| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౨. సత్తసుత్తం
2. Sattasuttaṃ
౧౬౧. సావత్థినిదానం. ఏకమన్తం నిసిన్నో ఖో ఆయస్మా రాధో భగవన్తం ఏతదవోచ – ‘‘‘సత్తో, సత్తో’తి, భన్తే, వుచ్చతి. కిత్తావతా ను ఖో, భన్తే , సత్తోతి వుచ్చతీ’’తి? ‘‘రూపే ఖో, రాధ, యో ఛన్దో యో రాగో యా నన్దీ యా తణ్హా, తత్ర సత్తో, తత్ర విసత్తో, తస్మా సత్తోతి వుచ్చతి. వేదనాయ… సఞ్ఞాయ… సఙ్ఖారేసు… విఞ్ఞాణే యో ఛన్దో యో రాగో యా నన్దీ యా తణ్హా, తత్ర సత్తో, తత్ర విసత్తో, తస్మా సత్తోతి వుచ్చతి’’.
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘సేయ్యథాపి, రాధ, కుమారకా వా కుమారికాయో వా పంస్వాగారకేహి కీళన్తి. యావకీవఞ్చ తేసు పంస్వాగారకేసు అవిగతరాగా హోన్తి అవిగతచ్ఛన్దా అవిగతపేమా అవిగతపిపాసా అవిగతపరిళాహా అవిగతతణ్హా, తావ తాని పంస్వాగారకాని అల్లీయన్తి కేళాయన్తి ధనాయన్తి 1 మమాయన్తి. యతో చ ఖో, రాధ, కుమారకా వా కుమారికాయో వా తేసు పంస్వాగారకేసు విగతరాగా హోన్తి విగతచ్ఛన్దా విగతపేమా విగతపిపాసా విగతపరిళాహా విగతతణ్హా, అథ ఖో తాని పంస్వాగారకాని హత్థేహి చ పాదేహి చ వికిరన్తి విధమన్తి విద్ధంసేన్తి వికీళనియం 2 కరోన్తి. ఏవమేవ ఖో, రాధ, తుమ్హేపి రూపం వికిరథ విధమథ విద్ధంసేథ వికీళనియం కరోథ తణ్హాక్ఖయాయ పటిపజ్జథ. వేదనం వికిరథ విధమథ విద్ధంసేథ వికీళనియం కరోథ తణ్హాక్ఖయాయ పటిపజ్జథ. సఞ్ఞం… సఙ్ఖారే వికిరథ విధమథ విద్ధంసేథ వికీళనియం కరోథ తణ్హాక్ఖయాయ పటిపజ్జథ. విఞ్ఞాణం వికిరథ విధమథ విద్ధంసేథ వికీళనియం కరోథ తణ్హాక్ఖయాయ పటిపజ్జథ. తణ్హాక్ఖయో హి, రాధ, నిబ్బాన’’న్తి. దుతియం.
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౨-౧౦. సత్తసుత్తాదివణ్ణనా • 2-10. Sattasuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౨-౧౦. సత్తసుత్తాదివణ్ణనా • 2-10. Sattasuttādivaṇṇanā
