| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5-22. ஸங்கிலிட்ட²த்திகாதி³வண்ணனா
5-22. Saṅkiliṭṭhattikādivaṇṇanā
ஸங்கிலிட்ட²ஸங்கிலேஸிகத்திகே ஸப்³ப³ங் குஸலத்திகே வுத்தனயானுஸாரேனேவ வேதி³தப்³ப³ங்.
Saṅkiliṭṭhasaṅkilesikattike sabbaṃ kusalattike vuttanayānusāreneva veditabbaṃ.
79. விதக்கத்திகே யதா²கம்மூபக³ஞாணஸ்ஸ பரிகம்மந்தி தி³ப்³ப³சக்கு²பரிகம்மமேவ தஸ்ஸ உப்பாத³னத்தா²ய பரிகம்மங். உப்பன்னஸ்ஸ பன வளஞ்ஜனகாலே பரிகம்மங் ஸந்தா⁴யேதங் வுத்தங். ஸேஸமெத்த² யதா²பாளிமேவ நிய்யாதி.
79. Vitakkattike yathākammūpagañāṇassa parikammanti dibbacakkhuparikammameva tassa uppādanatthāya parikammaṃ. Uppannassa pana vaḷañjanakāle parikammaṃ sandhāyetaṃ vuttaṃ. Sesamettha yathāpāḷimeva niyyāti.
82. தி ததா³ரம்மணப⁴வங்க³மூலப⁴வங்கா³னங் வஸேன வுத்தங். ஸேஸமெத்த² ஸப்³ப³ங் பாளிவஸேனேவ வேதி³தப்³ப³ங்.
82. Ti tadārammaṇabhavaṅgamūlabhavaṅgānaṃ vasena vuttaṃ. Sesamettha sabbaṃ pāḷivaseneva veditabbaṃ.
த³ஸ்ஸனத்திகே த³ஸ்ஸனேன பஹாதப்³போ³ ராகோ³ உப்பஜ்ஜதீதிஆதீ³ஸு த³ஸ்ஸனேன பஹாதப்³போ³ புது²ஜ்ஜனஸ்ஸ உப்பஜ்ஜதி. பா⁴வனாய பஹாதப்³போ³ ஸோதாபன்னஸ்ஸாபீதி ஏவங் உபரிமஸ்ஸ உபரிமஸ்ஸ ஹெட்டி²மா ஹெட்டி²மா நுப்பஜ்ஜந்தீதி வேதி³தப்³பா³. த³ஸ்ஸனேன பஹாதப்³போ³ த⁴ம்மோ பா⁴வனாய பஹாதப்³ப³ஸ்ஸ த⁴ம்மஸ்ஸ ஏகேனபி பச்சயேன பச்சயோ ந ஹோதி. ஸேஸமெத்த² பாளிங் அனுக³ந்த்வா குஸலத்திகே வுத்தலக்க²ணவஸேனேவ வேதி³தப்³ப³ங்.
Dassanattike dassanena pahātabbo rāgo uppajjatītiādīsu dassanena pahātabbo puthujjanassa uppajjati. Bhāvanāya pahātabbo sotāpannassāpīti evaṃ uparimassa uparimassa heṭṭhimā heṭṭhimā nuppajjantīti veditabbā. Dassanena pahātabbo dhammo bhāvanāya pahātabbassa dhammassa ekenapi paccayena paccayo na hoti. Sesamettha pāḷiṃ anugantvā kusalattike vuttalakkhaṇavaseneva veditabbaṃ.
த³ஸ்ஸனேனபஹாதப்³ப³ஹேதுகத்திகே த³ஸ்ஸனேனபஹாதப்³ப³ஹேதுகாதீ³னங் விபா⁴கோ³ அட்ட²கதா²கண்டே³ வுத்தனயேனேவ வேதி³தப்³போ³. விசிகிச்சு²த்³த⁴ச்சஸஹக³தோ மோஹோ அஹேதுகத்தா ததியபதே³ பவிட்டோ². ஏவமெத்த² யேஸங் த³ஸ்ஸனபா⁴வனாஹி பஹாதப்³போ³ ஹேது அத்தி², தே பஹாதப்³ப³ஹேதுகா. யேஸங் ஸோ நத்தி² தே நேவத³ஸ்ஸனேன நபா⁴வனாயபஹாதப்³ப³ஹேதுகாதி இமங் பஹாதப்³ப³ஹேதுகவிபா⁴க³ங் ஞத்வா ஸேஸங் த³ஸ்ஸனேனபஹாதப்³ப³த்திகே சேவ குஸலத்திகே ச த³ஸ்ஸிதலக்க²ணானுஸாரேனேவ வேதி³தப்³ப³ங்.
