| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೮. ಸಪ್ಪುರಿಸದಾನಸುತ್ತಂ
8. Sappurisadānasuttaṃ
೧೪೮. ‘‘ಪಞ್ಚಿಮಾನಿ , ಭಿಕ್ಖವೇ, ಸಪ್ಪುರಿಸದಾನಾನಿ। ಕತಮಾನಿ ಪಞ್ಚ? ಸದ್ಧಾಯ ದಾನಂ ದೇತಿ, ಸಕ್ಕಚ್ಚಂ ದಾನಂ ದೇತಿ, ಕಾಲೇನ ದಾನಂ ದೇತಿ, ಅನುಗ್ಗಹಿತಚಿತ್ತೋ 1 ದಾನಂ ದೇತಿ, ಅತ್ತಾನಞ್ಚ ಪರಞ್ಚ ಅನುಪಹಚ್ಚ ದಾನಂ ದೇತಿ।
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘ಸದ್ಧಾಯ ಖೋ ಪನ, ಭಿಕ್ಖವೇ, ದಾನಂ ದತ್ವಾ ಯತ್ಥ ಯತ್ಥ ತಸ್ಸ ದಾನಸ್ಸ ವಿಪಾಕೋ ನಿಬ್ಬತ್ತತಿ, ಅಡ್ಢೋ ಚ ಹೋತಿ ಮಹದ್ಧನೋ ಮಹಾಭೋಗೋ, ಅಭಿರೂಪೋ ಚ ಹೋತಿ ದಸ್ಸನೀಯೋ ಪಾಸಾದಿಕೋ ಪರಮಾಯ ವಣ್ಣಪೋಕ್ಖರತಾಯ ಸಮನ್ನಾಗತೋ।
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘ಸಕ್ಕಚ್ಚಂ ಖೋ ಪನ, ಭಿಕ್ಖವೇ, ದಾನಂ ದತ್ವಾ ಯತ್ಥ ಯತ್ಥ ತಸ್ಸ ದಾನಸ್ಸ ವಿಪಾಕೋ ನಿಬ್ಬತ್ತತಿ, ಅಡ್ಢೋ ಚ ಹೋತಿ ಮಹದ್ಧನೋ ಮಹಾಭೋಗೋ। ಯೇಪಿಸ್ಸ ತೇ ಹೋನ್ತಿ ಪುತ್ತಾತಿ ವಾ ದಾರಾತಿ ವಾ ದಾಸಾತಿ ವಾ ಪೇಸ್ಸಾತಿ ವಾ ಕಮ್ಮಕರಾತಿ 3 ವಾ, ತೇಪಿ ಸುಸ್ಸೂಸನ್ತಿ ಸೋತಂ ಓದಹನ್ತಿ ಅಞ್ಞಾ ಚಿತ್ತಂ ಉಪಟ್ಠಪೇನ್ತಿ।
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘ಕಾಲೇನ ಖೋ ಪನ, ಭಿಕ್ಖವೇ, ದಾನಂ ದತ್ವಾ ಯತ್ಥ ಯತ್ಥ ತಸ್ಸ ದಾನಸ್ಸ ವಿಪಾಕೋ ನಿಬ್ಬತ್ತತಿ, ಅಡ್ಢೋ ಚ ಹೋತಿ ಮಹದ್ಧನೋ ಮಹಾಭೋಗೋ; ಕಾಲಾಗತಾ ಚಸ್ಸ ಅತ್ಥಾ ಪಚುರಾ ಹೋನ್ತಿ।
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘ಅನುಗ್ಗಹಿತಚಿತ್ತೋ ಖೋ ಪನ, ಭಿಕ್ಖವೇ, ದಾನಂ ದತ್ವಾ ಯತ್ಥ ಯತ್ಥ ತಸ್ಸ ದಾನಸ್ಸ ವಿಪಾಕೋ ನಿಬ್ಬತ್ತತಿ, ಅಡ್ಢೋ ಚ ಹೋತಿ ಮಹದ್ಧನೋ ಮಹಾಭೋಗೋ; ಉಳಾರೇಸು ಚ ಪಞ್ಚಸು ಕಾಮಗುಣೇಸು ಭೋಗಾಯ ಚಿತ್ತಂ ನಮತಿ।
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘ಅತ್ತಾನಞ್ಚ ಪರಞ್ಚ ಅನುಪಹಚ್ಚ ಖೋ ಪನ, ಭಿಕ್ಖವೇ, ದಾನಂ ದತ್ವಾ ಯತ್ಥ ಯತ್ಥ ತಸ್ಸ ದಾನಸ್ಸ ವಿಪಾಕೋ ನಿಬ್ಬತ್ತತಿ, ಅಡ್ಢೋ ಚ ಹೋತಿ ಮಹದ್ಧನೋ ಮಹಾಭೋಗೋ; ನ ಚಸ್ಸ ಕುತೋಚಿ ಭೋಗಾನಂ ಉಪಘಾತೋ ಆಗಚ್ಛತಿ ಅಗ್ಗಿತೋ ವಾ ಉದಕತೋ ವಾ ರಾಜತೋ ವಾ ಚೋರತೋ ವಾ ಅಪ್ಪಿಯತೋ ವಾ ದಾಯಾದತೋ ವಾ 5। ಇಮಾನಿ ಖೋ, ಭಿಕ್ಖವೇ, ಪಞ್ಚ ಸಪ್ಪುರಿಸದಾನಾನೀ’’ತಿ। ಅಟ್ಠಮಂ।
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೮. ಸಪ್ಪುರಿಸದಾನಸುತ್ತವಣ್ಣನಾ • 8. Sappurisadānasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭-೧೦. ಅಸಪ್ಪುರಿಸದಾನಸುತ್ತಾದಿವಣ್ಣನಾ • 7-10. Asappurisadānasuttādivaṇṇanā
