| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
7. ஸத்தமனயோ ஸம்பயுத்தேனவிப்பயுத்தபத³வண்ணனா
7. Sattamanayo sampayuttenavippayuttapadavaṇṇanā
306. ஸம்பயுத்தேனவிப்பயுத்தபத³னித்³தே³ஸே ரூபக்க²ந்தா⁴த³யோ தேஹி ஸம்பயுத்தாபா⁴வதோ ந க³ஹிதா. ஸமுத³யஸச்சாதீ³னி ஸதிபி தேஹி ஸம்பயுத்தே, ஸம்பயுத்தேஹி ச விப்பயுத்தே ஸம்பயுத்தேனவிப்பயுத்தானங் க²ந்தா⁴தீ³ஹி விப்பயோகா³பா⁴வதோ. ந ஹி ஸமுத³யஸச்சேன ஸம்பயுத்தேஹி லோப⁴ஸஹக³தசித்துப்பாதே³ஹி விப்பயுத்தானங் ததோ அஞ்ஞத⁴ம்மானங் க²ந்தா⁴தீ³ஸு கேனசி விப்பயோகோ³ அத்தி². நனு ச தே ஏவ சித்துப்பாதா³ சத்தாரோ க²ந்தா⁴ அட்³ட⁴து³தியானி ஆயதனானி அட்³ட⁴து³தியா தா⁴துயோ ச ஹொந்தீதி தேஹி விப்பயோகோ³ வத்தப்³போ³தி? ந, தத³ஞ்ஞத⁴ம்மானங் க²ந்தா⁴தி³பா⁴வதோ. ந ஹி தே ஏவ த⁴ம்மா சத்தாரோ க²ந்தா⁴, அத² கோ² தே ச ததோ அஞ்ஞே ச, ததா² அட்³ட⁴து³தியாயதனதா⁴துயோபி. ந ச தத³ஞ்ஞஸமுதா³யேஹி அஞ்ஞே விப்பயுத்தா ஹொந்தி ஸமுதா³யேகதே³ஸானங் ஏகதே³ஸஞ்ஞஸமுதா³யானஞ்ச விப்பயோகா³பா⁴வதோ. ஏஸ நயோ மக்³க³ஸச்சஸுகி²ந்த்³ரியாதீ³ஸு. அவிதக்கவிசாரமத்தேஸுபி நிரவஸேஸேஸு அதி⁴ப்பேதேஸு தேஸங் ஸவிதக்கஸவிசாரஸமானக³திகத்தா அக்³க³ஹணே காரணங் ந தி³ஸ்ஸதி.
306. Sampayuttenavippayuttapadaniddese rūpakkhandhādayo tehi sampayuttābhāvato na gahitā. Samudayasaccādīni satipi tehi sampayutte, sampayuttehi ca vippayutte sampayuttenavippayuttānaṃ khandhādīhi vippayogābhāvato. Na hi samudayasaccena sampayuttehi lobhasahagatacittuppādehi vippayuttānaṃ tato aññadhammānaṃ khandhādīsu kenaci vippayogo atthi. Nanu ca te eva cittuppādā cattāro khandhā aḍḍhadutiyāni āyatanāni aḍḍhadutiyā dhātuyo ca hontīti tehi vippayogo vattabboti? Na, tadaññadhammānaṃ khandhādibhāvato. Na hi te eva dhammā cattāro khandhā, atha kho te ca tato aññe ca, tathā aḍḍhadutiyāyatanadhātuyopi. Na ca tadaññasamudāyehi aññe vippayuttā honti samudāyekadesānaṃ ekadesaññasamudāyānañca vippayogābhāvato. Esa nayo maggasaccasukhindriyādīsu. Avitakkavicāramattesupi niravasesesu adhippetesu tesaṃ savitakkasavicārasamānagatikattā aggahaṇe kāraṇaṃ na dissati.
