| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၉. သေဒကသုတ္တံ
9. Sedakasuttaṃ
၃၈၅. ဧကံ သမယံ ဘဂဝာ သုမ္ဘေသု ဝိဟရတိ သေဒကံ နာမ သုမ္ဘာနံ နိဂမော။ တတ္ရ ခော ဘဂဝာ ဘိက္ခူ အာမန္တေသိ – ‘‘ဘူတပုဗ္ဗံ, ဘိက္ခဝေ, စဏ္ဍာလဝံသိကော စဏ္ဍာလဝံသံ ဥသ္သာပေတ္ဝာ မေဒကထာလိကံ အန္တေဝာသိံ အာမန္တေသိ – ‘ဧဟိ တ္ဝံ, သမ္မ မေဒကထာလိကေ, စဏ္ဍာလဝံသံ အဘိရုဟိတ္ဝာ မမ ဥပရိခန္ဓေ တိဋ္ဌာဟီ’တိ။ ‘ဧဝံ, အာစရိယာ’တိ ခော, ဘိက္ခဝေ, မေဒကထာလိကာ အန္တေဝာသီ စဏ္ဍာလဝံသိကသ္သ ပဋိသ္သုတ္ဝာ စဏ္ဍာလဝံသံ အဘိရုဟိတ္ဝာ အာစရိယသ္သ ဥပရိခန္ဓေ အဋ္ဌာသိ။ အထ ခော, ဘိက္ခဝေ, စဏ္ဍာလဝံသိကော မေဒကထာလိကံ အန္တေဝာသိံ ဧတဒဝောစ – ‘တ္ဝံ, သမ္မ မေဒကထာလိကေ, မမံ ရက္ခ, အဟံ တံ ရက္ခိသ္သာမိ။ ဧဝံ မယံ အညမညံ ဂုတ္တာ အညမညံ ရက္ခိတာ သိပ္ပာနိ စေဝ ဒသ္သေသ္သာမ, လာဘဉ္စ 1 လစ္ဆာမ, သောတ္ထိနာ စ စဏ္ဍာလဝံသာ ဩရောဟိသ္သာမာ’တိ။ ဧဝံ ဝုတ္တေ, ဘိက္ခဝေ, မေဒကထာလိကာ အန္တေဝာသီ စဏ္ဍာလဝံသိကံ ဧတဒဝောစ – ‘န ခော ပနေတံ, အာစရိယ, ဧဝံ ဘဝိသ္သတိ။ တ္ဝံ, အာစရိယ, အတ္တာနံ ရက္ခ, အဟံ အတ္တာနံ ရက္ခိသ္သာမိ။ ဧဝံ မယံ အတ္တဂုတ္တာ အတ္တရက္ခိတာ သိပ္ပာနိ စေဝ ဒသ္သေသ္သာမ, လာဘဉ္စ လစ္ဆာမ, သောတ္ထိနာ စ စဏ္ဍာလဝံသာ ဩရောဟိသ္သာမာ’’’တိ။ ‘‘သော တတ္ထ ဉာယော’’တိ ဘဂဝာ ဧတဒဝောစ, ‘‘ယထာ မေဒကထာလိကာ အန္တေဝာသီ အာစရိယံ အဝောစ။ အတ္တာနံ, ဘိက္ခဝေ, ရက္ခိသ္သာမီတိ သတိပဋ္ဌာနံ သေဝိတဗ္ဗံ; ပရံ ရက္ခိသ္သာမီတိ သတိပဋ္ဌာနံ သေဝိတဗ္ဗံ။ အတ္တာနံ, ဘိက္ခဝေ, ရက္ခန္တော ပရံ ရက္ခတိ, ပရံ ရက္ခန္တော အတ္တာနံ ရက္ခတိ’’။
385. Ekaṃ samayaṃ bhagavā sumbhesu viharati sedakaṃ nāma sumbhānaṃ nigamo. Tatra kho bhagavā bhikkhū āmantesi – ‘‘bhūtapubbaṃ, bhikkhave, caṇḍālavaṃsiko caṇḍālavaṃsaṃ ussāpetvā medakathālikaṃ antevāsiṃ āmantesi – ‘ehi tvaṃ, samma medakathālike, caṇḍālavaṃsaṃ abhiruhitvā mama uparikhandhe tiṭṭhāhī’ti. ‘Evaṃ, ācariyā’ti kho, bhikkhave, medakathālikā antevāsī caṇḍālavaṃsikassa paṭissutvā caṇḍālavaṃsaṃ abhiruhitvā ācariyassa uparikhandhe aṭṭhāsi. Atha