| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸந்த²தசதுக்கபே⁴த³கதா²வண்ணனா
Santhatacatukkabhedakathāvaṇṇanā
61-2. படிபன்னகஸ்ஸாதி ஆரத்³த⁴விபஸ்ஸகஸ்ஸ. உபாதி³ன்னகந்தி காயிந்த்³ரியங் ஸந்தா⁴ய வுத்தங். உபாதி³ன்னகேன பு²ஸதீதி உபாதி³ன்னகேன பு²ஸீயதி க⁴ட்டீயதீதி ஏவங் கம்மனி ய-காரலோபேன அத்தோ² வேதி³தப்³போ³. அத² வா ஏவங் கரொந்தோ கிஞ்சி உபாதி³ன்னகங் உபாதி³ன்னகேன ந பு²ஸதி ந க⁴ட்டேதீதி ஏவமெத்த² அத்தோ² த³ட்ட²ப்³போ³. லேஸங் ஒட்³டெ³ஸ்ஸந்தீதி லேஸங் ஸமுட்டா²பெஸ்ஸந்தி, பரிகப்பெஸ்ஸந்தீதி வுத்தங் ஹோதி. ஸந்த²தாதி³பே⁴தே³ஹி பி⁴ந்தி³த்வாதி ஸந்த²தாதி³விஸேஸனேஹி விஸேஸெத்வா, ஸந்த²தாதீ³ஹி சதூஹி யோஜெத்வாதி வுத்தங் ஹோதி.
61-2.Paṭipannakassāti āraddhavipassakassa. Upādinnakanti kāyindriyaṃ sandhāya vuttaṃ. Upādinnakena phusatīti upādinnakena phusīyati ghaṭṭīyatīti evaṃ kammani ya-kāralopena attho veditabbo. Atha vā evaṃ karonto kiñci upādinnakaṃ upādinnakena na phusati na ghaṭṭetīti evamettha attho daṭṭhabbo. Lesaṃ oḍḍessantīti lesaṃ samuṭṭhāpessanti, parikappessantīti vuttaṃ hoti. Santhatādibhedehi bhinditvāti santhatādivisesanehi visesetvā, santhatādīhi catūhi yojetvāti vuttaṃ hoti.
ஸந்த²தாயாதி ஏகதே³ஸே ஸமுதா³யவோஹாரோ ‘‘படோ த³ட்³டோ⁴’’திஆதீ³ஸு விய. ததா² ஹி படஸ்ஸ ஏகதே³ஸேபி த³ட்³டே⁴ ‘‘படோ த³ட்³டோ⁴’’தி வோஹரந்தி , ஏவங் இத்தி²யா வச்சமக்³கா³தீ³ஸு கிஸ்மிஞ்சி மக்³கே³ ஸந்த²தே இத்தீ² ‘‘ஸந்த²தா’’தி வுச்சதி. தேனாஹ ‘‘ஸந்த²தா நாமா’’திஆதி³. வத்தா²தீ³னி அந்தோ அப்பவேஸெத்வா ப³ஹி ட²பெத்வா ப³ந்த⁴னங் ஸந்தா⁴ய ‘‘பலிவேடெ²த்வா’’தி வுத்தங். ஏகதே³ஸே ஸமுதா³யவோஹாரவஸேனேவ பி⁴க்கு²பி ‘‘ஸந்த²தோ’’தி வுச்சதீதி ஆஹ ‘‘ஸந்த²தோ நாமா’’திஆதி³. யத்தகே பவிட்டே²தி திலப²லமத்தே பவிட்டே². அக்கி²ஆதி³ம்ஹி ஸந்த²தேபி யதா²வத்து²கமேவாதி ஆஹ ‘‘து²ல்லச்சயக்கெ²த்தே து²ல்லச்சயங், து³க்கடக்கெ²த்தே து³க்கடமேவ ஹோதீ’’தி.
Santhatāyāti ekadese samudāyavohāro ‘‘paṭo daḍḍho’’tiādīsu viya. Tathā hi paṭassa ekadesepi daḍḍhe ‘‘paṭo daḍḍho’’ti voharanti , evaṃ itthiyā vaccamaggādīsu kismiñci magge santhate itthī ‘‘santhatā’’ti vuccati. Tenāha ‘‘santhatā nāmā’’tiādi. Vatthādīni anto appavesetvā bahi ṭhapetvā bandhanaṃ sandhāya ‘‘paliveṭhetvā’’ti vuttaṃ. Ekadese samudāyavohāravaseneva bhikkhupi ‘‘santhato’’ti vuccatīti āha ‘‘santhato nāmā’’tiādi. Yattake paviṭṭheti tilaphalamatte paviṭṭhe. Akkhiādimhi santhatepi yathāvatthukamevāti āha ‘‘thullaccayakkhette thullaccayaṃ, dukkaṭakkhette dukkaṭameva hotī’’ti.
