| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. ஸயனதா³யகத்தே²ரஅபதா³னவண்ணனா
3. Sayanadāyakattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ ஸயனதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா ஸுக²மனுப⁴வந்தோ ஸத்து² த⁴ம்மதே³ஸனங் ஸுத்வா ஸத்த²ரி பஸன்னோ த³ந்தஸுவண்ணரஜதமுத்தமணிமயங் மஹாரஹங் மஞ்சங் காராபெத்வா சீனபட்டகம்ப³லாதீ³னி அத்த²ரித்வா ஸயனத்தா²ய ப⁴க³வதோ அதா³ஸி. ப⁴க³வா தஸ்ஸ அனுக்³க³ஹங் கரொந்தோ தத்த² ஸயி . ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ தத³னுரூபங் ஆகாஸக³மனஸுக²ஸெய்யாதி³ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலே நிப்³ப³த்தித்வா விஞ்ஞுதங் பாபுணித்வா ஸத்து² த⁴ம்மதே³ஸனங் ஸுத்வா பஸன்னமானஸோ பப்³ப³ஜித்வா விபஸ்ஸந்தோ நசிரஸ்ஸேவ அரஹா அஹோஸி.
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
20. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. தங் ஹெட்டா² வுத்தத்த²மேவ.
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
21. ஸுகெ²த்தே பீ³ஜஸம்பதா³தி யதா² திணகசவரரஹிதே கத்³த³மாதி³ஸம்பன்னே ஸுகெ²த்தே வுத்தபீ³ஜானி ஸாது³ப²லானி நிப்பா²தெ³ந்தி, ஏவமேவ ராக³தோ³ஸாதி³தி³யட்³ட⁴ஸஹஸ்ஸகிலேஸஸங்கா²ததிணகசவரரஹிதே ஸுத்³த⁴ஸந்தானே புஞ்ஞக்கெ²த்தே வுத்ததா³னானி அப்பானிபி ஸமானானி மஹப்ப²லானி ஹொந்தீதி அத்தோ². ஸேஸங் ஸுவிஞ்ஞெய்யமேவாதி.
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
ஸயனதா³யகத்தே²ரஅபதா³னவண்ணனா ஸமத்தா.
Sayanadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. ஸயனதா³யகத்தே²ரஅபதா³னங் • 3. Sayanadāyakattheraapadānaṃ
