| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಸರಭಸುತ್ತಂ
4. Sarabhasuttaṃ
೬೫. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ। ತೇನ ಖೋ ಪನ ಸಮಯೇನ ಸರಭೋ ನಾಮ ಪರಿಬ್ಬಾಜಕೋ ಅಚಿರಪಕ್ಕನ್ತೋ ಹೋತಿ ಇಮಸ್ಮಾ ಧಮ್ಮವಿನಯಾ। ಸೋ ರಾಜಗಹೇ ಪರಿಸತಿ 1 ಏವಂ ವಾಚಂ ಭಾಸತಿ – ‘‘ಅಞ್ಞಾತೋ ಮಯಾ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ। ಅಞ್ಞಾಯ ಚ ಪನಾಹಂ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮಂ ಏವಾಹಂ ತಸ್ಮಾ ಧಮ್ಮವಿನಯಾ ಅಪಕ್ಕನ್ತೋ’’ತಿ। ಅಥ ಖೋ ಸಮ್ಬಹುಲಾ ಭಿಕ್ಖೂ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ರಾಜಗಹಂ ಪಿಣ್ಡಾಯ ಪವಿಸಿಂಸು। ಅಸ್ಸೋಸುಂ ಖೋ ತೇ ಭಿಕ್ಖೂ ಸರಭಸ್ಸ ಪರಿಬ್ಬಾಜಕಸ್ಸ ರಾಜಗಹೇ ಪರಿಸತಿ ಏವಂ ವಾಚಂ ಭಾಸಮಾನಸ್ಸ – ‘‘ಅಞ್ಞಾತೋ ಮಯಾ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ। ಅಞ್ಞಾಯ ಚ ಪನಾಹಂ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮಂ ಏವಾಹಂ ತಸ್ಮಾ ಧಮ್ಮವಿನಯಾ ಅಪಕ್ಕನ್ತೋ’’ತಿ।
65. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sarabho nāma paribbājako acirapakkanto hoti imasmā dhammavinayā. So rājagahe parisati 2 evaṃ vācaṃ bhāsati – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti. Atha kho sambahulā bhikkhū pubbaṇhasamayaṃ nivāsetvā pattacīvaramādāya rājagahaṃ piṇḍāya pavisiṃsu. Assosuṃ kho te bhikkhū sarabhassa paribbājakassa rājagahe parisati evaṃ vācaṃ bhāsamānassa – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti.
ಅಥ ಖೋ ತೇ ಭಿಕ್ಖೂ ರಾಜಗಹೇ ಪಿಣ್ಡಾಯ ಚರಿತ್ವಾ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತಾ ಯೇನ ಭಗವಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ಏಕಮನ್ತಂ ನಿಸಿನ್ನಾ ಖೋ ತೇ ಭಿಕ್ಖೂ ಭಗವನ್ತಂ ಏತದವೋಚುಂ – ‘‘ಸರಭೋ ನಾಮ, ಭನ್ತೇ, ಪರಿಬ್ಬಾಜಕೋ ಅಚಿರಪಕ್ಕನ್ತೋ ಇಮಸ್ಮಾ ಧಮ್ಮವಿನಯಾ। ಸೋ ರಾಜಗಹೇ ಪರಿಸತಿ ಏವಂ ವಾಚಂ ಭಾಸತಿ – ‘ಅಞ್ಞಾತೋ ಮಯಾ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ। ಅಞ್ಞಾಯ ಚ ಪನಾಹಂ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮಂ ಏವಾಹಂ ತಸ್ಮಾ ಧಮ್ಮವಿನಯಾ ಅಪಕ್ಕನ್ತೋ’ತಿ। ಸಾಧು ಭನ್ತೇ, ಭಗವಾ ಯೇನ ಸಿಪ್ಪಿನಿಕಾತೀರಂ 3 ಪರಿಬ್ಬಾಜಕಾರಾಮೋ ಯೇನ ಸರಭೋ ಪರಿಬ್ಬಾಜಕೋ ತೇನುಪಸಙ್ಕಮತು ಅನುಕಮ್ಪಂ ಉಪಾದಾಯಾ’’ತಿ। ಅಧಿವಾಸೇಸಿ ಭಗವಾ ತುಣ್ಹೀಭಾವೇನ।
Atha kho te bhikkhū rājagahe piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘sarabho nāma, bhante, paribbājako acirapakkanto imasmā dhammavinayā. So rājagahe parisati evaṃ vācaṃ bhāsati – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’ti. Sādhu bhante, bhagavā yena sippinikātīraṃ 4 paribbājakārāmo yena sarabho paribbājako tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena.
