| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಪಞ್ಞತ್ತಿವಗ್ಗೋ
Paññattivaggo
ಪಠಮಗಾಥಾಸಙ್ಗಣಿಕಂ
Paṭhamagāthāsaṅgaṇikaṃ
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ
Sattanagaresu paññattasikkhāpadavaṇṇanā
೩೩೫. ಅಡ್ಢುಡ್ಢಸತಾನೀತಿ ಪಞ್ಞಾಸಾಧಿಕಾನಿ ತೀಣಿ ಸತಾನಿ। ವಿಗ್ಗಹಪದೇನ ಮನುಸ್ಸವಿಗ್ಗಹಂ ವುತ್ತಂ।
335.Aḍḍhuḍḍhasatānīti paññāsādhikāni tīṇi satāni. Viggahapadena manussaviggahaṃ vuttaṃ.
ಅತಿರೇಕನ್ತಿ ಪಠಮಕಥಿನಂ। ಕಾಳಕನ್ತಿ ಸುದ್ಧಕಾಳಕಂ। ಭೂತನ್ತಿ ಭೂತಾರೋಚನಂ। ಭಿಕ್ಖುನೀಸು ಚ ಅಕ್ಕೋಸೋತಿ ‘‘ಯಾ ಪನ ಭಿಕ್ಖುನೀ ಭಿಕ್ಖುಂ ಅಕ್ಕೋಸೇಯ್ಯಾ’’ತಿ (ಪಾಚಿ॰ ೧೦೨೯) ವುತ್ತಂ ಸಿಕ್ಖಾಪದಂ।
Atirekanti paṭhamakathinaṃ. Kāḷakanti suddhakāḷakaṃ. Bhūtanti bhūtārocanaṃ. Bhikkhunīsu ca akkosoti ‘‘yā pana bhikkhunī bhikkhuṃ akkoseyyā’’ti (pāci. 1029) vuttaṃ sikkhāpadaṃ.
ದ್ವೇಪಿ ಚ ಭೇದಾತಿ ದ್ವೇ ಸಙ್ಘಭೇದಸಿಕ್ಖಾಪದಾನಿ। ಅನ್ತರವಾಸಕನಾಮೇನ ಅಞ್ಞಾತಿಕಾಯ ಭಿಕ್ಖುನಿಯಾ ಹತ್ಥತೋ ಚೀವರಪಟಿಗ್ಗಹಣಂ ವುತ್ತಂ। ಸುತ್ತನ್ತಿ ಸುತ್ತಂ ವಿಞ್ಞಾಪೇತ್ವಾ ವಾಯಾಪನಂ। ವಿಕಾಲೇತಿ ವಿಕಾಲಭೋಜನಂ। ಚಾರಿತ್ತನ್ತಿ ಪುರೇಭತ್ತಂ ಪಚ್ಛಾಭತ್ತಂ ಚಾರಿತ್ತಂ। ನಹಾನನ್ತಿ ಓರೇನದ್ಧಮಾಸನಹಾನಂ।
Dvepi ca bhedāti dve saṅghabhedasikkhāpadāni. Antaravāsakanāmena aññātikāya bhikkhuniyā hatthato cīvarapaṭiggahaṇaṃ vuttaṃ. Suttanti suttaṃ viññāpetvā vāyāpanaṃ. Vikāleti vikālabhojanaṃ. Cārittanti purebhattaṃ pacchābhattaṃ cārittaṃ. Nahānanti orenaddhamāsanahānaṃ.
ಚೀವರಂ ದತ್ವಾತಿ ಸಮಗ್ಗೇನ ಸಙ್ಘೇನ ಚೀವರಂ ದತ್ವಾ ಖಿಯ್ಯನಂ। ಗಿರಗ್ಗನ್ತಿ ನಚ್ಚಗೀತಂ। ಚರಿಯಾತಿ ಅನ್ತೋವಸ್ಸಂ ಚಾರಿಕಚರಣಂ। ತತ್ಥೇವಾತಿ ವಸ್ಸಂವುತ್ಥಾಯ ಚಾರಿಕಂ ಅಪಕ್ಕಮಿತ್ವಾ ತತ್ಥೇವ ನಿವಾಸನಂ ಪಟಿಚ್ಚ ಪಞ್ಞತ್ತಸಿಕ್ಖಾಪದಂ। ಛನ್ದದಾನೇನಾತಿ ಪಾರಿವಾಸಿಕೇನ ಛನ್ದದಾನೇನ।
Cīvaraṃ datvāti samaggena saṅghena cīvaraṃ datvā khiyyanaṃ. Giragganti naccagītaṃ. Cariyāti antovassaṃ cārikacaraṇaṃ. Tatthevāti vassaṃvutthāya cārikaṃ apakkamitvā tattheva nivāsanaṃ paṭicca paññattasikkhāpadaṃ. Chandadānenāti pārivāsikena chandadānena.