kho, bhikkhave, caṇḍālavaṃsiko medakathālikaṃ antevāsiṃ etadavoca – ‘tvaṃ, samma medakathālike, mamaṃ rakkha, ahaṃ taṃ rakkhissāmi. Evaṃ mayaṃ aññamaññaṃ guttā aññamaññaṃ rakkhitā sippāni ceva dassessāma, lābhañca 2 lacchāma, sotthinā ca caṇḍālavaṃsā orohissāmā’ti. Evaṃ vutte, bhikkhave, medakathālikā antevāsī caṇḍālavaṃsikaṃ etadavoca – ‘na kho panetaṃ, ācariya, evaṃ bhavissati. Tvaṃ, ācariya, attānaṃ rakkha, ahaṃ attānaṃ rakkhissāmi. Evaṃ mayaṃ attaguttā attarakkhitā sippāni ceva dassessāma, lābhañca lacchāma, sotthinā ca caṇḍālavaṃsā orohissāmā’’’ti. ‘‘So tattha ñāyo’’ti bhagavā etadavoca, ‘‘yathā medakathālikā antevāsī ācariyaṃ avoca. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhati’’.
‘‘ကထဉ္စ , ဘိက္ခဝေ, အတ္တာနံ ရက္ခန္တော ပရံ ရက္ခတိ? အာသေဝနာယ, ဘာဝနာယ, ဗဟုလီကမ္မေန – ဧဝံ ခော, ဘိက္ခဝေ, အတ္တာနံ ရက္ခန္တော ပရံ ရက္ခတိ။ ကထဉ္စ, ဘိက္ခဝေ, ပရံ ရက္ခန္တော အတ္တာနံ ရက္ခတိ? ခန္တိယာ, အဝိဟိံသာယ, မေတ္တစိတ္တတာယ, အနုဒယတာယ – ဧဝံ ခော, ဘိက္ခဝေ, ပရံ ရက္ခန္တော အတ္တာနံ ရက္ခတိ။ အတ္တာနံ, ဘိက္ခဝေ, ရက္ခိသ္သာမီတိ သတိပဋ္ဌာနံ သေဝိတဗ္ဗံ; ပရံ ရက္ခိသ္သာမီတိ သတိပဋ္ဌာနံ သေဝိတဗ္ဗံ။ အတ္တာနံ, ဘိက္ခဝေ, ရက္ခန္တော ပရံ ရက္ခတိ, ပရံ ရက္ခန္တော အတ္တာနံ ရက္ခတီ’’တိ။ နဝမံ။
‘‘Kathañca , bhikkhave, attānaṃ rakkhanto paraṃ rakkhati? Āsevanāya, bhāvanāya, bahulīkammena – evaṃ kho, bhikkhave, attānaṃ rakkhanto paraṃ rakkhati. Kathañca, bhikkhave, paraṃ rakkhanto attānaṃ rakkhati? Khantiyā, avihiṃsāya, mettacittatāya, anudayatāya – evaṃ kho, bhikkhave, paraṃ rakkhanto attānaṃ rakkhati. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhatī’’ti. Navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. သေဒကသုတ္တဝဏ္ဏနာ • 9. Sedakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉. သေဒကသုတ္တဝဏ္ဏနာ • 9. Sedakasuttavaṇṇanā
