| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
ஸேனாஸனக்க²ந்த⁴ககதா²வண்ணனா
Senāsanakkhandhakakathāvaṇṇanā
2827. ஆஸந்தி³கோதி சதுரஸ்ஸபீட²ங். அதிக்கந்தபமாணோதி ஹெட்டா² அடனியா வட்³ட⁴கிஹத்த²தோ உச்சதரப்பமாணபாத³கோ. ஏகபஸ்ஸதோ தீ³கோ⁴ பன உச்சபாத³கோ ந வட்டதி. யதா²ஹ – ‘‘உச்சகம்பி ஆஸந்தி³கந்தி வசனதோ ஏகதோபா⁴கே³ன தீ³க⁴பீட²மேவ ஹி அட்ட²ங்கு³லாதி⁴கபாத³கங் ந வட்டதி, சதுரஸ்ஸஆஸந்தி³கோ பன பமாணாதிக்கந்தோபி வட்டதீ’’தி (சூளவ॰ அட்ட²॰ 297).
2827.Āsandikoti caturassapīṭhaṃ. Atikkantapamāṇoti heṭṭhā aṭaniyā vaḍḍhakihatthato uccatarappamāṇapādako. Ekapassato dīgho pana uccapādako na vaṭṭati. Yathāha – ‘‘uccakampi āsandikanti vacanato ekatobhāgena dīghapīṭhameva hi aṭṭhaṅgulādhikapādakaṃ na vaṭṭati, caturassaāsandiko pana pamāṇātikkantopi vaṭṭatī’’ti (cūḷava. aṭṭha. 297).
ததா²தி இமினா ‘‘அதிக்கந்தபமாணோ’’தி இத³ங் பச்சாமஸதி. பஞ்சங்க³பீட²ந்தி சத்தாரோ பாதா³, அபஸ்ஸேனந்தி இமேஹி பஞ்சங்கே³ஹி யுத்தபீட²ங். ஸத்தங்க³ந்தி தீஸு தி³ஸாஸு அபஸ்ஸயே யோஜெத்வா கதங். தஞ்ஹி சதூஹி பாதே³ஹி, தீஹி அபஸ்ஸேஹி ச யுத்தத்தா ‘‘ஸத்தங்க³பீட²’’ந்தி வுத்தங். ஏஸ நயோ மஞ்சேபி. யதா²ஹ – ‘‘ஸத்தங்கோ³ நாம தீஸு தி³ஸாஸு அபஸ்ஸயங் கத்வா கதமஞ்சோ, அயம்பி பமாணாதிக்கந்தோ வட்டதீ’’தி (சூளவ॰ அட்ட²॰ 297).
Tathāti iminā ‘‘atikkantapamāṇo’’ti idaṃ paccāmasati. Pañcaṅgapīṭhanti cattāro pādā, apassenanti imehi pañcaṅgehi yuttapīṭhaṃ. Sattaṅganti tīsu disāsu apassaye yojetvā kataṃ. Tañhi catūhi pādehi, tīhi apassehi ca yuttattā ‘‘sattaṅgapīṭha’’nti vuttaṃ. Esa nayo mañcepi. Yathāha – ‘‘sattaṅgo nāma tīsu disāsu apassayaṃ katvā katamañco, ayampi pamāṇātikkanto vaṭṭatī’’ti (cūḷava. aṭṭha. 297).
2828. தூலோனத்³தா⁴தி உபரி தூலங் பக்கி²பித்வா ப³த்³தா⁴. க⁴ரேயேவாதி கி³ஹீனங் கே³ஹேயேவ நிஸீதி³துங் வட்டதீதி ஸம்ப³ந்தோ⁴. ‘‘நிஸீதி³து’’ந்தி இமினாவ ஸயனங் படிக்கி²த்தங். ஸீஸபாதூ³பதா⁴னந்தி ஸீஸூபதா⁴னஞ்சேவ பாதூ³பதா⁴னஞ்ச. ச-ஸத்³தோ³ பி-ஸத்³த³த்தே² ஸோ ‘‘அகி³லானஸ்ஸா’’தி எத்த² ஆனெத்வா ஸம்ப³ந்தி⁴தப்³போ³, தேன அகி³லானஸ்ஸாபி தாவ வட்டதி, பகே³வ கி³லானஸ்ஸாதி தீ³பேதி.
2828.Tūlonaddhāti upari tūlaṃ pakkhipitvā baddhā. Ghareyevāti gihīnaṃ geheyeva nisīdituṃ vaṭṭatīti sambandho. ‘‘Nisīditu’’nti imināva sayanaṃ paṭikkhittaṃ. Sīsapādūpadhānanti sīsūpadhānañceva pādūpadhānañca. Ca-saddo pi-saddatthe so ‘‘agilānassā’’ti ettha ānetvā sambandhitabbo, tena agilānassāpi tāva vaṭṭati, pageva gilānassāti dīpeti.
2829. ந கேவலங் கி³லானஸ்ஸ ஸீஸபாதூ³பதா⁴னமேவ வட்டதி, அத² கோ² இத³ம்பீதி த³ஸ்ஸேதுமாஹ ‘‘ஸந்த²ரித்வா’’திஆதி³. உபதா⁴னானி ஸந்த²ரித்வாதி ப³ஹூ உபதா⁴னானி அத்த²ரித்வா. தத்த² சாதி தஸ்மிங் உபதா⁴னஸந்த²ரே. பச்சத்த²ரணகங் த³த்வாதி உபரி பச்சத்த²ரணகங் அத்த²ரித்வா.
2829. Na kevalaṃ gilānassa sīsapādūpadhānameva vaṭṭati, atha kho idampīti dassetumāha ‘‘santharitvā’’tiādi. Upadhānāni santharitvāti bahū upadhānāni attharitvā. Tattha cāti tasmiṃ upadhānasanthare. Paccattharaṇakaṃ datvāti upari paccattharaṇakaṃ attharitvā.
2830. திரியந்தி வித்தா²ரதோ. முட்டி²ரதனந்தி பாகதிகமுட்டி²கரதனங். தங் பன வட்³ட⁴கீனங் வித³த்தி²மத்தங். மிதந்தி பாகடிதங் பமாணயுத்தங் ஹோதீதி யோஜனா. கத்த²சி பொத்த²கேஸு ‘‘மத’’ந்தி பாடோ² தி³ஸ்ஸதி, ஸோ ந க³ஹேதப்³போ³. தீ³க⁴தோதி பி³ம்போ³ஹனஸ்ஸ தீ³க⁴தோ. தி³யட்³ட⁴ந்தி தி³யட்³ட⁴ஹத்த²ங் வா த்³விஹத்த²ங் வா ஹோதீதி குருந்தி³யங் வுத்தந்தி ஸம்ப³ந்தோ⁴. இத³மேவ ஹி ‘‘ஸீஸப்பமாணபி³ம்போ³ஹன’’ந்தி அதி⁴ப்பேதங். யதா²ஹ –
2830.Tiriyanti vitthārato. Muṭṭhiratananti pākatikamuṭṭhikaratanaṃ. Taṃ pana vaḍḍhakīnaṃ vidatthimattaṃ. Mitanti pākaṭitaṃ pamāṇayuttaṃ hotīti yojanā. Katthaci potthakesu ‘‘mata’’nti pāṭho dissati, so na gahetabbo. Dīghatoti bimbohanassa dīghato. Diyaḍḍhanti diyaḍḍhahatthaṃ vā dvihatthaṃ vā hotīti kurundiyaṃ vuttanti sambandho. Idameva hi ‘‘sīsappamāṇabimbohana’’nti adhippetaṃ. Yathāha –
‘‘ஸீஸப்பமாணங் நாம யஸ்ஸ வித்தா²ரதோ தீஸு கண்ணேஸு த்³வின்னங் கண்ணானங் அந்தரங் மினியமானங் வித³த்தி² சேவ சதுரங்கு³லஞ்ச ஹோதி, மஜ்ஜ²ட்டா²னங் முட்டி²ரதனங் ஹோதி. தீ³க⁴தோ பன தி³யட்³ட⁴ரதனங் வா த்³விரதனங் வாதி குருந்தி³யங் வுத்தங். அயங் ஸீஸப்பமாணஸ்ஸ உக்கட்ட²பரிச்சே²தோ³, இதோ உத்³த⁴ங் ந வட்டதி, ஹெட்டா² பன வட்டதீ’’தி (சூளவ॰ அட்ட²॰ 297).
‘‘Sīsappamāṇaṃ nāma yassa vitthārato tīsu kaṇṇesu dvinnaṃ kaṇṇānaṃ antaraṃ miniyamānaṃ vidatthi ceva caturaṅgulañca hoti, majjhaṭṭhānaṃ muṭṭhiratanaṃ hoti. Dīghato pana diyaḍḍharatanaṃ vā dviratanaṃ vāti kurundiyaṃ vuttaṃ. Ayaṃ sīsappamāṇassa ukkaṭṭhaparicchedo, ito uddhaṃ na vaṭṭati, heṭṭhā pana vaṭṭatī’’ti (cūḷava. aṭṭha. 297).
2831. சோளந்தி பிலோதிகா. பண்ணந்தி ருக்க²லதானங் பண்ணங். உண்ணாதி ஏளகாதீ³னங் லோமங். திணந்தி த³ப்³ப³திணாதி³ யங் கிஞ்சி திணங். வாகந்தி கத³லிஅக்கமகசிவாகாதி³கங். ஏதேஹி பஞ்சஹி பூரிதா பி⁴ஸியோ தூலானங் க³ணனாவஸா ஹேதுக³ப்³பா⁴னங் ஏதேஸங் பஞ்சன்னங் க³ப்³பா⁴னங் க³ணனாவஸேன பஞ்ச பா⁴ஸிதாதி யோஜனா.
2831.Coḷanti pilotikā. Paṇṇanti rukkhalatānaṃ paṇṇaṃ. Uṇṇāti eḷakādīnaṃ lomaṃ. Tiṇanti dabbatiṇādi yaṃ kiñci tiṇaṃ. Vākanti kadaliakkamakacivākādikaṃ. Etehi pañcahi pūritā bhisiyo tūlānaṃ gaṇanāvasā hetugabbhānaṃ etesaṃ pañcannaṃ gabbhānaṃ gaṇanāvasena pañca bhāsitāti yojanā.
2832. பி³ம்போ³ஹனக³ப்³ப⁴ங் த³ஸ்ஸேதுமாஹ ‘‘பி⁴ஸீ’’திஆதி³. பஞ்சேவாதி யதா²வுத்தசோளாதி³பஞ்சேவ. ததா² தூலானி தீணிபீதி ‘‘அனுஜானாமி, பி⁴க்க²வே, தீணி தூலானி ருக்க²தூலங் லதாதூலங் போடகிதூல’’ந்தி (சூளவ॰ 297) அனுஞ்ஞாதானி தீணிபி தூலானி. எத்த² ச ருக்க²தூலங் நாம ஸிம்ப³லிருக்கா²தீ³னங் யேஸங் கேஸஞ்சி ருக்கா²னங் தூலங். லதாதூலங் நாம கீ²ரவல்லிஆதீ³னங் யாஸங் காஸஞ்சி வல்லீனங் தூலங். போடகிதூலங் நாம போடகிதிணாதீ³னங் யேஸங் கேஸஞ்சி திணஜாதிகானங் அந்தமஸோ உச்சு²னளாதீ³னம்பி தூலங். லோமானி மிக³பக்கீ²னந்தி ஸீஹாதி³சதுப்பதா³னங், மோராதி³பக்கீ²னங் லோமானி. இமேதி பி⁴ஸிக³ப்³பா⁴த³யோ இமே த³ஸ பி³ம்போ³ஹனஸ்ஸ க³ப்³பா⁴தி ஸம்ப³ந்தோ⁴.
2832. Bimbohanagabbhaṃ dassetumāha ‘‘bhisī’’tiādi. Pañcevāti yathāvuttacoḷādipañceva. Tathā tūlāni tīṇipīti ‘‘anujānāmi, bhikkhave, tīṇi tūlāni rukkhatūlaṃ latātūlaṃ poṭakitūla’’nti (cūḷava. 297) anuññātāni tīṇipi tūlāni. Ettha ca rukkhatūlaṃ nāma simbalirukkhādīnaṃ yesaṃ kesañci rukkhānaṃ tūlaṃ. Latātūlaṃ nāma khīravalliādīnaṃ yāsaṃ kāsañci vallīnaṃ tūlaṃ. Poṭakitūlaṃ nāma poṭakitiṇādīnaṃ yesaṃ kesañci tiṇajātikānaṃ antamaso ucchunaḷādīnampi tūlaṃ. Lomāni migapakkhīnanti sīhādicatuppadānaṃ, morādipakkhīnaṃ lomāni. Imeti bhisigabbhādayo ime dasa bimbohanassa gabbhāti sambandho.
2833. ஏவங் கப்பியங் பி⁴ஸிபி³ம்போ³ஹனக³ப்³ப⁴ங் த³ஸ்ஸெத்வா இதா³னி அகப்பியங் த³ஸ்ஸேதுமாஹ ‘‘மனுஸ்ஸலோம’’ந்திஆதி³. லோமேஸு மனுஸ்ஸலோமஞ்ச புப்பே²ஸு ப³குலபியங்கு³புப்பா²தி³கங் ஸப்³ப³ங் புப்ப²ஞ்ச பண்ணேஸு ச ஸுத்³த⁴ங் கேவலங் தமாலபத்தஞ்ச ந வட்டதீதி யோஜனா. ‘‘ஸுத்³த⁴’’ந்தி இமினா தமாலபத்தங் ஸேஸக³ப்³பே⁴ஹி மிஸ்ஸங் வட்டதீதி ப்³யதிரேகதோ தீ³பேதி.
2833. Evaṃ kappiyaṃ bhisibimbohanagabbhaṃ dassetvā idāni akappiyaṃ dassetumāha ‘‘manussaloma’’ntiādi. Lomesu manussalomañca pupphesu bakulapiyaṅgupupphādikaṃ sabbaṃ pupphañca paṇṇesu ca suddhaṃ kevalaṃ tamālapattañca na vaṭṭatīti yojanā. ‘‘Suddha’’nti iminā tamālapattaṃ sesagabbhehi missaṃ vaṭṭatīti byatirekato dīpeti.
2834. மஸூரகேதி சம்மச²விபி⁴ஸிபி³ம்போ³ஹனே.
2834.Masūraketi cammachavibhisibimbohane.
2835. ‘‘ஸுத்³த⁴’’ந்தி இமினா ப்³யதிரேகதோ த³ஸ்ஸிதமேவத்த²ங் ஸரூபதோ விபா⁴வேதுமாஹ ‘‘மிஸ்ஸ’’ந்திஆதி³.
2835. ‘‘Suddha’’nti iminā byatirekato dassitamevatthaṃ sarūpato vibhāvetumāha ‘‘missa’’ntiādi.
2836. திரச்சா²னக³தஸ்ஸ வாதி அந்தமஸோ க³ண்டு³ப்பாத³ஸ்ஸாபி. காரெந்தஸ்ஸாதி சித்தகம்மகட்ட²கம்மாதி³வஸேன காராபெந்தஸ்ஸ வா கரொந்தஸ்ஸ வா.
2836.Tiracchānagatassa vāti antamaso gaṇḍuppādassāpi. Kārentassāti cittakammakaṭṭhakammādivasena kārāpentassa vā karontassa vā.
2837. ஜாதகந்தி அபண்ணகஜாதகாதி³ஜாதகஞ்ச. வத்து²ந்தி விமானவத்து²ஆதி³கங் பஸாத³ஜனகங் வா பேதவத்து²ஆதி³கங் ஸங்வேக³ஜனகங் வா வத்து²ங். வா-ஸத்³தே³ன அட்ட²கதா²க³தங் இத⁴ த³ஸ்ஸிதபகரணங் ஸங்க³ண்ஹாதி. பரேஹி வாதி எத்த² வா-ஸத்³தோ³ அவதா⁴ரணே, தேன பரேஹி காராபேதுமேவ வட்டதி, ந ஸயங் காதுந்தி தீ³பேதி. ஸயங் காதும்பீதி எத்த² அபி-ஸத்³தோ³ பகே³வ காராபேதுந்தி தீ³பேதி.
2837.Jātakanti apaṇṇakajātakādijātakañca. Vatthunti vimānavatthuādikaṃ pasādajanakaṃ vā petavatthuādikaṃ saṃvegajanakaṃ vā vatthuṃ. Vā-saddena aṭṭhakathāgataṃ idha dassitapakaraṇaṃ saṅgaṇhāti. Parehi vāti ettha vā-saddo avadhāraṇe, tena parehi kārāpetumeva vaṭṭati, na sayaṃ kātunti dīpeti. Sayaṃ kātumpīti ettha api-saddo pageva kārāpetunti dīpeti.
2838. யோ பன பி⁴க்கு² த்³வீஹி வஸ்ஸேஹி வா ஏகேன வா வஸ்ஸேன யஸ்ஸ பி⁴க்கு²னோ வுட்³ட⁴தரோ வா ஹோதி த³ஹரதரோ வா, ஸோ தேன பி⁴க்கு²னா ஸமானாஸனிகோ நாம ஹோதீதி யோஜனா.
2838.Yo pana bhikkhu dvīhi vassehi vā ekena vā vassena yassa bhikkhuno vuḍḍhataro vā hoti daharataro vā, so tena bhikkhunā samānāsaniko nāma hotīti yojanā.
2839. ‘‘ஸத்தவஸ்ஸேன பஞ்சவஸ்ஸோ’’தி இத³ங் த்³வீஹி வஸ்ஸேஹி வுட்³ட⁴னவகானங் ஸமானாஸனிகத்தே உதா³ஹரணங். ‘‘ச² வஸ்ஸேன பஞ்சவஸ்ஸோ’’தி இத³ங் ஏகவஸ்ஸேன வுட்³ட⁴னவகானங் ஸமானாஸனிகத்தே உதா³ஹரணங்.
2839.‘‘Sattavassena pañcavasso’’ti idaṃ dvīhi vassehi vuḍḍhanavakānaṃ samānāsanikatte udāharaṇaṃ. ‘‘Chavassena pañcavasso’’ti idaṃ ekavassena vuḍḍhanavakānaṃ samānāsanikatte udāharaṇaṃ.
2840. யங் திண்ணங் நிஸீதி³துங் பஹோதி, தங் ஹெட்டா² தீ³கா⁴ஸனங் நாமாதி யோஜனா. ‘‘ஸமானாஸனிகா மஞ்சே நிஸீதி³த்வா மஞ்சங் பி⁴ந்தி³ங்ஸு, பீடே² நிஸீதி³த்வா பீட²ங் பி⁴ந்தி³ங்ஸூ’’தி (சூளவ॰ 320) ஆரோபிதே வத்து²ம்ஹி ‘‘அனுஜானாமி, பி⁴க்க²வே, து³வக்³க³ஸ்ஸ மஞ்சங் து³வக்³க³ஸ்ஸ பீட²’’ந்தி (சூளவ॰ 320) அனுஞ்ஞாதத்தா ‘‘த்³வே’’தி ஸமானாஸனிகே த்³வே ஸந்தா⁴ய வுத்தங்.
