| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. သတ္တိသတသုတ္တံ
5. Sattisatasuttaṃ
၁၁၀၅. ‘‘သေယ္ယထာပိ, ဘိက္ခဝေ, ပုရိသော ဝသ္သသတာယုကော ဝသ္သသတဇီဝီ။ တမေနံ ဧဝံ ဝဒေယ္ယ – ‘ဧဟမ္ဘော ပုရိသ, ပုဗ္ဗဏ္ဟသမယံ တံ သတ္တိသတေန ဟနိသ္သန္တိ, မဇ္ဈန္ဟိကသမယံ သတ္တိသတေန ဟနိသ္သန္တိ, သာယန္ဟသမယံ သတ္တိသတေန ဟနိသ္သန္တိ။ သော ခော တ္ဝံ, အမ္ဘော ပုရိသ, ဒိဝသေ ဒိဝသေ တီဟိ တီဟိ သတ္တိသတေဟိ ဟညမာနော ဝသ္သသတာယုကော ဝသ္သသတဇီဝီ ဝသ္သသတသ္သ အစ္စယေန အနဘိသမေတာနိ စတ္တာရိ အရိယသစ္စာနိ အဘိသမေသ္သသီ’’’တိ။
1105. ‘‘Seyyathāpi, bhikkhave, puriso vassasatāyuko vassasatajīvī. Tamenaṃ evaṃ vadeyya – ‘ehambho purisa, pubbaṇhasamayaṃ taṃ sattisatena hanissanti, majjhanhikasamayaṃ sattisatena hanissanti, sāyanhasamayaṃ sattisatena hanissanti. So kho tvaṃ, ambho purisa, divase divase tīhi tīhi sattisatehi haññamāno vassasatāyuko vassasatajīvī vassasatassa accayena anabhisametāni cattāri ariyasaccāni abhisamessasī’’’ti.
‘‘အတ္ထဝသိကေန, ဘိက္ခဝေ, ကုလပုတ္တေန အလံ ဥပဂန္တုံ။ တံ ကိသ္သ ဟေတု? အနမတဂ္ဂောယံ, ဘိက္ခဝေ, သံသာရော; ပုဗ္ဗာ ကောဋိ နပ္ပညာယတိ သတ္တိပ္ပဟာရာနံ အသိပ္ပဟာရာနံ ဥသုပ္ပဟာရာနံ ဖရသုပ္ပဟာရာနံ 1။ ဧဝဉ္စေတံ, ဘိက္ခဝေ, အသ္သ။ န ခော ပနာဟံ, ဘိက္ခဝေ, သဟ ဒုက္ခေန, သဟ ဒောမနသ္သေန စတုန္နံ အရိယသစ္စာနံ အဘိသမယံ ဝဒာမိ; အပိ စာဟံ, ဘိက္ခဝေ, သဟာဝ သုခေန, သဟာဝ သောမနသ္သေန စတုန္နံ အရိယသစ္စာနံ အဘိသမယံ ဝဒာမိ။ ကတမေသံ စတုန္နံ? ဒုက္ခသ္သ အရိယသစ္စသ္သ။ပေ.။ ဒုက္ခနိရောဓဂာမိနိယာ ပဋိပဒာယ အရိယသစ္စသ္သ။
‘‘Atthavasikena, bhikkhave, kulaputtena alaṃ upagantuṃ. Taṃ kissa hetu? Anamataggoyaṃ, bhikkhave, saṃsāro; pubbā koṭi nappaññāyati sattippahārānaṃ asippahārānaṃ usuppahārānaṃ pharasuppahārānaṃ 2. Evañcetaṃ, bhikkhave, assa. Na kho panāhaṃ, bhikkhave, saha dukkhena, saha domanassena catunnaṃ ariyasaccānaṃ abhisamayaṃ vadāmi; api cāhaṃ, bhikkhave, sahāva sukhena, sahāva somanassena catunnaṃ ariyasaccānaṃ abhisamayaṃ vadāmi. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘တသ္မာတိဟ , ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ ပဉ္စမံ။
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. သတ္တိသတသုတ္တဝဏ္ဏနာ • 5. Sattisatasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. သတ္တိသတသုတ္တဝဏ္ဏနာ • 5. Sattisatasuttavaṇṇanā
