| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
ஸேத³மோசனகதா²வண்ணனா
Sedamocanakathāvaṇṇanā
679. ஸுணதங் ஸுணந்தானங் பி⁴க்கூ²னங் படுபா⁴வகரா வினயவினிச்ச²யே பஞ்ஞாகோஸல்லஸாதி⁴கா ததோயேவ வரா உத்தமா. ஸேத³மோசனகா³தா²யோதி அத்த²பச்சத்தி²கானங், ஸாஸனபச்சத்தி²கானஞ்ச விஸ்ஸஜ்ஜேதுமஸக்குணெய்யபா⁴வேன சிந்தயந்தஸ்ஸ கி²ன்னஸரீரா ஸேதே³ மோசெந்தீதி ஸேத³மோசனா. அத்தா²னுக³தபஞ்ஹா உபாலித்தே²ரேன ட²பிதா பஞ்ஹகா³தா²யோ, தப்படிப³த்³தா⁴ விஸ்ஸஜ்ஜனகா³தா²யோ ச இதோ பரங் வக்கா²மீதி யோஜனா.
679.Suṇataṃ suṇantānaṃ bhikkhūnaṃ paṭubhāvakarā vinayavinicchaye paññākosallasādhikā tatoyeva varā uttamā. Sedamocanagāthāyoti atthapaccatthikānaṃ, sāsanapaccatthikānañca vissajjetumasakkuṇeyyabhāvena cintayantassa khinnasarīrā sede mocentīti sedamocanā. Atthānugatapañhā upālittherena ṭhapitā pañhagāthāyo, tappaṭibaddhā vissajjanagāthāyo ca ito paraṃ vakkhāmīti yojanā.
681. கப³ந்த⁴ங் நாம அஸீஸங் உரஸி ஜாதஅக்கி²முக²ஸரீரங். யதா²ஹ – ‘‘அஸீஸகங் கப³ந்த⁴ங், யஸ்ஸ உரே அக்கீ²னி சேவ முக²ஞ்ச ஹோதீ’’தி (பரி॰ அட்ட²॰ 479). முகே²ன கரணபூ⁴தேன. கத்வாதி ஸேவித்வா.
681.Kabandhaṃ nāma asīsaṃ urasi jātaakkhimukhasarīraṃ. Yathāha – ‘‘asīsakaṃ kabandhaṃ, yassa ure akkhīni ceva mukhañca hotī’’ti (pari. aṭṭha. 479). Mukhena karaṇabhūtena. Katvāti sevitvā.
682. தஸ்ஸ பி⁴க்கு²னோ கத²ங் பாராஜிகோ ஸியா பாராஜிகத⁴ம்மோ கத²ங் ஸியா.
682.Tassa bhikkhuno kathaṃ pārājiko siyā pārājikadhammo kathaṃ siyā.
684. கிஞ்சீதி பாத³ங் வா பாதா³ரஹங் வா பரஸந்தகங். பரஞ்ச ந ஸமாத³பேதி ‘‘அமுகஸ்ஸ இத்த²ன்னாமங் ப⁴ண்ட³ங் அவஹராஹீ’’தி பரங் ந ஆணாபெய்ய.
684.Kiñcīti pādaṃ vā pādārahaṃ vā parasantakaṃ. Parañca na samādapeti ‘‘amukassa itthannāmaṃ bhaṇḍaṃ avaharāhī’’ti paraṃ na āṇāpeyya.
685. பரஸ்ஸ கிஞ்சி நாதி³யந்தோதி ஸம்ப³ந்தோ⁴. ஆணத்திஞ்சாதி ச-ஸத்³தே³ன ஸங்விதா⁴னங், ஸங்கேதஞ்ச ஸங்க³ண்ஹாதி.
685. Parassa kiñci nādiyantoti sambandho. Āṇattiñcāti ca-saddena saṃvidhānaṃ, saṅketañca saṅgaṇhāti.
686. க³ருகங் ப⁴ண்ட³ந்தி பாத³க்³க⁴னகபா⁴வேன க³ருப⁴ண்ட³ங். ‘‘பரிக்கா²ர’’ந்தி ஏதஸ்ஸ விஸேஸனங். பரஸ்ஸ பரிக்கா²ரந்தி பரஸந்தகங் யங் கிஞ்சி பரிக்கா²ரங்.
686.Garukaṃ bhaṇḍanti pādagghanakabhāvena garubhaṇḍaṃ. ‘‘Parikkhāra’’nti etassa visesanaṃ. Parassa parikkhāranti parasantakaṃ yaṃ kiñci parikkhāraṃ.
692. மனுஸ்ஸுத்தரிகே த⁴ம்மேதி உத்தரிமனுஸ்ஸத⁴ம்மவிஸயே. கதிகங் கத்வானாதி ‘‘ஏவங் நிஸின்னே ஏவங் டி²தே ஏவங் க³மனே அத்த²ங் ஆவிகரோதீ’’திஆதி³ங் கத்வா. ஸம்பா⁴வனாதி⁴ப்பாயோதி ‘‘அரஹா’’தி க³ஹெத்வா மஹாஸம்பா⁴வனங் கரோதீதி அதி⁴ப்பாயோ ஹுத்வா. அதிக்கமதி சேதி ததா² கதங் கதிகங் அதிக்கமதி சே, ததா²ரூபங் நிஸஜ்ஜங் வா டா²னங் வா க³மனங் வா கரோதீதி அத்தோ². சுதோதி ததா²ரூபங் நிஸஜ்ஜாதி³ங் தி³ஸ்வா கேனசி மனுஸ்ஸஜாதிகேன ‘‘அரஹா’’தி தங்க²ணே ஞாதே ஸோ புக்³க³லோ பாராஜிகங் ஆபஜ்ஜதி.
692.Manussuttarike dhammeti uttarimanussadhammavisaye. Katikaṃ katvānāti ‘‘evaṃ nisinne evaṃ ṭhite evaṃ gamane atthaṃ āvikarotī’’tiādiṃ katvā. Sambhāvanādhippāyoti ‘‘arahā’’ti gahetvā mahāsambhāvanaṃ karotīti adhippāyo hutvā. Atikkamati ceti tathā kataṃ katikaṃ atikkamati ce, tathārūpaṃ nisajjaṃ vā ṭhānaṃ vā gamanaṃ vā karotīti attho. Cutoti tathārūpaṃ nisajjādiṃ disvā kenaci manussajātikena ‘‘arahā’’ti taṅkhaṇe ñāte so puggalo pārājikaṃ āpajjati.
693. ஏகவத்து²கா கத²ங் ப⁴வெய்யுந்தி யோஜனா.
693. Ekavatthukā kathaṃ bhaveyyunti yojanā.
694. இத்தி²யாதி ஏகிஸ்ஸா இத்தி²யா. படிபஜ்ஜந்தோதி ஏகக்க²ணே அஞ்ஞேன புரிஸேன வுத்தஸாஸனங் வத்வா, இமினா ச ‘‘படிக்³க³ண்ஹாதி, வீமங்ஸதீ’’தி அங்க³த்³வயஸ்ஸ புரிமஸித்³த⁴தங் தீ³பேதி இமஸ்ஸ பச்சாஹரணகதஞ்ச. காயஸங்ஸக்³க³ங் ஸமாபஜ்ஜித்வா து³ட்டு²ல்லங் வத்வா அத்தகாமபாரிசரியாய வண்ணங் ப⁴ணந்தோ.
694.Itthiyāti ekissā itthiyā. Paṭipajjantoti ekakkhaṇe aññena purisena vuttasāsanaṃ vatvā, iminā ca ‘‘paṭiggaṇhāti, vīmaṃsatī’’ti aṅgadvayassa purimasiddhataṃ dīpeti imassa paccāharaṇakatañca. Kāyasaṃsaggaṃ samāpajjitvā duṭṭhullaṃ vatvā attakāmapāricariyāya vaṇṇaṃ bhaṇanto.