2840. Yaṃ tiṇṇaṃ nisīdituṃ pahoti, taṃ heṭṭhā dīghāsanaṃ nāmāti yojanā. ‘‘Samānāsanikā mañce nisīditvā mañcaṃ bhindiṃsu, pīṭhe nisīditvā pīṭhaṃ bhindiṃsū’’ti (cūḷava. 320) āropite vatthumhi ‘‘anujānāmi, bhikkhave, duvaggassa mañcaṃ duvaggassa pīṭha’’nti (cūḷava. 320) anuññātattā ‘‘dve’’ti samānāsanike dve sandhāya vuttaṃ.
2841. உப⁴தொப்³யஞ்ஜனங் , இத்தி²ங், பண்ட³கங் ட²பெத்வா ஸப்³பே³ஹிபி க³ஹட்டே²ஹி, பப்³ப³ஜிதேஹி வா புரிஸேஹி ஸஹ தீ³கா⁴ஸனே நிஸீதி³துங் அனுஞ்ஞாதந்தி யோஜனா. பொத்த²கேஸு பன கத்த²சி ‘‘ஸப்³பே³ஸ’’ந்தி ஸாமிவசனந்தோ பாடோ² தி³ஸ்ஸதி, ததோ ‘‘ஸப்³பே³ஹிபீ’’தி கரணவசனந்தோவ பாடோ² யுத்ததரோ. கரணவசனப்பஸங்கே³ வா ஸாமிவசனநித்³தே³ஸோதி வேதி³தப்³ப³ங். யதா²ஹ ‘‘யங் திண்ணங் பஹோதி, தங் ஸங்ஹாரிமங் வா ஹோது அஸங்ஹாரிமங் வா, ததா²ரூபே அபி ப²லகக²ண்டே³ அனுபஸம்பன்னேனாபி ஸத்³தி⁴ங் நிஸீதி³துங் வட்டதீ’’தி (சூளவ॰ அட்ட²॰ 320).
2841. Ubhatobyañjanaṃ , itthiṃ, paṇḍakaṃ ṭhapetvā sabbehipi gahaṭṭhehi, pabbajitehi vā purisehi saha dīghāsane nisīdituṃ anuññātanti yojanā. Potthakesu pana katthaci ‘‘sabbesa’’nti sāmivacananto pāṭho dissati, tato ‘‘sabbehipī’’ti karaṇavacanantova pāṭho yuttataro. Karaṇavacanappasaṅge vā sāmivacananiddesoti veditabbaṃ. Yathāha ‘‘yaṃ tiṇṇaṃ pahoti, taṃ saṃhārimaṃ vā hotu asaṃhārimaṃ vā, tathārūpe api phalakakhaṇḍe anupasampannenāpi saddhiṃ nisīdituṃ vaṭṭatī’’ti (cūḷava. aṭṭha. 320).
2842. புரிமிகோதி ஞத்திது³தியாய கம்மவாசாய ஸம்மதேன ‘‘ந ச²ந்தா³க³திங் க³ச்செ²ய்ய…பே॰… க³ஹிதாக³ஹிதஞ்ச ஜானெய்யா’’தி (சூளவ॰ 317) வுத்தேஹி பஞ்சஹி அங்கே³ஹி ஸமன்னாக³தேன பி⁴க்கு²னா புரிமவஸ்ஸூபனாயிகதி³வஸே ‘‘அனுஜானாமி, பி⁴க்க²வே, பட²மங் பி⁴க்கூ² க³ணேதுங், பட²மங் பி⁴க்கூ² க³ணெத்வா ஸெய்யா க³ணேதுங், ஸெய்யா க³ணெத்வா ஸெய்யக்³கே³ன கா³ஹேது’’ந்திஆதி³னா (சூளவ॰ 318) நயேன அனுஞ்ஞாதனியாமேனேவ ஸேனாஸனக்³கா³ஹாபனங் புரிமிகோ நாம ஸேனாஸனக்³கா³ஹோ. ஏவமேவ பச்சி²மிகாய வஸ்ஸூபனாயிகதி³வஸே ஸேனாஸனக்³கா³ஹாபனங் பச்சி²மிகோ நாம. ஏவமேவ மஹாபவாரணாதி³வஸஸ்ஸ அனந்தரதி³வஸே ‘‘ப⁴ந்தே, அந்தராமுத்தகங் ஸேனாஸனங் க³ண்ஹதா²’’தி வத்வா வுட்³ட⁴படிபாடியா ஸேனாஸனக்³கா³ஹாபனங் அந்தராமுத்தகோ நாம. பகாஸிதோ ‘‘அபரஜ்ஜுக³தாய ஆஸாள்ஹியாபுரிமிகோ கா³ஹாபேதப்³போ³, மாஸக³தாய ஆஸாள்ஹியா பச்சி²மிகோ கா³ஹேதப்³போ³, அபரஜ்ஜுக³தாய பவாரணாய ஆயதிங் வஸ்ஸாவாஸத்தா²ய அந்தராமுத்தகோ கா³ஹேதப்³போ³’’தி (சூளவ॰ 318) வுத்தோ.
2842.Purimikoti ñattidutiyāya kammavācāya sammatena ‘‘na chandāgatiṃ gaccheyya…pe… gahitāgahitañca jāneyyā’’ti (cūḷava. 317) vuttehi pañcahi aṅgehi samannāgatena bhikkhunā purimavassūpanāyikadivase ‘‘anujānāmi, bhikkhave, paṭhamaṃ bhikkhū gaṇetuṃ, paṭhamaṃ bhikkhū gaṇetvā seyyā gaṇetuṃ, seyyā gaṇetvā seyyaggena gāhetu’’ntiādinā (cūḷava. 318) nayena anuññātaniyāmeneva senāsanaggāhāpanaṃ purimiko nāma senāsanaggāho. Evameva pacchimikāya vassūpanāyikadivase senāsanaggāhāpanaṃ pacchimiko nāma. Evameva mahāpavāraṇādivasassa anantaradivase ‘‘bhante, antarāmuttakaṃ senāsanaṃ gaṇhathā’’ti vatvā vuḍḍhapaṭipāṭiyā senāsanaggāhāpanaṃ antarāmuttako nāma. Pakāsito ‘‘aparajjugatāya āsāḷhiyāpurimiko gāhāpetabbo, māsagatāya āsāḷhiyā pacchimiko gāhetabbo, aparajjugatāya pavāraṇāya āyatiṃ vassāvāsatthāya antarāmuttako gāhetabbo’’ti (cūḷava. 318) vutto.
2843. வுத்தமேவத்த²ங் நியமெத்வா த³ஸ்ஸேதுமாஹ ‘‘புப்³பா³ருணா’’திஆதி³. இத⁴ பாடிபதா³ நாம த்³வே வஸ்ஸூபனாயிகதி³வஸா சேவ மஹாபவாரணாய அனந்தரதி³வஸோ ச. இமேஸங் திண்ணங் பாடிபத³தி³வஸானங் அருணோ புப்³பா³ருணோ நாம. தே தி³வஸே அதிக்கம்ம து³தியதிதி²படிப³த்³தோ⁴ அருணோ புனாருணோ நாம. இத³ந்தி உப⁴யாருணானந்தரங். ஸேனாஸனகா³ஹகஸ்ஸாதி எத்த² ஸகத்தே² க-பச்சயோ, ஸேனாஸனக்³கா³ஹஸ்ஸாதி அத்தோ². யதா²ஹ – ‘‘இத³ஞ்ஹி ஸேனாஸனக்³கா³ஹஸ்ஸ கெ²த்த’’ந்தி. வஸ்ஸூபக³தே வஸ்ஸூபக³மே காதப்³பே³ ஸதி, ஸாதே⁴தப்³ப³பயோஜனே பு⁴ம்மங். வஸ்ஸூபக³தேதி வா நிமித்தத்தே² பு⁴ம்மங். புரிமிகாய, ஹி பச்சி²மிகாய ச வஸ்ஸூபக³மனஸ்ஸ தங் தத³ஹு ஸேனாஸனக்³கா³ஹோ நிமித்தங், அந்தராமுத்தகோ பன ஆக³மினோ வஸ்ஸூபக³மனஸ்ஸாதி ஏவங் திவிதோ⁴பி ஸேனாஸனக்³கா³ஹோ வஸ்ஸூபக³மனஸ்ஸ நிமித்தங் ஹோதி.
2843. Vuttamevatthaṃ niyametvā dassetumāha ‘‘pubbāruṇā’’tiādi. Idha pāṭipadā nāma dve vassūpanāyikadivasā ceva mahāpavāraṇāya anantaradivaso ca. Imesaṃ tiṇṇaṃ pāṭipadadivasānaṃ aruṇo pubbāruṇo nāma. Te divase atikkamma dutiyatithipaṭibaddho aruṇo punāruṇo nāma. Idanti ubhayāruṇānantaraṃ. Senāsanagāhakassāti ettha sakatthe ka-paccayo, senāsanaggāhassāti attho. Yathāha – ‘‘idañhi senāsanaggāhassa khetta’’nti. Vassūpagate vassūpagame kātabbe sati, sādhetabbapayojane bhummaṃ. Vassūpagateti vā nimittatthe bhummaṃ. Purimikāya, hi pacchimikāya ca vassūpagamanassa taṃ tadahu senāsanaggāho nimittaṃ, antarāmuttako pana āgamino vassūpagamanassāti evaṃ tividhopi senāsanaggāho vassūpagamanassa nimittaṃ hoti.
2844. பாடிபத³தி³வஸஸ்ஸ அருணே உக்³க³தேயேவ ஸேனாஸனே பன கா³ஹிதே அஞ்ஞோ பி⁴க்கு² ஆக³ந்த்வா ஸசே ஸேனாஸனபஞ்ஞாபகங் ஸேனாஸனங் யாசதி, ஸோ பி⁴க்கு² ஸேனாஸனபஞ்ஞாபகேன ‘‘ஸேனாஸனங் கா³ஹித’’ந்தி வத்தப்³போ³தி யோஜனா.
2844. Pāṭipadadivasassa aruṇe uggateyeva senāsane pana gāhite añño bhikkhu āgantvā sace senāsanapaññāpakaṃ senāsanaṃ yācati, so bhikkhu senāsanapaññāpakena ‘‘senāsanaṃ gāhita’’nti vattabboti yojanā.
2845. வஸ்ஸாவாஸஸ்ஸ இத³ங் வஸ்ஸாவாஸிகங், வஸ்ஸங்வுத்தா²னங் தா³தப்³ப³சீவரங், கா³தா²ப³ந்த⁴வஸேன ‘‘வஸ்ஸவாஸிக’’ந்தி ரஸ்ஸத்தங். ஸங்கி⁴கங் அபலோகெத்வா க³ஹிதங் வஸ்ஸாவாஸிகங் சீவரங் ஸசே தத்ரஜங் தத்ருப்பாத³ங் ஹோதி, அந்தோவஸ்ஸே விப்³ப⁴ந்தோபி லப⁴தேதி யோஜனா. ‘‘தத்ரஜங் ஸசே’’தி இமினா சஸ்ஸ தா³யகானங் வஸ்ஸாவாஸிகபச்சயவஸேன கா³ஹிதங் பன ந லப⁴தீதி தீ³பேதி. யதா²ஹ – ‘‘பச்சயவஸேன கா³ஹிதங் பன ந லப⁴தீதி வத³ந்தீ’’தி (சூளவ॰ அட்ட²॰ 318).
2845. Vassāvāsassa idaṃ vassāvāsikaṃ, vassaṃvutthānaṃ dātabbacīvaraṃ, gāthābandhavasena ‘‘vassavāsika’’nti rassattaṃ. Saṅghikaṃ apaloketvā gahitaṃ vassāvāsikaṃ cīvaraṃ sace tatrajaṃ tatruppādaṃ hoti, antovasse vibbhantopi labhateti yojanā. ‘‘Tatrajaṃ sace’’ti iminā cassa dāyakānaṃ vassāvāsikapaccayavasena gāhitaṃ pana na labhatīti dīpeti. Yathāha – ‘‘paccayavasena gāhitaṃ pana na labhatīti vadantī’’ti (cūḷava. aṭṭha. 318).
2846-8. ஸசே வுத்த²வஸ்ஸோ யோ பி⁴க்கு² ஆவாஸிகஹத்த²தோ கிஞ்சி திசீவராதி³கங் கப்பியப⁴ண்ட³ங் அத்தனோ க³ஹெத்வா ‘‘அஸுகஸ்மிங் குலே மய்ஹங் க³ஹிதங் வஸ்ஸாவாஸிகசீவரங் க³ண்ஹ’’ இதி ஏவங் வத்வா தஸ்ஸ ஆவாஸிகஸ்ஸ த³த்வா தி³ஸங் க³ச்ச²தி பக்கமதி, ஸோ தத்த² க³தட்டா²னே ஸசே உப்பப்³ப³ஜதி கி³ஹீ ஹோதி, தஸ்ஸ தி³ஸங்க³தஸ்ஸ ஸம்பத்தங் தங் வஸ்ஸாவாஸிகங் தேன ததா² தி³ன்னம்பி ஆவாஸிகோ பி⁴க்கு² க³ஹேதுங் ந லப⁴தி, தஸ்ஸ பாபிதங் வஸ்ஸாவாஸிகசீவரங் ஸங்கி⁴கங்யேவ ஸியாதி யோஜனா. யதா²ஹ – ‘‘இத⁴, பி⁴க்க²வே, வஸ்ஸங்வுத்தோ² பி⁴க்கு² விப்³ப⁴மதி, ஸங்க⁴ஸ்ஸேவேத’’ந்தி.
2846-8. Sace vutthavasso yo bhikkhu āvāsikahatthato kiñci ticīvarādikaṃ kappiyabhaṇḍaṃ attano gahetvā ‘‘asukasmiṃ kule mayhaṃ gahitaṃ vassāvāsikacīvaraṃ gaṇha’’ iti evaṃ vatvā tassa āvāsikassa datvā disaṃ gacchati pakkamati, so tattha gataṭṭhāne sace uppabbajati gihī hoti, tassa disaṃgatassa sampattaṃ taṃ vassāvāsikaṃ tena tathā dinnampi āvāsiko bhikkhu gahetuṃ na labhati, tassa pāpitaṃ vassāvāsikacīvaraṃ saṅghikaṃyeva siyāti yojanā. Yathāha – ‘‘idha, bhikkhave, vassaṃvuttho bhikkhu vibbhamati, saṅghasseveta’’nti.
2849. தஸ்மிங் குலே தா³யகே மனுஸ்ஸே ஸம்முகா² சே படிச்சா²பேதி, தஸ்ஸ தி³ஸங்க³மிஸ்ஸ ஸம்பத்தங் வஸ்ஸாவாஸிகசீவரங் ஆவாஸிகோ லப⁴தீதி யோஜனா.
2849. Tasmiṃ kule dāyake manusse sammukhā ce paṭicchāpeti, tassa disaṃgamissa sampattaṃ vassāvāsikacīvaraṃ āvāsiko labhatīti yojanā.
2850. தத்த² ஆராமோ நாம புப்பா²ராமோ வா ப²லாராமோ வா. விஹாரோ நாம யங் கிஞ்சி பாஸாதா³தி³ஸேனாஸனங். வத்தூ²னி து³வித⁴ஸ்ஸபீதி ஆராமவத்து², விஹாரவத்தூ²தி து³வித⁴ஸ்ஸ வத்தூ²னி ச. ஆராமவத்து² நாம தேஸங்யேவ ஆராமானங் அத்தா²ய பரிச்சி²ந்தி³த்வா ட²பிதோகாஸோ, தேஸு வா ஆராமேஸு வினட்டே²ஸு தேஸங் போராணகபூ⁴மிபா⁴கோ³. விஹாரவத்து² நாம தஸ்ஸ பதிட்டா²னோகாஸோ. பி⁴ஸி நாம உண்ணபி⁴ஸிஆதீ³னங் பஞ்சன்னங் அஞ்ஞதரா. பி³ம்போ³ஹனங் நாம வுத்தப்பகாரானங் பி³ம்போ³ஹனானங் அஞ்ஞதரங். மஞ்சங் நாம மஸாரகோ பு³ந்தி³காப³த்³தோ⁴, குளீரபாத³கோ, ஆஹச்சபாத³கோதி இமேஸங் புப்³பே³ வுத்தானங் சதுன்னங் மஞ்சானங் அஞ்ஞதரங். பீட²ங் நாம மஸாரகாதீ³னங்யேவ சதுன்னங் பீடா²னங் அஞ்ஞதரங்.
2850. Tattha ārāmo nāma pupphārāmo vā phalārāmo vā. Vihāro nāma yaṃ kiñci pāsādādisenāsanaṃ. Vatthūni duvidhassapīti ārāmavatthu, vihāravatthūti duvidhassa vatthūni ca. Ārāmavatthu nāma tesaṃyeva ārāmānaṃ atthāya paricchinditvā ṭhapitokāso, tesu vā ārāmesu vinaṭṭhesu tesaṃ porāṇakabhūmibhāgo. Vihāravatthu nāma tassa patiṭṭhānokāso. Bhisi nāma uṇṇabhisiādīnaṃ pañcannaṃ aññatarā. Bimbohanaṃ nāma vuttappakārānaṃ bimbohanānaṃ aññataraṃ. Mañcaṃ nāma masārako bundikābaddho, kuḷīrapādako, āhaccapādakoti imesaṃ pubbe vuttānaṃ catunnaṃ mañcānaṃ aññataraṃ. Pīṭhaṃ nāma masārakādīnaṃyeva catunnaṃ pīṭhānaṃ aññataraṃ.
2851. லோஹகும்பீ⁴ நாம காளலோஹேன வா தம்ப³லோஹேன வா யேன கேனசி லோஹேன கதா கும்பீ⁴. கடாஹோ பாகடோவ. ‘‘பா⁴ணக’’ந்தி அலஞ்ஜரோ வுச்சதி. அலஞ்ஜரோதி ச ப³ஹுஉத³கக³ண்ஹனிகா மஹாசாடி, ஜலங் க³ண்ஹிதுங் அலந்தி அலஞ்ஜரோ. ‘‘வட்டசாடி விய ஹுத்வா தோ²கங் தீ³க⁴முகோ² மஜ்ஜே² பரிச்சே²த³ங் த³ஸ்ஸெத்வா கதோ’’தி க³ண்டி²பதே³ வுத்தங். வாரகோதி க⁴டோ. கு வுச்சதி பத²வீ, தஸ்ஸா தா³லனதோ விதா³ரணதோ ‘‘குதா³லோ’’தி அயோமயஉபகரணவிஸேஸோ வுச்சதி.
