| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. ஸத்தகனித்³தே³ஸவண்ணனா
7. Sattakaniddesavaṇṇanā
203. ஸத்தகே – ஸகிங் நிமுக்³கோ³தி ஏகவாரங் நிமுக்³கோ³. ஏகந்தகாளகேஹீதி ஏகந்தேனேவ காளகேஹி நத்தி²கவாத³அஹேதுகவாத³அகிரியவாத³ஸங்கா²தேஹி நியதமிச்சா²தி³ட்டி²த⁴ம்மேஹி. ஏவங் புக்³க³லோதி இமினா காரணேன புக்³க³லோ ஏகவாரங் நிமுக்³கோ³ ததா² நிமுக்³கோ³வ ஹோதி. ஏதஸ்ஸ ஹி புன ப⁴வதோ வுட்டா²னங் நாம நத்தீ²தி வத³ந்தி. மக்க²லிகோ³ஸாலாத³யோ விய ஹெட்டா² நரகக்³கீ³னங்யேவ ஆஹாரோ ஹோதி.
203. Sattake – sakiṃ nimuggoti ekavāraṃ nimuggo. Ekantakāḷakehīti ekanteneva kāḷakehi natthikavādaahetukavādaakiriyavādasaṅkhātehi niyatamicchādiṭṭhidhammehi. Evaṃ puggaloti iminā kāraṇena puggalo ekavāraṃ nimuggo tathā nimuggova hoti. Etassa hi puna bhavato vuṭṭhānaṃ nāma natthīti vadanti. Makkhaligosālādayo viya heṭṭhā narakaggīnaṃyeva āhāro hoti.
ஸாஹு ஸத்³தா⁴ குஸலேஸு த⁴ம்மேஸூதி குஸலத⁴ம்மேஸு ஸத்³தா⁴ நாம ஸாது⁴லத்³தி⁴காதி உம்முஜ்ஜதி. ஸோ தாவதகேனேவ குஸலேன உம்முஜ்ஜதி நாம. ஸாது⁴ ஹிரீதிஆதீ³ஸுபி ஏஸேவ நயோ. ஹாயதியேவாதி சங்கவாரே ஆஸித்தஉத³கங் விய ஏகந்தேன பரிஹாயதேவ. ஏவங் புக்³க³லோதி ஏவங் ஸாஹு ஸத்³தா⁴தி. இமேஸங் ஸத்³தா⁴தீ³னங் வஸேன ஏகவாரங் உம்முஜ்ஜித்வா தேஸங் பரிஹானியா புன நிமுஜ்ஜதியேவ, தே³வத³த்தாத³யோ விய. தே³வத³த்தோ ஹி அட்ட² ஸமாபத்தியோ, பஞ்ச ச அபி⁴ஞ்ஞாயோ நிப்³ப³த்தெத்வாபி புன பு³த்³தா⁴னங் படிகண்டகதாய தேஹி கு³ணேஹி பரிஹீனோ ருஹிருப்பாத³கம்மங் ஸங்க⁴பே⁴த³கம்மஞ்ச கத்வா காயஸ்ஸ பே⁴தா³ து³தியசித்தவாரேன நிரயே நிப்³ப³த்தி. கோகாலிகோ த்³வே அக்³க³ஸாவகே உபவதி³த்வா பது³மனிரயே நிப்³ப³த்தோ.
Sāhu saddhā kusalesu dhammesūti kusaladhammesu saddhā nāma sādhuladdhikāti ummujjati. So tāvatakeneva kusalena ummujjati nāma. Sādhu hirītiādīsupi eseva nayo. Hāyatiyevāti caṅkavāre āsittaudakaṃ viya ekantena parihāyateva. Evaṃ puggaloti evaṃ sāhu saddhāti. Imesaṃ saddhādīnaṃ vasena ekavāraṃ ummujjitvā tesaṃ parihāniyā puna nimujjatiyeva, devadattādayo viya. Devadatto hi aṭṭha samāpattiyo, pañca ca abhiññāyo nibbattetvāpi puna buddhānaṃ paṭikaṇṭakatāya tehi guṇehi parihīno ruhiruppādakammaṃ saṅghabhedakammañca katvā kāyassa bhedā dutiyacittavārena niraye nibbatti. Kokāliko dve aggasāvake upavaditvā padumaniraye nibbatto.