ಅಥ ಖೋ ಭಗವಾ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನ ಸಿಪ್ಪಿನಿಕಾತೀರಂ ಪರಿಬ್ಬಾಜಕಾರಾಮೋ ಯೇನ ಸರಭೋ ಪರಿಬ್ಬಾಜಕೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ । ನಿಸಜ್ಜ ಖೋ ಭಗವಾ ಸರಭಂ ಪರಿಬ್ಬಾಜಕಂ ಏತದವೋಚ – ‘‘ಸಚ್ಚಂ ಕಿರ ತ್ವಂ, ಸರಭ, ಏವಂ ವದೇಸಿ – ‘ಅಞ್ಞಾತೋ ಮಯಾ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ। ಅಞ್ಞಾಯ ಚ ಪನಾಹಂ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮಂ ಏವಾಹಂ ತಸ್ಮಾ ಧಮ್ಮವಿನಯಾ ಅಪಕ್ಕನ್ತೋ’’’ತಿ? ಏವಂ ವುತ್ತೇ ಸರಭೋ ಪರಿಬ್ಬಾಜಕೋ ತುಣ್ಹೀ ಅಹೋಸಿ।
Atha kho bhagavā sāyanhasamayaṃ paṭisallānā vuṭṭhito yena sippinikātīraṃ paribbājakārāmo yena sarabho paribbājako tenupasaṅkami; upasaṅkamitvā paññatte āsane nisīdi . Nisajja kho bhagavā sarabhaṃ paribbājakaṃ etadavoca – ‘‘saccaṃ kira tvaṃ, sarabha, evaṃ vadesi – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’’ti? Evaṃ vutte sarabho paribbājako tuṇhī ahosi.
ದುತಿಯಮ್ಪಿ ಖೋ, ಭಗವಾ ಸರಭಂ ಪರಿಬ್ಬಾಜಕಂ ಏತದವೋಚ – ‘‘ವದೇಹಿ, ಸರಭ, ಕಿನ್ತಿ ತೇ ಅಞ್ಞಾತೋ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ? ಸಚೇ ತೇ ಅಪರಿಪೂರಂ ಭವಿಸ್ಸತಿ, ಅಹಂ ಪರಿಪೂರೇಸ್ಸಾಮಿ। ಸಚೇ ಪನ ತೇ ಪರಿಪೂರಂ ಭವಿಸ್ಸತಿ, ಅಹಂ ಅನುಮೋದಿಸ್ಸಾಮೀ’’ತಿ। ದುತಿಯಮ್ಪಿ ಖೋ ಸರಭೋ ಪರಿಬ್ಬಾಜಕೋ ತುಣ್ಹೀ ಅಹೋಸಿ।
Dutiyampi kho, bhagavā sarabhaṃ paribbājakaṃ etadavoca – ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Dutiyampi kho sarabho paribbājako tuṇhī ahosi.
ತತಿಯಮ್ಪಿ ಖೋ ಭಗವಾ ಸರಭಂ ಪರಿಬ್ಬಾಜಕಂ ಏತದವೋಚ – (‘‘ಯೋ 5 ಖೋ ಸರಭ ಪಞ್ಞಾಯತಿ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ) 6 ‘‘ವದೇಹಿ, ಸರಭ, ಕಿನ್ತಿ ತೇ ಅಞ್ಞಾತೋ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ? ಸಚೇ ತೇ ಅಪರಿಪೂರಂ ಭವಿಸ್ಸತಿ, ಅಹಂ ಪರಿಪೂರೇಸ್ಸಾಮಿ। ಸಚೇ ಪನ ತೇ ಪರಿಪೂರಂ ಭವಿಸ್ಸತಿ, ಅಹಂ ಅನುಮೋದಿಸ್ಸಾಮೀ’’ತಿ। ತತಿಯಮ್ಪಿ ಖೋ ಸರಭೋ ಪರಿಬ್ಬಾಜಕೋ ತುಣ್ಹೀ ಅಹೋಸಿ।
Tatiyampi kho bhagavā sarabhaṃ paribbājakaṃ etadavoca – (‘‘yo 7 kho sarabha paññāyati samaṇānaṃ sakyaputtikānaṃ dhammo) 8 ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Tatiyampi kho sarabho paribbājako tuṇhī ahosi.