695. யதா²வுத்தங் வத்தங் அசரித்வாதி ப⁴க³வதா வுத்தங் பரிவாஸாதி³வத்தங் அசரித்வா.
695.Yathāvuttaṃ vattaṃ acaritvāti bhagavatā vuttaṃ parivāsādivattaṃ acaritvā.
696. பி⁴க்கு²னீஹி அஸாதா⁴ரணஸிக்கா²பத³த்தா ஆஹ ‘‘நத்தி² ஸங்கா⁴தி³ஸேஸதா’’தி.
696. Bhikkhunīhi asādhāraṇasikkhāpadattā āha ‘‘natthi saṅghādisesatā’’ti.
697. யேன குத்³தோ⁴ பஸங்ஸிதோதி எத்த² ‘‘நிந்தி³தோ சா’’தி ஸேஸோ.
697.Yena kuddho pasaṃsitoti ettha ‘‘nindito cā’’ti seso.
698. தித்தி²யானங் வண்ணம்ஹி ப⁴ஞ்ஞமானே யோ குஜ்ஜ²தி, ஸோ ஆராத⁴கோதி யோஜனா, பரிதோஸிதோ பஸங்ஸிதோதி அதி⁴ப்பாயோ. தித்தி²யபுப்³போ³ இமஸ்மிங் ஸாஸனே பப்³ப³ஜ்ஜங் லபி⁴த்வா தித்தி²யானங் வண்ணஸ்மிங் ப⁴ஞ்ஞமானே ஸுத்வா ஸசே குப்பதி அனத்தமனங் கரோதி, ஆராத⁴கோ ஸங்கா⁴ராத⁴கோ ஸங்க⁴ங் பரிதோஸெந்தோ ஹோதி, ஸம்பு³த்³த⁴ஸ்ஸ வண்ணஸ்மிங் ப⁴ஞ்ஞமானே யதி³ குஜ்ஜ²தி, நிந்தி³தோதி யோஜனா. எத்த² ஸம்பு³த்³த⁴ஸ்ஸாதி உபலக்க²ணங்.
698. Titthiyānaṃ vaṇṇamhi bhaññamāne yo kujjhati, so ārādhakoti yojanā, paritosito pasaṃsitoti adhippāyo. Titthiyapubbo imasmiṃ sāsane pabbajjaṃ labhitvā titthiyānaṃ vaṇṇasmiṃ bhaññamāne sutvā sace kuppati anattamanaṃ karoti, ārādhako saṅghārādhako saṅghaṃ paritosento hoti, sambuddhassa vaṇṇasmiṃ bhaññamāne yadi kujjhati, ninditoti yojanā. Ettha sambuddhassāti upalakkhaṇaṃ.
701. க³ஹெத்வாதி படிக்³க³ஹெத்வா.
701.Gahetvāti paṭiggahetvā.
751. ‘‘ந ரத்தசித்தோ’’திஆதி³னா புரிமானங் திண்ணங் பாராஜிகானங் வீதிக்கமசித்துப்பாத³மத்தஸ்ஸாபி அபா⁴வங் தீ³பேதி. மரணாயாதி எத்த² ‘‘மனுஸ்ஸஜாதிகஸ்ஸா’’தி இத³ங் பாராஜிகபகரணதோவ லப்³ப⁴தி. தஸ்ஸாதி கிஞ்சி தெ³ந்தஸ்ஸ. தந்தி ததா² தீ³யமானங்.
751.‘‘Na rattacitto’’tiādinā purimānaṃ tiṇṇaṃ pārājikānaṃ vītikkamacittuppādamattassāpi abhāvaṃ dīpeti. Maraṇāyāti ettha ‘‘manussajātikassā’’ti idaṃ pārājikapakaraṇatova labbhati. Tassāti kiñci dentassa. Tanti tathā dīyamānaṃ.