Dassanenapahātabbahetukattike dassanenapahātabbahetukādīnaṃ vibhāgo aṭṭhakathākaṇḍe vuttanayeneva veditabbo. Vicikicchuddhaccasahagato moho ahetukattā tatiyapade paviṭṭho. Evamettha yesaṃ dassanabhāvanāhi pahātabbo hetu atthi, te pahātabbahetukā. Yesaṃ so natthi te nevadassanena nabhāvanāyapahātabbahetukāti imaṃ pahātabbahetukavibhāgaṃ ñatvā sesaṃ dassanenapahātabbattike ceva kusalattike ca dassitalakkhaṇānusāreneva veditabbaṃ.
ஆசயகா³மித்திகே ச படிச்சவாரஸங்ஸட்ட²வாரேஸு அனுலோமங் குஸலத்திகஸதி³ஸமேவ. ஸேஸங் விஸ்ஸஜ்ஜனதோ க³ணனதோ ச யதா²பாளிமேவ நிய்யாதி.
Ācayagāmittike ca paṭiccavārasaṃsaṭṭhavāresu anulomaṃ kusalattikasadisameva. Sesaṃ vissajjanato gaṇanato ca yathāpāḷimeva niyyāti.
ஸெக்க²த்திகே அஸெக்கோ² த⁴ம்மோ ஸெக்க²ஸ்ஸ த⁴ம்மஸ்ஸ ந கேனசி பச்சயேன பச்சயோ. ஸெக்கோ² அஸெக்க²ஸ்ஸ அனந்தரபகதூபனிஸ்ஸயோ பன ஹோதி. ஸேஸமெத்த² யதா²பாளிமேவ நிய்யாதி, ததா² பரித்தத்திகே.
Sekkhattike asekkho dhammo sekkhassa dhammassa na kenaci paccayena paccayo. Sekkho asekkhassa anantarapakatūpanissayo pana hoti. Sesamettha yathāpāḷimeva niyyāti, tathā parittattike.
பரித்தாரம்மணத்திகே அப்பமாணாரம்மணாசேதனாதி ஸெக்கா²னங் கொ³த்ரபு⁴சேதனா, பச்சவெக்க²ணசேதனாதிபி வத்துங் வட்டதி. விபாகானங் பரித்தாரம்மணானந்தி படிஸந்தி⁴யங் கம்மங் ஆரம்மணங் கத்வா, பவத்தே சக்கு²விஞ்ஞாணாதி³வஸேனரூபாதி³ஆரம்மணங், ததா³ரம்மணவஸேன ஜவனேன க³ஹிதபரித்தாரம்மணஞ்ச ஆரம்மணங் கத்வா உப்பன்னானங். யே பன ‘‘கொ³த்ரபு⁴சித்தேன நத்தி² படிஸந்தீ⁴’’தி வத³ந்தி, தே இமினா ஸுத்தேன படிஸேதே⁴தப்³பா³. ஸேஸமெத்த² பாளினயேனேவ வேதி³தப்³ப³ங். ஹீனத்திகோ ஸங்கிலிட்ட²த்திகஸதி³ஸோ.
Parittārammaṇattike appamāṇārammaṇācetanāti sekkhānaṃ gotrabhucetanā, paccavekkhaṇacetanātipi vattuṃ vaṭṭati. Vipākānaṃ parittārammaṇānanti paṭisandhiyaṃ kammaṃ ārammaṇaṃ katvā, pavatte cakkhuviññāṇādivasenarūpādiārammaṇaṃ, tadārammaṇavasena javanena gahitaparittārammaṇañca ārammaṇaṃ katvā uppannānaṃ. Ye pana ‘‘gotrabhucittena natthi paṭisandhī’’ti vadanti, te iminā suttena paṭisedhetabbā. Sesamettha pāḷinayeneva veditabbaṃ. Hīnattiko saṅkiliṭṭhattikasadiso.
மிச்ச²த்தத்திகே மிச்ச²த்தனியதோ ஸம்மத்தனியதஸ்ஸ, ஸம்மத்தனியதோ வா மிச்ச²த்தனியதஸ்ஸ கேனசி பச்சயேன பச்சயோ ந ஹோதி. மிச்ச²த்தனியதோ வா ஸம்மத்தனியதோ வா ஸஹஜாதாதி⁴பதிரஹிதோ நாம நத்தி². ஸம்மத்தனியதே ஏகந்ததோ ஆரம்மணபுரேஜாதங் நத்தி², மிச்ச²த்தனியதே ஸியா ஆரம்மணபுரேஜாதங். அனியதங் சித்தங் ஆரப்³ப⁴ நியதா மிச்சா²தி³ட்டி² உப்பஜ்ஜெய்ய. ஸேஸா நியதங் ஆரப்³ப⁴ நியதங் நுப்பஜ்ஜதி, மிச்ச²த்தனியதங் க³ருங் கத்வா ந கோசி த⁴ம்மோ உப்பஜ்ஜதி. குஸலோ மிச்ச²த்தஸ்ஸ உபனிஸ்ஸயபச்சயோ ந ஹோதி. ஸேஸமெத்த² பாளியங் வுத்தனயேனேவ வேதி³தப்³ப³ங்.