2851.Lohakumbhī nāma kāḷalohena vā tambalohena vā yena kenaci lohena katā kumbhī. Kaṭāho pākaṭova. ‘‘Bhāṇaka’’nti alañjaro vuccati. Alañjaroti ca bahuudakagaṇhanikā mahācāṭi, jalaṃ gaṇhituṃ alanti alañjaro. ‘‘Vaṭṭacāṭi viya hutvā thokaṃ dīghamukho majjhe paricchedaṃ dassetvā kato’’ti gaṇṭhipade vuttaṃ. Vārakoti ghaṭo. Ku vuccati pathavī, tassā dālanato vidāraṇato ‘‘kudālo’’ti ayomayaupakaraṇaviseso vuccati.
2852. வல்லிவேளுஆதீ³ஸு வேளூதி மஹாவேணு. திணந்தி கே³ஹச்சா²த³னங் திணங். பண்ணங் தாலபண்ணாதி³கங். முஞ்ஜந்தி முஞ்ஜதிணங். பப்³ப³ஜந்தி பப்³ப³ஜதிணங், மத்திகா பகதிமத்திகா வா கே³ருகாதி³பஞ்சவண்ணா வா மத்திகா. ஆஹ ச அட்ட²கதா²சரியோ.
2852.Valliveḷuādīsu veḷūti mahāveṇu. Tiṇanti gehacchādanaṃ tiṇaṃ. Paṇṇaṃ tālapaṇṇādikaṃ. Muñjanti muñjatiṇaṃ. Pabbajanti pabbajatiṇaṃ, mattikā pakatimattikā vā gerukādipañcavaṇṇā vā mattikā. Āha ca aṭṭhakathācariyo.
2853. த்³வேதி பட²மது³தியக³ருப⁴ண்டா³னி. த்³வீஹி ஸங்க³ஹிதானி ‘‘ஆரோமோ, ஆராமவத்து², இத³ங் பட²மங். விஹாரோ, விஹாரவத்து², இத³ங் து³திய’’ந்தி (சூளவ॰ 321-322) வுத்தத்தா. சதுஸங்க³ஹந்தி சதூஹி பி⁴ஸிஆதீ³ஹி ஸங்க³ஹோ யஸ்ஸாதி விக்³க³ஹோ. நவகொட்டா²ஸந்தி லோஹகும்பி⁴ஆத³யோ நவ கொட்டா²ஸா அஸ்ஸாதி விக்³க³ஹோ. அட்ட²தா⁴ வல்லிஆதீ³ஹி அட்ட²ஹி பகாரேஹி.
2853.Dveti paṭhamadutiyagarubhaṇḍāni. Dvīhi saṅgahitāni ‘‘āromo, ārāmavatthu, idaṃ paṭhamaṃ. Vihāro, vihāravatthu, idaṃ dutiya’’nti (cūḷava. 321-322) vuttattā. Catusaṅgahanti catūhi bhisiādīhi saṅgaho yassāti viggaho. Navakoṭṭhāsanti lohakumbhiādayo nava koṭṭhāsā assāti viggaho. Aṭṭhadhā valliādīhi aṭṭhahi pakārehi.
2854. இதீதி நித³ஸ்ஸனத்தே². ஏவங் வுத்தனயேன பஞ்சஹி ராஸீஹி நித்³தி³ட்டா²னங் க³ருப⁴ண்ட³க³ணனானங் பிண்ட³வஸேன பஞ்சவீஸதிவித⁴ங் க³ருப⁴ண்ட³ங் பஞ்சனிம்மலலோசனோ நாதோ² பகாஸயீதி யோஜனா. பஞ்ச நிம்மலானி லோசனானி யஸ்ஸாதி விக்³க³ஹோ, மங்ஸதி³ப்³ப³த⁴ம்மபு³த்³த⁴ஸமந்தசக்கு²வஸேன பஞ்சவித⁴விப்பஸன்னலோசனோதி அத்தோ².
2854.Itīti nidassanatthe. Evaṃ vuttanayena pañcahi rāsīhi niddiṭṭhānaṃ garubhaṇḍagaṇanānaṃ piṇḍavasena pañcavīsatividhaṃ garubhaṇḍaṃ pañcanimmalalocano nātho pakāsayīti yojanā. Pañca nimmalāni locanāni yassāti viggaho, maṃsadibbadhammabuddhasamantacakkhuvasena pañcavidhavippasannalocanoti attho.
2855. விஸ்ஸஜ்ஜெந்தோதி இஸ்ஸரவதாய பரஸ்ஸ விஸ்ஸஜ்ஜெந்தோ. விபா⁴ஜெந்தோதி வஸ்ஸக்³கே³ன பாபெத்வா விபா⁴ஜெந்தோ. இத³ஞ்ஹி ஸப்³ப³ம்பி க³ருப⁴ண்ட³ங் ஸேனாஸனக்க²ந்த⁴கே (சூளவ॰ 321) ‘‘அவிஸ்ஸஜ்ஜியங். கிடாகி³ரிவத்து²ம்ஹி (சூளவ॰ 322) அவேப⁴ங்கி³ய’’ந்தி ச வுத்தங். உப⁴யத்த² ஆக³தவோஹாரபே⁴த³த³ஸ்ஸனமுகே²ன தத்த² விப்படிபஜ்ஜந்தஸ்ஸ ஆபத்திங் த³ஸ்ஸெந்தோ ஆஹ ‘‘பி⁴க்கு² து²ல்லச்சயங் பு²ஸே’’தி. பரிவாரே பன –
2855.Vissajjentoti issaravatāya parassa vissajjento. Vibhājentoti vassaggena pāpetvā vibhājento. Idañhi sabbampi garubhaṇḍaṃ senāsanakkhandhake (cūḷava. 321) ‘‘avissajjiyaṃ. Kiṭāgirivatthumhi (cūḷava. 322) avebhaṅgiya’’nti ca vuttaṃ. Ubhayattha āgatavohārabhedadassanamukhena tattha vippaṭipajjantassa āpattiṃ dassento āha ‘‘bhikkhu thullaccayaṃ phuse’’ti. Parivāre pana –
அவிஸ்ஸஜ்ஜியங் அவேப⁴ங்கி³யங், பஞ்ச வுத்தா மஹேஸினா;
Avissajjiyaṃ avebhaṅgiyaṃ, pañca vuttā mahesinā;
விஸ்ஸஜ்ஜெந்தஸ்ஸ பரிபு⁴ஞ்ஜந்தஸ்ஸ அனாபத்தி;
Vissajjentassa paribhuñjantassa anāpatti;
பஞ்ஹா மேஸா குஸலேஹி சிந்திதாதி. (பரி॰ 479) –
Pañhā mesā kusalehi cintitāti. (pari. 479) –
ஆக³தங். தஸ்மா மூலச்சே²ஜ்ஜவஸேன அவிஸ்ஸஜ்ஜியங், அவேப⁴ங்கி³யஞ்ச, பரிவத்தனவஸேன பன விஸ்ஸஜ்ஜெந்தஸ்ஸ, பரிபு⁴ஞ்ஜந்தஸ்ஸ ச அனாபத்தீதி ஏவமெத்த² அதி⁴ப்பாயோ.
Āgataṃ. Tasmā mūlacchejjavasena avissajjiyaṃ, avebhaṅgiyañca, parivattanavasena pana vissajjentassa, paribhuñjantassa ca anāpattīti evamettha adhippāyo.
2856. பி⁴க்கு²னா புக்³க³லேன வா ஸங்கே⁴ன வா க³ணேன வா க³ருப⁴ண்ட³ங் து விஸ்ஸஜ்ஜிதங் அவிஸ்ஸட்ட²மேவ ஹோதி, விப⁴த்தஞ்ச அவிபா⁴ஜிதமேவ ஹோதீதி யோஜனா.
2856.Bhikkhunā puggalena vā saṅghena vā gaṇena vā garubhaṇḍaṃ tu vissajjitaṃ avissaṭṭhameva hoti, vibhattañca avibhājitameva hotīti yojanā.
2857. எத்த² ஏதேஸு பஞ்சஸு க³ருப⁴ண்டே³ஸு புரிமேஸு தீஸு அக³ருப⁴ண்ட³கங் கிஞ்சி ந ச அத்தீ²தி யோஜனா. சதுத்தே² பன க³ருப⁴ண்டே³ அட்ட²கதா²ய ‘‘லோஹகும்பீ⁴, லோஹபா⁴ணகங், லோஹகடாஹந்தி இமானி தீணி மஹந்தானி வா ஹொந்து கு²த்³த³கானி வா, அந்தமஸோ பஸதமத்தஉத³கக³ண்ஹனகானிபி க³ருப⁴ண்டா³னியேவா’’தி வுத்தனயங் த³ஸ்ஸேதுமாஹ ‘‘லோஹகும்பீ⁴’’திஆதி³.
2857.Ettha etesu pañcasu garubhaṇḍesu purimesu tīsu agarubhaṇḍakaṃ kiñci na ca atthīti yojanā. Catutthe pana garubhaṇḍe aṭṭhakathāya ‘‘lohakumbhī, lohabhāṇakaṃ, lohakaṭāhanti imāni tīṇi mahantāni vā hontu khuddakāni vā, antamaso pasatamattaudakagaṇhanakānipi garubhaṇḍāniyevā’’ti vuttanayaṃ dassetumāha ‘‘lohakumbhī’’tiādi.
2858. இத³ங் திவித⁴ந்தி ஸம்ப³ந்தோ⁴. பாத³க³ண்ஹனகோதி எத்த² பாதோ³ நாம மக³த⁴னாளியா பஞ்சனாளிமத்தக³ண்ஹனகோ பா⁴ஜனவிஸேஸோ. பா⁴ஜனானங் பமாணங் கரொந்தா ஸீஹளதீ³பே யேபு⁴ய்யேன தேனேவ பாதே³ன மினந்தி. தஸ்மா அட்ட²கதா²யங் ‘‘ஸீஹளதீ³பே பாத³க³ண்ஹனகோ பா⁴ஜேதப்³போ³’’தி (சூளவ॰ அட்ட²॰ 321) வுத்தங். லோஹவாரகோதி காளலோஹதம்ப³லோஹவட்டலோஹகங்ஸலோஹானங் யேன கேனசி கதோ. பா⁴ஜியோதி பா⁴ஜேதப்³போ³.
2858. Idaṃ tividhanti sambandho. Pādagaṇhanakoti ettha pādo nāma magadhanāḷiyā pañcanāḷimattagaṇhanako bhājanaviseso. Bhājanānaṃ pamāṇaṃ karontā sīhaḷadīpe yebhuyyena teneva pādena minanti. Tasmā aṭṭhakathāyaṃ ‘‘sīhaḷadīpe pādagaṇhanako bhājetabbo’’ti (cūḷava. aṭṭha. 321) vuttaṃ. Lohavārakoti kāḷalohatambalohavaṭṭalohakaṃsalohānaṃ yena kenaci kato. Bhājiyoti bhājetabbo.
2859. ததோ உத்³த⁴ந்தி ததோ பாத³க³ண்ஹனகவாரகதோ உத்³த⁴ங் அதி⁴கங் க³ண்ஹனகோ. ஏவங் பாளிஆக³தானங் வினிச்ச²யங் த³ஸ்ஸெத்வா அட்ட²கதா²க³தானங் (சூளவ॰ அட்ட²॰ 321) த³ஸ்ஸேதுமாஹ ‘‘பி⁴ங்கா³ராதீ³னீ’’திஆதி³. பி⁴ங்கா³ரோ நாம உக்கி²த்தஹத்தி²ஸொண்டா³காரேன கதஜலனிக்³க³மகண்ணிகோ உச்சகீ³வோ மஹாமுக²உத³கபா⁴ஜனவிஸேஸோ. ஆதி³-ஸத்³தே³ன அட்ட²கதா²க³தானி ‘‘படிக்³க³ஹஉளுங்கத³ப்³பி³கடச்சு²பாதிதட்டகஸரகஸமுக்³க³அங்கா³ரகபல்லதூ⁴மகடச்சு²ஆதீ³னி கு²த்³த³கானி வா மஹந்தானி வா’’தி (சூளவ॰ அட்ட²॰ 321) வுத்தானி ஸங்க³ண்ஹாதி. ஸப்³பா³னீதி கு²த்³த³கானி வா மஹந்தானி வா.
2859.Tato uddhanti tato pādagaṇhanakavārakato uddhaṃ adhikaṃ gaṇhanako. Evaṃ pāḷiāgatānaṃ vinicchayaṃ dassetvā aṭṭhakathāgatānaṃ (cūḷava. aṭṭha. 321) dassetumāha ‘‘bhiṅgārādīnī’’tiādi. Bhiṅgāro nāma ukkhittahatthisoṇḍākārena katajalaniggamakaṇṇiko uccagīvo mahāmukhaudakabhājanaviseso. Ādi-saddena aṭṭhakathāgatāni ‘‘paṭiggahauḷuṅkadabbikaṭacchupātitaṭṭakasarakasamuggaaṅgārakapalladhūmakaṭacchuādīni khuddakāni vā mahantāni vā’’ti (cūḷava. aṭṭha. 321) vuttāni saṅgaṇhāti. Sabbānīti khuddakāni vā mahantāni vā.
2860. தம்ப³தா²லகா அயதா²லகா பா⁴ஜேதப்³பா³தி யோஜனா. ச-ஸத்³தே³ன அட்ட²கதா²யங் வுத்தங் ‘‘ட²பெத்வா பன பா⁴ஜனவிகதிங் அஞ்ஞஸ்மிம்பி கப்பியலோஹப⁴ண்டே³ அஞ்ஜனீ அஞ்ஜனிஸலாகா கண்ணமலஹரணீ ஸூசி பண்ணஸூசி கு²த்³த³கோ பிப்ப²லகோ கு²த்³த³கங் ஆரகண்டகங் குஞ்சிகா தாளங் கத்தரயட்டி²வேத⁴கோ நத்து²தா³னங் பி⁴ந்தி³வாலோ லோஹகூடோ லோஹகுட்டி லோஹகு³ளோ லோஹபிண்டி³ லோஹஅரணீ சக்கலிகங் அஞ்ஞம்பி விப்பகதங் லோஹப⁴ண்ட³ங் பா⁴ஜிய’’ந்தி (சூளவ॰ அட்ட²॰ 321) வசனங் ஸங்க³ண்ஹாதி. தூ⁴மனெத்தந்தி தூ⁴மனாளிகா. ஆதி³-ஸத்³தே³ன ‘‘பா²லதீ³பருக்க²தீ³பகபல்லகஓலம்ப³கதீ³பகஇத்தி²புரிஸதிரச்சா²னக³தரூபகானி பன அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி அந்தமஸோ லோஹகி²லகங் உபாதா³ய ஸப்³பா³னி லோஹப⁴ண்டா³னி க³ருப⁴ண்டா³னியேவ ஹொந்தீ’’தி (சூளவ॰ அட்ட²॰ 321) வுத்தங் ஸங்க³ண்ஹாதி.
2860. Tambathālakā ayathālakā bhājetabbāti yojanā. Ca-saddena aṭṭhakathāyaṃ vuttaṃ ‘‘ṭhapetvā pana bhājanavikatiṃ aññasmimpi kappiyalohabhaṇḍe añjanī añjanisalākā kaṇṇamalaharaṇī sūci paṇṇasūci khuddako pipphalako khuddakaṃ ārakaṇṭakaṃ kuñcikā tāḷaṃ kattarayaṭṭhivedhako natthudānaṃ bhindivālo lohakūṭo lohakuṭṭi lohaguḷo lohapiṇḍi lohaaraṇī cakkalikaṃ aññampi vippakataṃ lohabhaṇḍaṃ bhājiya’’nti (cūḷava. aṭṭha. 321) vacanaṃ saṅgaṇhāti. Dhūmanettanti dhūmanāḷikā. Ādi-saddena ‘‘phāladīparukkhadīpakapallakaolambakadīpakaitthipurisatiracchānagatarūpakāni pana aññāni vā bhitticchadanakavāṭādīsu upanetabbāni antamaso lohakhilakaṃ upādāya sabbāni lohabhaṇḍāni garubhaṇḍāniyeva hontī’’ti (cūḷava. aṭṭha. 321) vuttaṃ saṅgaṇhāti.
2861. அத்தனா படிலத்³த⁴ந்தி எத்த² பி-ஸத்³தோ³ லுத்தனித்³தி³ட்டோ², அத்தனா படிலத்³த⁴ம்பீதி அத்தோ². பி⁴க்கு²னா அத்தனா படிலத்³த⁴ம்பி தங் லோஹப⁴ண்ட³ங் கிஞ்சிபி புக்³க³லிகபரிபோ⁴கே³ன ந பு⁴ஞ்ஜிதப்³ப³ந்தி யோஜனா.
2861.Attanā paṭiladdhanti ettha pi-saddo luttaniddiṭṭho, attanā paṭiladdhampīti attho. Bhikkhunā attanā paṭiladdhampi taṃ lohabhaṇḍaṃ kiñcipi puggalikaparibhogena na bhuñjitabbanti yojanā.
2862. கங்ஸவட்டலோஹானங் விகாரபூ⁴தானி தம்ப³மயபா⁴ஜனானிபி புக்³க³லிகபரிபோ⁴கே³ன ஸப்³ப³ஸோ பரிபு⁴ஞ்ஜிதுங் ந வட்டந்தீதி யோஜனா.
2862. Kaṃsavaṭṭalohānaṃ vikārabhūtāni tambamayabhājanānipi puggalikaparibhogena sabbaso paribhuñjituṃ na vaṭṭantīti yojanā.
2863. ஏஸேவ நயோதி ‘‘ந புக்³க³லிகபோ⁴கே³னா’’திஆதி³னா த³ஸ்ஸிதனயோ. ஸங்கி⁴கேஸு வா கி³ஹீனங் ஸந்தகேஸு வா யதா²வுத்தப⁴ண்டே³ஸு பரிபோ⁴க³பச்சயா தோ³ஸோ ந அத்தீ²தி யோஜனா. ‘‘கங்ஸலோஹாதி³பா⁴ஜனங் ஸங்க⁴ஸ்ஸ தி³ன்னம்பி பாரிஹாரியங் ந வட்டதி, கி³ஹிவிகதனீஹாரேனேவ பரிபு⁴ஞ்ஜிதப்³ப³’’ந்தி (சூளவ॰ அட்ட²॰ 321) மஹாபச்சரியங் வுத்தங். எத்த² ச பாரிஹாரியங் ந வட்டதி அத்தனோ ஸந்தகங் விய க³ஹெத்வா பரிபு⁴ஞ்ஜிதுங் ந வட்டதீதி. ‘‘கி³ஹிவிகதனீஹாரேனேவ பரிபு⁴ஞ்ஜிதப்³ப³’’ந்தி இமினா ஸசே ஆராமிகாத³யோ படிஸாமெத்வா படிதெ³ந்தி, பரிபு⁴ஞ்ஜிதுங் வட்டதீதி த³ஸ்ஸேதி.
2863.Eseva nayoti ‘‘na puggalikabhogenā’’tiādinā dassitanayo. Saṅghikesu vā gihīnaṃ santakesu vā yathāvuttabhaṇḍesu paribhogapaccayā doso na atthīti yojanā. ‘‘Kaṃsalohādibhājanaṃ saṅghassa dinnampi pārihāriyaṃ na vaṭṭati, gihivikatanīhāreneva paribhuñjitabba’’nti (cūḷava. aṭṭha. 321) mahāpaccariyaṃ vuttaṃ. Ettha ca pārihāriyaṃ na vaṭṭati attano santakaṃ viya gahetvā paribhuñjituṃ na vaṭṭatīti. ‘‘Gihivikatanīhārenevaparibhuñjitabba’’nti iminā sace ārāmikādayo paṭisāmetvā paṭidenti, paribhuñjituṃ vaṭṭatīti dasseti.
2864. கீ²ரபாஸாணந்தி முது³கா பாணஜாதி. வுத்தஞ்ஹி மாதிகாட்ட²கதா²க³ண்டி²பதே³ ‘‘கீ²ரபாஸாணோ நாம முது³கோ பாஸாணோ’’தி. க³ருகந்தி க³ருப⁴ண்ட³ங். தட்டகாதி³கந்தி ஆதி³-ஸத்³தே³ன ஸரகாதீ³னங் ஸங்க³ஹோ. க⁴டகோதி கீ²ரபாஸாணமயோயேவ வாரகோ. ‘‘பாத³க³ண்ஹனதோ உத்³த⁴’’ந்தி இமினா பாத³க³ண்ஹனகோ அக³ருப⁴ண்ட³ந்தி தீ³பேதி.
2864.Khīrapāsāṇanti mudukā pāṇajāti. Vuttañhi mātikāṭṭhakathāgaṇṭhipade ‘‘khīrapāsāṇo nāma muduko pāsāṇo’’ti. Garukanti garubhaṇḍaṃ. Taṭṭakādikanti ādi-saddena sarakādīnaṃ saṅgaho. Ghaṭakoti khīrapāsāṇamayoyeva vārako. ‘‘Pādagaṇhanato uddha’’nti iminā pādagaṇhanako agarubhaṇḍanti dīpeti.
2865. ‘‘ஸுவண்ணரஜதஹாரகூடஜாதிப²லிகபா⁴ஜனானி கி³ஹிவிகதானிபி ந வட்டந்தி, பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா’’தி (சூளவ॰ அட்ட²॰ 321) அட்ட²கதா²யங் வுத்தனயங் த³ஸ்ஸேதுமாஹ ‘‘ஸிங்கீ³’’திஆதி³. ஸிங்கீ³தி ஸுவண்ணங். ஸஜ்ஜு² ரஜதங். ஹாரகூடங் நாம ஸுவண்ணவண்ணங் லோஹஜாதங். ப²லிகேன உப்³ப⁴வங் ஜாதங், ப²லிகமயங் பா⁴ஜனந்தி அத்தோ². கி³ஹீனங் ஸந்தகானிபீதி அபி-ஸத்³தே³ன கி³ஹிவிகதபரிபோ⁴கே³னாபி தாவ ந வட்டந்தி, பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வாதி தீ³பேதி. ஸேனாஸனபரிபோ⁴கே³ பன ஆமாஸம்பி அனாமாஸம்பி ஸப்³ப³ங் வட்டதி.
2865. ‘‘Suvaṇṇarajatahārakūṭajātiphalikabhājanāni gihivikatānipi na vaṭṭanti, pageva saṅghikaparibhogena vā puggalikaparibhogena vā’’ti (cūḷava. aṭṭha. 321) aṭṭhakathāyaṃ vuttanayaṃ dassetumāha ‘‘siṅgī’’tiādi. Siṅgīti suvaṇṇaṃ. Sajjhu rajataṃ. Hārakūṭaṃ nāma suvaṇṇavaṇṇaṃ lohajātaṃ. Phalikena ubbhavaṃ jātaṃ, phalikamayaṃ bhājananti attho. Gihīnaṃ santakānipīti api-saddena gihivikataparibhogenāpi tāva na vaṭṭanti, pageva saṅghikaparibhogena vā puggalikaparibhogena vāti dīpeti. Senāsanaparibhoge pana āmāsampi anāmāsampi sabbaṃ vaṭṭati.
2866. கு²த்³தா³தி யாய வாஸியா ட²பெத்வா த³ந்தகட்ட²ச்சே²த³னங் வா உச்சு²தச்ச²னங் வா அஞ்ஞங் மஹாகம்மங் காதுங் ந ஸக்கா, ஏவரூபா கு²த்³த³கா வாஸி பா⁴ஜனீயா. மஹத்தரீதி யதா²வுத்தப்பமாணாய வாஸியா மஹந்ததரா யேன கேனசி ஆகாரேன கதவாஸி க³ருப⁴ண்ட³ங். வேஜ்ஜானங் ஸிராவேத⁴னகம்பி ச ப²ரஸு ததா² க³ருப⁴ண்ட³ந்தி யோஜனா.
2866.Khuddāti yāya vāsiyā ṭhapetvā dantakaṭṭhacchedanaṃ vā ucchutacchanaṃ vā aññaṃ mahākammaṃ kātuṃ na sakkā, evarūpā khuddakā vāsi bhājanīyā. Mahattarīti yathāvuttappamāṇāya vāsiyā mahantatarā yena kenaci ākārena katavāsi garubhaṇḍaṃ. Vejjānaṃ sirāvedhanakampi ca pharasu tathā garubhaṇḍanti yojanā.
2867. குடா²ரீதி எத்த² ப²ரஸுஸதி³ஸோவ வினிச்ச²யோ. யா பன ஆவுத⁴ஸங்கே²பேன கதா, அயங் அனாமாஸா. குதா³லோ அந்தமஸோ சதுரங்கு³லமத்தோபி. ஸிக²ரந்தி த⁴னுரஜ்ஜுதோ நாமெத்வா தா³ருஆதீ³னங் விஜ்ஜ²னககண்டகோ. தேனேவாதி நிகா²த³னேனேவ.
2867.Kuṭhārīti ettha pharasusadisova vinicchayo. Yā pana āvudhasaṅkhepena katā, ayaṃ anāmāsā. Kudālo antamaso caturaṅgulamattopi. Sikharanti dhanurajjuto nāmetvā dāruādīnaṃ vijjhanakakaṇṭako. Tenevāti nikhādaneneva.
2868. நிகா²த³னஸ்ஸ பே⁴த³வந்ததாய தங் விப⁴ஜித்வா த³ஸ்ஸேதுமாஹ ‘‘சதுரஸ்ஸமுக²ங் தோ³ணிமுக²’’ந்தி. தோ³ணிமுக²ந்தி தோ³ணி விய உப⁴யபஸ்ஸேன நாமிதமுக²ங். வங்கந்தி அக்³க³தோ நாமெத்வா கதனிகா²த³னங். பி-ஸத்³தே³ன உஜுகங் ஸங்க³ண்ஹாதி. தத்த² சாதி தஸ்மிங் நிகா²த³னே. ஸத³ண்ட³ங் கு²த்³த³கஞ்ச நிகா²த³னங் ஸப்³ப³ங் க³ருப⁴ண்ட³ந்தி யோஜனா. ‘‘ஸத³ண்ட³ங் கு²த்³த³க’’ந்தி இமினா விஸேஸனத்³வயேன அத³ண்ட³ங் ப²லமத்தங் ஸிபாடிகாய ட²பெத்வா பரிஹரணயொக்³க³ங் ஸம்மஜ்ஜனித³ண்ட³வேத⁴னகங் நிகா²த³னங் அக³ருப⁴ண்ட³ங், ததோ மஹந்தங் நிகா²த³னங் அத³ண்ட³ம்பி க³ருப⁴ண்ட³ந்தி தீ³பேதி. யேஹி மனுஸ்ஸேஹி விஹாரே வாஸிஆதீ³னி தி³ன்னானி ச ஹொந்தி, தே சே க⁴ரே த³ட்³டே⁴ வா சோரேஹி வா விலுத்தே ‘‘தே³த² நோ, ப⁴ந்தே, உபகரணே புன பாகதிகே கரிஸ்ஸாமா’’தி வத³ந்தி, தா³தப்³பா³. ஸசே ஆஹரந்தி, ந வாரேதப்³பா³, அனாஹரந்தாபி ந சோதே³தப்³பா³.
2868. Nikhādanassa bhedavantatāya taṃ vibhajitvā dassetumāha ‘‘caturassamukhaṃ doṇimukha’’nti. Doṇimukhanti doṇi viya ubhayapassena nāmitamukhaṃ. Vaṅkanti aggato nāmetvā katanikhādanaṃ. Pi-saddena ujukaṃ saṅgaṇhāti. Tattha cāti tasmiṃ nikhādane. Sadaṇḍaṃ khuddakañca nikhādanaṃ sabbaṃ garubhaṇḍanti yojanā. ‘‘Sadaṇḍaṃ khuddaka’’nti iminā visesanadvayena adaṇḍaṃ phalamattaṃ sipāṭikāya ṭhapetvā pariharaṇayoggaṃ sammajjanidaṇḍavedhanakaṃ nikhādanaṃ agarubhaṇḍaṃ, tato mahantaṃ nikhādanaṃ adaṇḍampi garubhaṇḍanti dīpeti. Yehi manussehi vihāre vāsiādīni dinnāni ca honti, te ce ghare daḍḍhe vā corehi vā vilutte ‘‘detha no, bhante, upakaraṇe puna pākatike karissāmā’’ti vadanti, dātabbā. Sace āharanti, na vāretabbā, anāharantāpi na codetabbā.
2869. ‘‘கம்மாரதட்டகாரசுந்த³காரனளகாரமணிகாரபத்தப³ந்த⁴கானங் அதி⁴கரணிமுட்டி²கஸண்டா³ஸதுலாதீ³னி ஸப்³பா³னி லோஹமயஉபகரணானி ஸங்கே⁴ தி³ன்னகாலதோ பட்டா²ய க³ருப⁴ண்டா³னி. திபுகொட்டகஸுவண்ணகாரசம்மகாரஉபகரணேஸுபி ஏஸேவ நயோ. அயங் பன விஸேஸோ – திபுகொட்டகஉபகரணேஸுபி திபுச்சே²த³னஸத்த²கங், ஸுவண்ணகாரஉபகரணேஸு ஸுவண்ணச்சே²த³னஸத்த²கங், சம்மகாரஉபகரணேஸு கதபரிகம்மசம்மசி²ந்த³னகங் கு²த்³த³கஸத்த²ந்தி இமானி பா⁴ஜனீயப⁴ண்டா³னீ’’தி (சூளவ॰ அட்ட²॰ 321) அட்ட²கதா²க³தங் வினிச்ச²யேகதே³ஸங் த³ஸ்ஸேதுமாஹ ‘‘முட்டி²க’’ந்திஆதி³ . துலாதி³கந்தி எத்த² ஆதி³-ஸத்³தே³ன கத்தரிஆதி³உபகரணங் ஸங்க³ண்ஹாதி.
2869. ‘‘Kammārataṭṭakāracundakāranaḷakāramaṇikārapattabandhakānaṃ adhikaraṇimuṭṭhikasaṇḍāsatulādīni sabbāni lohamayaupakaraṇāni saṅghe dinnakālato paṭṭhāya garubhaṇḍāni. Tipukoṭṭakasuvaṇṇakāracammakāraupakaraṇesupi eseva nayo. Ayaṃ pana viseso – tipukoṭṭakaupakaraṇesupi tipucchedanasatthakaṃ, suvaṇṇakāraupakaraṇesu suvaṇṇacchedanasatthakaṃ, cammakāraupakaraṇesu kataparikammacammachindanakaṃ khuddakasatthanti imāni bhājanīyabhaṇḍānī’’ti (cūḷava. aṭṭha. 321) aṭṭhakathāgataṃ vinicchayekadesaṃ dassetumāha ‘‘muṭṭhika’’ntiādi . Tulādikanti ettha ādi-saddena kattariādiupakaraṇaṃ saṅgaṇhāti.
2870. ‘‘நஹாபிததுன்னகாரானங் உபகரணேஸுபி ட²பெத்வா மஹாகத்தரிங், மஹாஸண்டா³ஸங், மஹாபிப்ப²லகஞ்ச ஸப்³ப³ங் பா⁴ஜனீயங். மஹாகத்தரிஆதீ³னி க³ருப⁴ண்டா³னீ’’தி (சூளவ॰ அட்ட²॰ 321) அட்ட²கதா²க³தங் வினிச்ச²யங் த³ஸ்ஸேதுமாஹ ‘‘ந்ஹாபிதகஸ்ஸா’’திஆதி³. ந்ஹாபிதகஸ்ஸ உபகரணேஸு ஸண்டா³ஸோ, மஹத்தரீ கத்தரீ ச துன்னகாரானஞ்ச உபகரணேஸு மஹத்தரீ கத்தரீ ச மஹாபிப்ப²லகஞ்ச க³ருப⁴ண்ட³கந்தி யோஜனா.
2870. ‘‘Nahāpitatunnakārānaṃ upakaraṇesupi ṭhapetvā mahākattariṃ, mahāsaṇḍāsaṃ, mahāpipphalakañca sabbaṃ bhājanīyaṃ. Mahākattariādīni garubhaṇḍānī’’ti (cūḷava. aṭṭha. 321) aṭṭhakathāgataṃ vinicchayaṃ dassetumāha ‘‘nhāpitakassā’’tiādi. Nhāpitakassa upakaraṇesu saṇḍāso, mahattarī kattarī ca tunnakārānañca upakaraṇesu mahattarī kattarī ca mahāpipphalakañca garubhaṇḍakanti yojanā.
2871. எத்தாவதா சதுத்த²க³ருப⁴ண்டே³ வினிச்ச²யங் த³ஸ்ஸெத்வா இதா³னி பஞ்சமக³ருப⁴ண்டே³ வினிச்ச²யங் த³ஸ்ஸேதுமாஹ ‘‘வல்லீ’’திஆதி³. வெத்தலதாதி³கா வல்லி து³ல்லப⁴ட்டா²னே ஸங்க⁴ஸ்ஸ தி³ன்னா வா தத்த² ஸங்க⁴ஸ்ஸ பூ⁴மியங் ஜாதா, ரக்கி²தா கோ³பிதா வா அட்³ட⁴பா³ஹுப்பமாணா க³ருப⁴ண்ட³ங் ஹோதீதி யோஜனா. ‘‘அட்³ட⁴பா³ஹூதி கப்பரதோ பட்டா²ய யாவ அங்ஸகூட’’ந்தி க³ண்டி²பதே³ வுத்தங். ‘‘அட்³ட⁴பா³ஹு நாம வித³த்தி²சதுரங்கு³ல’’ந்திபி வத³ந்தி. ஸசே ஸா வல்லி ஸங்க⁴கம்மே, சேதியகம்மே ச கதே அதிரேகா ஹோதி, புக்³க³லிககம்மேபி உபனேதுங் வட்டதி. அரக்கி²தா பன க³ருப⁴ண்ட³மேவ ந ஹோதி.
2871. Ettāvatā catutthagarubhaṇḍe vinicchayaṃ dassetvā idāni pañcamagarubhaṇḍe vinicchayaṃ dassetumāha ‘‘vallī’’tiādi. Vettalatādikā valli dullabhaṭṭhāne saṅghassa dinnā vā tattha saṅghassa bhūmiyaṃ jātā, rakkhitā gopitā vā aḍḍhabāhuppamāṇā garubhaṇḍaṃ hotīti yojanā. ‘‘Aḍḍhabāhūti kapparato paṭṭhāya yāva aṃsakūṭa’’nti gaṇṭhipade vuttaṃ. ‘‘Aḍḍhabāhu nāma vidatthicaturaṅgula’’ntipi vadanti. Sace sā valli saṅghakamme, cetiyakamme ca kate atirekā hoti, puggalikakammepi upanetuṃ vaṭṭati. Arakkhitā pana garubhaṇḍameva na hoti.
2872. அட்ட²கதா²யங் ‘‘ஸுத்தமகசிவாகனாளிகேரஹீரசம்மமயா ரஜ்ஜுகா வா யொத்தானி வா வாகே ச நாளிகேரஹீரே ச வட்டெத்வா கதா ஏகவட்டா வா த்³விவட்டா வா ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ங். ஸுத்தங் பன அவட்டெத்வா தி³ன்னங், மகசிவாகனாளிகேரஹீரா ச பா⁴ஜனீயா’’தி (சூளவ॰ அட்ட²॰ 321) ஆக³தவினிச்ச²யங் த³ஸ்ஸேதுமாஹ ‘‘ஸுத்தவாகாதி³னிப்³ப³த்தா’’திஆதி³. வாகாதீ³தி ஆதி³-ஸத்³தே³ன மகசிவாகனாளிகேரஹீரசம்மானங் க³ஹணங். நாதிதீ³கா⁴ ரஜ்ஜுகா. அதிதீ³க⁴ங் யொத்தகங்.
2872.Aṭṭhakathāyaṃ ‘‘suttamakacivākanāḷikerahīracammamayā rajjukā vā yottāni vā vāke ca nāḷikerahīre ca vaṭṭetvā katā ekavaṭṭā vā dvivaṭṭā vā saṅghassa dinnakālato paṭṭhāya garubhaṇḍaṃ. Suttaṃ pana avaṭṭetvā dinnaṃ, makacivākanāḷikerahīrā ca bhājanīyā’’ti (cūḷava. aṭṭha. 321) āgatavinicchayaṃ dassetumāha ‘‘suttavākādinibbattā’’tiādi. Vākādīti ādi-saddena makacivākanāḷikerahīracammānaṃ gahaṇaṃ. Nātidīghā rajjukā. Atidīghaṃ yottakaṃ.
2873. நாளிகேரஸ்ஸ ஹீரே வா மகசிவாகே வா வட்டெத்வா கதா ஏகவட்டாபி க³ருப⁴ண்ட³கந்தி யோஜனா. யேஹி பனேதானி ரஜ்ஜுகயொத்தாதீ³னி தி³ன்னானி ஹொந்தி, தே அத்தனோ கரணீயேன ஹரந்தா ந வாரேதப்³பா³.
