| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೬. ಸಾರಿಪುತ್ತಸುತ್ತವಣ್ಣನಾ
6. Sāriputtasuttavaṇṇanā
೨೧೪. ವಾಕ್ಕರಣಚಾತುರಿಯತೋ ವಚನಗುಣಹೇತೂನಂ ಪೂರಿಯಾ ಪೂರೇ ಭವಾತಿ ಪೋರೀ, ತಾಯ ಪೋರಿಯಾ। ತೇನಾಹ ‘‘ಅಕ್ಖರಾದಿಪರಿಪುಣ್ಣಾಯಾ’’ತಿ। ಅವಿಬದ್ಧಾಯಾತಿ ಪಿತ್ತಾದೀಹಿ ನ ವಿಬದ್ಧಾಯ ಅನುಪದ್ದುತಾಯ। ತೇನಾಹ ‘‘ಅಪಲಿಬುದ್ಧಾಯಾ’’ತಿಆದಿ। ನಿದ್ದೋಸಾಯಾತಿ ಅತ್ಥತೋ ಬ್ಯಞ್ಜನತೋ ವಿಗತದೋಸಾಯ। ಅಕ್ಖಲಿತಪದಬ್ಯಞ್ಜನಾಯಾತಿ ಅಗಲಿತಪದಬ್ಯಞ್ಜನಾಯ, ಅತ್ಥಸ್ಸ ವಿಞ್ಞಾಪನಿಯಾತಿ ದಿಟ್ಠಧಮ್ಮಿಕಾದಿಅತ್ಥಸ್ಸ ಬೋಧನೇ ಪರಿಯತ್ತಾಯ। ಭಿಕ್ಖುನನ್ತಿ ಗಾಥಾಸುಖತ್ಥಂ ರಸ್ಸಂ ಕತ್ವಾ ವುತ್ತಂ।
214. Vākkaraṇacāturiyato vacanaguṇahetūnaṃ pūriyā pūre bhavāti porī, tāya poriyā. Tenāha ‘‘akkharādiparipuṇṇāyā’’ti. Avibaddhāyāti pittādīhi na vibaddhāya anupaddutāya. Tenāha ‘‘apalibuddhāyā’’tiādi. Niddosāyāti atthato byañjanato vigatadosāya. Akkhalitapadabyañjanāyāti agalitapadabyañjanāya, atthassa viññāpaniyāti diṭṭhadhammikādiatthassa bodhane pariyattāya. Bhikkhunanti gāthāsukhatthaṃ rassaṃ katvā vuttaṃ.
‘‘ಸಂಖಿತ್ತೇನಪಿ ದೇಸೇತಿ, ವಿತ್ಥಾರೇನಪಿ ಭಾಸತೀ’’ತಿ ನಯಿದಂ ಪಠಮಂ ಉದ್ದಿಸಿತ್ವಾ ತಸ್ಸ ಅತ್ಥಸ್ಸ ಕಿತ್ತನವಸೇನ ಪವತ್ತಿತಂ ವಚನಂ ಸನ್ಧಾಯ ವುತ್ತಂ। ಸಾ ಹಿ ವಿತ್ಥಾರದೇಸನಾ ಏವ ಹೋತಿ। ಯಾ ಪನ ದೇಸನಾ ಕದಾಚಿ ಧಮ್ಮಪಟಿಗ್ಗಾಹಕಾನಂ ಅಜ್ಝಾಸಯವಸೇನ ಸಂಖಿತ್ತೇನೇವ ದಸ್ಸೇತ್ವಾ ನಿಕ್ಖಿಪತಿ, ಯಾ ಚ ಕದಾಚಿ ವಿತ್ಥಾರೇನ, ತದುಭಯಂ ಸನ್ಧಾಯ ವುತ್ತಂ। ತೇನಾಹ ‘‘ಚತ್ತಾರಿಮಾನೀ’’ತಿಆದಿ। ಸಭಾವಮಧುರೋ ಪಚ್ಚಯವಸೇನ ಮಧುರತರೋ ಹೋತೀತಿ ದಸ್ಸೇತುಂ ‘‘ಯಥಾ’’ತಿಆದಿ ವುತ್ತಂ। ವಿವಿಧಾಕಾರಂ ಕತ್ವಾ ಧಮ್ಮಂ ಕಥೇತುಂ ಪಟಿಭಾತೀತಿ ಪಟಿಭಾನಂ, ದೇಸನಾಪಕಾರಞಾಣಂ। ತೇನಾಹ ‘‘ಸಮುದ್ದತೋ’’ತಿಆದಿ। ಓದಹನ್ತೀತಿ ಅವಜಾನನವಸೇನ ಗಮೇನ್ತಿ।
‘‘Saṃkhittenapi deseti, vitthārenapi bhāsatī’’ti nayidaṃ paṭhamaṃ uddisitvā tassa atthassa kittanavasena pavattitaṃ vacanaṃ sandhāya vuttaṃ. Sā hi vitthāradesanā eva hoti. Yā pana desanā kadāci dhammapaṭiggāhakānaṃ ajjhāsayavasena saṃkhitteneva dassetvā nikkhipati, yā ca kadāci vitthārena, tadubhayaṃ sandhāya vuttaṃ. Tenāha ‘‘cattārimānī’’tiādi. Sabhāvamadhuro paccayavasena madhurataro hotīti dassetuṃ ‘‘yathā’’tiādi vuttaṃ. Vividhākāraṃ katvā dhammaṃ kathetuṃ paṭibhātīti paṭibhānaṃ, desanāpakārañāṇaṃ. Tenāha ‘‘samuddato’’tiādi. Odahantīti avajānanavasena gamenti.
ಸಾರಿಪುತ್ತಸುತ್ತವಣ್ಣನಾ ನಿಟ್ಠಿತಾ।
Sāriputtasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೬. ಸಾರಿಪುತ್ತಸುತ್ತಂ • 6. Sāriputtasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಸಾರಿಪುತ್ತಸುತ್ತವಣ್ಣನಾ • 6. Sāriputtasuttavaṇṇanā