ಪಾರಾಜಿಕಾನಿ ಚತ್ತಾರೀತಿ ಭಿಕ್ಖುನೀನಂ ಅಸಾಧಾರಣಾನಿ। ಸೋಳಸಾತಿ ಆದಿತೋ ಪಞ್ಚ ಸಿಕ್ಖಾಪದಾನಿ, ಕುಲದೂಸನಞ್ಚಾತಿ ಛ, ಭಿಕ್ಖುನೀನಂ ಅಸಾಧಾರಣಾನಿ ದಸ ನಿಸ್ಸಗ್ಗಿಯಾನಿ।
Pārājikāni cattārīti bhikkhunīnaṃ asādhāraṇāni. Soḷasāti ādito pañca sikkhāpadāni, kuladūsanañcāti cha, bhikkhunīnaṃ asādhāraṇāni dasa nissaggiyāni.
ಚತುತ್ತಿಂಸಾತಿ ಪಠಮಕಥಿನಸುದ್ಧಕಾಳಕಚೀವರಪಟಿಗ್ಗಹಣರೂಪಿಯಚೀವರವಾಯಾಪನಕೋಸೇಯ್ಯಮಿಸ್ಸಕಏಳಕಲೋಮಧೋವಾಪನದುತಿಯಪತ್ತವಜ್ಜಿತಾನಿ ಭಿಕ್ಖುವಿಭಙ್ಗೇ ದ್ವಾವೀಸತಿ, ಭಿಕ್ಖುನೀನಂ ಅಸಾಧಾರಣಾನಿ ದ್ವಾದಸ ಚಾತಿ ಚತುತ್ತಿಂಸ। ಛಪಞ್ಞಾಸಸತನ್ತಿ ವೇಸಾಲಿಯಾದೀಸು ಪಞ್ಞತ್ತಾನಿ ದ್ವತ್ತಿಂಸಸಿಕ್ಖಾಪದಾನಿ ಠಪೇತ್ವಾ ಸೇಸಾ ಛಪಞ್ಞಾಸಸತಂ।
Catuttiṃsāti paṭhamakathinasuddhakāḷakacīvarapaṭiggahaṇarūpiyacīvaravāyāpanakoseyyamissakaeḷakalomadhovāpanadutiyapattavajjitāni bhikkhuvibhaṅge dvāvīsati, bhikkhunīnaṃ asādhāraṇāni dvādasa cāti catuttiṃsa. Chapaññāsasatanti vesāliyādīsu paññattāni dvattiṃsasikkhāpadāni ṭhapetvā sesā chapaññāsasataṃ.
ದಸ ಗಾರಯ್ಹಾತಿ ವೋಸಾಸಅಪ್ಪಟಿಸಂ ವಿದಿತಸಿಕ್ಖಾಪದದ್ವಯಞ್ಚ ಠಪೇತ್ವಾ ಸೇಸಾನಿ ದಸ ಪಾಟಿದೇಸನೀಯಾನಿ। ದ್ವೇ ಸತ್ತತಿ ಸೇಖಿಯಾನಿ ಸುರುಸುರುಕಾರಕಸಾಮಿಸೇನಹತ್ಥೇನಪಾನೀಯಥಾಲಕಪಟಿಗ್ಗಹಣಸಸಿತ್ಥಕಪತ್ತಧೋವನಾನಿ ತೀಣಿ ಠಪೇತ್ವಾ ಸೇಸಾನಿ ಸೇಖಿಯಾನಿ।
Dasagārayhāti vosāsaappaṭisaṃ viditasikkhāpadadvayañca ṭhapetvā sesāni dasa pāṭidesanīyāni. Dve sattati sekhiyāni surusurukārakasāmisenahatthenapānīyathālakapaṭiggahaṇasasitthakapattadhovanāni tīṇi ṭhapetvā sesāni sekhiyāni.
