ஸதி. ஏவங் புது²ஜ்ஜனஸ்ஸ ச ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி பஹீனட்டே²ன ச அப்பஹீனட்டே²ன ச.
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ tiṇṇaṃ saṃyojanānaṃ pahānāya sotāpattimaggaṃ paṭilābhatthāya vipassati. Sekkho saṅkhārupekkhaṃ tiṇṇaṃ saññojanānaṃ pahīnattā uttaripaṭilābhatthāya vipassati. Vītarāgo saṅkhārupekkhaṃ sabbakilesānaṃ pahīnattā diṭṭhadhammasukhavihāratthāya vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti pahīnaṭṭhena ca appahīnaṭṭhena ca.
கத²ங் ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி? ஸெக்கோ² ஸங்கா²ருபெக்க²ங் அபி⁴னந்த³தி வா விபஸ்ஸதி வா படிஸங்கா²ய வா ப²லஸமாபத்திங் ஸமாபஜ்ஜதி. வீதராகோ³ ஸங்கா²ருபெக்க²ங் விபஸ்ஸதி வா படிஸங்கா²ய வா ப²லஸமாபத்திங் ஸமாபஜ்ஜதி, தத³ஜ்ஜு²பெக்கி²த்வா ஸுஞ்ஞதவிஹாரேன வா அனிமித்தவிஹாரேன வா அப்பணிஹிதவிஹாரேன வா விஹரதி. ஏவங் ஸெக்க²ஸ்ஸ ச வீதராக³ஸ்ஸ ச ஸங்கா²ருபெக்கா²ய சித்தஸ்ஸ அபி⁴னீஹாரோ நானத்தங் ஹோதி விஹாரஸமாபத்தட்டே²ன.
Kathaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Evaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti vihārasamāpattaṭṭhena.
57. கதி ஸங்கா²ருபெக்கா² ஸமத²வஸேன உப்பஜ்ஜந்தி? கதி ஸங்கா²ருபெக்கா² விபஸ்ஸனாவஸேன உப்பஜ்ஜந்தி? அட்ட² ஸங்கா²ருபெக்கா² ஸமத²வஸேன உப்பஜ்ஜந்தி. த³ஸ ஸங்கா²ருபெக்கா² விபஸ்ஸனாவஸேன உப்பஜ்ஜந்தி.
57. Kati saṅkhārupekkhā samathavasena uppajjanti? Kati saṅkhārupekkhā vipassanāvasena uppajjanti? Aṭṭha saṅkhārupekkhā samathavasena uppajjanti. Dasa saṅkhārupekkhā vipassanāvasena uppajjanti.
கதமா அட்ட² ஸங்கா²ருபெக்கா² ஸமத²வஸேன உப்பஜ்ஜந்தி? பட²மங் ஜா²னங் படிலாப⁴த்தா²ய நீவரணே படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். து³தியங் ஜா²னங் படிலாப⁴த்தா²ய விதக்கவிசாரே படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். ததியங் ஜா²னங் படிலாப⁴த்தா²ய பீதிங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங் . சதுத்த²ங் ஜா²னங் படிலாப⁴த்தா²ய ஸுக²து³க்கே² படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். ஆகாஸானஞ்சாயதனஸமாபத்திங் படிலாப⁴த்தா²ய ரூபஸஞ்ஞங் படிக⁴ஸஞ்ஞங் நானத்தஸஞ்ஞங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். விஞ்ஞாணஞ்சாயதனஸமாபத்திங் படிலாப⁴த்தா²ய ஆகாஸானஞ்சாயதனஸஞ்ஞங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். ஆகிஞ்சஞ்ஞாயதனஸமாபத்திங் படிலாப⁴த்தா²ய விஞ்ஞாணஞ்சாயதனஸஞ்ஞங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். நேவஸஞ்ஞானாஸஞ்ஞாயதனஸமாபத்திங் படிலாப⁴த்தா²ய ஆகிஞ்சஞ்ஞாயதனஸஞ்ஞங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். இமா அட்ட² ஸங்கா²ருபெக்கா² ஸமத²வஸேன உப்பஜ்ஜந்தி.
Katamā aṭṭha saṅkhārupekkhā samathavasena uppajjanti? Paṭhamaṃ jhānaṃ paṭilābhatthāya nīvaraṇe paṭisaṅkhāsantiṭṭhanā paññā saṅkhārupekkhāsu ñāṇaṃ. Dutiyaṃ jhānaṃ paṭilābhatthāya vitakkavicāre paṭisaṅkhāsantiṭṭhanā paññā saṅkhārupekkhāsu ñāṇaṃ. Tatiyaṃ jhānaṃ paṭilābhatthāya pītiṃ paṭisaṅkhāsantiṭṭhanā paññā saṅkhārupekkhāsu ñāṇaṃ . Catutthaṃ jhānaṃ paṭilābhatthāya sukhadukkhe paṭisaṅkhāsantiṭṭhanā paññā saṅkhārupekkhāsu ñāṇaṃ. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Imā aṭṭha saṅkhārupekkhā samathavasena uppajjanti.