752. ‘‘பராஜயோ’’தி இத³ங் அப⁴ப்³ப³புக்³க³லேஸு ஸங்க⁴பே⁴த³கஸ்ஸ அந்தோக³த⁴த்தா வுத்தங். ஸலாகக்³கா³ஹேனாபி ஸங்க⁴ங் பி⁴ந்த³ந்தோ ஸங்க⁴பே⁴த³கோவ ஹோதி.
752.‘‘Parājayo’’ti idaṃ abhabbapuggalesu saṅghabhedakassa antogadhattā vuttaṃ. Salākaggāhenāpi saṅghaṃ bhindanto saṅghabhedakova hoti.
753. அத்³த⁴யோஜனே யங் திண்ணங் சீவரானங் அஞ்ஞதரங் ஏகங் சீவரங் நிக்கி²பித்வானாதி யோஜனா.
753. Addhayojane yaṃ tiṇṇaṃ cīvarānaṃ aññataraṃ ekaṃ cīvaraṃ nikkhipitvānāti yojanā.
754. ஸுப்பதிட்டி²தனிக்³ரோத⁴ஸதி³ஸே ருக்க²மூலகே திசீவரங் நிக்கி²பித்வா அத்³த⁴யோஜனே அருணங் உட்டா²பெந்தஸ்ஸாதி யோஜனா.
754. Suppatiṭṭhitanigrodhasadise rukkhamūlake ticīvaraṃ nikkhipitvā addhayojane aruṇaṃ uṭṭhāpentassāti yojanā.
755. காயிகா நானாவத்து²காயோ ஸம்ப³ஹுலா ஆபத்தியோ அபுப்³ப³ங் அசரிமங் ஏகக்க²ணே கத²ங் பு²ஸேதி யோஜனா.
755. Kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
757. வாசஸிகா ந காயிகா நானாவத்து²காயோ ஸம்ப³ஹுலா ஆபத்தியோ அபுப்³ப³ங் அசரிமங் ஏகக்க²ணே கத²ங் பு²ஸேதி யோஜனா.
757. Vācasikā na kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
758. வினயனஸத்தே²தி வினயபிடகே. தஸ்ஸ பி⁴க்கு²ஸ்ஸ.
758.Vinayanasattheti vinayapiṭake. Tassa bhikkhussa.
759. ‘‘இத்தி²யா’’திஆதீ³ஸு ஸஹத்தே² கரணவசனங். இத்தி²யா வா புரிஸேன வா பண்ட³கேன வா நிமித்தகே மேது²னங் ந ஸேவந்தோ ந படிஸேவந்தோ மேது²னபச்சயா சுதோதி யோஜனா.
759.‘‘Itthiyā’’tiādīsu sahatthe karaṇavacanaṃ. Itthiyā vā purisena vā paṇḍakena vā nimittake methunaṃ na sevanto na paṭisevanto methunapaccayā cutoti yojanā.
760. காயஸங்ஸக்³கோ³யேவ காயஸங்ஸக்³க³தா, தங் ஆபன்னா. அட்ட²வத்து²கங் சே²ஜ்ஜந்தி ஏவங்னாமகங் பாராஜிகங்.
760. Kāyasaṃsaggoyeva kāyasaṃsaggatā, taṃ āpannā. Aṭṭhavatthukaṃ chejjanti evaṃnāmakaṃ pārājikaṃ.
762. ஸமயே பிட்டி²ஸஞ்ஞிதேதி கி³ம்ஹானங் பச்சி²மமாஸஸ்ஸ பட²மதி³வஸதோ யாவ ஹேமந்தஸ்ஸ பட²மதி³வஸோ, எத்த²ந்தரே ஸத்தமாஸமத்தே பிட்டி²ஸஞ்ஞிதே ஸமயே. ‘‘மாதுயாபி சா’’தி வத்தப்³பே³ ‘‘மாதரம்பி சா’’தி வுத்தங். ஸோயேவ வா பாடோ².
