| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೫೫. ಸಾತಚ್ಚಮೂಲಕಸಪ್ಪಾಯಕಾರೀಸುತ್ತಂ
55. Sātaccamūlakasappāyakārīsuttaṃ
೭೧೬. ಸಾವತ್ಥಿನಿದಾನಂ। ‘‘ಚತಾರೋಮೇ, ಭಿಕ್ಖವೇ, ಝಾಯೀ। ಕತಮೇ ಚತ್ತಾರೋ? ಇಧ, ಭಿಕ್ಖವೇ , ಏಕಚ್ಚೋ ಝಾಯೀ ಸಮಾಧಿಸ್ಮಿಂ ಸಾತಚ್ಚಕಾರೀ ಹೋತಿ, ನ ಸಮಾಧಿಸ್ಮಿಂ ಸಪ್ಪಾಯಕಾರೀ। ಇಧ ಪನ, ಭಿಕ್ಖವೇ, ಏಕಚ್ಚೋ ಝಾಯೀ ಸಮಾಧಿಸ್ಮಿಂ ಸಪ್ಪಾಯಕಾರೀ ಹೋತಿ, ನ ಸಮಾಧಿಸ್ಮಿಂ ಸಾತಚ್ಚಕಾರೀ। ಇಧ ಪನ, ಭಿಕ್ಖವೇ, ಏಕಚ್ಚೋ ಝಾಯೀ ನೇವ ಸಮಾಧಿಸ್ಮಿಂ ಸಾತಚ್ಚಕಾರೀ ಹೋತಿ, ನ ಚ ಸಮಾಧಿಸ್ಮಿಂ ಸಪ್ಪಾಯಕಾರೀ। ಇಧ ಪನ, ಭಿಕ್ಖವೇ, ಏಕಚ್ಚೋ ಝಾಯೀ ಸಮಾಧಿಸ್ಮಿಂ ಸಾತಚ್ಚಕಾರೀ ಚ ಹೋತಿ, ಸಮಾಧಿಸ್ಮಿಂ ಸಪ್ಪಾಯಕಾರೀ ಚ। ತತ್ರ, ಭಿಕ್ಖವೇ, ಯ್ವಾಯಂ ಝಾಯೀ ಸಮಾಧಿಸ್ಮಿಂ ಸಾತಚ್ಚಕಾರೀ ಚ ಹೋತಿ ಸಮಾಧಿಸ್ಮಿಂ ಸಪ್ಪಾಯಕಾರೀ ಚ ಅಯಂ ಇಮೇಸಂ ಚತುನ್ನಂ ಝಾಯೀನಂ ಅಗ್ಗೋ ಚ ಸೇಟ್ಠೋ ಚ ಮೋಕ್ಖೋ ಚ ಉತ್ತಮೋ ಚ ಪವರೋ ಚ। ಸೇಯ್ಯಥಾಪಿ, ಭಿಕ್ಖವೇ, ಗವಾ ಖೀರಂ, ಖೀರಮ್ಹಾ ದಧಿ, ದಧಿಮ್ಹಾ ನವನೀತಂ, ನವನೀತಮ್ಹಾ ಸಪ್ಪಿ, ಸಪ್ಪಿಮ್ಹಾ ಸಪ್ಪಿಮಣ್ಡೋ ತತ್ರ ಅಗ್ಗಮಕ್ಖಾಯತಿ; ಏವಮೇವ ಖೋ, ಭಿಕ್ಖವೇ, ಯ್ವಾಯಂ ಝಾಯೀ ಸಮಾಧಿಸ್ಮಿಂ ಸಾತಚ್ಚಕಾರೀ ಚ ಹೋತಿ, ಸಮಾಧಿಸ್ಮಿಂ ಸಪ್ಪಾಯಕಾರೀ ಅಯಂ ಇಮೇಸಂ ಚತುನ್ನಂ ಝಾಯೀನಂ ಅಗ್ಗೋ ಚ ಸೇಟ್ಠೋ ಚ ಮೋಕ್ಖೋ ಚ ಉತ್ತಮೋ ಚ ಪವರೋ ಚಾ’’ತಿ। ಇದಮವೋಚ ಭಗವಾ। ಅತ್ತಮನಾ ತೇ ಭಿಕ್ಖೂ ಭಗವತೋ ಭಾಸಿತಂ ಅಭಿನನ್ದುನ್ತಿ। ಪಞ್ಚಪಞ್ಞಾಸಮಂ। (ಯಥಾ ಪಞ್ಚಪಞ್ಞಾಸಂ ವೇಯ್ಯಾಕರಣಾನಿ ಹೋನ್ತಿ ತಥಾ ವಿತ್ಥಾರೇತಬ್ಬಾನಿ।)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
ತಸ್ಸುದ್ದಾನಂ –
Tassuddānaṃ –
ಸಮಾಧಿ ಸಮಾಪತ್ತಿ ಠಿತಿ ಚ, ವುಟ್ಠಾನಂ ಕಲ್ಲಿತಾರಮ್ಮಣೇನ ಚ।
Samādhi samāpatti ṭhiti ca, vuṭṭhānaṃ kallitārammaṇena ca;
ಗೋಚರಾ ಅಭಿನೀಹಾರೋ ಸಕ್ಕಚ್ಚ, ಸಾತಚ್ಚ ಅಥೋಪಿ ಸಪ್ಪಾಯನ್ತಿ॥
Gocarā abhinīhāro sakkacca, sātacca athopi sappāyanti.
ಖನ್ಧವಗ್ಗೋ ತತಿಯೋ।
Khandhavaggo tatiyo.
ತಸ್ಸುದ್ದಾನಂ –
Tassuddānaṃ –
ಕಿಲೇಸ ಸಾರಿಪುತ್ತಾ ಚ, ನಾಗಾ ಸುಪಣ್ಣ ಗನ್ಧಬ್ಬಾ।
Kilesa sāriputtā ca, nāgā supaṇṇa gandhabbā;
ವಲಾಹ ವಚ್ಛಝಾನನ್ತಿ , ಖನ್ಧವಗ್ಗಮ್ಹಿ ತೇರಸಾತಿ॥
Valāha vacchajhānanti , khandhavaggamhi terasāti.
ಖನ್ಧವಗ್ಗಸಂಯುತ್ತಪಾಳಿ ನಿಟ್ಠಿತಾ।
Khandhavaggasaṃyuttapāḷi niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨-೫೫. ಸಮಾಧಿಮೂಲಕಠಿತಿಸುತ್ತಾದಿವಣ್ಣನಾ • 2-55. Samādhimūlakaṭhitisuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨-೫೫. ಸಮಾಧಿಮೂಲಕಠಿತಿಸುತ್ತಾದಿವಣ್ಣನಾ • 2-55. Samādhimūlakaṭhitisuttādivaṇṇanā