ಸೇಯ್ಯಾತಿ ಅನುಪಸಮ್ಪನ್ನೇನ ಸಹಸೇಯ್ಯಸಿಕ್ಖಾಪದಂ। ಖಣನೇತಿ ಪಥವೀಖಣನಂ। ಗಚ್ಛ ದೇವತೇತಿ ಭೂತಗಾಮಸಿಕ್ಖಾಪದಂ ವುತ್ತಂ। ಸಪ್ಪಾಣಕಂ ಸಿಞ್ಚನ್ತಿ ಸಪ್ಪಾಣೋದಕಸಿಞ್ಚನಂ। ಮಹಾವಿಹಾರೋತಿ ಮಹಲ್ಲಕವಿಹಾರೋ।
Seyyāti anupasampannena sahaseyyasikkhāpadaṃ. Khaṇaneti pathavīkhaṇanaṃ. Gaccha devateti bhūtagāmasikkhāpadaṃ vuttaṃ. Sappāṇakaṃ siñcanti sappāṇodakasiñcanaṃ. Mahāvihāroti mahallakavihāro.
ಅಞ್ಞನ್ತಿ ಅಞ್ಞವಾದಕಂ। ದ್ವಾರನ್ತಿ ಯಾವ ದ್ವಾರಕೋಸಾ ಅಗ್ಗಳಟ್ಠಪನಂ। ಸಹಧಮ್ಮೋತಿ ಸಹಧಮ್ಮಿಕಂ ವುಚ್ಚಮಾನೋ। ಪಯೋಪಾನನ್ತಿ ಸುರುಸುರುಕಾರಕಸಿಕ್ಖಾಪದಂ।
Aññanti aññavādakaṃ. Dvāranti yāva dvārakosā aggaḷaṭṭhapanaṃ. Sahadhammoti sahadhammikaṃ vuccamāno. Payopānanti surusurukārakasikkhāpadaṃ.
ಏಳಕಲೋಮೋತಿ ಏಳಕಲೋಮಧೋವಾಪನಂ। ಪತ್ತೋ ಚಾತಿ ದುತಿಯಪತ್ತೋ। ಓವಾದೋತಿ ಭಿಕ್ಖುನುಪಸ್ಸಯಂ ಉಪಸಙ್ಕಮಿತ್ವಾ ಓವಾದೋ। ಭೇಸಜ್ಜನ್ತಿ ಚತುಮಾಸಪಚ್ಚಯಪವಾರಣಾಸಿಕ್ಖಾಪದಂ। ಆರಞ್ಞಿಕೋತಿ ಚತುತ್ಥಪಾಟಿದೇಸನೀಯಂ। ಓವಾದೋತಿ ಓವಾದಾಯ ವಾ ಸಂವಾಸಾಯ ವಾ ಅಗಮನಂ।
Eḷakalomoti eḷakalomadhovāpanaṃ. Patto cāti dutiyapatto. Ovādoti bhikkhunupassayaṃ upasaṅkamitvā ovādo. Bhesajjanti catumāsapaccayapavāraṇāsikkhāpadaṃ. Āraññikoti catutthapāṭidesanīyaṃ. Ovādoti ovādāya vā saṃvāsāya vā agamanaṃ.
೩೩೭. ‘‘ಯೇ ಚ ಯಾವತತಿಯಕಾ’’ತಿ ಪಞ್ಹಸ್ಸ ‘‘ಇಮೇ ಖೋ ಯಾವತತಿಯಕಾ’’ತಿ ವಿಸ್ಸಜ್ಜನಂ ವತ್ವಾ ತದನನ್ತರಂ ‘‘ಸಾಧಾರಣಂ ಅಸಾಧಾರಣ’’ನ್ತಿಆದಿಪಞ್ಹಾನಂ ವಿಸ್ಸಜ್ಜನೇ ವತ್ತಬ್ಬೇ ಯಸ್ಮಾ ತಂ ಅವತ್ವಾ ‘‘ಕತಿ ಛೇದನಕಾನೀ’’ತಿಆದಿಕೇ ಅಟ್ಠ ಪಞ್ಹೇ ಅನ್ತರಾ ವಿಸ್ಸಜ್ಜೇತ್ವಾ ತೇಸಂ ಅನನ್ತರಾ ‘‘ವೀಸಂ ದ್ವೇ ಸತಾನಿ ಭಿಕ್ಖೂನಂ…ಪೇ॰… ಛಚತ್ತಾರೀಸಾ ಭಿಕ್ಖೂನಂ, ಭಿಕ್ಖುನೀಹಿ ಅಸಾಧಾರಣಾ’’ತಿಆದಿನಾ ಉಕ್ಕಮೇನೇವ ಸಾಧಾರಣಾದಿಪಞ್ಹಾ ವಿಸ್ಸಜ್ಜಿತಾ, ತಸ್ಮಾ ತಂ ಉಕ್ಕಮವಿಸ್ಸಜ್ಜನಕಾರಣಂ ದಸ್ಸೇತುಂ ‘‘ಯಸ್ಮಾ ಪನ ಯೇ ಚ ಯಾವತತಿಯಕಾತಿ ಅಯಂ ಪಞ್ಹೋ’’ತಿಆದಿಮಾಹ।
337. ‘‘Ye ca yāvatatiyakā’’ti pañhassa ‘‘ime kho yāvatatiyakā’’ti vissajjanaṃ vatvā tadanantaraṃ ‘‘sādhāraṇaṃ asādhāraṇa’’ntiādipañhānaṃ vissajjane vattabbe yasmā taṃ avatvā ‘‘kati chedanakānī’’tiādike aṭṭha pañhe antarā vissajjetvā tesaṃ anantarā ‘‘vīsaṃ dve satāni bhikkhūnaṃ…pe… chacattārīsā bhikkhūnaṃ, bhikkhunīhi asādhāraṇā’’tiādinā ukkameneva sādhāraṇādipañhā vissajjitā, tasmā taṃ ukkamavissajjanakāraṇaṃ dassetuṃ ‘‘yasmā pana ye ca yāvatatiyakāti ayaṃ pañho’’tiādimāha.
