| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੫. ਮਹਾਯਞ੍ਞવਗ੍ਗੋ
5. Mahāyaññavaggo
੧. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤવਣ੍ਣਨਾ
1. Sattaviññāṇaṭṭhitisuttavaṇṇanā
੪੪. ਪਞ੍ਚਮਸ੍ਸ ਪਠਮੇ ਯਸ੍ਮਾ ਨਿਦਸ੍ਸਨਤ੍ਥੇ ਨਿਪਾਤੋ (ਦੀ॰ ਨਿ॰ ਟੀ॰ ੨.੧੨੭) ਤਸ੍ਮਾ ਸੇਯ੍ਯਥਾਪਿ ਮਨੁਸ੍ਸਾਤਿ ਯਥਾ ਮਨੁਸ੍ਸਾਤਿ વੁਤ੍ਤਂ ਹੋਤਿ। વਿਸੇਸੋ ਹੋਤਿਯੇવ ਸਤਿਪਿ ਬਾਹਿਰਸ੍ਸ ਕਾਰਣਸ੍ਸ ਅਭੇਦੇ ਅਜ੍ਝਤ੍ਤਿਕਸ੍ਸ ਭਿਨ੍ਨਤ੍ਤਾ। ਨਾਨਤ੍ਤਂ ਕਾਯੇ ਏਤੇਸਂ, ਨਾਨਤ੍ਤੋ વਾ ਕਾਯੋ ਏਤੇਸਨ੍ਤਿ ਨਾਨਤ੍ਤਕਾਯਾ। ਇਮਿਨਾ ਨਯੇਨ ਸੇਸਪਦੇਸੁਪਿ ਅਤ੍ਥੋ વੇਦਿਤਬ੍ਬੋ। ਨੇਸਨ੍ਤਿ ਮਨੁਸ੍ਸਾਨਂ। ਨਾਨਤ੍ਤਾ ਸਞ੍ਞਾ ਏਤੇਸਂ ਅਤ੍ਥੀਤਿ ਨਾਨਤ੍ਤਸਞ੍ਞਿਨੋ। ਸੁਖਸਮੁਸ੍ਸਯਤੋ વਿਨਿਪਾਤੋ ਏਤੇਸਂ ਅਤ੍ਥੀਤਿ વਿਨਿਪਾਤਿਕਾ ਸਤਿਪਿ ਦੇવਭਾવੇ ਦਿਬ੍ਬਸਮ੍ਪਤ੍ਤਿਯਾ ਅਭਾવਤੋ। ਅਪਾਯੇਸੁ વਾ ਗਤੋ ਨਤ੍ਥਿ ਨਿਪਾਤੋ ਏਤੇਸਨ੍ਤਿ વਿਨਿਪਾਤਿਕਾ। ਤੇਨਾਹ ‘‘ਚਤੁਅਪਾਯવਿਨਿਮੁਤ੍ਤਾ’’ਤਿ। ਪਿਯਙ੍ਕਰਮਾਤਾਦੀਨਂ વਿਯਾਤਿ ਪਿਯਙ੍ਕਰਮਾਤਾ ਕਿਰ ਯਕ੍ਖਿਨੀ ਪਚ੍ਚੂਸਸਮਯੇ ਅਨੁਰੁਦ੍ਧਤ੍ਥੇਰਸ੍ਸ ਧਮ੍ਮਂ ਸਜ੍ਝਾਯਤੋ ਸੁਤ੍વਾ –
44. Pañcamassa paṭhame yasmā nidassanatthe nipāto (dī. ni. ṭī. 2.127) tasmā seyyathāpi manussāti yathā manussāti vuttaṃ hoti. Viseso hotiyeva satipi bāhirassa kāraṇassa abhede ajjhattikassa bhinnattā. Nānattaṃ kāye etesaṃ, nānatto vā kāyo etesanti nānattakāyā. Iminā nayena sesapadesupi attho veditabbo. Nesanti manussānaṃ. Nānattā saññā etesaṃ atthīti nānattasaññino. Sukhasamussayato vinipāto etesaṃ atthīti vinipātikā satipi devabhāve dibbasampattiyā abhāvato. Apāyesu vā gato natthi nipāto etesanti vinipātikā. Tenāha ‘‘catuapāyavinimuttā’’ti. Piyaṅkaramātādīnaṃ viyāti piyaṅkaramātā kira yakkhinī paccūsasamaye anuruddhattherassa dhammaṃ sajjhāyato sutvā –
‘‘ਮਾ ਸਦ੍ਦਮਕਰੀ ਪਿਯਙ੍ਕਰ, ਭਿਕ੍ਖੁ ਧਮ੍ਮਪਦਾਨਿ ਭਾਸਤਿ।
‘‘Mā saddamakarī piyaṅkara, bhikkhu dhammapadāni bhāsati;
ਅਪਿ ਧਮ੍ਮਪਦਂ વਿਜਾਨਿਯ, ਪਟਿਪਜ੍ਜੇਮ ਹਿਤਾਯ ਨੋ ਸਿਯਾ॥
Api dhammapadaṃ vijāniya, paṭipajjema hitāya no siyā.