கா²ணுங் க⁴ட்டெந்தஸ்ஸ து³க்கடந்தி இத்தி²னிமித்தஸ்ஸ அந்தோ கா²ணுங் பவேஸெத்வா ஸமதலங் அதிரித்தங் வா கா²ணுங் க⁴ட்டெந்தஸ்ஸ து³க்கடங் பவேஸாபா⁴வதோ. ஸசே பன ஈஸகங் அந்தோ பவிஸித்வா டி²தங் கா²ணுகமேவ அங்க³ஜாதேன சு²பதி, பாராஜிகமேவ. தஸ்ஸ தலந்தி வேளுனளாதி³கஸ்ஸ அந்தோதலங். வினீதவத்தூ²ஸு ‘‘தேன கோ² பன ஸமயேன அஞ்ஞதரோ பி⁴க்கு² ஸீவதி²கங் க³ந்த்வா சி²ன்னஸீஸங் பஸ்ஸித்வா வட்டகதே முகே² அச்சு²பந்தங் அங்க³ஜாதங் பவேஸேஸி. தஸ்ஸ குக்குச்சங் அஹோஸி…பே॰… அனாபத்தி பி⁴க்கு² பாராஜிகஸ்ஸ, ஆபத்தி து³க்கடஸ்ஸா’’தி வுத்தத்தா தஸ்ஸ ஸுத்தஸ்ஸ அனுலோமதோ ‘‘ஆகாஸக³தமேவ கத்வா பவேஸெத்வா நீஹரதி, து³க்கட’’ந்தி (பாரா॰ 73) வுத்தங். ப³ஹித்³தா⁴ கா²ணுகேதி அந்தோபவேஸிதவேணுபப்³பா³தி³கஸ்ஸ ப³ஹி நிக்க²ந்தகா²ணுகே. மேது²னராகே³ன இந்த்³ரியப³த்³த⁴ஆனிந்த்³ரியப³த்³த⁴ஸந்தானேஸு யத்த² கத்த²சி உபக்கமந்தஸ்ஸ ந ஸக்கா அனாபத்தியா ப⁴விதுந்தி ‘‘து³க்கடமேவா’’தி வுத்தங். தேனேவ வினீதவத்து²ம்ஹி அட்டி²கேஸு உபக்கமந்தஸ்ஸ து³க்கடங் வுத்தங்.
Khāṇuṃ ghaṭṭentassa dukkaṭanti itthinimittassa anto khāṇuṃ pavesetvā samatalaṃ atirittaṃ vā khāṇuṃ ghaṭṭentassa dukkaṭaṃ pavesābhāvato. Sace pana īsakaṃ anto pavisitvā ṭhitaṃ khāṇukameva aṅgajātena chupati, pārājikameva. Tassa talanti veḷunaḷādikassa antotalaṃ. Vinītavatthūsu ‘‘tena kho pana samayena aññataro bhikkhu sīvathikaṃ gantvā chinnasīsaṃ passitvā vaṭṭakate mukhe acchupantaṃ aṅgajātaṃ pavesesi. Tassa kukkuccaṃ ahosi…pe… anāpatti bhikkhu pārājikassa, āpatti dukkaṭassā’’ti vuttattā tassa suttassa anulomato ‘‘ākāsagatameva katvā pavesetvā nīharati, dukkaṭa’’nti (pārā. 73) vuttaṃ. Bahiddhā khāṇuketi antopavesitaveṇupabbādikassa bahi nikkhantakhāṇuke. Methunarāgena indriyabaddhaānindriyabaddhasantānesu yattha katthaci upakkamantassa na sakkā anāpattiyā bhavitunti ‘‘dukkaṭamevā’’ti vuttaṃ. Teneva vinītavatthumhi aṭṭhikesu upakkamantassa dukkaṭaṃ vuttaṃ.
ஸந்த²தசதுக்கபே⁴த³கதா²வண்ணனா நிட்டி²தா.
Santhatacatukkabhedakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸந்த²தசதுக்கபே⁴த³ககதா²வண்ணனா • Santhatacatukkabhedakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸந்த²தசதுக்கபே⁴த³கதா²வண்ணனா • Santhatacatukkabhedakathāvaṇṇanā