அட்ட²கதா²யங் பன ஏவரூபானீதி யதா² ரூபக்க²ந்தே⁴ விஸ்ஸஜ்ஜனங் ந யுஜ்ஜதி, ஏவங் யேஸு அஞ்ஞேஸுபி ந யுஜ்ஜதி, தானி விஸ்ஸஜ்ஜனஸ்ஸ அயோகே³ன ‘‘ஏவரூபானீ’’தி வுத்தானி, ந ஸம்பயுத்தாபா⁴வேனாதி த³ட்ட²ப்³ப³ங். யானி பன பதா³னி த⁴ம்மதா⁴துயா ஸம்பயுத்தே த⁴ம்மே தீ³பெந்தீதி ஏதேன வேத³னாக்க²ந்தா⁴தி³பதா³னி த³ஸ்ஸேதி, விஞ்ஞாணஞ்ச அஞ்ஞேன அஸம்மிஸ்ஸந்தி விஞ்ஞாணக்க²ந்த⁴மனாயதனாதி³பதா³னி. தத்த² அஞ்ஞேன அஸம்மிஸ்ஸந்தி அஸம்பயுத்தேன அஸம்மிஸ்ஸந்தி அத்தோ². அது³க்க²மஸுகா²யவேத³னாயஸம்பயுத்தபதா³னிபி ஹி ஸம்பயுத்தேஹி ஸம்மிஸ்ஸவிஞ்ஞாணதீ³பகானி இத⁴ க³ஹிதானீதி. ஏதேன ச லக்க²ணேன ஏவரூபானேவ க³ஹிதானீதி த³ஸ்ஸேதி, ந ஏவரூபானி க³ஹிதானேவாதி ஸமுத³யஸச்சாதி³இத்³தி⁴பாதா³தி³பதா³னங் அஸங்க³ஹிதத்தா. ‘‘அத² ப²ஸ்ஸஸத்தகங் சித்தங் ஸஹ யுத்தபதே³ஹி ஸத்தா’’தி புராணபாடோ², அயங் பன ஊனோதி கத்வா ‘‘அத² ப²ஸ்ஸஸத்தகங், திகே தயோ ஸத்த மஹந்தரே சா’’தி பாடோ² கதோ.
Aṭṭhakathāyaṃ pana evarūpānīti yathā rūpakkhandhe vissajjanaṃ na yujjati, evaṃ yesu aññesupi na yujjati, tāni vissajjanassa ayogena ‘‘evarūpānī’’ti vuttāni, na sampayuttābhāvenāti daṭṭhabbaṃ. Yāni pana padāni dhammadhātuyā sampayutte dhamme dīpentīti etena vedanākkhandhādipadāni dasseti, viññāṇañca aññena asammissanti viññāṇakkhandhamanāyatanādipadāni. Tattha aññena asammissanti asampayuttena asammissanti attho. Adukkhamasukhāyavedanāyasampayuttapadānipi hi sampayuttehi sammissaviññāṇadīpakāni idha gahitānīti. Etena ca lakkhaṇena evarūpāneva gahitānīti dasseti, na evarūpāni gahitānevāti samudayasaccādiiddhipādādipadānaṃ asaṅgahitattā. ‘‘Atha phassasattakaṃ cittaṃ saha yuttapadehi sattā’’ti purāṇapāṭho, ayaṃ pana ūnoti katvā ‘‘atha phassasattakaṃ, tike tayo satta mahantare cā’’ti pāṭho kato.
309. புச்சா²ய உத்³த⁴டபதே³னேவ ஸத்³தி⁴ங் விப்பயுத்தானங் வஸேனாதி இத³ங் புச்சா²ய உத்³த⁴டபதே³ன ஸம்பயுத்தேஹி விப்பயுத்தா தேன ஸத்³தி⁴ங் விப்பயுத்தா ஹொந்தீதி கத்வா வுத்தங். பாளிஉத்³தா³னகா³தா²யங் த்³வே ச மனேன யுத்தா, விதக்கவிசாரணாதி மனோதா⁴துயா ஏகந்தஸம்பயுத்தா த்³வே விதக்கவிசாராதி ஸவிதக்கபத³ங் ஸவிசாரபத³ஞ்ச த³ஸ்ஸேதி.
309. Pucchāya uddhaṭapadeneva saddhiṃ vippayuttānaṃ vasenāti idaṃ pucchāya uddhaṭapadena sampayuttehi vippayuttā tena saddhiṃ vippayuttā hontīti katvā vuttaṃ. Pāḷiuddānagāthāyaṃ dve ca manena yuttā, vitakkavicāraṇāti manodhātuyā ekantasampayuttā dve vitakkavicārāti savitakkapadaṃ savicārapadañca dasseti.
ஸத்தமனயஸம்பயுத்தேனவிப்பயுத்தபத³வண்ணனா நிட்டி²தா.
Sattamanayasampayuttenavippayuttapadavaṇṇanā niṭṭhitā.
Next: 8. அட்ட²மனயோ விப்பயுத்தேனஸம்பயுத்தபத³வண்ணனா • 8. Aṭṭhamanayo vippayuttenasampayuttapadavaṇṇanā
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 7. ஸம்பயுத்தேனவிப்பயுத்தபத³னித்³தே³ஸோ • 7. Sampayuttenavippayuttapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. ஸத்தமனயோ ஸம்பயுத்தேனவிப்பயுத்தபத³வண்ணனா • 7. Sattamanayo sampayuttenavippayuttapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. ஸத்தமனயோ ஸம்பயுத்தேனவிப்பயுத்தபத³வண்ணனா • 7. Sattamanayo sampayuttenavippayuttapadavaṇṇanā