‘‘ਪਾਣੇਸੁ ਚ ਸਂਯਮਾਮਸੇ, ਸਮ੍ਪਜਾਨਮੁਸਾ ਨ ਭਣਾਮਸੇ।
‘‘Pāṇesu ca saṃyamāmase, sampajānamusā na bhaṇāmase;
ਸਿਕ੍ਖੇਮ ਸੁਸੀਲ੍ਯਮਤ੍ਤਨੋ, ਅਪਿ ਮੁਚ੍ਚੇਮ ਪਿਸਾਚਯੋਨਿਯਾ’’ਤਿ॥ (ਸਂ॰ ਨਿ॰ ੧.੨੪੦) –
Sikkhema susīlyamattano, api muccema pisācayoniyā’’ti. (saṃ. ni. 1.240) –
ਏવਂ ਪੁਤ੍ਤਕਂ ਸਞ੍ਞਾਪੇਤ੍વਾ ਤਂ ਦਿવਸਂ ਸੋਤਾਪਤ੍ਤਿਫਲਂ ਪਤ੍ਤਾ। ਉਤ੍ਤਰਮਾਤਾ ਪਨ ਭਗવਤੋ ਧਮ੍ਮਂ ਸੁਤ੍વਾવ ਸੋਤਾਪਨ੍ਨਾ ਜਾਤਾ।
Evaṃ puttakaṃ saññāpetvā taṃ divasaṃ sotāpattiphalaṃ pattā. Uttaramātā pana bhagavato dhammaṃ sutvāva sotāpannā jātā.
ਬ੍ਰਹ੍ਮਕਾਯੇ ਪਠਮਜ੍ਝਾਨਨਿਬ੍ਬਤ੍ਤੇ ਬ੍ਰਹ੍ਮਸਮੂਹੇ, ਬ੍ਰਹ੍ਮਨਿਕਾਯੇ વਾ ਭવਾਤਿ ਬ੍ਰਹ੍ਮਕਾਯਿਕਾ। ਮਹਾਬ੍ਰਹ੍ਮੁਨੋ ਪਰਿਸਾਯ ਭવਾਤਿ ਬ੍ਰਹ੍ਮਪਾਰਿਸਜ੍ਜਾ ਤਸ੍ਸ ਪਰਿਚਾਰਕਟ੍ਠਾਨੇ ਠਿਤਤ੍ਤਾ। ਮਹਾਬ੍ਰਹ੍ਮੁਨੋ ਪੁਰੋਹਿਤਟ੍ਠਾਨੇ ਠਿਤਾਤਿ ਬ੍ਰਹ੍ਮਪੁਰੋਹਿਤਾ। ਆਯੁવਣ੍ਣਾਦੀਹਿ ਮਹਨ੍ਤਾ ਬ੍ਰਹ੍ਮਾਨੋਤਿ ਮਹਾਬ੍ਰਹ੍ਮਾਨੋ। ਸਤਿਪਿ ਤੇਸਂ ਤਿવਿਧਾਨਮ੍ਪਿ ਪਠਮੇਨ ਝਾਨੇਨ ਗਨ੍ਤ੍વਾ ਨਿਬ੍ਬਤ੍ਤਭਾવੇ ਝਾਨਸ੍ਸ ਪਨ ਪવਤ੍ਤਿਭੇਦੇਨ ਅਯਂ વਿਸੇਸੋਤਿ ਦਸ੍ਸੇਤੁਂ ‘‘ਬ੍ਰਹ੍ਮਪਾਰਿਸਜ੍ਜਾ ਪਨਾ’’ਤਿਆਦਿ વੁਤ੍ਤਂ। ਪਰਿਤ੍ਤੇਨਾਤਿ ਹੀਨੇਨ। ਸਾ ਚਸ੍ਸ ਹੀਨਤਾ ਛਨ੍ਦਾਦੀਨਂ ਹੀਨਤਾਯ વੇਦਿਤਬ੍ਬਾ। ਪਟਿਲਦ੍ਧਮਤ੍ਤਂ વਾ ਹੀਨਂ। ਕਪ੍ਪਸ੍ਸਾਤਿ ਅਸਙ੍ਖ੍ਯੇਯ੍ਯਕਪ੍ਪਸ੍ਸ । ਹੀਨਪਣੀਤਾਨਂ ਮਜ੍ਝੇ ਭવਤ੍ਤਾ ਮਜ੍ਝਿਮਂ। ਸਾ ਚਸ੍ਸ ਮਜ੍ਝਿਮਤਾ ਛਨ੍ਦਾਦੀਨਂ ਮਜ੍ਝਿਮਤਾਯ વੇਦਿਤਬ੍ਬਾ। ਪਟਿਲਭਿਤ੍વਾ ਨਾਤਿਸੁਭਾવਿਤਂ વਾ ਮਜ੍ਝਿਮਂ। ਉਪਡ੍ਢਕਪ੍ਪੋਤਿ ਅਸਙ੍ਖ੍ਯੇਯ੍ਯਕਪ੍ਪਸ੍ਸ ਉਪਡ੍ਢਕਪ੍ਪੋ। વਿਪ੍ਫਾਰਿਕਤਰੋਤਿ ਬ੍ਰਹ੍ਮਪਾਰਿਸਜ੍ਜੇਹਿ ਪਮਾਣਤੋ વਿਪੁਲਤਰੋ ਸਭਾવਤੋ ਉਲ਼ਾਰਤਰੋ ਚ ਹੋਤਿ। ਸਭਾવੇਨਪਿ ਹਿ ਉਲ਼ਾਰਤਮੋવ। ਤਂ ਪਨੇਤ੍ਥ ਅਪ੍ਪਮਾਣਂ। ਤਸ੍ਸ ਹਿ ਪਰਿਤ੍ਤਾਭਾਦੀਨਂ ਪਰਿਤ੍ਤਸੁਭਾਦੀਨਞ੍ਚ ਕਾਯੇ ਸਤਿਪਿ ਸਭਾવવੇਮਤ੍ਤੇ ਏਕਤ੍ਤવਸੇਨੇવ વવਤ੍ਥਪੀਯਤੀਤਿ ‘‘ਏਕਤ੍ਤਕਾਯਾ’’ਤ੍વੇવ ਤੇ વੁਚ੍ਚਨ੍ਤਿ। ਪਣੀਤੇਨਾਤਿ ਉਕ੍ਕਟ੍ਠੇਨ। ਸਾ ਚਸ੍ਸ ਉਕ੍ਕਟ੍ਠਤਾ ਛਨ੍ਦਾਦੀਨਂ ਉਕ੍ਕਟ੍ਠਤਾਯ વੇਦਿਤਬ੍ਬਾ। ਸੁਭਾવਿਤਂ વਾ, ਸਮ੍ਮਦੇવ, વਸਿਭਾવਂ ਪਾਪਿਤਂ ਪਣੀਤਂ ‘‘ਪਧਾਨਭਾવਂ ਨੀਤ’’ਨ੍ਤਿ ਕਤ੍વਾ। ਇਧਾਪਿ ਕਪ੍ਪੋ ਅਸਙ੍ਖ੍ਯੇਯ੍ਯਕਪ੍ਪવਸੇਨੇવ વੇਦਿਤਬ੍ਬੋ ਪਰਿਪੁਣ੍ਣਮਹਾਕਪ੍ਪਸ੍ਸ ਅਸਮ੍ਭવਤੋ। ਇਤੀਤਿ ਏવਂ વੁਤ੍ਤਪ੍ਪਕਾਰੇਨ। ਤੇਤਿ ‘‘ਬ੍ਰਹ੍ਮਕਾਯਿਕਾ’’ਤਿ વੁਤ੍ਤਾ ਤਿવਿਧਾਪਿ ਬ੍ਰਹ੍ਮਾਨੋ। ਸਞ੍ਞਾਯ ਏਕਤ੍ਤਾਤਿ ਤਿਹੇਤੁਕਭਾવੇਨ ਏਕਸਭਾવਤ੍ਤਾ। ਨ ਹਿ ਤਸ੍ਸਾ ਸਮ੍ਪਯੁਤ੍ਤਧਮ੍ਮવਸੇਨ ਅਞ੍ਞੋਪਿ ਕੋਚਿ ਭੇਦੋ ਅਤ੍ਥਿ। ਏવਨ੍ਤਿ ਇਮਿਨਾ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋ ਗਹਿਤਾਤਿ ਦਸ੍ਸੇਤਿ।
Brahmakāye paṭhamajjhānanibbatte brahmasamūhe, brahmanikāye vā bhavāti brahmakāyikā. Mahābrahmuno parisāya bhavāti brahmapārisajjā tassa paricārakaṭṭhāne ṭhitattā. Mahābrahmuno purohitaṭṭhāne ṭhitāti brahmapurohitā. Āyuvaṇṇādīhi mahantā brahmānoti mahābrahmāno. Satipi tesaṃ tividhānampi paṭhamena jhānena gantvā nibbattabhāve jhānassa pana pavattibhedena ayaṃ visesoti dassetuṃ ‘‘brahmapārisajjā panā’’tiādi vuttaṃ. Parittenāti hīnena. Sā cassa hīnatā chandādīnaṃ hīnatāya veditabbā. Paṭiladdhamattaṃ vā hīnaṃ. Kappassāti asaṅkhyeyyakappassa . Hīnapaṇītānaṃ majjhe bhavattā majjhimaṃ. Sā cassa majjhimatā chandādīnaṃ majjhimatāya veditabbā. Paṭilabhitvā nātisubhāvitaṃ vā majjhimaṃ. Upaḍḍhakappoti