கதமா த³ஸ ஸங்கா²ருபெக்கா² விபஸ்ஸனாவஸேன உப்பஜ்ஜந்தி? ஸோதாபத்திமக்³க³ங் படிலாப⁴த்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். ஸோதாபத்திப²லஸமாபத்தத்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங்…பே॰… படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். ஸகதா³கா³மிமக்³க³ங் படிலாப⁴த்தா²ய…பே॰… ஸகதா³கா³மிப²லஸமாபத்தத்தா²ய…பே॰… அனாகா³மிமக்³க³ங் படிலாப⁴த்தா²ய…பே॰… அனாகா³மிப²லஸமாபத்தத்தா²ய …பே॰… அரஹத்தமக்³க³ங் படிலாப⁴த்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங் படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். அரஹத்தப²லஸமாபத்தத்தா²ய…பே॰… ஸுஞ்ஞதவிஹாரஸமாபத்தத்தா²ய…பே॰… அனிமித்தவிஹாரஸமாபத்தத்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங்…பே॰… படிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங். இமா த³ஸ ஸங்கா²ருபெக்கா² விபஸ்ஸனாவஸேன உப்பஜ்ஜந்தி.
Katamā dasa saṅkhārupekkhā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Sakadāgāmimaggaṃ paṭilābhatthāya…pe… sakadāgāmiphalasamāpattatthāya…pe… anāgāmimaggaṃ paṭilābhatthāya…pe… anāgāmiphalasamāpattatthāya …pe… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Arahattaphalasamāpattatthāya…pe… suññatavihārasamāpattatthāya…pe… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Imā dasa saṅkhārupekkhā vipassanāvasena uppajjanti.
58. கதி ஸங்கா²ருபெக்கா² குஸலா, கதி அகுஸலா, கதி அப்³யாகதா? பன்னரஸ ஸங்கா²ருபெக்கா² குஸலா, திஸ்ஸோ ஸங்கா²ருபெக்கா² அப்³யாகதா. நத்தி² ஸங்கா²ருபெக்கா² அகுஸலா.
58. Kati saṅkhārupekkhā kusalā, kati akusalā, kati abyākatā? Pannarasa saṅkhārupekkhā kusalā, tisso saṅkhārupekkhā abyākatā. Natthi saṅkhārupekkhā akusalā.
படிஸங்கா²ஸந்திட்ட²னா பஞ்ஞா, அட்ட² சித்தஸ்ஸ கோ³சரா;
Paṭisaṅkhāsantiṭṭhanā paññā, aṭṭha cittassa gocarā;
புது²ஜ்ஜனஸ்ஸ த்³வே ஹொந்தி, தயோ ஸெக்க²ஸ்ஸ கோ³சரா;
Puthujjanassa dve honti, tayo sekkhassa gocarā;
தயோ ச வீதராக³ஸ்ஸ, யேஹி சித்தங் விவட்டதி.
Tayo ca vītarāgassa, yehi cittaṃ vivaṭṭati.
அட்ட² ஸமாதி⁴ஸ்ஸ பச்சயா, த³ஸ ஞாணஸ்ஸ கோ³சரா;
Aṭṭha samādhissa paccayā, dasa ñāṇassa gocarā;
அட்டா²ரஸ ஸங்கா²ருபெக்கா², திண்ணங் விமொக்கா²ன பச்சயா.
Aṭṭhārasa saṅkhārupekkhā, tiṇṇaṃ vimokkhāna paccayā.
இமே அட்டா²ரஸாகாரா, பஞ்ஞா யஸ்ஸ பரிச்சிதா;
Ime aṭṭhārasākārā, paññā yassa pariccitā;
குஸலோ ஸங்கா²ருபெக்கா²ஸு, நானாதி³ட்டீ²ஸு ந கம்பதீதி.
Kusalo saṅkhārupekkhāsu, nānādiṭṭhīsu na kampatīti.
தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘முஞ்சிதுகம்யதாபடிஸங்கா²ஸந்திட்ட²னா பஞ்ஞா ஸங்கா²ருபெக்கா²ஸு ஞாணங்’’.
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ’’.
ஸங்கா²ருபெக்கா²ஞாணனித்³தே³ஸோ நவமோ.
Saṅkhārupekkhāñāṇaniddeso navamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 9. ஸங்கா²ருபெக்கா²ஞாணனித்³தே³ஸவண்ணனா • 9. Saṅkhārupekkhāñāṇaniddesavaṇṇanā
