| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. સપ્પુરિસદાનસુત્તં
8. Sappurisadānasuttaṃ
૧૪૮. ‘‘પઞ્ચિમાનિ , ભિક્ખવે, સપ્પુરિસદાનાનિ. કતમાનિ પઞ્ચ? સદ્ધાય દાનં દેતિ, સક્કચ્ચં દાનં દેતિ, કાલેન દાનં દેતિ, અનુગ્ગહિતચિત્તો 1 દાનં દેતિ, અત્તાનઞ્ચ પરઞ્ચ અનુપહચ્ચ દાનં દેતિ.
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘સદ્ધાય ખો પન, ભિક્ખવે, દાનં દત્વા યત્થ યત્થ તસ્સ દાનસ્સ વિપાકો નિબ્બત્તતિ, અડ્ઢો ચ હોતિ મહદ્ધનો મહાભોગો, અભિરૂપો ચ હોતિ દસ્સનીયો પાસાદિકો પરમાય વણ્ણપોક્ખરતાય સમન્નાગતો.
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘સક્કચ્ચં ખો પન, ભિક્ખવે, દાનં દત્વા યત્થ યત્થ તસ્સ દાનસ્સ વિપાકો નિબ્બત્તતિ, અડ્ઢો ચ હોતિ મહદ્ધનો મહાભોગો. યેપિસ્સ તે હોન્તિ પુત્તાતિ વા દારાતિ વા દાસાતિ વા પેસ્સાતિ વા કમ્મકરાતિ 3 વા, તેપિ સુસ્સૂસન્તિ સોતં ઓદહન્તિ અઞ્ઞા ચિત્તં ઉપટ્ઠપેન્તિ.
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘કાલેન ખો પન, ભિક્ખવે, દાનં દત્વા યત્થ યત્થ તસ્સ દાનસ્સ વિપાકો નિબ્બત્તતિ, અડ્ઢો ચ હોતિ મહદ્ધનો મહાભોગો; કાલાગતા ચસ્સ અત્થા પચુરા હોન્તિ.
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘અનુગ્ગહિતચિત્તો ખો પન, ભિક્ખવે, દાનં દત્વા યત્થ યત્થ તસ્સ દાનસ્સ વિપાકો નિબ્બત્તતિ, અડ્ઢો ચ હોતિ મહદ્ધનો મહાભોગો; ઉળારેસુ ચ પઞ્ચસુ કામગુણેસુ ભોગાય ચિત્તં નમતિ.
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘અત્તાનઞ્ચ પરઞ્ચ અનુપહચ્ચ ખો પન, ભિક્ખવે, દાનં દત્વા યત્થ યત્થ તસ્સ દાનસ્સ વિપાકો નિબ્બત્તતિ, અડ્ઢો ચ હોતિ મહદ્ધનો મહાભોગો; ન ચસ્સ કુતોચિ ભોગાનં ઉપઘાતો આગચ્છતિ અગ્ગિતો વા ઉદકતો વા રાજતો વા ચોરતો વા અપ્પિયતો વા દાયાદતો વા 5. ઇમાનિ ખો, ભિક્ખવે, પઞ્ચ સપ્પુરિસદાનાની’’તિ. અટ્ઠમં.
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૮. સપ્પુરિસદાનસુત્તવણ્ણના • 8. Sappurisadānasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭-૧૦. અસપ્પુરિસદાનસુત્તાદિવણ્ણના • 7-10. Asappurisadānasuttādivaṇṇanā