asaṅkhyeyyakappassa upaḍḍhakappo. Vipphārikataroti brahmapārisajjehi pamāṇato vipulataro sabhāvato uḷārataro ca hoti. Sabhāvenapi hi uḷāratamova. Taṃ panettha appamāṇaṃ. Tassa hi parittābhādīnaṃ parittasubhādīnañca kāye satipi sabhāvavematte ekattavaseneva vavatthapīyatīti ‘‘ekattakāyā’’tveva te vuccanti. Paṇītenāti ukkaṭṭhena. Sā cassa ukkaṭṭhatā chandādīnaṃ ukkaṭṭhatāya veditabbā. Subhāvitaṃ vā, sammadeva, vasibhāvaṃ pāpitaṃ paṇītaṃ ‘‘padhānabhāvaṃ nīta’’nti katvā. Idhāpi kappo asaṅkhyeyyakappavaseneva veditabbo paripuṇṇamahākappassa asambhavato. Itīti evaṃ vuttappakārena. Teti ‘‘brahmakāyikā’’ti vuttā tividhāpi brahmāno. Saññāya ekattāti tihetukabhāvena ekasabhāvattā. Na hi tassā sampayuttadhammavasena aññopi koci bhedo atthi. Evanti iminā nānattakāyā ekattasaññino gahitāti dasseti.
ਦਣ੍ਡਉਕ੍ਕਾਯਾਤਿ ਦਣ੍ਡਦੀਪਿਕਾਯ। ਸਰਤਿ ਧਾવਤਿ, વਿਸ੍ਸਰਤਿ વਿਪ੍ਪਕਿਣ੍ਣਾ વਿਯ ਧਾવਤਿ। ਦ੍વੇ ਕਪ੍ਪਾਤਿ ਦ੍વੇ ਮਹਾਕਪ੍ਪਾ। ਇਤੋ ਪਰੇਸੁਪਿ ਏਸੇવ ਨਯੋ। ਇਧਾਤਿ ਇਮਸ੍ਮਿਂ ਸੁਤ੍ਤੇ। ਉਕ੍ਕਟ੍ਠਪਰਿਚ੍ਛੇਦવਸੇਨ ਆਭਸ੍ਸਰਗ੍ਗਹਣੇਨੇવ ਸਬ੍ਬੇਪਿ ਤੇ ਪਰਿਤ੍ਤਾਭਾਅਪ੍ਪਮਾਣਾਭਾਪਿ ਗਹਿਤਾ।
Daṇḍaukkāyāti daṇḍadīpikāya. Sarati dhāvati, vissarati vippakiṇṇā viya dhāvati. Dve kappāti dve mahākappā. Ito paresupi eseva nayo. Idhāti imasmiṃ sutte. Ukkaṭṭhaparicchedavasena ābhassaraggahaṇeneva sabbepi te parittābhāappamāṇābhāpi gahitā.