762.Samaye piṭṭhisaññiteti gimhānaṃ pacchimamāsassa paṭhamadivasato yāva hemantassa paṭhamadivaso, etthantare sattamāsamatte piṭṭhisaññite samaye. ‘‘Mātuyāpi cā’’ti vattabbe ‘‘mātarampi cā’’ti vuttaṃ. Soyeva vā pāṭho.
764. ‘‘அவஸ்ஸுதஹத்த²தோ ஹி பிண்ட³ங் க³ஹெத்வா’’தி இமினா ஸங்கா⁴தி³ஸேஸஸ்ஸ வத்து²மாஹ, லஸுணந்தி பாசித்தியஸ்ஸ வத்து²ங், மனுஸ்ஸமங்ஸந்தி து²ல்லச்சயவத்து²ங், அகப்பமஞ்ஞந்தி து³க்கடவத்து²ங். அகப்பமஞ்ஞந்தி எத்த² ‘‘மங்ஸ’’ந்தி ஸேஸோ. ‘‘ஸப்³பே³ ஏகதோ’’தி பத³ச்சே²தோ³. ஏகதோதி எத்த² ‘‘மத்³தி³த்வா’’தி ஸேஸோ, அகப்பியமங்ஸேஹி ஸத்³தி⁴ங் ஏகதோ மத்³தி³த்வா கா²த³தீதி அத்தோ². ஸப்³ப³மேதங் ‘‘க³ஹெத்வா, மத்³தி³த்வா, கா²த³தீ’’தி கிரியானங் கம்மவசனங். மனுஸ்ஸமங்ஸஞ்சாதி எத்த² ச-ஸத்³தோ³ பச்சேகங் யோஜேதப்³போ³ ஹோதி. தஸ்ஸாதி பி⁴க்கு²னியா. ஸங்கா⁴தி³ஸேஸபாசித்தியது³க்கடபாடிதே³ஸனீயது²ல்லச்சயானி ஏகக்க²ணே ஹொந்தி.
764.‘‘Avassutahatthato hi piṇḍaṃ gahetvā’’ti iminā saṅghādisesassa vatthumāha, lasuṇanti pācittiyassa vatthuṃ, manussamaṃsanti thullaccayavatthuṃ, akappamaññanti dukkaṭavatthuṃ. Akappamaññanti ettha ‘‘maṃsa’’nti seso. ‘‘Sabbe ekato’’ti padacchedo. Ekatoti ettha ‘‘madditvā’’ti seso, akappiyamaṃsehi saddhiṃ ekato madditvā khādatīti attho. Sabbametaṃ ‘‘gahetvā, madditvā, khādatī’’ti kiriyānaṃ kammavacanaṃ. Manussamaṃsañcāti ettha ca-saddo paccekaṃ yojetabbo hoti. Tassāti bhikkhuniyā. Saṅghādisesapācittiyadukkaṭapāṭidesanīyathullaccayāni ekakkhaṇe honti.
765. ‘‘புக்³க³லோ ஏகோ’’தி பத³ச்சே²தோ³. த்³வேபி ச புண்ணவஸ்ஸாதி பரிபுண்ணவீஸதிவஸ்ஸா ச த்³வே ஸாமணேரா. ஏகாவ தேஸங் பன கம்மவாசாதி தேஸங் உபி⁴ன்னங் ஸாமணேரானங் ஏகேன ஆசரியேன ஏகாவ உபஸம்பத³கம்மவாசா கதா. ஏகஸ்ஸாதி ஏகஸ்ஸாபி ஸாமணேரஸ்ஸ. கம்மந்தி உபஸம்பத³கம்மங். ந ரூஹதேதி ந ஸம்பஜ்ஜதி, கிமெத்த² காரணங், வத³ ப⁴த்³த³முகா²தி அதி⁴ப்பாயோ.