நேவ ஹாயதி நோ வட்³ட⁴தீதி அப்பஹோனககாலேபி ந ஹாயதி, பஹோனககாலேபி ந வட்³ட⁴தி. உப⁴யம்பி பனேதங் அகா³ரிகேனபி அனகா³ரிகேனபி தீ³பேதப்³ப³ங். ஏகச்சோ ஹி அகா³ரிகோ அப்பஹோனககாலே பக்கி²கப⁴த்தங் வா ஸலாகப⁴த்தங் வா வஸ்ஸாவாஸிகங் வா உபனிப³ந்தா⁴பேதி. ஸோ பச்சா² பஹோனககாலேபி பக்கி²கப⁴த்தாதி³மத்தமேவ பவத்தேதி. அனகா³ரிகோபி ஆதி³ம்ஹி அப்பஹோனககாலே உத்³தே³ஸங் வா து⁴தங்க³ங் வா க³ண்ஹாதி, மேதா⁴ப³லவீரியஸம்பத்தியா பஹோனககாலேபி ததோ உத்தரிங் ந கரோதி. ஏவங் புக்³க³லோதி ஏவங் இமாய ஸத்³தா⁴தீ³னங் டி²தியா புக்³க³லோ உம்முஜ்ஜித்வா டி²தோ நாம ஹோதி.
Neva hāyati no vaḍḍhatīti appahonakakālepi na hāyati, pahonakakālepi na vaḍḍhati. Ubhayampi panetaṃ agārikenapi anagārikenapi dīpetabbaṃ. Ekacco hi agāriko appahonakakāle pakkhikabhattaṃ vā salākabhattaṃ vā vassāvāsikaṃ vā upanibandhāpeti. So pacchā pahonakakālepi pakkhikabhattādimattameva pavatteti. Anagārikopi ādimhi appahonakakāle uddesaṃ vā dhutaṅgaṃ vā gaṇhāti, medhābalavīriyasampattiyā pahonakakālepi tato uttariṃ na karoti. Evaṃ puggaloti evaṃ imāya saddhādīnaṃ ṭhitiyā puggalo ummujjitvā ṭhito nāma hoti.
உம்முஜ்ஜித்வா விபஸ்ஸதி விலோகேதீதி ஸோதாபன்னோ புக்³க³லோ உட்ட²ஹித்வா க³மனமக்³க³ங் க³ந்தப்³ப³ங் தி³ஸங் வா ஆலோகேதி நாம.
Ummujjitvā vipassati viloketīti sotāpanno puggalo uṭṭhahitvā gamanamaggaṃ gantabbaṃ disaṃ vā āloketi nāma.
உம்முஜ்ஜித்வா பதரதீதி ஸகதா³கா³மிபுக்³க³லோ கிலேஸதனுதாய உட்ட²ஹித்வா க³ந்தப்³ப³தி³ஸாபி⁴முகோ² பதரதி நாம.
Ummujjitvāpataratīti sakadāgāmipuggalo kilesatanutāya uṭṭhahitvā gantabbadisābhimukho patarati nāma.
பதிகா³த⁴ப்பத்தோ ஹோதீதி அனாகா³மிபுக்³க³லோ உட்டா²ய விலோகெத்வா பதரித்வா க³ந்த்வா ஏகஸ்மிங் டா²னே பதிட்டா²பத்தோ நாம ஹோதி, திட்ட²தி, ந புனாக³ச்ச²தி.
Patigādhappatto hotīti anāgāmipuggalo uṭṭhāya viloketvā pataritvā gantvā ekasmiṃ ṭhāne patiṭṭhāpatto nāma hoti, tiṭṭhati, na punāgacchati.
திண்ணோ பாரங்க³தோ த²லே திட்ட²தீதி ஸப்³ப³கிலேஸோக⁴ங் தரித்வா பரதீரங் க³ந்த்வா நிப்³பா³னத²லே டி²தோ நாம ஹோதி. இமே பன ஸத்த புக்³க³லா உத³கோபமேன தீ³பிதா.