ਸੁਨ੍ਦਰਾ ਪਭਾ ਸੁਭਾ, ਤਾਯ ਕਿਣ੍ਣਾ ਸੁਭਾਕਿਣ੍ਣਾਤਿ વਤ੍ਤਬ੍ਬੇ। ਭਾ-ਸਦ੍ਦਸ੍ਸ ਰਸ੍ਸਤ੍ਤਂ ਅਨ੍ਤਿਮ-ਣ-ਕਾਰਸ੍ਸ ਹ-ਕਾਰਞ੍ਚ ਕਤ੍વਾ ‘‘ਸੁਭਕਿਣ੍ਹਾ’’ਤਿ વੁਤ੍ਤਾ। ਅਟ੍ਠਕਥਾਯਂ ਪਨ ਨਿਚ੍ਚਲਾਯ ਏਕਗ੍ਘਨਾਯ ਪਭਾਯ ਸੁਭੋਤਿ ਪਰਿਯਾਯવਚਨਨ੍ਤਿ ‘‘ਸੁਭੇਨ ਓਕਿਣ੍ਣਾ વਿਕਿਣ੍ਣਾ’’ਤਿ ਅਤ੍ਥੋ વੁਤ੍ਤੋ। ਏਤ੍ਥਾਪਿ ਅਨ੍ਤਿਮ-ਣ-ਕਾਰਸ੍ਸ ਹ-ਕਾਰਕਰਣਂ ਇਚ੍ਛਿਤਬ੍ਬਮੇવ। ਨ ਛਿਜ੍ਜਿਤ੍વਾ ਪਭਾ ਗਚ੍ਛਤਿ ਏਕਗ੍ਘਨਤ੍ਤਾ। ਚਤੁਤ੍ਥવਿਞ੍ਞਾਣਟ੍ਠਿਤਿਮੇવ ਭਜਨ੍ਤਿ ਕਾਯਸ੍ਸ ਸਞ੍ਞਾਯ ਚ ਏਕਰੂਪਤ੍ਤਾ। વਿਪੁਲਸਨ੍ਤਸੁਖਾਯੁવਣ੍ਣਾਦਿਫਲਤ੍ਤਾ વੇਹਪ੍ਫਲਾ। ਏਤ੍ਥਾਤਿ વਿਞ੍ਞਾਣਟ੍ਠਿਤਿਯਂ।
Sundarā pabhā subhā, tāya kiṇṇā subhākiṇṇāti vattabbe. Bhā-saddassa rassattaṃ antima-ṇa-kārassa ha-kārañca katvā ‘‘subhakiṇhā’’ti vuttā. Aṭṭhakathāyaṃ pana niccalāya ekagghanāya pabhāya subhoti pariyāyavacananti ‘‘subhena okiṇṇā vikiṇṇā’’ti attho vutto. Etthāpi antima-ṇa-kārassa ha-kārakaraṇaṃ icchitabbameva. Na chijjitvā pabhā gacchati ekagghanattā. Catutthaviññāṇaṭṭhitimeva bhajanti kāyassa saññāya ca ekarūpattā. Vipulasantasukhāyuvaṇṇādiphalattā vehapphalā. Etthāti viññāṇaṭṭhitiyaṃ.
વਿવਟ੍ਟਪਕ੍ਖੇ ਠਿਤਾ ਅਪੁਨਰਾવਤ੍ਤਨਤੋ। ‘‘ਨ ਸਬ੍ਬਕਾਲਿਕਾ’’ਤਿ વਤ੍વਾ ਤਮੇવ ਅਸਬ੍ਬਕਾਲਿਕਤ੍ਤਂ વਿਭਾવੇਤੁਂ ‘‘ਕਪ੍ਪਸਤਸਹਸ੍ਸਮ੍ਪੀ’’ਤਿਆਦਿ વੁਤ੍ਤਂ। ਸੋਲ਼ਸਕਪ੍ਪਸਹਸ੍ਸਚ੍ਚਯੇਨ ਉਪ੍ਪਨ੍ਨਾਨਂ ਸੁਦ੍ਧਾવਾਸਬ੍ਰਹ੍ਮਾਨਂ ਪਰਿਨਿਬ੍ਬਾਯਨਤੋ ਅਞ੍ਞੇਸਞ੍ਚ ਤਤ੍ਥ ਅਨੁਪ੍ਪਜ੍ਜਨਤੋ ਬੁਦ੍ਧਸੁਞ੍ਞੇ ਲੋਕੇ ਸੁਞ੍ਞਂ ਤਂ ਠਾਨਂ ਹੋਤਿ, ਤਸ੍ਮਾ ਸੁਦ੍ਧਾવਾਸਾ ਨ ਸਬ੍ਬਕਾਲਿਕਾ। ਖਨ੍ਧਾવਾਰਟ੍ਠਾਨਸਦਿਸਾ ਹੋਨ੍ਤਿ ਸੁਦ੍ਧਾવਾਸਭੂਮਿਯੋ। ਇਮਿਨਾ ਸੁਤ੍ਤੇਨ ਸੁਦ੍ਧਾવਾਸਾਨਂ ਸਤ੍ਤਾવਾਸਭਾવਦੀਪਨੇਨੇવ વਿਞ੍ਞਾਣਟ੍ਠਿਤਿਭਾવੋਪਿ ਦੀਪਿਤੋ ਹੋਤਿ, ਤਸ੍ਮਾ ਸੁਦ੍ਧਾવਾਸਾਪਿ ਸਤ੍ਤਸੁ વਿਞ੍ਞਾਣਟ੍ਠਿਤੀਸੁ ਚਤੁਤ੍ਥવਿਞ੍ਞਾਣਟ੍ਠਿਤਿਂ, ਨવਸੁ ਸਤ੍ਤਾવਾਸੇਸੁ ਚਤੁਤ੍ਥਸਤ੍ਤਾવਾਸਞ੍ਚ ਭਜਨ੍ਤਿ।
Vivaṭṭapakkhe ṭhitā apunarāvattanato. ‘‘Na sabbakālikā’’ti vatvā tameva asabbakālikattaṃ vibhāvetuṃ ‘‘kappasatasahassampī’’tiādi vuttaṃ. Soḷasakappasahassaccayena uppannānaṃ suddhāvāsabrahmānaṃ parinibbāyanato aññesañca tattha anuppajjanato buddhasuññe loke suññaṃ taṃ ṭhānaṃ hoti, tasmā suddhāvāsā na sabbakālikā. Khandhāvāraṭṭhānasadisā honti suddhāvāsabhūmiyo. Iminā suttena suddhāvāsānaṃ sattāvāsabhāvadīpaneneva viññāṇaṭṭhitibhāvopi dīpito hoti, tasmā suddhāvāsāpi sattasu viññāṇaṭṭhitīsu catutthaviññāṇaṭṭhitiṃ, navasu sattāvāsesu catutthasattāvāsañca bhajanti.
ਸੁਖੁਮਤ੍ਤਾਤਿ ਸਙ੍ਖਾਰਾવਸੇਸਸੁਖੁਮਭਾવਪ੍ਪਤ੍ਤਤ੍ਤਾ। ਪਰਿਬ੍ਯਤ੍ਤવਿਞ੍ਞਾਣਕਿਚ੍ਚਾਭਾવਤੋ ਨੇવ વਿਞ੍ਞਾਣਂ, ਨ ਸਬ੍ਬਸੋ ਅવਿਞ੍ਞਾਣਂ ਹੋਤੀਤਿ ਨਾવਿਞ੍ਞਾਣਂ, ਤਸ੍ਮਾ ਪਰਿਪ੍ਫੁਤવਿਞ੍ਞਾਣਕਿਚ੍ਚવਨ੍ਤੀਸੁ વਿਞ੍ਞਾਣਟ੍ਠਿਤੀਸੁ ਨ વੁਤ੍ਤਂ।
Sukhumattāti saṅkhārāvasesasukhumabhāvappattattā. Paribyattaviññāṇakiccābhāvato neva viññāṇaṃ, na sabbaso aviññāṇaṃ hotīti nāviññāṇaṃ, tasmā paripphutaviññāṇakiccavantīsu viññāṇaṭṭhitīsu na vuttaṃ.
ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤવਣ੍ਣਨਾ ਨਿਟ੍ਠਿਤਾ।
Sattaviññāṇaṭṭhitisuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤਂ • 1. Sattaviññāṇaṭṭhitisuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧-੨. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤਾਦਿવਣ੍ਣਨਾ • 1-2. Sattaviññāṇaṭṭhitisuttādivaṇṇanā