765. ‘‘Puggalo eko’’ti padacchedo. Dvepi ca puṇṇavassāti paripuṇṇavīsativassā ca dve sāmaṇerā. Ekāva tesaṃ pana kammavācāti tesaṃ ubhinnaṃ sāmaṇerānaṃ ekena ācariyena ekāva upasampadakammavācā katā. Ekassāti ekassāpi sāmaṇerassa. Kammanti upasampadakammaṃ. Na rūhateti na sampajjati, kimettha kāraṇaṃ, vada bhaddamukhāti adhippāyo.
766. மஹித்³தி⁴கேஸூதி த்³வீஸு ஸாமணேரேஸு. ஸசே பன ஏகோ கேஸக்³க³மத்தம்பி ஆகாஸகோ³ ஆகாஸட்டோ² ஹோதி , ஆகாஸக³தஸ்ஸேவ கதங் தங் உபஸம்பத³கம்மங் நேவ ரூஹதி நேவ ஸம்பஜ்ஜதி, பூ⁴மிக³தஸ்ஸ ரூஹதீதி யோஜனா.
766.Mahiddhikesūti dvīsu sāmaṇeresu. Sace pana eko kesaggamattampi ākāsago ākāsaṭṭho hoti , ākāsagatasseva kataṃ taṃ upasampadakammaṃ neva rūhati neva sampajjati, bhūmigatassa rūhatīti yojanā.
767. இத்³தி⁴யா ஆகாஸே டி²தேன ஸங்கே⁴ன பூ⁴மிக³தஸ்ஸ ஸாமணேரஸ்ஸ உபஸம்பத³கம்மங் ந காதப்³ப³ங். யதி³ கரோதி, குப்பதீதி யோஜனா. இத³ஞ்ச ஸப்³ப³கம்மானங் ஸாதா⁴ரணலக்க²ணங். யதா²ஹ – ‘‘ஸங்கே⁴னாபி ஆகாஸே நிஸீதி³த்வா பூ⁴மிக³தஸ்ஸ கம்மங் ந காதப்³ப³ங். ஸசே கரோதி, குப்பதீ’’தி (பரி॰ அட்ட²॰ 481).
767. Iddhiyā ākāse ṭhitena saṅghena bhūmigatassa sāmaṇerassa upasampadakammaṃ na kātabbaṃ. Yadi karoti, kuppatīti yojanā. Idañca sabbakammānaṃ sādhāraṇalakkhaṇaṃ. Yathāha – ‘‘saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppatī’’ti (pari. aṭṭha. 481).
768. வத்த²ங் கப்பகதஞ்ச ந ஹோதி, ரத்தஞ்ச ந ஹோதி, கேஸகம்ப³லாதி³ அகப்பியஞ்ச ஹோதி, நிவத்த²ஸ்ஸ பனாபத்தி தங் பன நிவத்த²ஸ்ஸ பி⁴க்கு²னோ ஆபத்தி ஹோதி. அனாபத்தி கத²ங் ஸியா, வத³ ப⁴த்³த³முகா²தி யோஜனா.
768. Vatthaṃ kappakatañca na hoti, rattañca na hoti, kesakambalādi akappiyañca hoti, nivatthassa panāpatti taṃ pana nivatthassa bhikkhuno āpatti hoti. Anāpatti kathaṃ siyā, vada bhaddamukhāti yojanā.
769. எத்த² ஏதஸ்மிங் அகப்பியவத்து²தா⁴ரணே தன்னிமித்தங். அச்சி²ன்னசீவரஸ்ஸ பி⁴க்கு²னோ அனாபத்தி ஸியாதி யோஜனா. ‘‘கிஞ்சிபீ’’திஆதி³னா வுத்தமேவத்த²ங் ஸமத்தே²தி. அஸ்ஸ அச்சி²ன்னசீவரஸ்ஸ பி⁴க்கு²ஸ்ஸ அகப்பியங் நாம கிஞ்சிபி சீவரங் ந விஜ்ஜதி, தஸ்மா அனாபத்தீதி அதி⁴ப்பாயோ.