2873. Nāḷikerassa hīre vā makacivāke vā vaṭṭetvā katā ekavaṭṭāpi garubhaṇḍakanti yojanā. Yehi panetāni rajjukayottādīni dinnāni honti, te attano karaṇīyena harantā na vāretabbā.
2874. வட்³ட⁴கிஅங்கு³லேன அட்ட²ங்கு³லாயதோ ஸூசித³ண்ட³மத்தோ பரிணாஹதோ ஸீஹளதீ³பே லேக²கானங் லேக²னிஸூசித³ண்ட³மத்தோ ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தோ கோ³பிதோ வேளு க³ருப⁴ண்ட³ங் ஸியாதி யோஜனா. ‘‘யங் மஜ்ஜி²மபுரிஸஸ்ஸ கனிட்ட²ங்கு³லியா அக்³க³ப்பமாணங், இத³ங் ஸீஹளதீ³பே லேக²கானங் லேக²னிஸூசியா பமாண’’ந்தி வத³ந்தி. ஸோ ச ஸங்க⁴கம்மே ச சேதியகம்மே ச கதே அதிரேகோ புக்³க³லிககம்மே தா³துங் வட்டதி.
2874. Vaḍḍhakiaṅgulena aṭṭhaṅgulāyato sūcidaṇḍamatto pariṇāhato sīhaḷadīpe lekhakānaṃ lekhanisūcidaṇḍamatto saṅghassa dinno vā tatthajātako vā rakkhito gopito veḷu garubhaṇḍaṃ siyāti yojanā. ‘‘Yaṃ majjhimapurisassa kaniṭṭhaṅguliyā aggappamāṇaṃ, idaṃ sīhaḷadīpe lekhakānaṃ lekhanisūciyā pamāṇa’’nti vadanti. So ca saṅghakamme ca cetiyakamme ca kate atireko puggalikakamme dātuṃ vaṭṭati.
2875. த³ண்டோ³ ச ஸலாகா ச த³ண்ட³ஸலாகா, ச²த்தஸ்ஸ த³ண்ட³ஸலாகாதி விக்³க³ஹோ. ச²த்தத³ண்டோ³ நாம ச²த்தபிண்டி³. ச²த்தஸலாகாதி ச²த்தபஞ்ஜரஸலாகா. த³ண்டோ³தி உபாஹனத³ண்ட³கோ. ‘‘த³ண்டோ³’’தி ஸாமஞ்ஞேன வுத்தேபி அட்ட²கதா²க³தேஸு ஸரூபேன இதா⁴வுத்தோ உபாஹனத³ண்டோ³யேவ ஸாமஞ்ஞவசனேன பாரிஸேஸதோ க³ஹேதப்³போ³தி. த³ட்³ட⁴கே³ஹமனுஸ்ஸா க³ண்ஹித்வா க³ச்ச²ந்தா ந வாரேதப்³பா³.
2875. Daṇḍo ca salākā ca daṇḍasalākā, chattassa daṇḍasalākāti viggaho. Chattadaṇḍo nāma chattapiṇḍi. Chattasalākāti chattapañjarasalākā. Daṇḍoti upāhanadaṇḍako. ‘‘Daṇḍo’’ti sāmaññena vuttepi aṭṭhakathāgatesu sarūpena idhāvutto upāhanadaṇḍoyeva sāmaññavacanena pārisesato gahetabboti. Daḍḍhagehamanussā gaṇhitvā gacchantā na vāretabbā.
2876. முஞ்ஜாதீ³ஸு கே³ஹச்ச²த³னாரஹேஸு திணேஸு யங் கிஞ்சி முட்டி²மத்தங் திணங் வா கே³ஹச்ச²த³னாரஹங் தாலபண்ணாதி³ ஏகம்பி ஸங்க⁴ஸ்ஸ தி³ன்னங் வா தத்த² ஸங்கி⁴கபூ⁴மியங் ஜாதங் வா க³ருப⁴ண்ட³ங் ஸியாதி யோஜேதப்³பா³. தத்த² முட்டி²மத்தங் நாம கரளமத்தங். இத³ஞ்ச கரளங் கத்வா சா²தெ³ந்தானங் ச²த³னகரளவஸேன க³ஹேதப்³ப³ங். தாலபண்ணாதீ³தி ஆதி³-ஸத்³தே³ன நாளிகேரபண்ணாதி³கே³ஹச்ச²த³னபண்ணானங் க³ஹணங். தம்பி முஞ்ஜாதி³ ஸங்க⁴கம்மே ச சேதியகம்மே ச கதே அதிரேகங் புக்³க³லிககம்மே தா³துங் வட்டதி. த³ட்³ட⁴கே³ஹமனுஸ்ஸா க³ஹெத்வா க³ச்ச²ந்தி, ந வாரேதப்³பா³தி.
2876.Muñjādīsu gehacchadanārahesu tiṇesu yaṃ kiñci muṭṭhimattaṃ tiṇaṃ vā gehacchadanārahaṃ tālapaṇṇādi ekampi saṅghassa dinnaṃ vā tattha saṅghikabhūmiyaṃ jātaṃ vā garubhaṇḍaṃ siyāti yojetabbā. Tattha muṭṭhimattaṃ nāma karaḷamattaṃ. Idañca karaḷaṃ katvā chādentānaṃ chadanakaraḷavasena gahetabbaṃ. Tālapaṇṇādīti ādi-saddena nāḷikerapaṇṇādigehacchadanapaṇṇānaṃ gahaṇaṃ. Tampi muñjādi saṅghakamme ca cetiyakamme ca kate atirekaṃ puggalikakamme dātuṃ vaṭṭati. Daḍḍhagehamanussā gahetvā gacchanti, na vāretabbāti.
2877-8. அட்ட²ங்கு³லப்பமாணோதி தீ³க⁴தோ அட்ட²ங்கு³லமத்தோ. கேசி ‘‘புது²லதோ’’தி வத³ந்தி. ரித்தபொத்த²கோதி லேகா²ஹி ஸுஞ்ஞபொத்த²கோ, ந லிகி²தபொத்த²கோதி வுத்தங் ஹோதி. ‘‘அட்ட²ங்கு³லப்பமாணோ’’தி இமினா அட்ட²ங்கு³லதோ ஊனப்பமாணோ பா⁴ஜியோ, ‘‘ரித்தபொத்த²கோ’’தி இமினா அட்ட²ங்கு³லதோ அதிரேகப்பமாணோபி லிகி²தபொத்த²கோ பா⁴ஜியோதி த³ஸ்ஸேதி.
2877-8.Aṭṭhaṅgulappamāṇoti dīghato aṭṭhaṅgulamatto. Keci ‘‘puthulato’’ti vadanti. Rittapotthakoti lekhāhi suññapotthako, na likhitapotthakoti vuttaṃ hoti. ‘‘Aṭṭhaṅgulappamāṇo’’ti iminā aṭṭhaṅgulato ūnappamāṇo bhājiyo, ‘‘rittapotthako’’ti iminā aṭṭhaṅgulato atirekappamāṇopi likhitapotthako bhājiyoti dasseti.
‘‘மத்திகா பகதிமத்திகா வா ஹோது பஞ்சவண்ணா வா ஸுதா⁴ வா ஸஜ்ஜுரஸகங்கு³ட்ட²ஸிலேஸாதீ³ஸு வா யங் கிஞ்சி து³ல்லப⁴ட்டா²னே ஆனெத்வா வா தி³ன்னங் தத்த²ஜாதகங் வா ரக்கி²தகோ³பிதங் தாலப²லபக்கமத்தங் க³ருப⁴ண்ட³ங் ஹோதீ’’தி (சூளவ॰ அட்ட²॰ 321) அட்ட²கதா²க³தவினிச்ச²யங் த³ஸ்ஸேதுமாஹ ‘‘மத்திகா’’திஆதி³. பாகதிகா வா ஸேதகே³ருகாதி³பஞ்சவண்ணா வாபி மத்திகாதி யோஜனா. ஸிலேஸோ நாம கபி³ட்டா²தி³ஸிலேஸோ. ஆதி³-ஸத்³தே³ன ஸஜ்ஜுரஸகங்கு³ட்டா²தீ³னங் க³ஹணங். தாலபக்கபமாணந்தி ஏகட்டி²தாலப²லபமாணாபி. தம்பி மத்திகாதி³ ஸங்க⁴கம்மே, சேதியகம்மே ச நிட்டி²தே அதிரேகங் புக்³க³லிககம்மே தா³துங் வட்டதி.
‘‘Mattikā pakatimattikā vā hotu pañcavaṇṇā vā sudhā vā sajjurasakaṅguṭṭhasilesādīsu vā yaṃ kiñci dullabhaṭṭhāne ānetvā vā dinnaṃ tatthajātakaṃ vā rakkhitagopitaṃ tālaphalapakkamattaṃ garubhaṇḍaṃ hotī’’ti (cūḷava. aṭṭha. 321) aṭṭhakathāgatavinicchayaṃ dassetumāha ‘‘mattikā’’tiādi. Pākatikā vā setagerukādipañcavaṇṇā vāpi mattikāti yojanā. Sileso nāma kabiṭṭhādisileso. Ādi-saddena sajjurasakaṅguṭṭhādīnaṃ gahaṇaṃ. Tālapakkapamāṇanti ekaṭṭhitālaphalapamāṇāpi. Tampi mattikādi saṅghakamme, cetiyakamme ca niṭṭhite atirekaṃ puggalikakamme dātuṃ vaṭṭati.
2879-80. ‘‘வேளுஆதி³க’’ந்தி பத³ச்சே²தோ³. ரக்கி²தங் கோ³பிதங் வாபி க³ண்ஹதா ஸமகங் வா அதிரேகங் வா தா²வரங் அந்தமஸோ தங்அக்³க⁴னகங் வாலிகமேவ வா த³த்வா க³ஹேதப்³ப³ந்தி யோஜனா.
2879-80. ‘‘Veḷuādika’’nti padacchedo. Rakkhitaṃ gopitaṃ vāpi gaṇhatā samakaṃ vā atirekaṃ vā thāvaraṃ antamaso taṃagghanakaṃ vālikameva vā datvā gahetabbanti yojanā.
அட்ட²கதா²யங் பன ‘‘ரக்கி²தகோ³பிதங் வேளுங் க³ண்ஹந்தேன ஸமகங் வா அதிரேகங் வா தா²வரங் அந்தமஸோ தங்அக்³க⁴னகவாலிகாயபி பா²திகம்மங் கத்வா க³ஹேதப்³போ³. பா²திகம்மங் அகத்வா க³ண்ஹந்தேன தத்தே²வ வளஞ்ஜேதப்³போ³, க³மனகாலே ஸங்கி⁴கே ஆவாஸே ட²பெத்வா க³ந்தப்³ப³ங். அஸதியா க³ஹெத்வா க³தேன பன பஹிணித்வா தா³தப்³போ³. தே³ஸந்தரக³தேன ஸம்பத்தவிஹாரே ஸங்கி⁴காவாஸே ட²பேதப்³போ³’’தி (சூளவ॰ அட்ட²॰ 321) வேளும்ஹியேவ அயங் வினிச்ச²யோ வுத்தோ, இத⁴ பன ‘‘வல்லிவேளாதி³கங் கிஞ்சீ’’தி வல்லிஆதீ³னம்பி ஸாமஞ்ஞேன வுத்தத்தா தங் உபலக்க²ணமத்தங் வல்லிஆதீ³ஸுபி யதா²ரஹங் லப்³ப⁴தீதி வேதி³தப்³ப³ங்.
Aṭṭhakathāyaṃ pana ‘‘rakkhitagopitaṃ veḷuṃ gaṇhantena samakaṃ vā atirekaṃ vā thāvaraṃ antamaso taṃagghanakavālikāyapi phātikammaṃ katvā gahetabbo. Phātikammaṃ akatvā gaṇhantena tattheva vaḷañjetabbo, gamanakāle saṅghike āvāse ṭhapetvā gantabbaṃ. Asatiyā gahetvā gatena pana pahiṇitvā dātabbo. Desantaragatena sampattavihāre saṅghikāvāse ṭhapetabbo’’ti (cūḷava. aṭṭha. 321) veḷumhiyeva ayaṃ vinicchayo vutto, idha pana ‘‘valliveḷādikaṃ kiñcī’’ti valliādīnampi sāmaññena vuttattā taṃ upalakkhaṇamattaṃ valliādīsupi yathārahaṃ labbhatīti veditabbaṃ.
2881. அஞ்ஜனந்தி ஸிலாமயோ. ஏவங் ஹரிதாலமனோஸிலாபி.
2881.Añjananti silāmayo. Evaṃ haritālamanosilāpi.
2882. தா³ருப⁴ண்டே³ அயங் வினிச்ச²யோ – பரிணாஹதோ யதா²வுத்த ஸூசித³ண்ட³ப்பமாணகோ அட்ட²ங்கு³லதீ³கோ⁴ யோ கோசி தா³ருப⁴ண்ட³கோ தா³ருது³ல்லப⁴ட்டா²னே ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ க³ருப⁴ண்ட³ங் ஹோதீதி யோஜனா.
2882. Dārubhaṇḍe ayaṃ vinicchayo – pariṇāhato yathāvutta sūcidaṇḍappamāṇako aṭṭhaṅguladīgho yo koci dārubhaṇḍako dārudullabhaṭṭhāne saṅghassa dinno vā tatthajātako vā rakkhitagopito garubhaṇḍaṃ hotīti yojanā.
2883. ஏவங் குருந்த³ட்ட²கதா²ய ஆக³தவினிச்ச²யங் த³ஸ்ஸெத்வா மஹாஅட்ட²கதா²ய (சூளவ॰ அட்ட²॰ 321) ஆக³தங் த³ஸ்ஸேதுமாஹ ‘‘மஹாஅட்ட²கதா²ய’’ந்திஆதி³. தத்த² ஆஸந்தி³கஸத்தங்கா³ வுத்தலக்க²ணாவ. ‘‘ப⁴த்³த³பீட²’’ந்தி வெத்தமயங் பீட²ங் வுச்சதி. பீடி²காதி பிலோதிகாப³த்³த⁴பீட²மேவ.
2883. Evaṃ kurundaṭṭhakathāya āgatavinicchayaṃ dassetvā mahāaṭṭhakathāya (cūḷava. aṭṭha. 321) āgataṃ dassetumāha ‘‘mahāaṭṭhakathāya’’ntiādi. Tattha āsandikasattaṅgā vuttalakkhaṇāva. ‘‘Bhaddapīṭha’’nti vettamayaṃ pīṭhaṃ vuccati. Pīṭhikāti pilotikābaddhapīṭhameva.
2884. ஏளகபாத³பீட²ங் நாம தா³ருபட்டிகாய உபரி பாதே³ ட²பெத்வா போ⁴ஜனபல்லங்கங் விய கதபீட²ங் வுச்சதி. ‘‘ஆமலகவட்டகபீட²’’ந்தி ஏதஸ்ஸ ‘‘ஆமண்ட³கவட்டக’’ந்தி பரியாயோ, தஸ்மா உப⁴யேனாபி ஆமலகாகாரேன யோஜிதங் ப³ஹுபாத³கபீட²ங் வுச்சதி. கேஸுசி பொத்த²கேஸு ‘‘ததா²மண்ட³கபீட²க’’ந்தி பாடோ². கா³தா²ப³ந்த⁴வஸேன மண்ட³க-ஸத்³த³பயோகோ³. கொச்ச²ங் பூ⁴தகா³மவக்³கே³ சதுத்த²ஸிக்கா²பதே³ வுத்தஸரூபங். பலாலபீட²ந்தி நிபஜ்ஜனத்தா²ய கதா பலாலபி⁴ஸி, இமினா கத³லிபத்தாதி³மயபீட²ம்பி உபலக்க²ணதோ த³ஸ்ஸிதங். யதா²ஹ – ‘‘பலாலபீடே²ன செத்த² கத³லிபத்தாதி³பீடா²னிபி ஸங்க³ஹிதானீ’’தி (சூளவ॰ அட்ட²॰ 321). தோ⁴வனே ப²லகந்தி சீவரதோ⁴வனப²லகங், தோ⁴வனாதி³ஸத்³தா³னங் வியெத்த² விப⁴த்திஅலோபோ. இமேஸு தாவ யங் கிஞ்சி கு²த்³த³கங் வா ஹோது மஹந்தங் வா, ஸங்க⁴ஸ்ஸ தி³ன்னங் க³ருப⁴ண்ட³ங் ஹோதி. ப்³யக்³க⁴சம்மஓனத்³த⁴ம்பி வாளரூபபரிக்கி²த்தங் ரதனபரிஸிப்³பி³தங் கொச்ச²ங் க³ருப⁴ண்ட³மேவ.
2884.Eḷakapādapīṭhaṃ nāma dārupaṭṭikāya upari pāde ṭhapetvā bhojanapallaṅkaṃ viya katapīṭhaṃ vuccati. ‘‘Āmalakavaṭṭakapīṭha’’nti etassa ‘‘āmaṇḍakavaṭṭaka’’nti pariyāyo, tasmā ubhayenāpi āmalakākārena yojitaṃ bahupādakapīṭhaṃ vuccati. Kesuci potthakesu ‘‘tathāmaṇḍakapīṭhaka’’nti pāṭho. Gāthābandhavasena maṇḍaka-saddapayogo. Kocchaṃ bhūtagāmavagge catutthasikkhāpade vuttasarūpaṃ. Palālapīṭhanti nipajjanatthāya katā palālabhisi, iminā kadalipattādimayapīṭhampi upalakkhaṇato dassitaṃ. Yathāha – ‘‘palālapīṭhena cettha kadalipattādipīṭhānipi saṅgahitānī’’ti (cūḷava. aṭṭha. 321). Dhovanephalakanti cīvaradhovanaphalakaṃ, dhovanādisaddānaṃ viyettha vibhattialopo. Imesu tāva yaṃ kiñci khuddakaṃ vā hotu mahantaṃ vā, saṅghassa dinnaṃ garubhaṇḍaṃ hoti. Byagghacammaonaddhampi vāḷarūpaparikkhittaṃ ratanaparisibbitaṃ kocchaṃ garubhaṇḍameva.
2885. ப⁴ண்டி³காதி த³ண்ட³கட்ட²ச்சே²த³னப⁴ண்டி³கா. முக்³க³ரோதி த³ண்ட³முக்³க³ரோ. த³ண்ட³முக்³க³ரோ நாம யேன ரஜிதசீவரங் போதெ²ந்தி. வத்த²க⁴ட்டனமுக்³க³ரோதி சீவரக⁴ட்டனமுக்³க³ரோ, யேன அனுவாதாதி³ங் க⁴ட்டெந்தி. அம்ப³ணந்தி ப²லகேஹி பொக்க²ரணிஸதி³ஸங் கதபானீயபா⁴ஜனங். மஞ்ஜூஸா நாம தோ³ணிபேளா. நாவா போதோ. ரஜனதோ³ணிகா நாம யத்த² சீவரங் ரஜந்தி, பக்கரஜனங் வா ஆகிரந்தி.
