| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
7. сад̇д̇аманаяо самбаяуд̇д̇знавиббаяуд̇д̇абад̣̇аван̣н̣анаа
7. Sattamanayo sampayuttenavippayuttapadavaṇṇanā
306. д̇зхи самуд̣̇аяасажжаад̣̇ийхи канд̇хад̇д̇аяаканд̇хзгад̣̇зсаад̣̇игз самбаяуд̇д̇з сад̇иби, самбаяуд̇д̇зхи жа виббаяуд̇д̇з руубаниб̣б̣аанаад̣̇игз д̇ад̣̇ан̃н̃ад̇хаммз сад̇иби виббаяог̇аабхаавад̇о. сан̇кзбзна вуд̇д̇амад̇т̇ам̣ вид̇т̇аарзна д̣̇ассзд̇ум̣ ‘‘на хий’’д̇иаад̣̇и вуд̇д̇ам̣. д̇ад̇о лобхасахаг̇ад̇ажид̇д̇уббаад̣̇ад̇о ан̃н̃ад̇хаммаанам̣ авасидтаанам̣ гусалаагусалааб̣яаагад̇ад̇хаммаанам̣ канд̇хаад̣̇ийсу гзнажи виббаяог̇о на хи ад̇т̇и канд̇хабан̃жагаад̣̇ийнам̣ сан̇г̇ан̣ханад̇о д̇зсам̣. д̇з зва жид̇д̇уббаад̣̇аад̇и д̇з лобхасахаг̇ад̇ажид̇д̇уббаад̣̇аа зва. д̇ад̣̇ан̃н̃ад̇хаммаананд̇и д̇ад̣̇ан̃н̃ад̇хаммаанамбийд̇и би-сад̣̇д̣̇алобо д̣̇адтаб̣б̣о. д̇ат̇аад̇и иминаа на жа д̇з зва д̇хаммаа ад̣дхад̣̇уд̇ияааяад̇анад̇хаад̇уяо, ат̇а ко д̇з жа д̇ад̇о ан̃н̃з жаад̇и имамад̇т̇ам̣ убасам̣харад̇и.
306. Tehi samudayasaccādīhi khandhattayakhandhekadesādike sampayutte satipi, sampayuttehi ca vippayutte rūpanibbānādike tadaññadhamme satipi vippayogābhāvato. Saṅkhepena vuttamatthaṃ vitthārena dassetuṃ ‘‘na hī’’tiādi vuttaṃ. Tato lobhasahagatacittuppādato aññadhammānaṃ avasiṭṭhānaṃ kusalākusalābyākatadhammānaṃ khandhādīsu kenaci vippayogo na hi atthi khandhapañcakādīnaṃ saṅgaṇhanato tesaṃ. Te eva cittuppādāti te lobhasahagatacittuppādā eva. Tadaññadhammānanti tadaññadhammānampīti pi-saddalopo daṭṭhabbo. Tathāti iminā na ca te eva dhammā aḍḍhadutiyāyatanadhātuyo, atha kho te ca tato aññe cāti imamatthaṃ upasaṃharati.