769.Ettha etasmiṃ akappiyavatthudhāraṇe tannimittaṃ. Acchinnacīvarassa bhikkhuno anāpatti siyāti yojanā. ‘‘Kiñcipī’’tiādinā vuttamevatthaṃ samattheti. Assa acchinnacīvarassa bhikkhussa akappiyaṃ nāma kiñcipi cīvaraṃ na vijjati, tasmā anāpattīti adhippāyo.
770. குதோபி ச புரிஸஸ்ஸ ஹத்த²தோ போ⁴ஜனஸ்ஸ கிஞ்சி ந க³ண்ஹதி, போ⁴ஜனதோ கிஞ்சிபி ஸயம்பி கஸ்ஸசி புரிஸஸ்ஸ ந தே³தி, ததா²பி க³ருகங் வஜ்ஜங் ஸங்கா⁴தி³ஸேஸாபத்திங் உபேதி ஆபஜ்ஜதி, தங் கத²மாபஜ்ஜதி, த்வங் யதி³ வினயே குஸலோ அஸி, மே மய்ஹங் வத³ ஏதங் காரணங் கதே²ஹீதி யோஜனா. ஹவேதி நிபாதமத்தங்.
770.Kutopi ca purisassa hatthato bhojanassa kiñci na gaṇhati, bhojanato kiñcipi sayampi kassaci purisassa na deti, tathāpi garukaṃ vajjaṃ saṅghādisesāpattiṃ upeti āpajjati, taṃ kathamāpajjati, tvaṃ yadi vinaye kusalo asi, me mayhaṃ vada etaṃ kāraṇaṃ kathehīti yojanā. Haveti nipātamattaṃ.
771. யா பன பி⁴க்கு²னீ அஞ்ஞாய பி⁴க்கு²னியா ‘‘இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா’’திஆதி³னா (பாசி॰ 705) ஸங்கா⁴தி³ஸேஸமாதிகாய வுத்தனயேன உய்யோஜிதா அவஸ்ஸுதம்ஹா புரிஸபுக்³க³லா யங் கிஞ்சி போ⁴ஜனங் ஆதா³ய படிக்³க³ஹெத்வா ஸசே பு⁴ஞ்ஜதி, ஸா ததா² பு⁴ஞ்ஜந்தீ யாய உய்யோஜிதா பு⁴ஞ்ஜதி, தஸ்ஸா உய்யோஜிகாய தீ⁴ரா வினயத⁴ரா பண்டி³தா ஸங்கா⁴தி³ஸேஸங் கத²யந்தி தஸ்ஸா உய்யோஜிதாய போ⁴ஜனபரியோஸானே உய்யோஜிகாய ஸங்கா⁴தி³ஸேஸங் வத³ந்தீதி யோஜனா. யதா²ஹ – ‘‘தஸ்ஸா ஹி போ⁴ஜனபரியோஸானே உய்யோஜிகாய ஸங்கா⁴தி³ஸேஸோ ஹோதீ’’தி (பரி॰ அட்ட²॰ 481).
771.Yā pana bhikkhunī aññāya bhikkhuniyā ‘‘iṅgha, ayye, yaṃ te eso purisapuggalo deti khādanīyaṃ vā’’tiādinā (pāci. 705) saṅghādisesamātikāya vuttanayena uyyojitā avassutamhā purisapuggalā yaṃ kiñci bhojanaṃ ādāya paṭiggahetvā sace bhuñjati, sā tathā bhuñjantī yāya uyyojitā bhuñjati, tassā uyyojikāya dhīrā vinayadharā paṇḍitā saṅghādisesaṃ kathayanti tassā uyyojitāya bhojanapariyosāne uyyojikāya saṅghādisesaṃ vadantīti yojanā. Yathāha – ‘‘tassā hi bhojanapariyosāne uyyojikāya saṅghādiseso hotī’’ti (pari. aṭṭha. 481).