2885.Bhaṇḍikāti daṇḍakaṭṭhacchedanabhaṇḍikā. Muggaroti daṇḍamuggaro. Daṇḍamuggaro nāma yena rajitacīvaraṃ pothenti. Vatthaghaṭṭanamuggaroti cīvaraghaṭṭanamuggaro, yena anuvātādiṃ ghaṭṭenti. Ambaṇanti phalakehi pokkharaṇisadisaṃ katapānīyabhājanaṃ. Mañjūsā nāma doṇipeḷā. Nāvā poto. Rajanadoṇikā nāma yattha cīvaraṃ rajanti, pakkarajanaṃ vā ākiranti.
2886. உளுங்கோதி நாளிகேரப²லகடாஹாதி³மயோ உளுங்கோ. உப⁴யங் பிதா⁴னஸமகோ ஸமுக்³கோ³. ‘‘கு²த்³த³கோ பரிவித⁴னோ கரண்ட³’’ந்தி வத³ந்தி. கரண்டோ³ ச பாத³க³ண்ஹனகதோ அதிரேகப்பமாணோ இத⁴ அதி⁴ப்பேதோ. கடச்சூ²தி த³ப்³பி³. ஆதி³-ஸத்³தே³ன பானீயஸராவபானீயஸங்கா²தீ³னங் க³ஹணங்.
2886.Uḷuṅkoti nāḷikeraphalakaṭāhādimayo uḷuṅko. Ubhayaṃ pidhānasamako samuggo. ‘‘Khuddako parividhano karaṇḍa’’nti vadanti. Karaṇḍo ca pādagaṇhanakato atirekappamāṇo idha adhippeto. Kaṭacchūti dabbi. Ādi-saddena pānīyasarāvapānīyasaṅkhādīnaṃ gahaṇaṃ.
2887. கே³ஹஸம்பா⁴ரந்தி கே³ஹோபகரணங். த²ம்ப⁴துலாஸோபானப²லகாதி³ தா³ருமயங், பாஸாணமயம்பி இமினாவ க³ஹிதங். கப்பியசம்மந்தி ‘‘ஏளகாஜமிகா³ன’’ந்திஆதி³னா (வி॰ வி॰ 2650) ஹெட்டா² த³ஸ்ஸிதங் கப்பியசம்மங். தப்³பி³பரியாயங் அகப்பியங். அபா⁴ஜியங் க³ருப⁴ண்ட³த்தா. பூ⁴மத்த²ரணங் கத்வா பரிபு⁴ஞ்ஜிதுங் வட்டதி.
2887.Gehasambhāranti gehopakaraṇaṃ. Thambhatulāsopānaphalakādi dārumayaṃ, pāsāṇamayampi imināva gahitaṃ. Kappiyacammanti ‘‘eḷakājamigāna’’ntiādinā (vi. vi. 2650) heṭṭhā dassitaṃ kappiyacammaṃ. Tabbipariyāyaṃ akappiyaṃ. Abhājiyaṃ garubhaṇḍattā. Bhūmattharaṇaṃ katvā paribhuñjituṃ vaṭṭati.
2888. அட்ட²கதா²யங் ‘‘ஏளகசம்மங் பன பச்சத்த²ரணக³திகமேவ ஹோதி, தம்பி க³ருப⁴ண்ட³மேவா’’தி (சூளவ॰ அட்ட²॰ 321) வுத்தத்தா ஆஹ ‘‘ஏளசம்மங் க³ருங் வுத்த’’ந்தி. குருந்தி³யங் பன ‘‘ஸப்³ப³ங் மஞ்சப்பமாணங் சம்மங் க³ருப⁴ண்ட³’’ந்தி (சூளவ॰ அட்ட²॰ 321) வுத்தங். எத்த² ச ‘‘பச்சத்த²ரணக³திகமேவா’’தி இமினா மஞ்சபீடே²பி அத்த²ரிதுங் வட்டதீதி தீ³பேதி. ‘‘பாவாராதி³பச்சத்த²ரணம்பி க³ருப⁴ண்ட³’’ந்தி ஏகே, ‘‘நோ’’தி அபரே, வீமங்ஸித்வா க³ஹேதப்³ப³ங். மஞ்சப்பமாணந்தி ச பமாணயுத்தங் மஞ்சங். பமாணயுத்தமஞ்சோ நாம யஸ்ஸ தீ³க⁴ஸோ நவ வித³த்தி²யோ திரியஞ்ச தது³பட்³ட⁴ங். உத்³த⁴ங் முக²மஸ்ஸாதி உது³க்க²லங். ஆதி³-ஸத்³தே³ன முஸலங், ஸுப்பங், நிஸத³ங், நிஸத³போதோ, பாஸாணதோ³ணி, பாஸாணகடாஹஞ்ச ஸங்க³ஹிதங். பேஸகாராதீ³தி ஆதி³-ஸத்³தே³ன சம்மகாராதீ³னங் க³ஹணங். துரிவேமாதி³ பேஸகாரப⁴ண்ட³ஞ்ச ப⁴ஸ்தாதி³ சம்மகாரப⁴ண்ட³ஞ்ச கஸிப⁴ண்ட³ஞ்ச யுக³னங்க³லாதி³ ஸங்கி⁴கங் ஸங்க⁴ஸந்தகங் க³ருப⁴ண்ட³ந்தி யோஜனா.
2888.Aṭṭhakathāyaṃ ‘‘eḷakacammaṃ pana paccattharaṇagatikameva hoti, tampi garubhaṇḍamevā’’ti (cūḷava. aṭṭha. 321) vuttattā āha ‘‘eḷacammaṃ garuṃ vutta’’nti. Kurundiyaṃ pana ‘‘sabbaṃ mañcappamāṇaṃ cammaṃ garubhaṇḍa’’nti (cūḷava. aṭṭha. 321) vuttaṃ. Ettha ca ‘‘paccattharaṇagatikamevā’’ti iminā mañcapīṭhepi attharituṃ vaṭṭatīti dīpeti. ‘‘Pāvārādipaccattharaṇampi garubhaṇḍa’’nti eke, ‘‘no’’ti apare, vīmaṃsitvā gahetabbaṃ. Mañcappamāṇanti ca pamāṇayuttaṃ mañcaṃ. Pamāṇayuttamañco nāma yassa dīghaso nava vidatthiyo tiriyañca tadupaḍḍhaṃ. Uddhaṃ mukhamassāti udukkhalaṃ. Ādi-saddena musalaṃ, suppaṃ, nisadaṃ, nisadapoto, pāsāṇadoṇi, pāsāṇakaṭāhañca saṅgahitaṃ. Pesakārādīti ādi-saddena cammakārādīnaṃ gahaṇaṃ. Turivemādi pesakārabhaṇḍañca bhastādi cammakārabhaṇḍañca kasibhaṇḍañca yuganaṅgalādi saṅghikaṃ saṅghasantakaṃ garubhaṇḍanti yojanā.
2889. ‘‘ததே²வா’’தி இமினா ‘‘ஸங்கி⁴க’’ந்தி இத³ங் பச்சாமஸதி. ஆதா⁴ரகோதி பத்தாதா⁴ரோ. தாலவண்டந்தி தாலவண்டேஹி கதங். வேளுத³ந்தவிலீவேஹி வா மோரபிஞ்சே²ஹி வா சம்மவிகதீஹி வா கதம்பி தங்ஸதி³ஸங் ‘‘தாலவண்ட’’ந்தேவ வுச்சதி. வட்டவிதூ⁴பனானங் தாலவண்டேயேவ அந்தோக³த⁴த்தா ‘‘பீ³ஜனீ’’தி சதுரஸ்ஸவிதூ⁴பனஞ்ச கேதகபாரோஹகுந்தாலபண்ணாதி³மயத³ந்தமயவிஸாணமயத³ண்ட³கமகஸபீ³ஜனீ ச வுச்சதி. பச்சி² பாகடாயேவ. பச்சி²தோ கு²த்³த³கோ தாலபண்ணாதி³மயோ பா⁴ஜனவிஸேஸோ சங்கோடகங். ஸப்³பா³ ஸம்மஜ்ஜனீதி நாளிகேரஹீராதீ³ஹி ப³த்³தா⁴ யட்டி²ஸம்மஜ்ஜனீ, முட்டி²ஸம்மஜ்ஜனீதி து³விதா⁴ பரிவேணங்க³ணாதி³ஸம்மஜ்ஜனீ ச ததே²வ து³விதா⁴ க²ஜ்ஜூரினாளிகேரபண்ணாதீ³ஹி ப³த்³தா⁴ கே³ஹஸம்மஜ்ஜனீ சாதி ஸப்³பா³பி ஸம்மஜ்ஜனீ க³ருப⁴ண்ட³ங் ஹோதி.
2889.‘‘Tathevā’’ti iminā ‘‘saṅghika’’nti idaṃ paccāmasati. Ādhārakoti pattādhāro. Tālavaṇṭanti tālavaṇṭehi kataṃ. Veḷudantavilīvehi vā morapiñchehi vā cammavikatīhi vā katampi taṃsadisaṃ ‘‘tālavaṇṭa’’nteva vuccati. Vaṭṭavidhūpanānaṃ tālavaṇṭeyeva antogadhattā ‘‘bījanī’’ti caturassavidhūpanañca ketakapārohakuntālapaṇṇādimayadantamayavisāṇamayadaṇḍakamakasabījanī ca vuccati. Pacchi pākaṭāyeva. Pacchito khuddako tālapaṇṇādimayo bhājanaviseso caṅkoṭakaṃ. Sabbā sammajjanīti nāḷikerahīrādīhi baddhā yaṭṭhisammajjanī, muṭṭhisammajjanīti duvidhā pariveṇaṅgaṇādisammajjanī ca tatheva duvidhā khajjūrināḷikerapaṇṇādīhi baddhā gehasammajjanī cāti sabbāpi sammajjanī garubhaṇḍaṃ hoti.
2890. சக்கயுத்தகயானந்தி ஹத்த²வட்டகஸகடாதி³யுத்தயானஞ்ச.
2890.Cakkayuttakayānanti hatthavaṭṭakasakaṭādiyuttayānañca.
2891. ச²த்தந்தி பண்ணகிலஞ்ஜஸேதச்ச²த்தவஸேன திவித⁴ங் ச²த்தங். முட்டி²பண்ணந்தி தாலபண்ணங் ஸந்தா⁴ய வுத்தங். விஸாணபா⁴ஜனஞ்ச தும்ப³பா⁴ஜனஞ்சாதி விக்³க³ஹோ, ஏகதே³ஸஸரூபேகஸேஸோ, கா³தா²ப³ந்த⁴வஸேன நிக்³க³ஹிதாக³மோ ச. விஸாணமயங், பா⁴ஜனங் தும்ப³மயங் பா⁴ஜனஞ்சாதி அத்தோ². இத⁴ ‘‘பாத³க³ண்ஹனகதோ அதிரித்தப்பமாண’’ந்தி ஸேஸோ. அரணீ அரணிஸஹிதங். ஆதி³-ஸத்³தே³ன ஆமலகதும்ப³ங் அனுஞ்ஞாதவாஸியா த³ண்ட³ஞ்ச ஸங்க³ண்ஹாதி. லஹு அக³ருப⁴ண்ட³ங், பா⁴ஜனீயந்தி அத்தோ². பாத³க³ண்ஹனகதோ அதிரித்தப்பமாணங் க³ருப⁴ண்ட³ங்.
2891.Chattanti paṇṇakilañjasetacchattavasena tividhaṃ chattaṃ. Muṭṭhipaṇṇanti tālapaṇṇaṃ sandhāya vuttaṃ. Visāṇabhājanañca tumbabhājanañcāti viggaho, ekadesasarūpekaseso, gāthābandhavasena niggahitāgamo ca. Visāṇamayaṃ, bhājanaṃ tumbamayaṃ bhājanañcāti attho. Idha ‘‘pādagaṇhanakato atirittappamāṇa’’nti seso. Araṇī araṇisahitaṃ. Ādi-saddena āmalakatumbaṃ anuññātavāsiyā daṇḍañca saṅgaṇhāti. Lahu agarubhaṇḍaṃ, bhājanīyanti attho. Pādagaṇhanakato atirittappamāṇaṃ garubhaṇḍaṃ.
2892. விஸாணந்தி கோ³விஸாணாதி³ யங் கிஞ்சி விஸாணங். அதச்சி²தங் யதா²க³தமேவ பா⁴ஜனீயங். அனிட்டி²தங் மஞ்சபாதா³தி³ யங் கிஞ்சி பா⁴ஜனீயந்தி யோஜனா. யதா²ஹ – ‘‘மஞ்சபாதோ³ மஞ்சஅடனீ பீட²பாதோ³ பீட²அடனீ வாஸிப²ரஸுஆதீ³னங் த³ண்டோ³தி ஏதேஸு யங் கிஞ்சி விப்பகததச்ச²னகம்மங் அனிட்டி²தமேவ பா⁴ஜனீயங், தச்சி²தமட்ட²ங் பன க³ருப⁴ண்ட³ங் ஹோதீ’’தி (சூளவ॰ அட்ட²॰ 321).
2892.Visāṇanti govisāṇādi yaṃ kiñci visāṇaṃ. Atacchitaṃ yathāgatameva bhājanīyaṃ. Aniṭṭhitaṃ mañcapādādi yaṃ kiñci bhājanīyanti yojanā. Yathāha – ‘‘mañcapādo mañcaaṭanī pīṭhapādo pīṭhaaṭanī vāsipharasuādīnaṃ daṇḍoti etesu yaṃ kiñci vippakatatacchanakammaṃ aniṭṭhitameva bhājanīyaṃ, tacchitamaṭṭhaṃ pana garubhaṇḍaṃ hotī’’ti (cūḷava. aṭṭha. 321).
2893. நிட்டி²தோ தச்சி²தோ வாபீதி தச்சி²தனிட்டி²தோபி. விதோ⁴தி காயப³ந்த⁴னே அனுஞ்ஞாதவிதோ⁴. ஹிங்கு³கரண்ட³கோதி ஹிங்கு³மயோ வா ததா³தா⁴ரோ வா கரண்ட³கோ. அஞ்ஜனீதி அஞ்ஜனநாளிகா ச அஞ்ஜனகரண்ட³கோ ச. ஸலாகாயோதி அஞ்ஜனிஸலாகா. உத³புஞ்ச²னீதி ஹத்தி²த³ந்தவிஸாணாதி³மயா உத³கபுஞ்ச²னீ. இத³ங் ஸப்³ப³ங் பா⁴ஜனீயமேவ.
2893.Niṭṭhito tacchito vāpīti tacchitaniṭṭhitopi. Vidhoti kāyabandhane anuññātavidho. Hiṅgukaraṇḍakoti hiṅgumayo vā tadādhāro vā karaṇḍako. Añjanīti añjananāḷikā ca añjanakaraṇḍako ca. Salākāyoti añjanisalākā. Udapuñchanīti hatthidantavisāṇādimayā udakapuñchanī. Idaṃ sabbaṃ bhājanīyameva.
2894. பரிபோ⁴கா³ரஹந்தி மனுஸ்ஸானங் உபபோ⁴க³பரிபோ⁴க³யொக்³க³ங். குலாலப⁴ண்ட³ந்தி க⁴டபிட²ராதி³கும்ப⁴காரப⁴ண்ட³ம்பி. பத்தங்கா³ரகடாஹந்தி பத்தகடாஹங், அங்கா³ரகடாஹஞ்ச. தூ⁴மதா³னங் நாளிகா. கபல்லிகாதி தீ³பகபல்லிகா.
2894.Paribhogārahanti manussānaṃ upabhogaparibhogayoggaṃ. Kulālabhaṇḍanti ghaṭapiṭharādikumbhakārabhaṇḍampi. Pattaṅgārakaṭāhanti pattakaṭāhaṃ, aṅgārakaṭāhañca. Dhūmadānaṃ nāḷikā. Kapallikāti dīpakapallikā.
2895. து²பிகாதி பாஸாதா³தி³து²பிகா. தீ³பருக்கோ²தி பதீ³பாதா⁴ரோ. சயனச்ச²த³னிட்ட²காதி பாகாரசேதியாதீ³னங் சயனிட்ட²கா ச கே³ஹாதீ³னங் ச²த³னிட்ட²கா ச. ஸப்³ப³ம்பீதி யதா²வுத்தங் ஸப்³ப³ம்பி அனவஸேஸங் பரிக்கா²ரங்.
2895.Thupikāti pāsādādithupikā. Dīparukkhoti padīpādhāro. Cayanacchadaniṭṭhakāti pākāracetiyādīnaṃ cayaniṭṭhakā ca gehādīnaṃ chadaniṭṭhakā ca. Sabbampīti yathāvuttaṃ sabbampi anavasesaṃ parikkhāraṃ.
2896. கஞ்சனகோதி ஸரகோ. க⁴டகோதி பாத³க³ண்ஹனகதோ அனதிரித்தப்பமாணோ க⁴டகோ. ‘‘யதா² ச மத்திகாப⁴ண்டே³, ஏவங் லோஹப⁴ண்டே³பி குண்டி³கா பா⁴ஜனீயகொட்டா²ஸமேவ ப⁴ஜதீ’’தி (சூளவ॰ அட்ட²॰ 321) அட்ட²கதா²னயங் ஸங்க³ஹேதுமாஹ ‘‘லோஹப⁴ண்டே³பி குண்டி³காபி ச பா⁴ஜியா’’தி.
2896.Kañcanakoti sarako. Ghaṭakoti pādagaṇhanakato anatirittappamāṇo ghaṭako. ‘‘Yathā ca mattikābhaṇḍe, evaṃ lohabhaṇḍepi kuṇḍikā bhājanīyakoṭṭhāsameva bhajatī’’ti (cūḷava. aṭṭha. 321) aṭṭhakathānayaṃ saṅgahetumāha ‘‘lohabhaṇḍepi kuṇḍikāpi ca bhājiyā’’ti.