ಅಥ ಖೋ ತೇ ಪರಿಬ್ಬಾಜಕಾ ಸರಭಂ ಪರಿಬ್ಬಾಜಕಂ ಏತದವೋಚುಂ – ‘‘ಯದೇವ ಖೋ ತ್ವಂ, ಆವುಸೋ ಸರಭ, ಸಮಣಂ ಗೋತಮಂ ಯಾಚೇಯ್ಯಾಸಿ ತದೇವ ತೇ ಸಮಣೋ ಗೋತಮೋ ಪವಾರೇತಿ। ವದೇಹಾವುಸೋ ಸರಭ, ಕಿನ್ತಿ ತೇ ಅಞ್ಞಾತೋ ಸಮಣಾನಂ ಸಕ್ಯಪುತ್ತಿಕಾನಂ ಧಮ್ಮೋ? ಸಚೇ ತೇ ಅಪರಿಪೂರಂ ಭವಿಸ್ಸತಿ, ಸಮಣೋ ಗೋತಮೋ ಪರಿಪೂರೇಸ್ಸತಿ। ಸಚೇ ಪನ ತೇ ಪರಿಪೂರಂ ಭವಿಸ್ಸತಿ, ಸಮಣೋ ಗೋತಮೋ ಅನುಮೋದಿಸ್ಸತೀ’’ತಿ। ಏವಂ ವುತ್ತೇ ಸರಭೋ ಪರಿಬ್ಬಾಜಕೋ ತುಣ್ಹೀಭೂತೋ ಮಙ್ಕುಭೂತೋ ಪತ್ತಕ್ಖನ್ಧೋ ಅಧೋಮುಖೋ ಪಜ್ಝಾಯನ್ತೋ ಅಪ್ಪಟಿಭಾನೋ ನಿಸೀದಿ।
Atha kho te paribbājakā sarabhaṃ paribbājakaṃ etadavocuṃ – ‘‘yadeva kho tvaṃ, āvuso sarabha, samaṇaṃ gotamaṃ yāceyyāsi tadeva te samaṇo gotamo pavāreti. Vadehāvuso sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, samaṇo gotamo paripūressati. Sace pana te paripūraṃ bhavissati, samaṇo gotamo anumodissatī’’ti. Evaṃ vutte sarabho paribbājako tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi.