Micchattattike micchattaniyato sammattaniyatassa, sammattaniyato vā micchattaniyatassa kenaci paccayena paccayo na hoti. Micchattaniyato vā sammattaniyato vā sahajātādhipatirahito nāma natthi. Sammattaniyate ekantato ārammaṇapurejātaṃ natthi, micchattaniyate siyā ārammaṇapurejātaṃ. Aniyataṃ cittaṃ ārabbha niyatā micchādiṭṭhi uppajjeyya. Sesā niyataṃ ārabbha niyataṃ nuppajjati, micchattaniyataṃ garuṃ katvā na koci dhammo uppajjati. Kusalo micchattassa upanissayapaccayo na hoti. Sesamettha pāḷiyaṃ vuttanayeneva veditabbaṃ.
மக்³கா³ரம்மணத்திகே படிச்சவாரஸ்ஸ அனுலோமே விபாகபச்சயோ நத்தி². கம்மபச்சயேபி இமஸ்மிங் திகே நானாக்க²ணிகங் ந லப்³ப⁴தி, ததா² உப்பன்னத்திகஅதீதத்திகேஸு. பச்சனீயே அஹேதுகங் மக்³கா³ரம்மணந்தி அஹேதுகங் மக்³கா³ரம்மணங், ஆவஜ்ஜனங் ஸந்தா⁴யேதங் வுத்தங். ஸேஸமெத்த² பாளிஅனுஸாரேனேவ வேதி³தப்³ப³ங்.
Maggārammaṇattike paṭiccavārassa anulome vipākapaccayo natthi. Kammapaccayepi imasmiṃ tike nānākkhaṇikaṃ na labbhati, tathā uppannattikaatītattikesu. Paccanīye ahetukaṃ maggārammaṇanti ahetukaṃ maggārammaṇaṃ, āvajjanaṃ sandhāyetaṃ vuttaṃ. Sesamettha pāḷianusāreneva veditabbaṃ.
உப்பன்னத்திகே ச அதீதத்திகே ச படிச்சவாராத³யோ நத்தி², பஞ்ஹாவாரமத்தமேவ லப்³ப⁴தி. கஸ்மா? படிச்சவாராத³யோ ஹி ஸஹஜாதபுரேஜாதானஞ்ஞேவ ஹொந்தி. இமே ச திகா அதீதானாக³தமிஸ்ஸகா. உப்பன்னத்திகே செத்த² அனந்தரபா⁴கி³யாபி பச்சயா ந லப்³ப⁴ந்தி. கஸ்மா? உப்பன்னத்திகே அதீதஸ்ஸ அபா⁴வதோ. உப்பன்னோ ச அனுப்பன்னோ சாதி இமே செத்த² த்³வே த⁴ம்மா உப்பன்னஸ்ஸ ச அனுப்பன்னஸ்ஸ சாதி இமேஸங் த்³வின்னங் ந கேனசி பச்சயேன பச்சயோ. அனுப்பன்னோ ச உப்பாதீ³ சாதி இமே பன த்³வே உப்பன்னஸ்ஸ ஆரம்மணூபனிஸ்ஸயவஸேன த்³வீஹி பச்சயேஹி பச்சயோ. ஸேஸமெத்த² பாளியங் ஆக³தனயேனேவ வேதி³தப்³ப³ங்.
Uppannattike ca atītattike ca paṭiccavārādayo natthi, pañhāvāramattameva labbhati. Kasmā? Paṭiccavārādayo hi sahajātapurejātānaññeva honti. Ime ca tikā atītānāgatamissakā. Uppannattike cettha anantarabhāgiyāpi paccayā na labbhanti. Kasmā? Uppannattike atītassa abhāvato. Uppanno ca anuppanno cāti ime cettha dve dhammā uppannassa ca anuppannassa cāti imesaṃ dvinnaṃ na kenaci paccayena paccayo. Anuppanno ca uppādī cāti ime pana dve uppannassa ārammaṇūpanissayavasena dvīhi paccayehi paccayo. Sesamettha pāḷiyaṃ āgatanayeneva veditabbaṃ.
அதீதத்திகே பச்சுப்பன்னங் அதீதானாக³தஸ்ஸ, அதீதானாக³தஞ்ச அதீதானாக³தஸ்ஸ ந கேனசி பச்சயேன பச்சயோ. நிப்³பா³னங் பன த்³வீஸுபி இமேஸு திகேஸு நேவ பச்சயதோ ந பச்சயுப்பன்னதோ லப்³ப⁴தி. ஸேஸமிதா⁴பி பாளியங் ஆக³தனயேனேவ வேதி³தப்³ப³ங்.