Tiṇṇo pāraṅgato thale tiṭṭhatīti sabbakilesoghaṃ taritvā paratīraṃ gantvā nibbānathale ṭhito nāma hoti. Ime pana satta puggalā udakopamena dīpitā.
ஸத்த கிர ஜங்க⁴வாணிஜா அத்³தா⁴னமக்³க³படிபன்னா அந்தராமக்³கே³ ஏகங் புண்ணனதி³ங் பாபுணிங்ஸு. தேஸு பட²மங் ஓதிண்ணோ உத³கபீ⁴ருகோ புரிஸோ ஓதிண்ணட்டா²னேயேவ நிமுஜ்ஜித்வா புன உட்டா²துங் நாஸக்கி², அந்தோயேவ மச்ச²கச்ச²பப⁴க்கோ² ஜாதோ. து³தியோ ஓதிண்ணட்டா²னே நிமுஜ்ஜித்வா ஸகிங் உட்ட²ஹித்வா புன நிமுக்³கோ³ உட்டா²துங் நாஸக்கி², அந்தோயேவ மச்ச²கச்ச²பப⁴க்கோ² ஜாதோ. ததியோ நிமுஜ்ஜித்வா உட்ட²ஹி. ஸோ மஜ்ஜே² நதி³யா ட²த்வா நேவ ஓரதோ ஆக³ந்துங், ந பரதோ க³ந்துங் அஸக்கி² . சதுத்தோ² உட்டா²ய டி²தோ உத்தரணதித்த²ங் ஓலோகேஸி. பஞ்சமோ ஓதரணதித்த²ங் ஓலோகெத்வா பதரி. ச²ட்டோ² தரித்வா பாரிமதீரங் க³ந்த்வா கடிப்பமாணே உத³கே டி²தோ. ஸத்தமோ பாரிமதீரங் க³ந்த்வா க³ந்த⁴சுண்ணாதீ³ஹி ந்ஹாத்வா வரவத்தா²னி நிவாஸெத்வா ஸுரபி⁴விலேபனங் விலிம்பித்வா நீலுப்பலாதீ³னி பிளந்தி⁴த்வா நானாலங்காரபடிமண்டி³தோ மஹானக³ரங் பவிஸித்வா பாஸாத³வரமாருய்ஹ உத்தமபோ⁴ஜனங் பு⁴ஞ்ஜி.
Satta kira jaṅghavāṇijā addhānamaggapaṭipannā antarāmagge ekaṃ puṇṇanadiṃ pāpuṇiṃsu. Tesu paṭhamaṃ otiṇṇo udakabhīruko puriso otiṇṇaṭṭhāneyeva nimujjitvā puna uṭṭhātuṃ nāsakkhi, antoyeva macchakacchapabhakkho jāto. Dutiyo otiṇṇaṭṭhāne nimujjitvā sakiṃ uṭṭhahitvā puna nimuggo uṭṭhātuṃ nāsakkhi, antoyeva macchakacchapabhakkho jāto. Tatiyo nimujjitvā uṭṭhahi. So majjhe nadiyā ṭhatvā neva orato āgantuṃ, na parato gantuṃ asakkhi . Catuttho uṭṭhāya ṭhito uttaraṇatitthaṃ olokesi. Pañcamo otaraṇatitthaṃ oloketvā patari. Chaṭṭho taritvā pārimatīraṃ gantvā kaṭippamāṇe udake ṭhito. Sattamo pārimatīraṃ gantvā gandhacuṇṇādīhi nhātvā varavatthāni nivāsetvā surabhivilepanaṃ vilimpitvā nīluppalādīni piḷandhitvā nānālaṅkārapaṭimaṇḍito mahānagaraṃ pavisitvā pāsādavaramāruyha uttamabhojanaṃ bhuñji.
