| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. સાવજ્જસુત્તં
5. Sāvajjasuttaṃ
૧૩૫. ‘‘ચત્તારોમે, ભિક્ખવે, પુગ્ગલા 1 સન્તો સંવિજ્જમાના લોકસ્મિં. કતમે ચત્તારો? સાવજ્જો, વજ્જબહુલો, અપ્પવજ્જો, અનવજ્જો.
135. ‘‘Cattārome, bhikkhave, puggalā 2 santo saṃvijjamānā lokasmiṃ. Katame cattāro? Sāvajjo, vajjabahulo, appavajjo, anavajjo.
‘‘કથઞ્ચ, ભિક્ખવે, પુગ્ગલો સાવજ્જો હોતિ? ઇધ, ભિક્ખવે, એકચ્ચો પુગ્ગલો સાવજ્જેન કાયકમ્મેન સમન્નાગતો હોતિ, સાવજ્જેન વચીકમ્મેન સમન્નાગતો હોતિ, સાવજ્જેન મનોકમ્મેન સમન્નાગતો હોતિ. એવં ખો, ભિક્ખવે, પુગ્ગલો સાવજ્જો હોતિ.
‘‘Kathañca, bhikkhave, puggalo sāvajjo hoti? Idha, bhikkhave, ekacco puggalo sāvajjena kāyakammena samannāgato hoti, sāvajjena vacīkammena samannāgato hoti, sāvajjena manokammena samannāgato hoti. Evaṃ kho, bhikkhave, puggalo sāvajjo hoti.
‘‘કથઞ્ચ , ભિક્ખવે, પુગ્ગલો વજ્જબહુલો હોતિ? ઇધ, ભિક્ખવે, એકચ્ચો પુગ્ગલો સાવજ્જેન બહુલં કાયકમ્મેન સમન્નાગતો હોતિ, અપ્પં અનવજ્જેન; સાવજ્જેન બહુલં વચીકમ્મેન સમન્નાગતો હોતિ, અપ્પં અનવજ્જેન; સાવજ્જેન બહુલં મનોકમ્મેન સમન્નાગતો હોતિ, અપ્પં અનવજ્જેન. એવં ખો, ભિક્ખવે, પુગ્ગલો વજ્જબહુલો હોતિ.
‘‘Kathañca , bhikkhave, puggalo vajjabahulo hoti? Idha, bhikkhave, ekacco puggalo sāvajjena bahulaṃ kāyakammena samannāgato hoti, appaṃ anavajjena; sāvajjena bahulaṃ vacīkammena samannāgato hoti, appaṃ anavajjena; sāvajjena bahulaṃ manokammena samannāgato hoti, appaṃ anavajjena. Evaṃ kho, bhikkhave, puggalo vajjabahulo hoti.
‘‘કથઞ્ચ , ભિક્ખવે, પુગ્ગલો અપ્પવજ્જો હોતિ? ઇધ, ભિક્ખવે, એકચ્ચો પુગ્ગલો અનવજ્જેન બહુલં કાયકમ્મેન સમન્નાગતો હોતિ, અપ્પં સાવજ્જેન; અનવજ્જેન બહુલં વચીકમ્મેન સમન્નાગતો હોતિ, અપ્પં સાવજ્જેન; અનવજ્જેન બહુલં મનોકમ્મેન સમન્નાગતો હોતિ, અપ્પં સાવજ્જેન. એવં ખો, ભિક્ખવે, પુગ્ગલો અપ્પવજ્જો હોતિ.
‘‘Kathañca , bhikkhave, puggalo appavajjo hoti? Idha, bhikkhave, ekacco puggalo anavajjena bahulaṃ kāyakammena samannāgato hoti, appaṃ sāvajjena; anavajjena bahulaṃ vacīkammena samannāgato hoti, appaṃ sāvajjena; anavajjena bahulaṃ manokammena samannāgato hoti, appaṃ sāvajjena. Evaṃ kho, bhikkhave, puggalo appavajjo hoti.
‘‘કથઞ્ચ , ભિક્ખવે, પુગ્ગલો અનવજ્જો હોતિ? ઇધ, ભિક્ખવે, એકચ્ચો પુગ્ગલો અનવજ્જેન કાયકમ્મેન સમન્નાગતો હોતિ, અનવજ્જેન વચીકમ્મેન સમન્નાગતો હોતિ, અનવજ્જેન મનોકમ્મેન સમન્નાગતો હોતિ. એવં ખો, ભિક્ખવે, પુગ્ગલો અનવજ્જો હોતિ. ઇમે ખો, ભિક્ખવે, ચત્તારો પુગ્ગલા સન્તો સંવિજ્જમાના લોકસ્મિ’’ન્તિ. પઞ્ચમં.
‘‘Kathañca , bhikkhave, puggalo anavajjo hoti? Idha, bhikkhave, ekacco puggalo anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti. Evaṃ kho, bhikkhave, puggalo anavajjo hoti. Ime kho, bhikkhave, cattāro puggalā santo saṃvijjamānā lokasmi’’nti. Pañcamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫. સાવજ્જસુત્તવણ્ણના • 5. Sāvajjasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૫-૮. સાવજ્જસુત્તાદિવણ્ણના • 5-8. Sāvajjasuttādivaṇṇanā