೩೩೮. ಧೋವನಞ್ಚ ಪಟಿಗ್ಗಹೋತಿಆದಿಗಾಥಾ ಅಟ್ಠಕಥಾಚರಿಯಾನಂ ಗಾಥಾವ। ಛಬ್ಬಸ್ಸಾನಿ ನಿಸೀದನನ್ತಿ ದ್ವೇ ಸಿಕ್ಖಾಪದಾನಿ। ದ್ವೇ ಲೋಮಾತಿ ತಿಯೋಜನಾತಿಕ್ಕಮಧೋವಾಪನವಸೇನ ದ್ವೇ ಏಳಕಲೋಮಸಿಕ್ಖಾಪದಾನಿ। ವಸ್ಸಿಕಾ ಆರಞ್ಞಕೇನ ಚಾತಿ ವಸ್ಸಿಕಸಾಟಿಕಾ ಪರಿಯೇಸನಅರಞ್ಞಕೇಸು ಸೇನಾಸನೇಸು ವಿಹರಣಸಿಕ್ಖಾಪದೇನ ಸಹ।
338.Dhovanañca paṭiggahotiādigāthā aṭṭhakathācariyānaṃ gāthāva. Chabbassāni nisīdananti dve sikkhāpadāni. Dve lomāti tiyojanātikkamadhovāpanavasena dve eḷakalomasikkhāpadāni. Vassikā āraññakena cāti vassikasāṭikā pariyesanaaraññakesu senāsanesu viharaṇasikkhāpadena saha.
ಪಣೀತನ್ತಿ ಪಣೀತಭೋಜನವಿಞ್ಞಾಪನಂ। ಊನನ್ತಿ ಊನವೀಸತಿವಸ್ಸೂಪಸಮ್ಪಾದನಂ। ಮಾತುಗಾಮೇನ ಸದ್ಧಿನ್ತಿ ಸಂವಿಧಾಯ ಗಮನಂ ವುತ್ತಂ। ಯಾ ಸಿಕ್ಖಾತಿ ಯಂ ಸಿಕ್ಖಾಪದಂ। ನಿಸೀದನೇ ಚ ಯಾ ಸಿಕ್ಖಾತಿ ಪಮಾಣಾತಿಕ್ಕನ್ತನಿಸೀದನಕಾರಾಪನೇ ಯಂ ಸಿಕ್ಖಾಪದಂ। ತಥಾ ವಸ್ಸಿಕಾ ಯಾ ಚ ಸಾಟಿಕಾತಿ ಏತ್ಥಾಪಿ।
Paṇītanti paṇītabhojanaviññāpanaṃ. Ūnanti ūnavīsativassūpasampādanaṃ. Mātugāmena saddhinti saṃvidhāya gamanaṃ vuttaṃ. Yā sikkhāti yaṃ sikkhāpadaṃ. Nisīdaneca yā sikkhāti pamāṇātikkantanisīdanakārāpane yaṃ sikkhāpadaṃ. Tathā vassikā yā ca sāṭikāti etthāpi.
ಪಾಳಿಯಂ ಸತಂ ಸತ್ತತಿ ಛಚ್ಚೇವಿಮೇ ಹೋನ್ತಿ ಉಭಿನ್ನಂ ಅಸಾಧಾರಣಾತಿ ಭಿಕ್ಖೂನಂ ಭಿಕ್ಖುನೀಹಿ ಅಸಾಧಾರಣಾ ಛಚತ್ತಾರೀಸ, ಭಿಕ್ಖುನೀನಂ ಭಿಕ್ಖೂಹಿ ಅಸಾಧಾರಣಾ ತಿಂಸಾಧಿಕಂ ಸತಞ್ಚಾತಿ ಏವಂ ಉಭಿನ್ನಂ ಅಸಾಧಾರಣಾ ಚ ಛಸತ್ತತಿಅಧಿಕಂ ಸತಂ ಸಿಕ್ಖಾಪದಾನೀತಿ ಅತ್ಥೋ। ಸತಂ ಸತ್ತತಿ ಚತ್ತಾರೀತಿ ಉಭಿನ್ನಂ ಸಾಧಾರಣಸಿಕ್ಖಾನಂ ಗಣನಾ ಚತುಸತ್ತತಿಅಧಿಕಂ ಸತಂ ಸಿಕ್ಖಾಪದಾನೀತಿ ಅತ್ಥೋ।
Pāḷiyaṃ sataṃ sattati chaccevime honti ubhinnaṃ asādhāraṇāti bhikkhūnaṃ bhikkhunīhi asādhāraṇā chacattārīsa, bhikkhunīnaṃ bhikkhūhi asādhāraṇā tiṃsādhikaṃ satañcāti evaṃ ubhinnaṃ asādhāraṇā ca chasattatiadhikaṃ sataṃ sikkhāpadānīti attho. Sataṃ sattati cattārīti ubhinnaṃ sādhāraṇasikkhānaṃ gaṇanā catusattatiadhikaṃ sataṃ sikkhāpadānīti attho.
ವಿಭತ್ತಿಯೋತಿ ಆಪತ್ತಿಕ್ಖನ್ಧಾ ಚೇವ ಉಪೋಸಥಪವಾರಣಾದಯೋ ಚ ಅಧಿಪ್ಪೇತಾ। ತೇ ಹಿ ಪಾರಾಜಿಕಾದಿಭೇದೇನ, ಭಿಕ್ಖುಉಪೋಸಥಾದಿಭೇದೇನ ಚ ವಿಭಜೀಯನ್ತಿ। ತೇನಾಹ ‘‘ವಿಭತ್ತಿಯೋ’’ತಿಆದಿ। ತೇಸನ್ತಿ ಅಟ್ಠನ್ನಂ ಪಾರಾಜಿಕಾದೀನಂ। ದ್ವೀಹೀತಿಆದಿ ವಿವಾದಾಧಿಕರಣಾದೀನಂ ಸಮಥೇಹಿ ವೂಪಸಮದಸ್ಸನಂ।
Vibhattiyoti āpattikkhandhā ceva uposathapavāraṇādayo ca adhippetā. Te hi pārājikādibhedena, bhikkhuuposathādibhedena ca vibhajīyanti. Tenāha ‘‘vibhattiyo’’tiādi. Tesanti aṭṭhannaṃ pārājikādīnaṃ. Dvīhītiādi vivādādhikaraṇādīnaṃ samathehi vūpasamadassanaṃ.
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ ನಿಟ್ಠಿತಾ।
Sattanagaresu paññattasikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi
೧. ಸತ್ತನಗರೇಸು ಪಞ್ಞತ್ತಸಿಕ್ಖಾಪದಂ • 1. Sattanagaresu paññattasikkhāpadaṃ
೩. ಛೇದನಕಾದಿ • 3. Chedanakādi
೪. ಅಸಾಧಾರಣಾದಿ • 4. Asādhāraṇādi
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ • Sattanagaresu paññattasikkhāpadavaṇṇanā
ಛೇದನಕಾದಿವಣ್ಣನಾ • Chedanakādivaṇṇanā
ಅಸಾಧಾರಣಾದಿವಣ್ಣನಾ • Asādhāraṇādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ • Sattanagaresu paññattasikkhāpadavaṇṇanā
ಅಸಾಧಾರಣಾದಿವಣ್ಣನಾ • Asādhāraṇādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ • Sattanagaresu paññattasikkhāpadavaṇṇanā
ಛೇದನಕಾದಿವಣ್ಣನಾ • Chedanakādivaṇṇanā
ಅಸಾಧಾರಣಾದಿವಣ್ಣನಾ • Asādhāraṇādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi
ಸತ್ತನಗರೇಸು ಪಞ್ಞತ್ತಸಿಕ್ಖಾಪದವಣ್ಣನಾ • Sattanagaresu paññattasikkhāpadavaṇṇanā
ಛೇದನಕಾದಿವಣ್ಣನಾ • Chedanakādivaṇṇanā
ಅಸಾಧಾರಣಾದಿವಣ್ಣನಾ • Asādhāraṇādivaṇṇanā
