| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
5. саанусуд̇д̇аван̣н̣анаа
5. Sānusuttavaṇṇanā
239. бан̃жамз яагкзна г̇ахид̇о ход̇ийд̇и со гира д̇ассаа убаасигааяа згабуд̇д̇аго. ат̇а нам̣ саа д̣̇ахарагаалзязва баб̣б̣ааж̇зси. со баб̣б̣аж̇ид̇агаалад̇о бадтааяа сийлаваа ахоси вад̇д̇асамбанно, аажарияубаж̇жхааяаааг̇анд̇угаад̣̇ийнам̣ вад̇д̇ам̣ гад̇амзва ход̇и, маасасса адтамийд̣̇ивасз баад̇о вудтааяа уд̣̇агамаал̣агз уд̣̇агам̣ убадтаабзд̇ваа д̇хаммассаванаг̇г̇ам̣ саммаж̇ж̇ид̇ваа д̣̇ийбам̣ ж̇аалзд̇ваа мад̇хурассарзна д̇хаммассаванам̣ гхосзд̇и. бхигкуу д̇асса т̇аамам̣ н̃ад̇ваа ‘‘сарабхаан̣ам̣ бхан̣а, сааман̣зраа’’д̇и аж̇жхзсанд̇и. со ‘‘маяхам̣ хад̣̇аяаваад̇о руж̇ад̇и, гаасо ваа б̣аад̇хад̇ий’’д̇и гин̃жи бажжаахаарам̣ агад̇ваа д̇хаммаасанам̣ абхирухид̇ваа аагаасаг̇ан̇г̇ам̣ од̇аарзнд̇о вияа сарабхаан̣ам̣ вад̇ваа од̇аранд̇о – ‘‘маяхам̣ маад̇аабид̇уунамби имасмим̣ сарабхан̃н̃з бад̇д̇ий’’д̇и вад̣̇ад̇и. д̇асса мануссаа маад̇аабид̇аро бад̇д̇ияаа д̣̇иннабхаавам̣ на ж̇аананд̇и. ананд̇арад̇д̇абхаавз банасса маад̇аа яагкиний ж̇аад̇аа. саа д̣̇звад̇аахи сад̣̇д̇хим̣ ааг̇ад̇аа , д̇хаммам̣ суд̇ваа – ‘‘сааман̣зрзна д̣̇иннабад̇д̇им̣ анумод̣̇аами, д̇аад̇аа’’д̇и вад̣̇ад̇и. сийласамбаннаа жа наама бхигкуу сад̣̇звагасса логасса бияаа хонд̇ийд̇и д̇асмим̣ сааман̣зрз д̣̇звад̇аа салаж̇ж̇аа саг̇аараваа махааб̣рахмам̣ вияа аг̇г̇игканд̇хам̣ вияа жа нам̣ ман̃н̃анд̇и. сааман̣зрз г̇ааравзна д̇ам̣ яагкиним̣ г̇арум̣ гад̇ваа бассанд̇и. д̇хаммассаванаяагкасамааг̇амаад̣̇ийсу ‘‘саанумаад̇аа саанумаад̇аа’’д̇и яагкинияаа аг̇г̇аасанам̣ аг̇г̇од̣̇агам̣ аг̇г̇абин̣д̣ам̣ д̣̇знд̇и. махзсагкааби яагкаа д̇ам̣ д̣̇исваа маг̇г̇аа оггаманд̇и, аасанаа вудтаханд̇и.
