| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. සඤ්‌ඤානානත්‌තසුත්‌තං
7. Saññānānattasuttaṃ
91. සාවත්‌ථියං විහරති…පෙ.… ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච – ‘‘ධාතුනානත්‌තං, භික්‌ඛවෙ, පටිච්‌ච උප්‌පජ්‌ජති සඤ්‌ඤානානත්‌තං, සඤ්‌ඤානානත්‌තං පටිච්‌ච උප්‌පජ්‌ජති සඞ්‌කප්‌පනානත්‌තං, සඞ්‌කප්‌පනානත්‌තං පටිච්‌ච උප්‌පජ්‌ජති ඡන්‌දනානත්‌තං, ඡන්‌දනානත්‌තං පටිච්‌ච උප්‌පජ්‌ජති පරිළාහනානත්‌තං, පරිළාහනානත්‌තං පටිච්‌ච උප්‌පජ්‌ජති පරියෙසනානානත්‌තං. කතමඤ්‌ච, භික්‌ඛවෙ, ධාතුනානත්‌තං? රූපධාතු…පෙ.… ධම්‌මධාතු – ඉදං වුච්‌චති, භික්‌ඛවෙ, ධාතුනානත්‌තං’’.
91. Sāvatthiyaṃ viharati…pe… ‘‘bhadante’’ti te bhikkhū bhagavato paccassosuṃ. Bhagavā etadavoca – ‘‘dhātunānattaṃ, bhikkhave, paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ. Katamañca, bhikkhave, dhātunānattaṃ? Rūpadhātu…pe… dhammadhātu – idaṃ vuccati, bhikkhave, dhātunānattaṃ’’.
‘‘කථඤ්‌ච , භික්‌ඛවෙ, ධාතුනානත්‌තං පටිච්‌ච උප්‌පජ්‌ජති සඤ්‌ඤානානත්‌තං, සඤ්‌ඤානානත්‌තං පටිච්‌ච උප්‌පජ්‌ජති සඞ්‌කප්‌පනානත්‌තං, සඞ්‌කප්‌පනානත්‌තං පටිච්‌ච උප්‌පජ්‌ජති ඡන්‌දනානත්‌තං, ඡන්‌දනානත්‌තං පටිච්‌ච උප්‌පජ්‌ජති පරිළාහනානත්‌තං, පරිළාහනානත්‌තං පටිච්‌ච උප්‌පජ්‌ජති පරියෙසනානානත්‌තං?
‘‘Kathañca , bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ?
‘‘රූපධාතුං, භික්‌ඛවෙ, පටිච්‌ච උප්‌පජ්‌ජති රූපසඤ්‌ඤා , රූපසඤ්‌ඤං පටිච්‌ච උප්‌පජ්‌ජති රූපසඞ්‌කප්‌පො, රූපසඞ්‌කප්‌පං පටිච්‌ච උප්‌පජ්‌ජති රූපච්‌ඡන්‌දො, රූපච්‌ඡන්‌දං පටිච්‌ච උප්‌පජ්‌ජති රූපපරිළාහො, රූපපරිළාහං පටිච්‌ච උප්‌පජ්‌ජති රූපපරියෙසනා…පෙ.… ධම්‌මධාතුං පටිච්‌ච උප්‌පජ්‌ජති ධම්‌මසඤ්‌ඤා, ධම්‌මසඤ්‌ඤං පටිච්‌ච උප්‌පජ්‌ජති ධම්‌මසඞ්‌කප්‌පො, ධම්‌මසඞ්‌කප්‌පං පටිච්‌ච උප්‌පජ්‌ජති ධම්‌මච්‌ඡන්‌දො, ධම්‌මච්‌ඡන්‌දං පටිච්‌ච උප්‌පජ්‌ජති ධම්‌මපරිළාහො, ධම්‌මපරිළාහං පටිච්‌ච උප්‌පජ්‌ජති ධම්‌මපරියෙසනා.
‘‘Rūpadhātuṃ, bhikkhave, paṭicca uppajjati rūpasaññā , rūpasaññaṃ paṭicca uppajjati rūpasaṅkappo, rūpasaṅkappaṃ paṭicca uppajjati rūpacchando, rūpacchandaṃ paṭicca uppajjati rūpapariḷāho, rūpapariḷāhaṃ paṭicca uppajjati rūpapariyesanā…pe… dhammadhātuṃ paṭicca uppajjati dhammasaññā, dhammasaññaṃ paṭicca uppajjati dhammasaṅkappo, dhammasaṅkappaṃ paṭicca uppajjati dhammacchando, dhammacchandaṃ paṭicca uppajjati dhammapariḷāho, dhammapariḷāhaṃ paṭicca uppajjati dhammapariyesanā.
‘‘එවං, ඛො, භික්‌ඛවෙ, ධාතුනානත්‌තං පටිච්‌ච උප්‌පජ්‌ජති සඤ්‌ඤානානත්‌තං, සඤ්‌ඤානානත්‌තං පටිච්‌ච උප්‌පජ්‌ජති සඞ්‌කප්‌පනානත්‌තං, සඞ්‌කප්‌පනානත්‌තං පටිච්‌ච උප්‌පජ්‌ජති ඡන්‌දනානත්‌තං, ඡන්‌දනානත්‌තං පටිච්‌ච උප්‌පජ්‌ජති පරිළාහනානත්‌තං, පරිළාහනානත්‌තං පටිච්‌ච උප්‌පජ්‌ජති පරියෙසනානානත්‌ත’’න්‌ති. සත්‌තමං.
‘‘Evaṃ, kho, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānatta’’nti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. සඤ්‌ඤානානත්‌තසුත්‌තවණ්‌ණනා • 7. Saññānānattasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. සඤ්‌ඤානානත්‌තසුත්‌තවණ්‌ණනා • 7. Saññānānattasuttavaṇṇanā
