| Library / Tipiṭaka / ತಿಪಿಟಕ • Tipiṭaka / ಪೇತವತ್ಥು-ಅಟ್ಠಕಥಾ • Petavatthu-aṭṭhakathā |
೧೫. ಸೇಟ್ಠಿಪುತ್ತಪೇತವತ್ಥುವಣ್ಣನಾ
15. Seṭṭhiputtapetavatthuvaṇṇanā
ಸಟ್ಠಿವಸ್ಸಸಹಸ್ಸಾನೀತಿ ಇದಂ ಸೇಟ್ಠಿಪುತ್ತಪೇತವತ್ಥು। ತಸ್ಸ ಕಾ ಉಪ್ಪತ್ತಿ? ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ। ತೇನ ಖೋ ಪನ ಸಮಯೇನ ರಾಜಾ ಪಸೇನದಿ ಕೋಸಲೋ ಅಲಙ್ಕತಪ್ಪಟಿಯತ್ತೋ ಹತ್ಥಿಕ್ಖನ್ಧವರಗತೋ ಮಹತಿಯಾ ರಾಜಿದ್ಧಿಯಾ ಮಹನ್ತೇನ ರಾಜಾನುಭಾವೇನ ನಗರಂ ಅನುಸಞ್ಚರನ್ತೋ ಅಞ್ಞತರಸ್ಮಿಂ ಗೇಹೇ ಉಪರಿಪಾಸಾದೇ ವಾತಪಾನಂ ವಿವರಿತ್ವಾ ತಂ ರಾಜವಿಭೂತಿಂ ಓಲೋಕೇನ್ತಿಂ ರೂಪಸಮ್ಪತ್ತಿಯಾ ದೇವಚ್ಛರಾಪಟಿಭಾಗಂ ಏಕಂ ಇತ್ಥಿಂ ದಿಸ್ವಾ ಅದಿಟ್ಠಪುಬ್ಬೇ ಆರಮ್ಮಣೇ ಸಹಸಾ ಸಮುಪ್ಪನ್ನೇನ ಕಿಲೇಸಸಮುದಾಚಾರೇನ ಪರಿಯುಟ್ಠಿತಚಿತ್ತೋ ಸತಿಪಿ ಕುಲರೂಪಾಚಾರಾದಿಗುಣವಿಸೇಸಸಮ್ಪನ್ನೇ ಅನ್ತೇಪುರಜನೇ ಸಭಾವಲಹುಕಸ್ಸ ಪನ ದುದ್ದಮಸ್ಸ ಚಿತ್ತಸ್ಸ ವಸೇನ ತಸ್ಸಂ ಇತ್ಥಿಯಂ ಪಟಿಬದ್ಧಮಾನಸೋ ಹುತ್ವಾ ಪಚ್ಛಾಸನೇ ನಿಸಿನ್ನಸ್ಸ ಪುರಿಸಸ್ಸ ‘‘ಇಮಂ ಪಾಸಾದಂ ಇಮಞ್ಚ ಇತ್ಥಿಂ ಉಪಧಾರೇಹೀ’’ತಿ ಸಞ್ಞಂ ದತ್ವಾ ರಾಜಗೇಹಂ ಪವಿಟ್ಠೋ। ