| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೩. ಸಪ್ಪುರಿಸಧಮ್ಮಸುತ್ತವಣ್ಣನಾ
3. Sappurisadhammasuttavaṇṇanā
೧೦೫. ಏವಂ ಮೇ ಸುತನ್ತಿ ಸಪ್ಪುರಿಸಧಮ್ಮಸುತ್ತಂ। ತತ್ಥ ಸಪ್ಪುರಿಸಧಮ್ಮನ್ತಿ ಸಪ್ಪುರಿಸಾನಂ ಧಮ್ಮಂ। ಅಸಪ್ಪುರಿಸಧಮ್ಮನ್ತಿ ಪಾಪಪುರಿಸಾನಂ ಧಮ್ಮಂ। ಏವಂ ಮಾತಿಕಂ ಠಪೇತ್ವಾಪಿ ಪುನ ಯಥಾ ನಾಮ ಮಗ್ಗಕುಸಲೋ ಪುರಿಸೋ ವಾಮಂ ಮುಞ್ಚಿತ್ವಾ ದಕ್ಖಿಣಂ ಗಣ್ಹಾತಿ। ಪಠಮಂ ಮುಞ್ಚಿತಬ್ಬಂ ಕಥೇತಿ, ಏವಂ ಪಹಾತಬ್ಬಂ ಧಮ್ಮಂ ಪಠಮಂ ದೇಸೇನ್ತೋ ಕತಮೋ ಚ, ಭಿಕ್ಖವೇ, ಅಸಪ್ಪುರಿಸಧಮ್ಮೋತಿಆದಿಮಾಹ। ತತ್ಥ ಉಚ್ಚಾಕುಲಾತಿ ಖತ್ತಿಯಕುಲಾ ವಾ ಬ್ರಾಹ್ಮಣಕುಲಾ ವಾ। ಏತದೇವ ಹಿ ಕುಲದ್ವಯಂ ‘‘ಉಚ್ಚಾಕುಲ’’ನ್ತಿ ವುಚ್ಚತಿ। ಸೋ ತತ್ಥ ಪುಜ್ಜೋತಿ ಸೋ ಭಿಕ್ಖು ತೇಸು ಭಿಕ್ಖೂಸು ಪೂಜಾರಹೋ। ಅನ್ತರಂ ಕರಿತ್ವಾತಿ ಅಬ್ಭನ್ತರಂ ಕತ್ವಾ।
105.Evaṃme sutanti sappurisadhammasuttaṃ. Tattha sappurisadhammanti sappurisānaṃ dhammaṃ. Asappurisadhammanti pāpapurisānaṃ dhammaṃ. Evaṃ mātikaṃ ṭhapetvāpi puna yathā nāma maggakusalo puriso vāmaṃ muñcitvā dakkhiṇaṃ gaṇhāti. Paṭhamaṃ muñcitabbaṃ katheti, evaṃ pahātabbaṃ dhammaṃ paṭhamaṃ desento katamo ca, bhikkhave, asappurisadhammotiādimāha. Tattha uccākulāti khattiyakulā vā brāhmaṇakulā vā. Etadeva hi kuladvayaṃ ‘‘uccākula’’nti vuccati. So tattha pujjoti so bhikkhu tesu bhikkhūsu pūjāraho. Antaraṃ karitvāti abbhantaraṃ katvā.
ಮಹಾಕುಲಾತಿ ಖತ್ತಿಯಕುಲಾ ವಾ ಬ್ರಾಹ್ಮಣಕುಲಾ ವಾ ವೇಸ್ಸಕುಲಾ ವಾ। ಇದಮೇವ ಹಿ ಕುಲತ್ತಯಂ ‘‘ಮಹಾಕುಲ’’ನ್ತಿ ವುಚ್ಚತಿ। ಮಹಾಭೋಗಕುಲಾತಿ ಮಹನ್ತೇಹಿ ಭೋಗೇಹಿ ಸಮನ್ನಾಗತಾ ಕುಲಾ। ಉಳಾರಭೋಗಕುಲಾತಿ ಉಳಾರೇಹಿ ಪಣೀತೇಹಿ ಭೋಗೇಹಿ ಸಮ್ಪನ್ನಕುಲಾ। ಇಮಸ್ಮಿಂ ಪದದ್ವಯೇ ಚತ್ತಾರಿಪಿ ಕುಲಾನಿ ಲಬ್ಭನ್ತಿ। ಯತ್ಥ ಕತ್ಥಚಿ ಕುಲೇ ಜಾತೋ ಹಿ ಪುಞ್ಞಬಲೇಹಿ ಮಹಾಭೋಗೋಪಿ ಉಳಾರಭೋಗೋಪಿ ಹೋತಿಯೇವ।
Mahākulāti khattiyakulā vā brāhmaṇakulā vā vessakulā vā. Idameva hi kulattayaṃ ‘‘mahākula’’nti vuccati. Mahābhogakulāti mahantehi bhogehi samannāgatā kulā. Uḷārabhogakulāti uḷārehi paṇītehi bhogehi sampannakulā. Imasmiṃ padadvaye cattāripi kulāni labbhanti. Yattha katthaci kule jāto hi puññabalehi mahābhogopi uḷārabhogopi hotiyeva.