2897. க³ரு நாம பச்சி²மங் க³ருப⁴ண்ட³த்தயங். தா²வரங் நாம புரிமத்³வயங். ஸங்க⁴ஸ்ஸாதி ஸங்கே⁴ன. பரிவத்தெத்வாதி புக்³க³லிகாதீ³ஹி தாதி³ஸேஹி தேஹி பரிவத்தெத்வா. தத்ராயங் பரிவத்தனநயோ (சூளவ॰ அட்ட²॰ 321) – ஸங்க⁴ஸ்ஸ நாளிகேராராமோ தூ³ரே ஹோதி, கப்பியகாரகா தங் ப³ஹுதரங் கா²த³ந்தி, ததோ ஸகடவேதனங் த³த்வா அப்பமேவ ஆஹரந்தி, அஞ்ஞேஸங் பன தஸ்ஸ ஆராமஸ்ஸ அவிதூ³ரகா³மவாஸீனங் மனுஸ்ஸானங் விஹாரஸ்ஸ ஸமீபே ஆராமோ ஹோதி, தே ஸங்க⁴ங் உபஸங்கமித்வா ஸகேன ஆராமேன தங் ஆராமங் யாசந்தி, ஸங்கே⁴ன ‘‘ருச்சதி ஸங்க⁴ஸ்ஸா’’தி அபலோகெத்வா ஸம்படிச்சி²தப்³போ³. ஸசேபி பி⁴க்கூ²னங் ருக்க²ஸஹஸ்ஸங் ஹோதி, மனுஸ்ஸானங் பஞ்சஸதானி, ‘‘நனு தும்ஹாகங் ஆராமோ கு²த்³த³கோ’’தி ந வத்தப்³ப³ங். கிஞ்சாபி ஹி அயங் கு²த்³த³கோ, அத² கோ² இதரதோ ப³ஹுதரங் ஆயங் தே³தி. ஸசேபி ஸமகமேவ தே³தி, ஏவம்பி இச்சி²திச்சி²தக்க²ணே பரிபு⁴ஞ்ஜிதுங் ஸக்காதி க³ஹேதப்³ப³மேவ.
2897.Garu nāma pacchimaṃ garubhaṇḍattayaṃ. Thāvaraṃ nāma purimadvayaṃ. Saṅghassāti saṅghena. Parivattetvāti puggalikādīhi tādisehi tehi parivattetvā. Tatrāyaṃ parivattananayo (cūḷava. aṭṭha. 321) – saṅghassa nāḷikerārāmo dūre hoti, kappiyakārakā taṃ bahutaraṃ khādanti, tato sakaṭavetanaṃ datvā appameva āharanti, aññesaṃ pana tassa ārāmassa avidūragāmavāsīnaṃ manussānaṃ vihārassa samīpe ārāmo hoti, te saṅghaṃ upasaṅkamitvā sakena ārāmena taṃ ārāmaṃ yācanti, saṅghena ‘‘ruccati saṅghassā’’ti apaloketvā sampaṭicchitabbo. Sacepi bhikkhūnaṃ rukkhasahassaṃ hoti, manussānaṃ pañcasatāni, ‘‘nanu tumhākaṃ ārāmo khuddako’’ti na vattabbaṃ. Kiñcāpi hi ayaṃ khuddako, atha kho itarato bahutaraṃ āyaṃ deti. Sacepi samakameva deti, evampi icchiticchitakkhaṇe paribhuñjituṃ sakkāti gahetabbameva.
ஸசே பன மனுஸ்ஸானங் ப³ஹுதரா ருக்கா² ஹொந்தி, ‘‘நனு தும்ஹாகங் ப³ஹுதரா ருக்கா²’’தி வத்தப்³ப³ங். ஸசே ‘‘அதிரேகங் அம்ஹாகங் புஞ்ஞங் ஹோது, ஸங்க⁴ஸ்ஸ தே³மா’’தி வத³ந்தி, ஜானாபெத்வா ஸம்படிச்சி²துங் வட்டதி. பி⁴க்கூ²னங் ருக்கா² ப²லதா⁴ரினோ, மனுஸ்ஸானங் ருக்கா² ந தாவ ப²லங் க³ண்ஹந்தி. கிஞ்சாபி ந க³ண்ஹந்தி, ந சிரஸ்ஸேவ க³ண்ஹிஸ்ஸந்தீதி ஸம்படிச்சி²தப்³ப³மேவ. மனுஸ்ஸானங் ருக்கா² ப²லதா⁴ரினோ, பி⁴க்கூ²னங் ந தாவ ப²லங் க³ண்ஹந்தி. ‘‘நனு தும்ஹாகங் ருக்கா² ப²லதா⁴ரினோ’’தி வத்தப்³ப³ங். ஸசே ‘‘க³ண்ஹத², ப⁴ந்தே, அம்ஹாகங் புஞ்ஞங் ப⁴விஸ்ஸதீ’’தி வத³ந்தி, ஜானாபெத்வா ஸம்படிச்சி²துங் வட்டதி. ஏவங் ஆராமேன ஆராமோ பரிவத்தேதப்³போ³. ஏதேனேவ நயேன ஆராமவத்து²பி விஹாரோபி விஹாரவத்து²பி ஆராமேன பரிவத்தேதப்³ப³ங். ஆராமவத்து²னா ச மஹந்தேன வா கு²த்³த³கேன வா ஆராமஆராமவத்து²விஹாரவிஹாரவத்தூ²னி.
Sace pana manussānaṃ bahutarā rukkhā honti, ‘‘nanu tumhākaṃ bahutarā rukkhā’’ti vattabbaṃ. Sace ‘‘atirekaṃ amhākaṃ puññaṃ hotu, saṅghassa demā’’ti vadanti, jānāpetvā sampaṭicchituṃ vaṭṭati. Bhikkhūnaṃ rukkhā phaladhārino, manussānaṃ rukkhā na tāva phalaṃ gaṇhanti. Kiñcāpi na gaṇhanti, na cirasseva gaṇhissantīti sampaṭicchitabbameva. Manussānaṃ rukkhā phaladhārino, bhikkhūnaṃ na tāva phalaṃ gaṇhanti. ‘‘Nanu tumhākaṃ rukkhā phaladhārino’’ti vattabbaṃ. Sace ‘‘gaṇhatha, bhante, amhākaṃ puññaṃ bhavissatī’’ti vadanti, jānāpetvā sampaṭicchituṃ vaṭṭati. Evaṃ ārāmena ārāmo parivattetabbo. Eteneva nayena ārāmavatthupi vihāropi vihāravatthupi ārāmena parivattetabbaṃ. Ārāmavatthunā ca mahantena vā khuddakena vā ārāmaārāmavatthuvihāravihāravatthūni.
கத²ங் விஹாரேன விஹாரோ பரிவத்தேதப்³போ³? ஸங்க⁴ஸ்ஸ அந்தோகா³மே கே³ஹங் ஹோதி, மனுஸ்ஸானங் விஹாரமஜ்ஜே² பாஸாதோ³, உபோ⁴பி அக்³கே⁴ன ஸமகா, ஸசே மனுஸ்ஸா தேன பாஸாதே³ன தங் கே³ஹங் யாசந்தி, ஸம்படிச்சி²துங் வட்டதி. பி⁴க்கூ²னங் சே மஹக்³க⁴தரங் கே³ஹங் ஹோதி, ‘‘மஹக்³க⁴தரங் அம்ஹாகங் கே³ஹ’’ந்தி வுத்தே ச ‘‘கிஞ்சாபி மஹக்³க⁴தரங், பப்³ப³ஜிதானங் பன அஸாருப்பங், ந ஸக்கா தத்த² பப்³ப³ஜிதேஹி வஸிதுங், இத³ங் பன ஸாருப்பங், க³ண்ஹதா²’’தி வத³ந்தி, ஏவம்பி ஸம்படிச்சி²துங் வட்டதி. ஸசே பன மனுஸ்ஸானங் மஹக்³க⁴ங் ஹோதி, ‘‘நனு தும்ஹாகங் கே³ஹங் மஹக்³க⁴’’ந்தி வத்தப்³ப³ங். ‘‘ஹோது, ப⁴ந்தே, அம்ஹாகங் புஞ்ஞங் ப⁴விஸ்ஸதி, க³ண்ஹதா²’’தி வுத்தே பன ஸம்படிச்சி²துங் வட்டதி. ஏவங் விஹாரேன விஹாரோ பரிவத்தேதப்³போ³. ஏதேனேவ நயேன விஹாரவத்து²பி ஆராமோபி ஆராமவத்து²பி விஹாரேன பரிவத்தேதப்³ப³ங். விஹாரவத்து²னா ச மஹக்³கே⁴ன வா அப்பக்³கே⁴ன வா விஹாரவிஹாரவத்து²ஆராமஆராமவத்தூ²னி. ஏவங் தாவ தா²வரேன தா²வரபரிவத்தனங் வேதி³தப்³ப³ங்.
Kathaṃ vihārena vihāro parivattetabbo? Saṅghassa antogāme gehaṃ hoti, manussānaṃ vihāramajjhe pāsādo, ubhopi agghena samakā, sace manussā tena pāsādena taṃ gehaṃ yācanti, sampaṭicchituṃ vaṭṭati. Bhikkhūnaṃ ce mahagghataraṃ gehaṃ hoti, ‘‘mahagghataraṃ amhākaṃ geha’’nti vutte ca ‘‘kiñcāpi mahagghataraṃ, pabbajitānaṃ pana asāruppaṃ, na sakkā tattha pabbajitehi vasituṃ, idaṃ pana sāruppaṃ, gaṇhathā’’ti vadanti, evampi sampaṭicchituṃ vaṭṭati. Sace pana manussānaṃ mahagghaṃ hoti, ‘‘nanu tumhākaṃ gehaṃ mahaggha’’nti vattabbaṃ. ‘‘Hotu, bhante, amhākaṃ puññaṃ bhavissati, gaṇhathā’’ti vutte pana sampaṭicchituṃ vaṭṭati. Evaṃ vihārena vihāro parivattetabbo. Eteneva nayena vihāravatthupi ārāmopi ārāmavatthupi vihārena parivattetabbaṃ. Vihāravatthunā ca mahagghena vā appagghena vā vihāravihāravatthuārāmaārāmavatthūni. Evaṃ tāva thāvarena thāvaraparivattanaṃ veditabbaṃ.
க³ருப⁴ண்டே³ன க³ருப⁴ண்ட³பரிவத்தனே பன மஞ்சபீட²ங் மஹந்தங் வா ஹோது கு²த்³த³கங் வா, அந்தமஸோ சதுரங்கு³லபாத³கங் கா³மதா³ரகேஹி பங்ஸ்வாகா³ரகேஸு கீளந்தேஹி கதம்பி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ங் ஹோதி. ஸசேபி ராஜராஜமஹாமத்தாத³யோ ஏகப்பஹாரேனேவ மஞ்சஸதங் வா மஞ்சஸஹஸ்ஸங் வா தெ³ந்தி, ஸப்³பே³ கப்பியமஞ்சா ஸம்படிச்சி²தப்³பா³, ஸம்படிச்சி²த்வா வுட்³ட⁴படிபாடியா ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³பா³, புக்³க³லிகவஸேன ந தா³தப்³பா³. அதிரேகமஞ்சே ப⁴ண்டா³கா³ராதீ³ஸு பஞ்ஞபெத்வா பத்தசீவரங் நிக்கி²பிதும்பி வட்டதி.
Garubhaṇḍena garubhaṇḍaparivattane pana mañcapīṭhaṃ mahantaṃ vā hotu khuddakaṃ vā, antamaso caturaṅgulapādakaṃ gāmadārakehi paṃsvāgārakesu kīḷantehi katampi saṅghassa dinnakālato paṭṭhāya garubhaṇḍaṃ hoti. Sacepi rājarājamahāmattādayo ekappahāreneva mañcasataṃ vā mañcasahassaṃ vā denti, sabbe kappiyamañcā sampaṭicchitabbā, sampaṭicchitvā vuḍḍhapaṭipāṭiyā ‘‘saṅghikaparibhogena paribhuñjathā’’ti dātabbā, puggalikavasena na dātabbā. Atirekamañce bhaṇḍāgārādīsu paññapetvā pattacīvaraṃ nikkhipitumpi vaṭṭati.
ப³ஹிஸீமாய ‘‘ஸங்க⁴ஸ்ஸ தே³மா’’தி தி³ன்னமஞ்சோ ஸங்க⁴த்தே²ரஸ்ஸ வஸனட்டா²னே தா³தப்³போ³. தத்த² சே ப³ஹூ மஞ்சா ஹொந்தி, மஞ்சேன கம்மங் நத்தி², யஸ்ஸ வஸனட்டா²னே கம்மங் அத்தி², தத்த² ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³போ³. மஹக்³கே⁴ன ஸதக்³க⁴னகேன, ஸஹஸ்ஸக்³க⁴னகேன வா மஞ்சேன அஞ்ஞங் மஞ்சஸதங் லப⁴தி, பரிவத்தெத்வா க³ஹேதப்³ப³ங். ந கேவலங் மஞ்சேன மஞ்சோயேவ, ஆராமஆராமவத்து²விஹாரவிஹாரவத்து²பீட²பி⁴ஸிபி³ம்போ³ஹனானிபி பரிவத்தேதுங் வட்டந்தி. ஏஸ நயோ பீட²பி⁴ஸிபி³ம்போ³ஹனேஸுபி ஏதேஸு ஹி கப்பியாகப்பியங் வுத்தனயமேவ. தத்த² அகப்பியங் ந பரிபு⁴ஞ்ஜிதப்³ப³ங், கப்பியங் ஸங்கி⁴கபரிபோ⁴கே³ன பரிபு⁴ஞ்ஜிதப்³ப³ங். அகப்பியங் வா மஹக்³க⁴ங் கப்பியங் வா பரிவத்தெத்வா வுத்தவத்தூ²னி க³ஹேதப்³பா³னி, அக³ருப⁴ண்டு³பக³ங் பன பி⁴ஸிபி³ம்போ³ஹனங் நாம நத்தீ²தி.
Bahisīmāya ‘‘saṅghassa demā’’ti dinnamañco saṅghattherassa vasanaṭṭhāne dātabbo. Tattha ce bahū mañcā honti, mañcena kammaṃ natthi, yassa vasanaṭṭhāne kammaṃ atthi, tattha ‘‘saṅghikaparibhogena paribhuñjathā’’ti dātabbo. Mahagghena satagghanakena, sahassagghanakena vā mañcena aññaṃ mañcasataṃ labhati, parivattetvā gahetabbaṃ. Na kevalaṃ mañcena mañcoyeva, ārāmaārāmavatthuvihāravihāravatthupīṭhabhisibimbohanānipi parivattetuṃ vaṭṭanti. Esa nayo pīṭhabhisibimbohanesupi etesu hi kappiyākappiyaṃ vuttanayameva. Tattha akappiyaṃ na paribhuñjitabbaṃ, kappiyaṃ saṅghikaparibhogena paribhuñjitabbaṃ. Akappiyaṃ vā mahagghaṃ kappiyaṃ vā parivattetvā vuttavatthūni gahetabbāni, agarubhaṇḍupagaṃ pana bhisibimbohanaṃ nāma natthīti.
2898. பி⁴க்கு² அதோ⁴தேன பாதே³ன, அல்லபாதே³ன வா ஸேனாஸனங் நக்கமேதி ஸம்ப³ந்தோ⁴. ஸயந்தி எத்த², ஆஸந்தி சாதி ஸயனாஸனங், பரிகம்மகதபூ⁴மத்த²ரணாதி³. அல்லபாதே³ன வாதி யேன அக்கந்தட்டா²னே உத³கங் பஞ்ஞாயதி, ஏவரூபேன திந்தபாதே³ன. யதா²ஹ – ‘‘அல்லேஹி பாதே³ஹீதி யேஹி அக்கந்தட்டா²னே உத³கங் பஞ்ஞாயதி, ஏவரூபேஹி பாதே³ஹி பரிப⁴ண்ட³கதபூ⁴மி வா ஸேனாஸனங் வா ந அக்கமிதப்³ப³ங். ஸசே பன உத³கஸினேஹமத்தமேவ பஞ்ஞாயதி, ந உத³கங், வட்டதீ’’தி (சூளவ॰ அட்ட²॰ 324). ஸஉபாஹனோதி எத்த² ‘‘தோ⁴தபாத³க’’ந்தி வத்தப்³ப³ங். பாதே³ படிமுக்காஹி உபாஹனாஹி ஸஉபாஹனோ பி⁴க்கு² தோ⁴தபாத³கங் தோ⁴தபாதே³ஹி அக்கமிதப்³ப³ட்டா²னங் ததே²வ ந அக்கமேதி யோஜனா.
2898. Bhikkhu adhotena pādena, allapādena vā senāsanaṃ nakkameti sambandho. Sayanti ettha, āsanti cāti sayanāsanaṃ, parikammakatabhūmattharaṇādi. Allapādena vāti yena akkantaṭṭhāne udakaṃ paññāyati, evarūpena tintapādena. Yathāha – ‘‘allehi pādehīti yehi akkantaṭṭhāne udakaṃ paññāyati, evarūpehi pādehi paribhaṇḍakatabhūmi vā senāsanaṃ vā na akkamitabbaṃ. Sace pana udakasinehamattameva paññāyati, na udakaṃ, vaṭṭatī’’ti (cūḷava. aṭṭha. 324). Saupāhanoti ettha ‘‘dhotapādaka’’nti vattabbaṃ. Pāde paṭimukkāhi upāhanāhi saupāhano bhikkhu dhotapādakaṃ dhotapādehi akkamitabbaṭṭhānaṃ tatheva na akkameti yojanā.
2899. பரிகம்மகதாயாதி ஸுதா⁴தி³பரிகம்மகதாய. நிட்டு²ப⁴ந்தஸ்ஸாதி கே²ளங் பாதெந்தஸ்ஸ. பரிகம்மகதங் பி⁴த்திந்தி ஸேதபி⁴த்திங் வா சித்தகம்மகதங் வா பி⁴த்திங். ந கேவலஞ்ச பி⁴த்திமேவ, த்³வாரம்பி வாதபானம்பி அபஸ்ஸேனப²லகம்பி பாஸாணத்த²ம்ப⁴ம்பி ருக்க²த்த²ம்ப⁴ம்பி சீவரேன வா கேனசி வா அப்படிச்சா²தெ³த்வா அபஸ்ஸயிதுங் ந லப⁴தியேவ. ‘‘த்³வாரவாதபானாத³யோ பன அபரிகம்மகதாபி அபடிச்சா²தெ³த்வா ந அபஸ்ஸயிதப்³பா³’’தி க³ண்டி²பதே³ வுத்தங்.
2899.Parikammakatāyāti sudhādiparikammakatāya. Niṭṭhubhantassāti kheḷaṃ pātentassa. Parikammakataṃ bhittinti setabhittiṃ vā cittakammakataṃ vā bhittiṃ. Na kevalañca bhittimeva, dvārampi vātapānampi apassenaphalakampi pāsāṇatthambhampi rukkhatthambhampi cīvarena vā kenaci vā appaṭicchādetvā apassayituṃ na labhatiyeva. ‘‘Dvāravātapānādayo pana aparikammakatāpi apaṭicchādetvā na apassayitabbā’’ti gaṇṭhipade vuttaṃ.