239. Pañcame yakkhena gahito hotīti so kira tassā upāsikāya ekaputtako. Atha naṃ sā daharakāleyeva pabbājesi. So pabbajitakālato paṭṭhāya sīlavā ahosi vattasampanno, ācariyupajjhāyaāgantukādīnaṃ vattaṃ katameva hoti, māsassa aṭṭhamīdivase pāto vuṭṭhāya udakamāḷake udakaṃ upaṭṭhāpetvā dhammassavanaggaṃ sammajjitvā dīpaṃ jāletvā madhurassarena dhammassavanaṃ ghoseti. Bhikkhū tassa thāmaṃ ñatvā ‘‘sarabhāṇaṃ bhaṇa, sāmaṇerā’’ti ajjhesanti. So ‘‘mayhaṃ hadayavāto rujati, kāso vā bādhatī’’ti kiñci paccāhāraṃ akatvā dhammāsanaṃ abhiruhitvā ākāsagaṅgaṃ otārento viya sarabhāṇaṃ vatvā otaranto – ‘‘mayhaṃ mātāpitūnampi imasmiṃ sarabhaññe pattī’’ti vadati. Tassa manussā mātāpitaro pattiyā dinnabhāvaṃ na jānanti. Anantarattabhāve panassa mātā yakkhinī jātā. Sā devatāhi saddhiṃ āgatā , dhammaṃ sutvā – ‘‘sāmaṇerena dinnapattiṃ anumodāmi, tātā’’ti vadati. Sīlasampannā ca nāma bhikkhū sadevakassa lokassa piyā hontīti tasmiṃ sāmaṇere devatā salajjā sagāravā mahābrahmaṃ viya aggikkhandhaṃ viya ca naṃ maññanti. Sāmaṇere gāravena taṃ yakkhiniṃ garuṃ katvā passanti. Dhammassavanayakkhasamāgamādīsu ‘‘sānumātā sānumātā’’ti yakkhiniyā aggāsanaṃ aggodakaṃ aggapiṇḍaṃ denti. Mahesakkhāpi yakkhā taṃ disvā maggā okkamanti, āsanā vuṭṭhahanti.
ат̇а ко сааман̣зро вуд̣дхиманвааяа барибаггинд̣̇рияо анабхирад̇ибийл̣ид̇о анабхирад̇им̣ винод̣̇зд̇ум̣ асаггонд̇о баруул̣хагзсанако гилидтаниваасанабаарубано гассажи анаарожзд̇ваа бад̇д̇ажийварамаад̣̇ааяа згагова маад̇у гхарам̣ г̇ад̇о. убаасигаа буд̇д̇ам̣ д̣̇исваа, ванд̣̇ид̇ваа ааха – ‘‘д̇аад̇а, д̇вам̣ буб̣б̣з аажарияубаж̇жхааязхи ваа д̣̇ахарасааман̣зрзхи ваа сад̣̇д̇хим̣ ид̇хааг̇ажчаси. гасмаа згагова аж̇ж̇а ааг̇ад̇о’’д̇и? со угган̣тид̇абхаавам̣ аарожзси. сад̣̇д̇хаа убаасигаа наанаббагаарзна гхарааваасз аад̣̇ийнавам̣ д̣̇ассзд̇ваа буд̇д̇ам̣ овад̣̇амаанааби д̇ам̣ сан̃н̃аабзд̇ум̣ асаггонд̇ий, ‘‘аббзва наама ад̇д̇ано д̇хаммад̇ааяаби саллагкзссад̇ий’’д̇и ануяож̇зд̇ваава – ‘‘д̇идта, д̇аад̇а, яаава д̇з яааг̇убхад̇д̇ам̣ самбаад̣̇зми, яааг̇ум̣ бивид̇ваа гад̇абхад̇д̇агижжасса д̇з манаабаани вад̇т̇аани нийхарид̇ваа д̣̇ассаамий’’д̇и вад̇ваа аасанам̣ бан̃н̃аабзд̇ваа ад̣̇ааси. нисийд̣̇и сааман̣зро. убаасигаа мухуд̇д̇знзва яааг̇укаж̇ж̇агам̣ самбаад̣̇зд̇ваа ад̣̇ааси. д̇ад̇о ‘‘бхад̇д̇ам̣ самбаад̣̇зссаамий’’д̇и авид̣̇уурз нисиннаа д̇ан̣д̣улз д̇ховад̇и. д̇асмим̣ самаяз саа яагкиний ‘‘гахам̣ ну ко сааман̣зро? гин̃жи бхигкаахаарам̣ лабхад̇и , уд̣̇ааху но’’д̇и? ааваж̇ж̇амаанаа д̇асса виб̣бхамид̇угаамад̇ааяа нисиннабхаавам̣ н̃ад̇ваа, ‘‘маа хзва ко мз д̣̇звад̇аанам̣ анд̇арз лаж̇ж̇ам̣ уббаад̣̇зяяа, г̇ажчаамисса виб̣бхаманз анд̇арааяам̣ гаромий’’д̇и ааг̇анд̇ваа сарийрз ад̇химужжид̇ваа г̇ийвам̣ баривад̇д̇зд̇ваа бхуумияам̣ баад̇зси. со агкийхи вибаривад̇д̇зхи кзл̣зна баг̇гхаранд̇зна бхуумияам̣ вибпанд̣̇ад̇и. д̇зна вуд̇д̇ам̣ ‘‘яагкзна г̇ахид̇о ход̇ий’’д̇и.