772. தங் கத²ங் யதி³ பு³ஜ்ஜ²ஸி ஜானாஸி, ஸாது⁴கங் ப்³ரூஹி கதே²ஹீதி யோஜனா.
772. Taṃ kathaṃ yadi bujjhasi jānāsi, sādhukaṃ brūhi kathehīti yojanā.
773. நிஸேவிதேதி தாய உய்யோஜிதாய பி⁴க்கு²னியா தஸ்ஸ புரிஸபுக்³க³லஸ்ஸ ஹத்த²தோ படிக்³க³ஹிதே தஸ்மிங் த³ந்தபோனே பரிபு⁴த்தே உய்யோஜிகா லஹுவஜ்ஜங் ஆபஜ்ஜதீதி அத்தோ².
773.Niseviteti tāya uyyojitāya bhikkhuniyā tassa purisapuggalassa hatthato paṭiggahite tasmiṃ dantapone paribhutte uyyojikā lahuvajjaṃ āpajjatīti attho.
775. ‘‘உக்கி²த்தகோ’’தி இமினா ஆபத்திவஜ்ஜமாஹ. யதா²ஹ – ‘‘தேன ஹி ஸத்³தி⁴ங் வினயகம்மங் நத்தி², தஸ்மா ஸோ ஸங்கா⁴தி³ஸேஸங் ஆபஜ்ஜித்வா சா²தெ³ந்தோ வஜ்ஜங் ந பு²ஸதீ’’தி.
775.‘‘Ukkhittako’’ti iminā āpattivajjamāha. Yathāha – ‘‘tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatī’’ti.
776. ஸப்பாணப்பாணஜந்தி ஸப்பாணகே ச அப்பாணகே ச ஜாதங். நேவ ஜங்க³மந்தி பாதே³ஹி பூ⁴மியங் நேவ சரந்தங். ந விஹங்க³மந்தி ஆகாஸே பக்க²ங் பஸாரெத்வா ந சரந்தங். த்³விஜந்தி த்³வீஹி பச்சயேஹி, த்³விக்க²த்துங் வா ஜாதத்தா த்³விஜங். கந்தந்தி மனோஹரங். அகந்தந்தி அமனோஹரங்.
776.Sappāṇappāṇajanti sappāṇake ca appāṇake ca jātaṃ. Neva jaṅgamanti pādehi bhūmiyaṃ neva carantaṃ. Na vihaṅgamanti ākāse pakkhaṃ pasāretvā na carantaṃ. Dvijanti dvīhi paccayehi, dvikkhattuṃ vā jātattā dvijaṃ. Kantanti manoharaṃ. Akantanti amanoharaṃ.
777. ஸப்பாணஜோ ஸத்³தோ³ சித்தஜோ வுத்தோ, அப்பாணஜோ உதுஜோ ஸத்³தோ³ வுத்தோ, ஸோ பன த்³வீஹேவ பச்சயேஹி ஜாதத்தா ‘‘த்³விஜோ’’தி மதோதி யோஜனா.
777. Sappāṇajo saddo cittajo vutto, appāṇajo utujo saddo vutto, so pana dvīheva paccayehi jātattā ‘‘dvijo’’ti matoti yojanā.
778. ‘‘வினயே’’திஆதி³கா³தா² வண்ணிதத்தா²யேவ.
778.‘‘Vinaye’’tiādigāthā vaṇṇitatthāyeva.
இதி உத்தரே லீனத்த²பகாஸனியா
Iti uttare līnatthapakāsaniyā
ஸேத³மோசனகதா²வண்ணனா நிட்டி²தா.
Sedamocanakathāvaṇṇanā niṭṭhitā.