ಅಥ ಖೋ ಭಗವಾ ಸರಭಂ ಪರಿಬ್ಬಾಜಕಂ ತುಣ್ಹೀಭೂತಂ ಮಙ್ಕುಭೂತಂ ಪತ್ತಕ್ಖನ್ಧಂ ಅಧೋಮುಖಂ ಪಜ್ಝಾಯನ್ತಂ ಅಪ್ಪಟಿಭಾನಂ ವಿದಿತ್ವಾ ತೇ ಪರಿಬ್ಬಾಜಕೇ ಏತದವೋಚ –
Atha kho bhagavā sarabhaṃ paribbājakaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhānaṃ viditvā te paribbājake etadavoca –
‘‘ಯೋ ಖೋ ಮಂ, ಪರಿಬ್ಬಾಜಕಾ 9, ಏವಂ ವದೇಯ್ಯ – ‘ಸಮ್ಮಾಸಮ್ಬುದ್ಧಸ್ಸ ತೇ ಪಟಿಜಾನತೋ ಇಮೇ ಧಮ್ಮಾ ಅನಭಿಸಮ್ಬುದ್ಧಾ’ತಿ, ತಮಹಂ ತತ್ಥ ಸಾಧುಕಂ ಸಮನುಯುಞ್ಜೇಯ್ಯಂ ಸಮನುಗಾಹೇಯ್ಯಂ ಸಮನುಭಾಸೇಯ್ಯಂ। ಸೋ ವತ ಮಯಾ ಸಾಧುಕಂ ಸಮನುಯುಞ್ಜಿಯಮಾನೋ ಸಮನುಗಾಹಿಯಮಾನೋ ಸಮನುಭಾಸಿಯಮಾನೋ ಅಟ್ಠಾನಮೇತಂ ಅನವಕಾಸೋ ಯಂ ಸೋ ತಿಣ್ಣಂ ಠಾನಾನಂ ನಾಞ್ಞತರಂ 10 ಠಾನಂ ನಿಗಚ್ಛೇಯ್ಯ, ಅಞ್ಞೇನ ವಾ ಅಞ್ಞಂ ಪಟಿಚರಿಸ್ಸತಿ, ಬಹಿದ್ಧಾ ಕಥಂ ಅಪನಾಮೇಸ್ಸತಿ, ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರಿಸ್ಸತಿ, ತುಣ್ಹೀಭೂತೋ ಮಙ್ಕುಭೂತೋ 11 ಪತ್ತಕ್ಖನ್ಧೋ ಅಧೋಮುಖೋ ಪಜ್ಝಾಯನ್ತೋ ಅಪ್ಪಟಿಭಾನೋ ನಿಸೀದಿಸ್ಸತಿ, ಸೇಯ್ಯಥಾಪಿ ಸರಭೋ ಪರಿಬ್ಬಾಜಕೋ।
‘‘Yo kho maṃ, paribbājakā 12, evaṃ vadeyya – ‘sammāsambuddhassa te paṭijānato ime dhammā anabhisambuddhā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ 13 ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto 14 pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
‘‘ಯೋ ಖೋ ಮಂ, ಪರಿಬ್ಬಾಜಕಾ, ಏವಂ ವದೇಯ್ಯ – ‘ಖೀಣಾಸವಸ್ಸ ತೇ ಪಟಿಜಾನತೋ ಇಮೇ ಆಸವಾ ಅಪರಿಕ್ಖೀಣಾ’ತಿ, ತಮಹಂ ತತ್ಥ ಸಾಧುಕಂ ಸಮನುಯುಞ್ಜೇಯ್ಯಂ ಸಮನುಗಾಹೇಯ್ಯಂ ಸಮನುಭಾಸೇಯ್ಯಂ। ಸೋ ವತ ಮಯಾ ಸಾಧುಕಂ ಸಮನುಯುಞ್ಜಿಯಮಾನೋ ಸಮನುಗಾಹಿಯಮಾನೋ ಸಮನುಭಾಸಿಯಮಾನೋ ಅಟ್ಠಾನಮೇತಂ ಅನವಕಾಸೋ ಯಂ ಸೋ ತಿಣ್ಣಂ ಠಾನಾನಂ ನಾಞ್ಞತರಂ ಠಾನಂ ನಿಗಚ್ಛೇಯ್ಯ, ಅಞ್ಞೇನ ವಾ ಅಞ್ಞಂ ಪಟಿಚರಿಸ್ಸತಿ, ಬಹಿದ್ಧಾ ಕಥಂ ಅಪನಾಮೇಸ್ಸತಿ, ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರಿಸ್ಸತಿ, ತುಣ್ಹೀಭೂತೋ ಮಙ್ಕುಭೂತೋ ಪತ್ತಕ್ಖನ್ಧೋ ಅಧೋಮುಖೋ ಪಜ್ಝಾಯನ್ತೋ ಅಪ್ಪಟಿಭಾನೋ ನಿಸೀದಿಸ್ಸತಿ, ಸೇಯ್ಯಥಾಪಿ ಸರಭೋ ಪರಿಬ್ಬಾಜಕೋ।
‘‘Yo kho maṃ, paribbājakā, evaṃ vadeyya – ‘khīṇāsavassa te paṭijānato ime āsavā aparikkhīṇā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
‘‘ಯೋ ಖೋ ಮಂ, ಪರಿಬ್ಬಾಜಕಾ, ಏವಂ ವದೇಯ್ಯ – ‘ಯಸ್ಸ ಖೋ ಪನ ತೇ ಅತ್ಥಾಯ ಧಮ್ಮೋ ದೇಸಿತೋ, ಸೋ ನ ನಿಯ್ಯಾತಿ ತಕ್ಕರಸ್ಸ ಸಮ್ಮಾ ದುಕ್ಖಕ್ಖಯಾಯಾ’ತಿ, ತಮಹಂ ತತ್ಥ ಸಾಧುಕಂ ಸಮನುಯುಞ್ಜೇಯ್ಯಂ ಸಮನುಗಾಹೇಯ್ಯಂ ಸಮನುಭಾಸೇಯ್ಯಂ। ಸೋ ವತ ಮಯಾ ಸಾಧುಕಂ ಸಮನುಯುಞ್ಜಿಯಮಾನೋ ಸಮನುಗಾಹಿಯಮಾನೋ ಸಮನುಭಾಸಿಯಮಾನೋ ಅಟ್ಠಾನಮೇತಂ ಅನವಕಾಸೋ ಯಂ ಸೋ ತಿಣ್ಣಂ ಠಾನಾನಂ ನಾಞ್ಞತರಂ ಠಾನಂ ನಿಗಚ್ಛೇಯ್ಯ, ಅಞ್ಞೇನ ವಾ ಅಞ್ಞಂ ಪಟಿಚರಿಸ್ಸತಿ, ಬಹಿದ್ಧಾ ಕಥಂ ಅಪನಾಮೇಸ್ಸತಿ, ಕೋಪಞ್ಚ ದೋಸಞ್ಚ ಅಪ್ಪಚ್ಚಯಞ್ಚ ಪಾತುಕರಿಸ್ಸತಿ, ತುಣ್ಹೀಭೂತೋ ಮಙ್ಕುಭೂತೋ ಪತ್ತಕ್ಖನ್ಧೋ ಅಧೋಮುಖೋ ಪಜ್ಝಾಯನ್ತೋ ಅಪ್ಪಟಿಭಾನೋ ನಿಸೀದಿಸ್ಸತಿ, ಸೇಯ್ಯಥಾಪಿ ಸರಭೋ ಪರಿಬ್ಬಾಜಕೋ’’ತಿ। ಅಥ ಖೋ ಭಗವಾ ಸಿಪ್ಪಿನಿಕಾತೀರೇ ಪರಿಬ್ಬಾಜಕಾರಾಮೇ ತಿಕ್ಖತ್ತುಂ ಸೀಹನಾದಂ ನದಿತ್ವಾ ವೇಹಾಸಂ ಪಕ್ಕಾಮಿ।
‘‘Yo kho maṃ, paribbājakā, evaṃ vadeyya – ‘yassa kho pana te atthāya dhammo desito, so na niyyāti takkarassa sammā dukkhakkhayāyā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako’’ti. Atha kho bhagavā sippinikātīre paribbājakārāme tikkhattuṃ sīhanādaṃ naditvā vehāsaṃ pakkāmi.