೧೦೬. ಯಸಸ್ಸೀತಿ ಪರಿವಾರಸಮ್ಪನ್ನೋ। ಅಪ್ಪಞ್ಞಾತಾತಿ ರತ್ತಿಂ ಖಿತ್ತಸರಾ ವಿಯ ಸಙ್ಘಮಜ್ಝಾದೀಸು ನ ಪಞ್ಞಾಯನ್ತಿ। ಅಪ್ಪೇಸಕ್ಖಾತಿ ಅಪ್ಪಪರಿವಾರಾ।
106.Yasassīti parivārasampanno. Appaññātāti rattiṃ khittasarā viya saṅghamajjhādīsu na paññāyanti. Appesakkhāti appaparivārā.
೧೦೭. ಆರಞ್ಞಿಕೋತಿ ಸಮಾದಿನ್ನಆರಞ್ಞಿಕಧುತಙ್ಗೋ। ಸೇಸಧುತಙ್ಗೇಸುಪಿ ಏಸೇವ ನಯೋ। ಇಮಸ್ಮಿಞ್ಚ ಸುತ್ತೇ ಪಾಳಿಯಂ ನವೇವ ಧುತಙ್ಗಾನಿ ಆಗತಾನಿ, ವಿತ್ಥಾರೇನ ಪನೇತಾನಿ ತೇರಸ ಹೋನ್ತಿ। ತೇಸು ಯಂ ವತ್ತಬ್ಬಂ, ತಂ ಸಬ್ಬಂ ಸಬ್ಬಾಕಾರೇನ ವಿಸುದ್ಧಿಮಗ್ಗೇ ಧುತಙ್ಗನಿದ್ದೇಸೇ ವುತ್ತಮೇವ।
107.Āraññikoti samādinnaāraññikadhutaṅgo. Sesadhutaṅgesupi eseva nayo. Imasmiñca sutte pāḷiyaṃ naveva dhutaṅgāni āgatāni, vitthārena panetāni terasa honti. Tesu yaṃ vattabbaṃ, taṃ sabbaṃ sabbākārena visuddhimagge dhutaṅganiddese vuttameva.
೧೦೮. ಅತಮ್ಮಯತಾತಿ ತಮ್ಮಯತಾ ವುಚ್ಚತಿ ತಣ್ಹಾ, ನಿತ್ತಣ್ಹಾತಿ ಅತ್ಥೋ। ಅತಮ್ಮಯತಞ್ಞೇವ ಅನ್ತರಂ ಕರಿತ್ವಾತಿ ನಿತ್ತಣ್ಹತಂಯೇವ ಕಾರಣಂ ಕತ್ವಾ ಅಬ್ಭನ್ತರಂ ವಾ ಕತ್ವಾ, ಚಿತ್ತೇ ಉಪ್ಪಾದೇತ್ವಾತಿ ಅತ್ಥೋ।
108.Atammayatāti tammayatā vuccati taṇhā, nittaṇhāti attho. Atammayataññeva antaraṃ karitvāti nittaṇhataṃyeva kāraṇaṃ katvā abbhantaraṃ vā katvā, citte uppādetvāti attho.
ನಿರೋಧವಾರೇ ಯಸ್ಮಾ ಅನಾಗಾಮಿಖೀಣಾಸವಾವ ತಂ ಸಮಾಪತ್ತಿಂ ಸಮಾಪಜ್ಜನ್ತಿ, ಪುಥುಜ್ಜನಸ್ಸ ಸಾ ನತ್ಥಿ, ತಸ್ಮಾ ಅಸಪ್ಪುರಿಸವಾರೋ ಪರಿಹೀನೋ। ನ ಕಞ್ಚಿ ಮಞ್ಞತೀತಿ ಕಞ್ಚಿ ಪುಗ್ಗಲಂ ತೀಹಿ ಮಞ್ಞನಾಹಿ ನ ಮಞ್ಞತಿ। ನ ಕುಹಿಞ್ಚಿ ಮಞ್ಞತೀತಿ ಕಿಸ್ಮಿಞ್ಚಿ ಓಕಾಸೇ ನ ಮಞ್ಞತಿ। ನ ಕೇನಚಿ ಮಞ್ಞತೀತಿ ಕೇನಚಿ ವತ್ಥುನಾಪಿ ತಂ ಪುಗ್ಗಲಂ ನ ಮಞ್ಞತಿ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
Nirodhavāre yasmā anāgāmikhīṇāsavāva taṃ samāpattiṃ samāpajjanti, puthujjanassa sā natthi, tasmā asappurisavāro parihīno. Na kañci maññatīti kañci puggalaṃ tīhi maññanāhi na maññati. Nakuhiñci maññatīti kismiñci okāse na maññati. Na kenaci maññatīti kenaci vatthunāpi taṃ puggalaṃ na maññati. Sesaṃ sabbattha uttānamevāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಸಪ್ಪುರಿಸಧಮ್ಮಸುತ್ತವಣ್ಣನಾ ನಿಟ್ಠಿತಾ।
Sappurisadhammasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೩. ಸಪ್ಪುರಿಸಸುತ್ತಂ • 3. Sappurisasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೩. ಸಪ್ಪುರಿಸಧಮ್ಮಸುತ್ತವಣ್ಣನಾ • 3. Sappurisadhammasuttavaṇṇanā