нану д̇ад̣̇ан̃н̃абхаавад̇о зва д̇зхи ид̇арзсам̣ виббаяог̇о сид̣̇д̇ход̇и ааха ‘‘на жаа’’д̇иаад̣̇и. д̇ад̣̇ан̃н̃асамуд̣̇ааязхийд̇и д̇ад̇о лобхасахаг̇ад̇ажид̇д̇уббаад̣̇ад̇о ан̃н̃асамуд̣̇ааязхи ан̃н̃з лобхасахаг̇ад̇аа д̇хаммаа виббаяуд̇д̇аа на хонд̇и. гасмаа? самуд̣̇ааяз…бз… виббаяог̇аабхаавад̇о. д̇ассад̇т̇о – самуд̣̇ааязна лобхасахаг̇ад̇ад̇ад̣̇ан̃н̃ад̇хаммараасинаа згад̣̇зсаанам̣ лобхасахаг̇ад̇ад̇хаммаанам̣ виббаяог̇аабхаавад̇о, д̇ат̇аа яз згад̣̇зсаа худ̇ваа ан̃н̃зсам̣ аваяаваанам̣ самуд̣̇ааяабхууд̇аа, д̇зсан̃жа самуд̣̇ааязна виббаяог̇аабхаавад̇од̇и. анзна самуд̣̇ааязна аваяавасса самуд̣̇ааяасса аваяавзна жа д̇асса на виббаяог̇о, аваяавассзва бана аваяавзнаад̇и д̣̇ассзд̇и. зса наяод̇и явааяам̣ самуд̣̇аяасажжз вуд̇д̇о вид̇хи, зсзва маг̇г̇асажжасукинд̣̇рияаад̣̇ийсу аруубагканд̇хзгад̣̇зсад̇д̇аа д̇зсанд̇и д̣̇ассзд̇и. ниравасзсзсууд̇и аб̣ахигад̇авид̇аггзсу. вид̇агго хи самуд̣̇ааяад̇о аб̣ахигад̇о. ‘‘со хи самуд̣̇ааяо’’д̇иаад̣̇иго вуд̇д̇анаяо лаб̣бхад̇ийд̇и ааха ‘‘аг̇г̇ахан̣з гааран̣ам̣ на д̣̇иссад̇ий’’д̇и.
Nanu tadaññabhāvato eva tehi itaresaṃ vippayogo siddhoti āha ‘‘na cā’’tiādi. Tadaññasamudāyehīti tato lobhasahagatacittuppādato aññasamudāyehi aññe lobhasahagatā dhammā vippayuttā na honti. Kasmā? Samudāye…pe… vippayogābhāvato. Tassattho – samudāyena lobhasahagatatadaññadhammarāsinā ekadesānaṃ lobhasahagatadhammānaṃ vippayogābhāvato, tathā ye ekadesā hutvā aññesaṃ avayavānaṃ samudāyabhūtā, tesañca samudāyena vippayogābhāvatoti. Anena samudāyena avayavassa samudāyassa avayavena ca tassa na vippayogo, avayavasseva pana avayavenāti dasseti. Esa nayoti yvāyaṃ samudayasacce vutto vidhi, eseva maggasaccasukhindriyādīsu arūpakkhandhekadesattā tesanti dasseti. Niravasesesūti abahikatavitakkesu. Vitakko hi samudāyato abahikato. ‘‘So hi samudāyo’’tiādiko vuttanayo labbhatīti āha ‘‘aggahaṇe kāraṇaṃ na dissatī’’ti.
ан̃н̃зсуби самуд̣̇аяасажжаад̣̇ийсу виссаж̇ж̇анасса…бз… д̣̇адтаб̣б̣ам̣, яад̇о самуд̣̇аяасажжаад̣̇и ид̇ха на г̇ахид̇анд̇и ад̇хиббааяо. самбаяуд̇д̇аад̇хигаарад̇о ‘‘ан̃н̃знаа’’д̇и бад̣̇ам̣ самбаяуд̇д̇ад̇о ан̃н̃ам̣ вад̣̇ад̇ийд̇и ааха ‘‘асамбаяуд̇д̇зна асаммиссанд̇и ад̇т̇о’’д̇и. ид̣̇аани б̣яад̇ирзгзнаби д̇амад̇т̇ам̣ бад̇идтаабзд̇ум̣ ‘‘ад̣̇угкамасукаа…бз… г̇ахид̇ааний’’д̇и вуд̇д̇ам̣. зд̇зна лагкан̣знаад̇и ‘‘асамбаяуд̇д̇зна асаммисса’’нд̇и вуд̇д̇алагкан̣зна. жид̇д̇анд̇и ‘‘жид̇д̇зхи д̇хаммзхи яз д̇хаммаа’’д̇и бан̃хам̣ убалагкзд̇и. сахаяуд̇д̇абад̣̇зхи сад̇д̇аад̇и ‘‘жзд̇асигзхи д̇хаммзхи яз д̇хаммаа’’д̇иаад̣̇инаа жид̇д̇зна сахаяуд̇д̇з д̇хаммз д̣̇ийбзнд̇зхи бад̣̇зхи ааг̇ад̇аа сад̇д̇а бан̃хаа. д̇ин̣н̣ам̣ д̇игабад̣̇аанамаг̇г̇ахан̣зна уунод̇и гад̇ваа. яз санд̇хааяа ‘‘д̇игз д̇аяо’’д̇и вуд̇д̇ам̣. д̇ам̣ бана взд̣̇анаабийд̇ид̇д̇игзсу бажчимам̣, вид̇аггад̇д̇игз батаманд̇и бад̣̇ад̇д̇аяам̣ взд̣̇ид̇аб̣б̣ам̣.
