| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. සාවකසුත්‌තං
7. Sāvakasuttaṃ
130. සාවත්‌ථියං විහරති. අථ ඛො සම්‌බහුලා භික්‌ඛූ යෙන භගවා…පෙ.… එකමන්‌තං නිසින්‌නා ඛො තෙ භික්‌ඛූ භගවන්‌තං එතදවොචුං – ‘‘කීවබහුකා නු ඛො, භන්‌තෙ, කප්‌පා අබ්‌භතීතා අතික්‌කන්‌තා’’ති? ‘‘බහුකා ඛො, භික්‌ඛවෙ , කප්‌පා අබ්‌භතීතා අතික්‌කන්‌තා. තෙ න සුකරා සඞ්‌ඛාතුං – ‘එත්‌තකා කප්‌පා ඉති වා, එත්‌තකානි කප්‌පසතානි ඉති වා, එත්‌තකානි කප්‌පසහස්‌සානි ඉති වා, එත්‌තකානි කප්‌පසතසහස්‌සානි ඉති වා’’’ති.
130. Sāvatthiyaṃ viharati. Atha kho sambahulā bhikkhū yena bhagavā…pe… ekamantaṃ nisinnā kho te bhikkhū bhagavantaṃ etadavocuṃ – ‘‘kīvabahukā nu kho, bhante, kappā abbhatītā atikkantā’’ti? ‘‘Bahukā kho, bhikkhave , kappā abbhatītā atikkantā. Te na sukarā saṅkhātuṃ – ‘ettakā kappā iti vā, ettakāni kappasatāni iti vā, ettakāni kappasahassāni iti vā, ettakāni kappasatasahassāni iti vā’’’ti.
‘‘සක්‌කා පන, භන්‌තෙ, උපමං කාතු’’න්‌ති? ‘‘සක්‌කා, භික්‌ඛවෙ’’ති භගවා අවොච. ‘‘ඉධස්‌සු, භික්‌ඛවෙ, චත්‌තාරො සාවකා වස්‌සසතායුකා වස්‌සසතජීවිනො. තෙ දිවසෙ දිවසෙ කප්‌පසතසහස්‌සං කප්‌පසතසහස්‌සං අනුස්‌සරෙය්‍යුං. අනනුස්‌සරිතාව භික්‌ඛවෙ, තෙහි කප්‌පා අස්‌සු, අථ ඛො තෙ චත්‌තාරො සාවකා වස්‌සසතායුකා වස්‌සසතජීවිනො වස්‌සසතස්‌ස අච්‌චයෙන කාලං කරෙය්‍යුං. එවං බහුකා ඛො, භික්‌ඛවෙ, කප්‌පා අබ්‌භතීතා අතික්‌කන්‌තා. තෙ න සුකරා සඞ්‌ඛාතුං – ‘එත්‌තකා කප්‌පා ඉති වා, එත්‌තකානි කප්‌පසතානි ඉති වා, එත්‌තකානි කප්‌පසහස්‌සානි ඉති වා, එත්‌තකානි කප්‌පසතසහස්‌සානි ඉති වා’ති. තං කිස්‌ස හෙතු? අනමතග්‌ගොයං, භික්‌ඛවෙ, සංසාරො…පෙ.… අලං විමුච්‌චිතු’’න්‌ති. සත්‌තමං.
‘‘Sakkā pana, bhante, upamaṃ kātu’’nti? ‘‘Sakkā, bhikkhave’’ti bhagavā avoca. ‘‘Idhassu, bhikkhave, cattāro sāvakā vassasatāyukā vassasatajīvino. Te divase divase kappasatasahassaṃ kappasatasahassaṃ anussareyyuṃ. Ananussaritāva bhikkhave, tehi kappā assu, atha kho te cattāro sāvakā vassasatāyukā vassasatajīvino vassasatassa accayena kālaṃ kareyyuṃ. Evaṃ bahukā kho, bhikkhave, kappā abbhatītā atikkantā. Te na sukarā saṅkhātuṃ – ‘ettakā kappā iti vā, ettakāni kappasatāni iti vā, ettakāni kappasahassāni iti vā, ettakāni kappasatasahassāni iti vā’ti. Taṃ kissa hetu? Anamataggoyaṃ, bhikkhave, saṃsāro…pe… alaṃ vimuccitu’’nti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. සාවකසුත්‌තවණ්‌ණනා • 7. Sāvakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. සාවකසුත්‌තවණ්‌ණනා • 7. Sāvakasuttavaṇṇanā