2901. நித்³தா³யதோ தஸ்ஸ கோசி ஸரீராவயவோ பச்சத்த²ரணே ஸங்குடிதே ஸஹஸா யதி³ மஞ்சங் பு²ஸதி, து³க்கடந்தி யோஜனா.
2901. Niddāyato tassa koci sarīrāvayavo paccattharaṇe saṅkuṭite sahasā yadi mañcaṃ phusati, dukkaṭanti yojanā.
2902. லோமேஸு மஞ்சங் பு²ஸந்தேஸு. ஹத்த²பாதா³னங் தலேன அக்கமிதுங் வட்டதீதி யோஜனா. மஞ்சபீட²ங் நீஹரந்தஸ்ஸ காயே படிஹஞ்ஞதி, அனாபத்தி.
2902.Lomesu mañcaṃ phusantesu. Hatthapādānaṃ talena akkamituṃ vaṭṭatīti yojanā. Mañcapīṭhaṃ nīharantassa kāye paṭihaññati, anāpatti.
‘‘தா³யகேஹி ‘காயேன பு²ஸித்வா யதா²ஸுக²ங் பரிபு⁴ஞ்ஜதா²’தி தி³ன்னஸேனாஸனங், மஞ்சபீடா²தி³ஞ்ச தா³யகேன வுத்தனியாமேன பரிபு⁴ஞ்ஜந்தஸ்ஸ தோ³ஸோ நத்தீ²’’தி மாதிகட்ட²கதா²ய ஸீஹளக³ண்டி²பதே³ வுத்தத்தா ததா² பரிபு⁴ஞ்ஜந்தஸ்ஸ அனாபத்தி. ‘‘இமங் மஞ்சபீடா²தி³ங் ஸங்க⁴ஸ்ஸ த³ம்மீ’’தி வுத்தே க³ருப⁴ண்ட³ங் ஹோதி, ந பா⁴ஜேதப்³ப³ங் ஸங்க⁴ஸ்ஸ பராமட்ட²த்தா. ‘‘இமங் மஞ்சபீடா²தி³ங் ப⁴த³ந்தானங் வஸ்ஸக்³கே³ன க³ண்ஹிதுங் த³ம்மீ’’தி வுத்தே ஸதிபி க³ருப⁴ண்ட³பா⁴வே கப்பியவத்து²ங் பா⁴ஜெத்வா க³ண்ஹிதுங் வட்டதி, அகப்பியப⁴ண்ட³மேவ பா⁴ஜெத்வா க³ஹேதுங் ந லப்³ப⁴தி. ‘‘இமங் மஞ்சபீட²ங் வஸ்ஸக்³கே³ன க³ஹேதுங் ஸங்க⁴ஸ்ஸ த³ம்மீ’’தி வுத்தே வஸ்ஸக்³கே³ன பா⁴ஜெத்வா க³ஹேதப்³ப³ங் வஸ்ஸக்³கே³ன பா⁴ஜனங் பட²மங் வத்வா பச்சா² ஸங்க⁴ஸ்ஸ பராமட்ட²த்தா. ‘‘ஸங்க⁴ஸ்ஸ இமங் மஞ்சபீட²ங் வஸ்ஸக்³கே³ன க³ண்ஹிதுங் த³ம்மீ’’தி வுத்தே பன க³ருப⁴ண்ட³ங் ஹோதி பட²மங் ஸங்க⁴ஸ்ஸ பராமட்ட²த்தாதி அயம்பி விஸேஸோ மாதிகட்ட²கதா² க³ண்டி²பதே³யேவ வுத்தோ.
‘‘Dāyakehi ‘kāyena phusitvā yathāsukhaṃ paribhuñjathā’ti dinnasenāsanaṃ, mañcapīṭhādiñca dāyakena vuttaniyāmena paribhuñjantassa doso natthī’’ti mātikaṭṭhakathāya sīhaḷagaṇṭhipade vuttattā tathā paribhuñjantassa anāpatti. ‘‘Imaṃ mañcapīṭhādiṃ saṅghassa dammī’’ti vutte garubhaṇḍaṃ hoti, na bhājetabbaṃ saṅghassa parāmaṭṭhattā. ‘‘Imaṃ mañcapīṭhādiṃ bhadantānaṃ vassaggena gaṇhituṃ dammī’’ti vutte satipi garubhaṇḍabhāve kappiyavatthuṃ bhājetvā gaṇhituṃ vaṭṭati, akappiyabhaṇḍameva bhājetvā gahetuṃ na labbhati. ‘‘Imaṃ mañcapīṭhaṃ vassaggena gahetuṃ saṅghassa dammī’’ti vutte vassaggena bhājetvā gahetabbaṃ vassaggena bhājanaṃ paṭhamaṃ vatvā pacchā saṅghassa parāmaṭṭhattā. ‘‘Saṅghassa imaṃ mañcapīṭhaṃ vassaggena gaṇhituṃ dammī’’ti vutte pana garubhaṇḍaṃ hoti paṭhamaṃ saṅghassa parāmaṭṭhattāti ayampi viseso mātikaṭṭhakathā gaṇṭhipadeyeva vutto.
2903-4. உத்³தே³ஸப⁴த்தவினிச்ச²யேகதே³ஸங் த³ஸ்ஸேதுமாஹ ‘‘ஸஹஸ்ஸக்³க⁴னகோ’’திஆதி³. ஸஹஸ்ஸக்³க⁴னகோ ஸசீவரோ பிண்ட³பாதோ அவஸ்ஸிகங் பி⁴க்கு²ங் பத்தோ, தஸ்மிங் விஹாரே ச ‘‘ஏவரூபோ பிண்ட³பாதோ அவஸ்ஸிகங் பி⁴க்கு²ங் பத்தோ’’தி லிகி²த்வா ட²பிதோபி ச ஹோதி, ததோ ஸட்டி²வஸ்ஸானமச்சயே தாதி³ஸோ ஸஹஸ்ஸக்³க⁴னகோ ஸசீவரோ கோசி பிண்ட³பாதோ ஸசே உப்பன்னோ ஹோதி, தங் பிண்ட³பாதங் பு³தோ⁴ வினிச்ச²யகுஸலோ பி⁴க்கு² அவஸ்ஸிகட்டி²திகாய அத³த்வா ஸட்டி²வஸ்ஸிகட்டி²திகாய த³தெ³ய்யாதி யோஜனா.
2903-4. Uddesabhattavinicchayekadesaṃ dassetumāha ‘‘sahassagghanako’’tiādi. Sahassagghanako sacīvaro piṇḍapāto avassikaṃ bhikkhuṃ patto, tasmiṃ vihāre ca ‘‘evarūpo piṇḍapāto avassikaṃ bhikkhuṃ patto’’ti likhitvā ṭhapitopi ca hoti, tato saṭṭhivassānamaccaye tādiso sahassagghanako sacīvaro koci piṇḍapāto sace uppanno hoti, taṃ piṇḍapātaṃ budho vinicchayakusalo bhikkhu avassikaṭṭhitikāya adatvā saṭṭhivassikaṭṭhitikāya dadeyyāti yojanā.
2905. உத்³தே³ஸப⁴த்தங் பு⁴ஞ்ஜித்வாதி உபஸம்பன்னகாலே அத்தனோ வஸ்ஸக்³கே³ன பத்தங் உத்³தே³ஸப⁴த்தங் பரிபு⁴ஞ்ஜித்வா. ஜாதோ சே ஸாமணேரகோதி ஸிக்கா²பச்சக்கா²னாதி³வஸேன ஸசே ஸாமணேரோ ஜாதோ. தந்தி உபஸம்பன்னகாலே க³ஹிதங் ததே³வ உத்³தே³ஸப⁴த்தங். ஸாமணேரஸ்ஸ பாளியாதி ஸாமணேரபடிபாடியா அத்தனோ பத்தங் பச்சா² க³ஹேதுங் லப⁴தி.
2905.Uddesabhattaṃ bhuñjitvāti upasampannakāle attano vassaggena pattaṃ uddesabhattaṃ paribhuñjitvā. Jāto ce sāmaṇerakoti sikkhāpaccakkhānādivasena sace sāmaṇero jāto. Tanti upasampannakāle gahitaṃ tadeva uddesabhattaṃ. Sāmaṇerassa pāḷiyāti sāmaṇerapaṭipāṭiyā attano pattaṃ pacchā gahetuṃ labhati.
2906. யோ ஸாமணேரோ ஸம்புண்ணவீஸதிவஸ்ஸோ ‘‘ஸ்வே உத்³தே³ஸங் லபி⁴ஸ்ஸதீ’’தி வத்தப்³போ³, அஜ்ஜ ஸோ உபஸம்பன்னோ ஹோதி, டி²திகா அதீதா ஸியாதி யோஜனா, ஸ்வே பாபேதப்³பா³ ஸாமணேரட்டி²திகா அஜ்ஜ உபஸம்பன்னத்தா அதிக்கந்தா ஹோதீதி அத்தோ², தங் ப⁴த்தங் ந லப⁴தீதி வுத்தங் ஹோதி.
2906.Yo sāmaṇero sampuṇṇavīsativasso ‘‘sve uddesaṃ labhissatī’’ti vattabbo, ajja so upasampanno hoti, ṭhitikā atītā siyāti yojanā, sve pāpetabbā sāmaṇeraṭṭhitikā ajja upasampannattā atikkantā hotīti attho, taṃ bhattaṃ na labhatīti vuttaṃ hoti.
2907. உத்³தே³ஸப⁴த்தானந்தரங் ஸலாகப⁴த்தங் த³ஸ்ஸேதுமாஹ ‘‘ஸசே பனா’’திஆதி³. ஸசே ஸலாகா லத்³தா⁴, தங்தி³னே ப⁴த்தங் ந லத்³த⁴ங், புனதி³னே தஸ்ஸ ப⁴த்தங் க³ஹேதப்³ப³ங், ந ஸங்ஸயோ ‘‘க³ஹேதப்³ப³ங் நு கோ², ந க³ஹேதப்³ப³’’ந்தி ஏவங் ஸங்ஸயோ ந காதப்³போ³தி யோஜனா.
2907. Uddesabhattānantaraṃ salākabhattaṃ dassetumāha ‘‘sace panā’’tiādi. Sace salākā laddhā, taṃdine bhattaṃ na laddhaṃ, punadine tassa bhattaṃ gahetabbaṃ, na saṃsayo ‘‘gahetabbaṃ nu kho, na gahetabba’’nti evaṃ saṃsayo na kātabboti yojanā.
2908. உத்தரி உத்தரங் அதிரேகங் ப⁴ங்க³ங் ப்³யஞ்ஜனங் ஏதஸ்ஸாதி உத்தரிப⁴ங்க³ங், தஸ்ஸ, அதிரேகப்³யஞ்ஜனஸ்ஸாதி அத்தோ². ஏகசரஸ்ஸாதி ஏகசாரிகஸ்ஸ. ஸலாகாயேவ ஸலாகிகா.
2908. Uttari uttaraṃ atirekaṃ bhaṅgaṃ byañjanaṃ etassāti uttaribhaṅgaṃ, tassa, atirekabyañjanassāti attho. Ekacarassāti ekacārikassa. Salākāyeva salākikā.
2909. உத்தரிப⁴ங்க³மேவ உத்தரிப⁴ங்க³கங்.
2909. Uttaribhaṅgameva uttaribhaṅgakaṃ.
2910. யேன யேன ஹீதி கா³ஹிதஸலாகேன யேன யேன பி⁴க்கு²னா. யங் யந்தி ப⁴த்தப்³யஞ்ஜனேஸு யங் யங் ப⁴த்தங் வா யங் யங் ப்³யஞ்ஜனங் வா.
2910.Yena yena hīti gāhitasalākena yena yena bhikkhunā. Yaṃ yanti bhattabyañjanesu yaṃ yaṃ bhattaṃ vā yaṃ yaṃ byañjanaṃ vā.
2911. ஸங்கு⁴த்³தே³ஸாதி³கந்தி ஸங்க⁴ப⁴த்தஉத்³தே³ஸப⁴த்தாதி³கங். ஆதி³-ஸத்³தே³ன நிமந்தனங், ஸலாகங், பக்கி²கங், உபோஸதி²கங், பாடிபதி³கந்தி பஞ்ச ப⁴த்தானி க³ஹிதானி.
2911.Saṅghuddesādikanti saṅghabhattauddesabhattādikaṃ. Ādi-saddena nimantanaṃ, salākaṃ, pakkhikaṃ, uposathikaṃ, pāṭipadikanti pañca bhattāni gahitāni.
தத்த² ஸப்³ப³ஸங்க⁴ஸ்ஸ தி³ன்னங் ஸங்க⁴ப⁴த்தங் நாம. ‘‘ஸங்க⁴தோ எத்தகே பி⁴க்கூ² உத்³தி³ஸித்வா தே³தா²’’திஆதி³னா வத்வா தி³ன்னங் உத்³தே³ஸப⁴த்தங். ‘‘ஸங்க⁴தோ எத்தகானங் பி⁴க்கூ²னங் ப⁴த்தங் க³ண்ஹதா²’’திஆதி³னா வத்வா தி³ன்னங் நிமந்தனங் நாம. அத்தனோ அத்தனோ நாமேன ஸலாககா³ஹகானங் பி⁴க்கூ²னங் தி³ன்னங் ஸலாகப⁴த்தங் நாம. சாதுத்³த³ஸியங் தி³ன்னங் பக்கி²கங். உபோஸதே² தி³ன்னங் உபோஸதி²கங். பாடிபதே³ தி³ன்னங் பாடிபதி³கங். தங்தங்னாமேன தி³ன்னமேவ ததா² ததா² வோஹரீயதி. ஏதேஸங் பன வித்தா²ரகதா² ‘‘அபி⁴லக்கி²தேஸூ’’திஆதி³னா (சூளவ॰ அட்ட²॰ 325 பக்கி²கப⁴த்தாதி³கதா²) அட்ட²கதா²யங் வுத்தனயேன வேதி³தப்³பா³. ஆக³ந்துகாதீ³தி எத்த² ஆதி³-ஸத்³தே³ன க³மிகப⁴த்தங், கி³லானப⁴த்தங், கி³லானுபட்டா²கப⁴த்தந்தி தீணி க³ஹிதானி. ஆக³ந்துகானங் தி³ன்னங் ப⁴த்தங் ஆக³ந்துகப⁴த்தங். ஏஸேவ நயோ ஸேஸேஸு.
Tattha sabbasaṅghassa dinnaṃ saṅghabhattaṃ nāma. ‘‘Saṅghato ettake bhikkhū uddisitvā dethā’’tiādinā vatvā dinnaṃ uddesabhattaṃ. ‘‘Saṅghato ettakānaṃ bhikkhūnaṃ bhattaṃ gaṇhathā’’tiādinā vatvā dinnaṃ nimantanaṃ nāma. Attano attano nāmena salākagāhakānaṃ bhikkhūnaṃ dinnaṃ salākabhattaṃ nāma. Cātuddasiyaṃ dinnaṃ pakkhikaṃ. Uposathe dinnaṃ uposathikaṃ. Pāṭipade dinnaṃ pāṭipadikaṃ. Taṃtaṃnāmena dinnameva tathā tathā voharīyati. Etesaṃ pana vitthārakathā ‘‘abhilakkhitesū’’tiādinā (cūḷava. aṭṭha. 325 pakkhikabhattādikathā) aṭṭhakathāyaṃ vuttanayena veditabbā. Āgantukādīti ettha ādi-saddena gamikabhattaṃ, gilānabhattaṃ, gilānupaṭṭhākabhattanti tīṇi gahitāni. Āgantukānaṃ dinnaṃ bhattaṃ āgantukabhattaṃ. Eseva nayo sesesu.
2912. விஹாரந்தி விஹாரப⁴த்தங் உத்தரபத³லோபேன, விஹாரே தத்ருப்பாத³ப⁴த்தஸ்ஸேதங் அதி⁴வசனங். வாரப⁴த்தந்தி து³ப்³பி⁴க்க²ஸமயே ‘‘வாரேன பி⁴க்கூ² ஜக்³கி³ஸ்ஸாமா’’தி து⁴ரகே³ஹதோ பட்டா²ய தி³ன்னங். நிச்சந்தி நிச்சப⁴த்தங் உத்தரபத³லோபேன, தஞ்ச ததா² வத்வாவ தி³ன்னங். குடிப⁴த்தங் நாம ஸங்க⁴ஸ்ஸ ஆவாஸங் கத்வா ‘‘அம்ஹாகங் ஸேனாஸனவாஸினோ அம்ஹாகங் ப⁴த்தங் க³ண்ஹந்தூ’’தி தி³ன்னங். பன்னரஸவித⁴ங் ஸப்³ப³மேவ ப⁴த்தங் இத⁴ இமஸ்மிங் ஸேனாஸனக்க²ந்த⁴கே உத்³தி³ட்ட²ங் கதி²தங். ஏதேஸங் வித்தா²ரவினிச்ச²யோ அத்தி²கேஹி ஸமந்தபாஸாதி³காய க³ஹேதப்³போ³.
2912.Vihāranti vihārabhattaṃ uttarapadalopena, vihāre tatruppādabhattassetaṃ adhivacanaṃ. Vārabhattanti dubbhikkhasamaye ‘‘vārena bhikkhū jaggissāmā’’ti dhuragehato paṭṭhāya dinnaṃ. Niccanti niccabhattaṃ uttarapadalopena, tañca tathā vatvāva dinnaṃ. Kuṭibhattaṃ nāma saṅghassa āvāsaṃ katvā ‘‘amhākaṃ senāsanavāsino amhākaṃ bhattaṃ gaṇhantū’’ti dinnaṃ. Pannarasavidhaṃ sabbameva bhattaṃ idha imasmiṃ senāsanakkhandhake uddiṭṭhaṃ kathitaṃ. Etesaṃ vitthāravinicchayo atthikehi samantapāsādikāya gahetabbo.
2913. பச்சயபா⁴ஜனே மிச்சா²படிபத்தியா மஹாதீ³னவத்தா அப்பமத்தேனேவ படிபஜ்ஜிதப்³ப³ந்தி பச்சயபா⁴ஜனகங் அனுஸாஸந்தோ ஆஹ ‘‘பாளி’’ந்திஆதி³.
2913. Paccayabhājane micchāpaṭipattiyā mahādīnavattā appamatteneva paṭipajjitabbanti paccayabhājanakaṃ anusāsanto āha ‘‘pāḷi’’ntiādi.
ஸேனாஸனக்க²ந்த⁴ககதா²வண்ணனா.
Senāsanakkhandhakakathāvaṇṇanā.