Atha kho sāmaṇero vuḍḍhimanvāya paripakkindriyo anabhiratipīḷito anabhiratiṃ vinodetuṃ asakkonto parūḷhakesanakho kiliṭṭhanivāsanapārupano kassaci anārocetvā pattacīvaramādāya ekakova mātu gharaṃ gato. Upāsikā puttaṃ disvā, vanditvā āha – ‘‘tāta, tvaṃ pubbe ācariyupajjhāyehi vā daharasāmaṇerehi vā saddhiṃ idhāgacchasi. Kasmā ekakova ajja āgato’’ti? So ukkaṇṭhitabhāvaṃ ārocesi. Saddhā upāsikā nānappakārena gharāvāse ādīnavaṃ dassetvā puttaṃ ovadamānāpi taṃ saññāpetuṃ asakkontī, ‘‘appeva nāma attano dhammatāyapi sallakkhessatī’’ti anuyojetvāva – ‘‘tiṭṭha, tāta, yāva te yāgubhattaṃ sampādemi, yāguṃ pivitvā katabhattakiccassa te manāpāni vatthāni nīharitvā dassāmī’’ti vatvā āsanaṃ paññāpetvā adāsi. Nisīdi sāmaṇero. Upāsikā muhutteneva yāgukhajjakaṃ sampādetvā adāsi. Tato ‘‘bhattaṃ sampādessāmī’’ti avidūre nisinnā taṇḍule dhovati. Tasmiṃ samaye sā yakkhinī ‘‘kahaṃ nu kho sāmaṇero? Kiñci bhikkhāhāraṃ labhati , udāhu no’’ti? Āvajjamānā tassa vibbhamitukāmatāya nisinnabhāvaṃ ñatvā, ‘‘mā heva kho me devatānaṃ antare lajjaṃ uppādeyya, gacchāmissa vibbhamane antarāyaṃ karomī’’ti āgantvā sarīre adhimuccitvā gīvaṃ parivattetvā bhūmiyaṃ pātesi. So akkhīhi viparivattehi kheḷena paggharantena bhūmiyaṃ vipphandati. Tena vuttaṃ ‘‘yakkhena gahito hotī’’ti.
абхаасийд̇и убаасигаа буд̇д̇асса д̇ам̣ виббагаарам̣ д̣̇исваа взг̇зна г̇анд̇ваа буд̇д̇ам̣ аалин̇г̇зд̇ваа ууруусу нибаж̇ж̇аабзси. сагалаг̇аамаваасино ааг̇анд̇ваа б̣алигаммаад̣̇ийни гаронд̇и. убаасигаа барид̣̇звамаанаа имаа г̇аат̇ааяо абхааси.
Abhāsīti upāsikā puttassa taṃ vippakāraṃ disvā vegena gantvā puttaṃ āliṅgetvā ūrūsu nipajjāpesi. Sakalagāmavāsino āgantvā balikammādīni karonti. Upāsikā paridevamānā imā gāthāyo abhāsi.
баадихаарияабагкан̃жаад̇и мануссаа ‘‘адтамийубосат̇асса бажжуг̇г̇аманан̃жа ануг̇г̇аманан̃жа гариссаамаа’’д̇и сад̇д̇амияааби навамияааби убосат̇ан̇г̇аани самаад̣̇ияанд̇и, жаад̇уд̣̇д̣̇асийбаннарасийнам̣ бажжуг̇г̇аманаануг̇г̇аманам̣ гаронд̇аа д̇зрасияааби баадибад̣̇зби самаад̣̇ияанд̇и, ‘‘вассааваасасса ануг̇г̇аманам̣ гариссаамаа’’д̇и д̣̇виннам̣ бавааран̣аанам̣ анд̇арз ад̣дхамаасам̣ ниб̣ад̣̇д̇хубосат̇игаа бхаванд̇и. ид̣̇ам̣ санд̇хааяа вуд̇д̇ам̣ ‘‘баадихаарияабагкан̃жаа’’д̇и. адтан̇г̇асусамааг̇ад̇анд̇и адтан̇г̇зхи судту самааг̇ад̇ам̣, самбаяуд̇д̇анд̇и ад̇т̇о. б̣рахмажарияанд̇и сздтажарияам̣. на д̇з хи яагкаа гийл̣анд̇ийд̇и на д̇з г̇ахзд̇ваа яагкаа гиламзнд̇и.
Pāṭihāriyapakkhañcāti manussā ‘‘aṭṭhamīuposathassa paccuggamanañca anuggamanañca karissāmā’’ti sattamiyāpi navamiyāpi uposathaṅgāni samādiyanti, cātuddasīpannarasīnaṃ paccuggamanānuggamanaṃ karontā terasiyāpi pāṭipadepi samādiyanti, ‘‘vassāvāsassa anuggamanaṃ karissāmā’’ti dvinnaṃ pavāraṇānaṃ antare aḍḍhamāsaṃ nibaddhuposathikā bhavanti. Idaṃ sandhāya vuttaṃ ‘‘pāṭihāriyapakkhañcā’’ti. Aṭṭhaṅgasusamāgatanti aṭṭhaṅgehi suṭṭhu samāgataṃ, sampayuttanti attho. Brahmacariyanti seṭṭhacariyaṃ. Na te hi yakkhā kīḷantīti na te gahetvā yakkhā kilamenti.
буна жаад̇уд̣̇д̣̇асинд̇и имааяа г̇аат̇ааяа сааман̣зрасса гааяз ад̇химуд̇д̇аа яагкиний ааха. аави ваа яад̣̇и ваа раход̇и гассажи саммукз ваа бараммукз ваа. бамуд̇яад̇т̇ийд̇и бамуд̇д̇и ад̇т̇и. уббажжаабийд̇и уббад̇ид̇вааби. сажзби сагун̣о вияа уббад̇ид̇ваа балааяаси, д̇ат̇ааби д̇з могко над̇т̇ийд̇и вад̣̇ад̇и. зван̃жа бана вад̇ваа сааман̣зрам̣ мун̃жи. сааман̣зро агкийни уммийлзси, маад̇аа гзсз багирияа ассасанд̇ий бассасанд̇ий род̣̇ад̇и. со ‘‘амануссзна г̇ахид̇омхий’’д̇и на ж̇аанаад̇и. ологзнд̇о бана ‘‘ахам̣ буб̣б̣з бийтз нисинно. маад̇аа мз авид̣̇уурз нисийд̣̇ид̇ваа д̇ан̣д̣улз д̇ховад̇и. ид̣̇аани банамхи бхуумияам̣ нисинно, маад̇ааби мз ассасанд̇ий бассасанд̇ий род̣̇ад̇и, сагалаг̇аамаваасиноби саннибад̇ид̇аа. гим̣ ну ко зд̇а’’нд̇и? нибаннагова мад̇ам̣ ваа аммаад̇и г̇аат̇амааха.
Puna cātuddasinti imāya gāthāya sāmaṇerassa kāye adhimuttā yakkhinī āha. Āvi vā yadi vā rahoti kassaci sammukhe vā parammukhe vā. Pamutyatthīti pamutti atthi. Uppaccāpīti uppatitvāpi. Sacepi sakuṇo viya uppatitvā palāyasi, tathāpi te mokkho natthīti vadati. Evañca pana vatvā sāmaṇeraṃ muñci. Sāmaṇero akkhīni ummīlesi, mātā kese pakiriya assasantī passasantī rodati. So ‘‘amanussena gahitomhī’’ti na jānāti. Olokento pana ‘‘ahaṃ pubbe pīṭhe nisinno. Mātā me avidūre nisīditvā taṇḍule dhovati. Idāni panamhi bhūmiyaṃ nisinno, mātāpi me assasantī passasantī rodati, sakalagāmavāsinopi sannipatitā. Kiṃ nu kho eta’’nti? Nipannakova mataṃ vā ammāti gāthamāha.
гаамз жаж̇ид̇ваанаад̇и д̣̇увид̇хзби гаамз бахааяа. бунарааг̇ажчад̇зд̇и виб̣бхаманавасзна ааг̇ажчад̇и. буна ж̇ийвам̣ мад̇о хи сод̇и уббаб̣б̣аж̇ид̇ваа буна ж̇ийванд̇оби со мад̇агова, д̇асмаа д̇амби род̣̇анд̇ийд̇и вад̣̇ад̇и.
Kāmecajitvānāti duvidhepi kāme pahāya. Punarāgacchateti vibbhamanavasena āgacchati. Puna jīvaṃ mato hi soti uppabbajitvā puna jīvantopi so matakova, tasmā tampi rodantīti vadati.
ид̣̇аанисса гхарааваасз аад̣̇ийнавам̣ д̣̇ассзнд̇ий гуггул̣аад̇иаад̣̇имааха. д̇ад̇т̇а гуггул̣аад̇и гхарааваасо гира ун̣хадтзна гуггул̣аа наама ход̇и. гасса уж̇жхаабаяаамасзд̇и – ‘‘абхид̇хаават̇а, бхад̣̇д̣̇ам̣ д̇з ход̇уу’’д̇и звам̣ вад̇ваа – ‘‘яам̣ д̇вам̣ виб̣бхамид̇угаамо яагкзна баабид̇о, имам̣ виббагаарам̣ гасса маяам̣ уж̇жхаабаяаама ниж̇жхаабаяаама аарожаяаамаа’’д̇и вад̣̇ад̇и. буна д̣аяхид̇умижчасийд̇иаад̣̇ид̇д̇агхарад̇о нийхадабхан̣д̣ам̣ вияа гхараа нийхарид̇ваа б̣уд̣̇д̇хасаасанз баб̣б̣аж̇ид̇о буна махаад̣аахасад̣̇исз гхарааваасз д̣аяхид̇ум̣ ижчасийд̇и ад̇т̇о. со маад̇ари гат̇знд̇ияаа гат̇знд̇ияаа саллагкзд̇ваа хирод̇д̇аббам̣ бадилабхид̇ваа, ‘‘над̇т̇и маяхам̣ г̇ихибхаавзна ад̇т̇о’’д̇и ааха. ат̇асса маад̇аа ‘‘саад̇ху, д̇аад̇аа’’д̇и д̇удтаа бан̣ийд̇абхож̇анам̣ бхож̇зд̇ваа, ‘‘гад̇и вассоси, д̇аад̇аа’’д̇и бужчи. барибун̣н̣авассомхи убаасигзд̇и. ‘‘д̇зна хи, д̇аад̇а, убасамбад̣̇ам̣ гарохий’’д̇и жийварасаадагз ад̣̇ааси. со д̇ижийварам̣ гаараабзд̇ваа убасамбанно б̣уд̣̇д̇хаважанам̣ уг̇г̇ан̣ханд̇о д̇збидаго худ̇ваа сийлаад̣̇ийнам̣ ааг̇ад̇адтаанз д̇ам̣ д̇ам̣ буурзнд̇о нажирассзва арахад̇д̇ам̣ бад̇ваа махаад̇хаммагат̇иго худ̇ваа вийсавассасад̇ам̣ тад̇ваа сагалаж̇амб̣уд̣̇ийбам̣ кобхзд̇ваа бариниб̣б̣ааяи. бан̃жамам̣.
Idānissa gharāvāse ādīnavaṃ dassentī kukkuḷātiādimāha. Tattha kukkuḷāti gharāvāso kira uṇhaṭṭhena kukkuḷā nāma hoti. Kassa ujjhāpayāmaseti – ‘‘abhidhāvatha, bhaddaṃ te hotū’’ti evaṃ vatvā – ‘‘yaṃ tvaṃ vibbhamitukāmo yakkhena pāpito, imaṃ vippakāraṃ kassa mayaṃ ujjhāpayāma nijjhāpayāma ārocayāmā’’ti vadati. Puna ḍayhitumicchasītiādittagharato nīhaṭabhaṇḍaṃ viya gharā nīharitvā buddhasāsane pabbajito puna mahāḍāhasadise gharāvāse ḍayhituṃ icchasīti attho. So mātari kathentiyā kathentiyā sallakkhetvā hirottappaṃ paṭilabhitvā, ‘‘natthi mayhaṃ gihibhāvena attho’’ti āha. Athassa mātā ‘‘sādhu, tātā’’ti tuṭṭhā paṇītabhojanaṃ bhojetvā, ‘‘kati vassosi, tātā’’ti pucchi. Paripuṇṇavassomhi upāsiketi. ‘‘Tena hi, tāta, upasampadaṃ karohī’’ti cīvarasāṭake adāsi. So ticīvaraṃ kārāpetvā upasampanno buddhavacanaṃ uggaṇhanto tepiṭako hutvā sīlādīnaṃ āgataṭṭhāne taṃ taṃ pūrento nacirasseva arahattaṃ patvā mahādhammakathiko hutvā vīsavassasataṃ ṭhatvā sakalajambudīpaṃ khobhetvā parinibbāyi. Pañcamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 5. саанусуд̇д̇ам̣ • 5. Sānusuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 5. саанусуд̇д̇аван̣н̣анаа • 5. Sānusuttavaṇṇanā