தத்த² ஸத்த ஜங்க⁴வாணிஜா விய இமே ஸத்த புக்³க³லா. நதீ³ விய வட்டங். பட²மஸ்ஸ உத³கபீ⁴ருகஸ்ஸ புரிஸஸ்ஸ ஓதிண்ணட்டா²னேயேவ நிமுஜ்ஜனங் விய மிச்சா²தி³ட்டி²கஸ்ஸ வட்டே நிமுஜ்ஜனங். உம்முஜ்ஜித்வா நிமுக்³க³புரிஸோ விய ஸத்³தா⁴தீ³னங் உப்பத்திமத்தகேன உம்முஜ்ஜித்வா தேஸங் பரிஹானியா நிமுக்³க³புக்³க³லோ. மஜ்ஜே² நதி³யா டி²தோ விய ஸத்³தா⁴தீ³னங் டி²தியா டி²தபுக்³க³லோ. உத்தரணதித்த²ங் ஓலோகெந்தோ விய க³ந்தப்³ப³மக்³க³ங் க³ந்தப்³ப³தி³ஸங் வா ஓலோகெந்தோ ஸோதாபன்னோ. பதரிதபுரிஸோ விய கிலேஸதனுதாய பதரந்தோ ஸகதா³கா³மீ. தரித்வா கடிமத்தே உத³கே டி²தபுரிஸோ விய அனாவத்திதத⁴ம்மதாய டி²தோ அனாகா³மீ. ந்ஹத்வா பாரிமதீரங் உத்தரித்வா த²லே டி²தபுரிஸோ விய சத்தாரோ ஓகே⁴ அதிக்கமித்வா நிப்³பா³னத²லே டி²தோ கீ²ணாஸவப்³ராஹ்மணோ. த²லே டி²தபுரிஸஸ்ஸ நக³ரங் பவிஸித்வா பாஸாத³வரங் ஆருய்ஹ உத்தமபோ⁴ஜனபு⁴ஞ்ஜனங் விய கீ²ணாஸவஸ்ஸ நிப்³பா³னாரம்மணங் ப²லஸமாபத்திங் அப்பெத்வா வீதினாமனங் வேதி³தப்³ப³ங். உப⁴தோபா⁴க³விமுத்தாத³யோ ஹெட்டா² பகாஸிதாயேவாதி.
Tattha satta jaṅghavāṇijā viya ime satta puggalā. Nadī viya vaṭṭaṃ. Paṭhamassa udakabhīrukassa purisassa otiṇṇaṭṭhāneyeva nimujjanaṃ viya micchādiṭṭhikassa vaṭṭe nimujjanaṃ. Ummujjitvā nimuggapuriso viya saddhādīnaṃ uppattimattakena ummujjitvā tesaṃ parihāniyā nimuggapuggalo. Majjhe nadiyā ṭhito viya saddhādīnaṃ ṭhitiyā ṭhitapuggalo. Uttaraṇatitthaṃ olokento viya gantabbamaggaṃ gantabbadisaṃ vā olokento sotāpanno. Pataritapuriso viya kilesatanutāya pataranto sakadāgāmī. Taritvā kaṭimatte udake ṭhitapuriso viya anāvattitadhammatāya ṭhito anāgāmī. Nhatvā pārimatīraṃ uttaritvā thale ṭhitapuriso viya cattāro oghe atikkamitvā nibbānathale ṭhito khīṇāsavabrāhmaṇo. Thale ṭhitapurisassa nagaraṃ pavisitvā pāsādavaraṃ āruyha uttamabhojanabhuñjanaṃ viya khīṇāsavassa nibbānārammaṇaṃ phalasamāpattiṃ appetvā vītināmanaṃ veditabbaṃ. Ubhatobhāgavimuttādayo heṭṭhā pakāsitāyevāti.
ஸத்தகனித்³தே³ஸவண்ணனா.
Sattakaniddesavaṇṇanā.
207. அட்ட²கனவகனித்³தே³ஸாபி ஹெட்டா² வுத்தனயேனேவ வேதி³தப்³பா³.
207. Aṭṭhakanavakaniddesāpi heṭṭhā vuttanayeneva veditabbā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi
7. ஸத்தகபுக்³க³லபஞ்ஞத்தி • 7. Sattakapuggalapaññatti
8. அட்ட²கபுக்³க³லபஞ்ஞத்தி • 8. Aṭṭhakapuggalapaññatti
9. நவகபுக்³க³லபஞ்ஞத்தி • 9. Navakapuggalapaññatti
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. ஸத்தகனித்³தே³ஸவண்ணனா • 7. Sattakaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. ஸத்தகனித்³தே³ஸவண்ணனா • 7. Sattakaniddesavaṇṇanā