Atītattike paccuppannaṃ atītānāgatassa, atītānāgatañca atītānāgatassa na kenaci paccayena paccayo. Nibbānaṃ pana dvīsupi imesu tikesu neva paccayato na paccayuppannato labbhati. Sesamidhāpi pāḷiyaṃ āgatanayeneva veditabbaṃ.
அஜ்ஜ²த்தத்திகே அஜ்ஜ²த்தப³ஹித்³தா⁴பத³ங் ந க³ஹிதங். அஜ்ஜ²த்தப³ஹித்³தா⁴ஸங்கா²தா ஹி உபோ⁴ ராஸயோ நேவ ஏகதோ பச்சயா ஹொந்தி, ந பச்சயுப்பன்னா; தஸ்மா ஹத்த²தலே ட²பிதஸ்ஸ ஸாஸபஸ்ஸ வண்ணோபி ஹத்த²தலவண்ணேன ஸத்³தி⁴ங் ஏகதோ ஆரம்மணங் ந ஹோதீதி வேதி³தப்³போ³. யதா² ச அஜ்ஜ²த்தப³ஹித்³தா⁴பத³ங், ஏவமெத்த² அஜ்ஜ²த்தாரம்மணத்திகேபி அஜ்ஜ²த்தப³ஹித்³தா⁴ரம்மணபத³ங் ந லப்³ப⁴தி. ஸேஸங் யதா²பாளிமேவ நிய்யாதி.
Ajjhattattike ajjhattabahiddhāpadaṃ na gahitaṃ. Ajjhattabahiddhāsaṅkhātā hi ubho rāsayo neva ekato paccayā honti, na paccayuppannā; tasmā hatthatale ṭhapitassa sāsapassa vaṇṇopi hatthatalavaṇṇena saddhiṃ ekato ārammaṇaṃ na hotīti veditabbo. Yathā ca ajjhattabahiddhāpadaṃ, evamettha ajjhattārammaṇattikepi ajjhattabahiddhārammaṇapadaṃ na labbhati. Sesaṃ yathāpāḷimeva niyyāti.
ஸனித³ஸ்ஸனத்திகேபி பாளிவஸேனேவ அத்தோ² க³ஹேதப்³போ³. க³ணனாபெத்த² பாளியங் ஆக³தவாரே ஸங்கி²பித்வா ஹெட்டா² வுத்தனயேனேவ ஸங்ஸந்த³னேஸு ஸங்ஸந்தி³த்வா வேதி³தப்³பா³தி.
Sanidassanattikepi pāḷivaseneva attho gahetabbo. Gaṇanāpettha pāḷiyaṃ āgatavāre saṅkhipitvā heṭṭhā vuttanayeneva saṃsandanesu saṃsanditvā veditabbāti.
த⁴ம்மானுலோமே திகபட்டா²னவண்ணனா.
Dhammānulome tikapaṭṭhānavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi
5. ஸங்கிலிட்ட²த்திகங் • 5. Saṃkiliṭṭhattikaṃ
6. விதக்கத்திகங் • 6. Vitakkattikaṃ
7. பீதித்திகங் • 7. Pītittikaṃ
8. த³ஸ்ஸனேனபஹாதப்³ப³த்திகங் • 8. Dassanenapahātabbattikaṃ
9. த³ஸ்ஸனேனபஹாதப்³ப³ஹேதுகத்திகங் • 9. Dassanenapahātabbahetukattikaṃ
10. ஆசயகா³மித்திகங் • 10. Ācayagāmittikaṃ
11. ஸெக்க²த்திகங் • 11. Sekkhattikaṃ
12. பரித்தத்திகங் • 12. Parittattikaṃ
13. பரித்தாரம்மணத்திகங் • 13. Parittārammaṇattikaṃ
14. ஹீனத்திகங் • 14. Hīnattikaṃ
15. மிச்ச²த்தனியதத்திகங் • 15. Micchattaniyatattikaṃ
16. மக்³கா³ரம்மணத்திகங் • 16. Maggārammaṇattikaṃ
17. உப்பன்னத்திகங் • 17. Uppannattikaṃ
18. அதீதத்திகங் • 18. Atītattikaṃ
19. அதீதாரம்மணத்திகங் • 19. Atītārammaṇattikaṃ
20. அஜ்ஜ²த்தத்திகங் • 20. Ajjhattattikaṃ
21. அஜ்ஜ²த்தாரம்மணத்திகங் • 21. Ajjhattārammaṇattikaṃ
22. ஸனித³ஸ்ஸனஸப்படிக⁴த்திகங் • 22. Sanidassanasappaṭighattikaṃ