ಅಥ ಖೋ ತೇ ಪರಿಬ್ಬಾಜಕಾ ಅಚಿರಪಕ್ಕನ್ತಸ್ಸ ಭಗವತೋ ಸರಭಂ ಪರಿಬ್ಬಾಜಕಂ ಸಮನ್ತತೋ ವಾಚಾಯಸನ್ನಿತೋದಕೇನ 15 ಸಞ್ಜಮ್ಭರಿಮಕಂಸು 16 – ‘‘ಸೇಯ್ಯಥಾಪಿ, ಆವುಸೋ ಸರಭ, ಬ್ರಹಾರಞ್ಞೇ ಜರಸಿಙ್ಗಾಲೋ ‘ಸೀಹನಾದಂ ನದಿಸ್ಸಾಮೀ’ತಿ ಸಿಙ್ಗಾಲಕಂಯೇವ 17 ನದತಿ, ಭೇರಣ್ಡಕಂಯೇವ ನದತಿ 18; ಏವಮೇವಂ ಖೋ ತ್ವಂ, ಆವುಸೋ ಸರಭ, ಅಞ್ಞತ್ರೇವ ಸಮಣೇನ ಗೋತಮೇನ ‘ಸೀಹನಾದಂ ನದಿಸ್ಸಾಮೀ’ತಿ ಸಿಙ್ಗಾಲಕಂಯೇವ ನದಸಿ ಭೇರಣ್ಡಕಂಯೇವ ನದಸಿ। ಸೇಯ್ಯಥಾಪಿ, ಆವುಸೋ ಸರಭ, ಅಮ್ಬುಕಸಞ್ಚರೀ 19 ‘ಪುರಿಸಕರವಿತಂ 20 ರವಿಸ್ಸಾಮೀ’ತಿ ಅಮ್ಬುಕಸಞ್ಚರಿರವಿತಂಯೇವ ರವತಿ; ಏವಮೇವಂ ಖೋ ತ್ವಂ, ಆವುಸೋ ಸರಭ, ಅಞ್ಞತ್ರೇವ ಸಮಣೇನ ಗೋತಮೇನ ‘ಪುರಿಸಕರವಿತಂ ರವಿಸ್ಸಾಮೀ’ತಿ, ಅಮ್ಬುಕಸಞ್ಚರಿರವಿತಂಯೇವ ರವಸಿ। ಸೇಯ್ಯಥಾಪಿ, ಆವುಸೋ ಸರಭ, ಉಸಭೋ ಸುಞ್ಞಾಯ ಗೋಸಾಲಾಯ ಗಮ್ಭೀರಂ ನದಿತಬ್ಬಂ ಮಞ್ಞತಿ; ಏವಮೇವಂ ಖೋ ತ್ವಂ, ಆವುಸೋ ಸರಭ, ಅಞ್ಞತ್ರೇವ ಸಮಣೇನ ಗೋತಮೇನ ಗಮ್ಭೀರಂ ನದಿತಬ್ಬಂ ಮಞ್ಞಸೀ’’ತಿ। ಅಥ ಖೋ ತೇ ಪರಿಬ್ಬಾಜಕಾ ಸರಭಂ ಪರಿಬ್ಬಾಜಕಂ ಸಮನ್ತತೋ ವಾಚಾಯಸನ್ನಿತೋದಕೇನ ಸಞ್ಜಮ್ಭರಿಮಕಂಸೂತಿ। ಚತುತ್ಥಂ।
Atha kho te paribbājakā acirapakkantassa bhagavato sarabhaṃ paribbājakaṃ samantato vācāyasannitodakena 21 sañjambharimakaṃsu 22 – ‘‘seyyathāpi, āvuso sarabha, brahāraññe jarasiṅgālo ‘sīhanādaṃ nadissāmī’ti siṅgālakaṃyeva 23 nadati, bheraṇḍakaṃyeva nadati 24; evamevaṃ kho tvaṃ, āvuso sarabha, aññatreva samaṇena gotamena ‘sīhanādaṃ nadissāmī’ti siṅgālakaṃyeva nadasi bheraṇḍakaṃyeva nadasi. Seyyathāpi, āvuso sarabha, ambukasañcarī 25 ‘purisakaravitaṃ 26 ravissāmī’ti ambukasañcariravitaṃyeva ravati; evamevaṃ kho tvaṃ, āvuso sarabha, aññatreva samaṇena gotamena ‘purisakaravitaṃ ravissāmī’ti, ambukasañcariravitaṃyeva ravasi. Seyyathāpi, āvuso sarabha, usabho suññāya gosālāya gambhīraṃ naditabbaṃ maññati; evamevaṃ kho tvaṃ, āvuso sarabha, aññatreva samaṇena gotamena gambhīraṃ naditabbaṃ maññasī’’ti. Atha kho te paribbājakā sarabhaṃ paribbājakaṃ samantato vācāyasannitodakena sañjambharimakaṃsūti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಸರಭಸುತ್ತವಣ್ಣನಾ • 4. Sarabhasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪. ಸರಭಸುತ್ತವಣ್ಣನಾ • 4. Sarabhasuttavaṇṇanā
