| Library / Tipiṭaka / तिपिटक • Tipiṭaka / जातकपाळि • Jātakapāḷi |
४०२. सत्तुभस्तजातकं (७-१-७)
402. Sattubhastajātakaṃ (7-1-7)
४६.
46.
विब्भन्तचित्तो कुपितिन्द्रियोसि, नेत्तेहि ते वारिगणा सवन्ति।
Vibbhantacitto kupitindriyosi, nettehi te vārigaṇā savanti;
किं ते नट्ठं किं पन पत्थयानो, इधागमा ब्रह्मे तदिङ्घ 1 ब्रूहि॥
Kiṃ te naṭṭhaṃ kiṃ pana patthayāno, idhāgamā brahme tadiṅgha 2 brūhi.
४७.
47.
मिय्येथ भरिया वजतो ममज्ज, अगच्छतो मरणमाह यक्खो।
Miyyetha bhariyā vajato mamajja, agacchato maraṇamāha yakkho;
एतेन दुक्खेन पवेधितोस्मि, अक्खाहि मे सेनक एतमत्थं॥
Etena dukkhena pavedhitosmi, akkhāhi me senaka etamatthaṃ.
४८.
48.
बहूनि ठानानि विचिन्तयित्वा, यमेत्थ वक्खामि तदेव सच्चं।
Bahūni ṭhānāni vicintayitvā, yamettha vakkhāmi tadeva saccaṃ;
मञ्ञामि ते ब्राह्मण सत्तुभस्तं, अजानतो कण्हसप्पो पविट्ठो॥
Maññāmi te brāhmaṇa sattubhastaṃ, ajānato kaṇhasappo paviṭṭho.
४९.
49.
आदाय दण्डं परिसुम्भ भस्तं, पस्सेळमूगं उरगं दुजिव्हं 3।
Ādāya daṇḍaṃ parisumbha bhastaṃ, passeḷamūgaṃ uragaṃ dujivhaṃ 4;
छिन्दज्ज कङ्खं विचिकिच्छितानि, भुजङ्गमं पस्स पमुञ्च भस्तं॥
Chindajja kaṅkhaṃ vicikicchitāni, bhujaṅgamaṃ passa pamuñca bhastaṃ.
५०.
50.
संविग्गरूपो परिसाय मज्झे, सो ब्राह्मणो सत्तुभस्तं पमुञ्चि।
Saṃviggarūpo parisāya majjhe, so brāhmaṇo sattubhastaṃ pamuñci;
अथ निक्खमि उरगो उग्गतेजो, आसीविसो सप्पो फणं करित्वा॥
Atha nikkhami urago uggatejo, āsīviso sappo phaṇaṃ karitvā.
५१.
51.
सुलद्धलाभा जनकस्स रञ्ञो, यो पस्सती सेनकं साधुपञ्ञं।
Suladdhalābhā janakassa rañño, yo passatī senakaṃ sādhupaññaṃ;
विवट्टछद्दो 5 नुसि सब्बदस्सी, ञाणं नु ते ब्राह्मण भिंसरूपं॥
Vivaṭṭachaddo 6 nusi sabbadassī, ñāṇaṃ nu te brāhmaṇa bhiṃsarūpaṃ.
५२.
52.
इमानि मे सत्तसतानि अत्थि, गण्हाहि सब्बानि ददामि तुय्हं।
Imāni me sattasatāni atthi, gaṇhāhi sabbāni dadāmi tuyhaṃ;
तया हि मे जीवितमज्ज लद्धं, अथोपि भरियाय मकासि सोत्थिं॥
Tayā hi me jīvitamajja laddhaṃ, athopi bhariyāya makāsi sotthiṃ.
५३.
53.
न पण्डिता वेतनमादियन्ति, चित्राहि गाथाहि सुभासिताहि।
Na paṇḍitā vetanamādiyanti, citrāhi gāthāhi subhāsitāhi;
इतोपि ते ब्रह्मे ददन्तु वित्तं, आदाय त्वं गच्छ सकं निकेतन्ति॥
Itopi te brahme dadantu vittaṃ, ādāya tvaṃ gaccha sakaṃ niketanti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४०२] ७. सत्तुभस्तजातकवण्णना • [402] 7. Sattubhastajātakavaṇṇanā