Aññesupi samudayasaccādīsu vissajjanassa…pe… daṭṭhabbaṃ, yato samudayasaccādi idha na gahitanti adhippāyo. Sampayuttādhikārato ‘‘aññenā’’ti padaṃ sampayuttato aññaṃ vadatīti āha ‘‘asampayuttena asammissanti attho’’ti. Idāni byatirekenapi tamatthaṃ patiṭṭhāpetuṃ ‘‘adukkhamasukhā…pe… gahitānī’’ti vuttaṃ. Etena lakkhaṇenāti ‘‘asampayuttena asammissa’’nti vuttalakkhaṇena. Cittanti ‘‘cittehi dhammehi ye dhammā’’ti pañhaṃ upalakkheti. Sahayuttapadehi sattāti ‘‘cetasikehi dhammehi ye dhammā’’tiādinā cittena sahayutte dhamme dīpentehi padehi āgatā satta pañhā. Tiṇṇaṃ tikapadānamaggahaṇena ūnoti katvā. Ye sandhāya ‘‘tike tayo’’ti vuttaṃ. Taṃ pana vedanāpītittikesu pacchimaṃ, vitakkattike paṭhamanti padattayaṃ veditabbaṃ.
309. уд̣̇д̇хадабад̣̇зна багаасияамаанаа ад̇т̇аа абхзд̣̇обажаарзна ‘‘уд̣̇д̇хадабад̣̇а’’нд̇и вуд̇д̇аад̇и ааха ‘‘уд̣̇д̇хадабад̣̇зна самбаяуд̇д̇зхий’’д̇и. д̇зна жа яат̇аавуд̇д̇зна уд̣̇д̇хадабад̣̇зна. манзна яуд̇д̇аад̇и зд̇т̇а мананамад̇д̇ад̇д̇аа манод̇хаад̇у ‘‘мано’’д̇и вуд̇д̇аад̇и ааха ‘‘манод̇хаад̇уяаа зганд̇асамбаяуд̇д̇аа’’д̇и.
309. Uddhaṭapadena pakāsiyamānā atthā abhedopacārena ‘‘uddhaṭapada’’nti vuttāti āha ‘‘uddhaṭapadena sampayuttehī’’ti. Tena ca yathāvuttena uddhaṭapadena. Manena yuttāti ettha mananamattattā manodhātu ‘‘mano’’ti vuttāti āha ‘‘manodhātuyā ekantasampayuttā’’ti.
сад̇д̇аманаяасамбаяуд̇д̇знавиббаяуд̇д̇абад̣̇аван̣н̣анаа нидтид̇аа.
Sattamanayasampayuttenavippayuttapadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаад̇угат̇аабаал̣и • Dhātukathāpāḷi / 7. самбаяуд̇д̇знавиббаяуд̇д̇абад̣̇анид̣̇д̣̇зсо • 7. Sampayuttenavippayuttapadaniddeso
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 7. сад̇д̇аманаяо самбаяуд̇д̇знавиббаяуд̇д̇абад̣̇аван̣н̣анаа • 7. Sattamanayo sampayuttenavippayuttapadavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 7. сад̇д̇аманаяо самбаяуд̇д̇знавиббаяуд̇д̇абад̣̇аван̣н̣анаа • 7. Sattamanayo sampayuttenavippayuttapadavaṇṇanā
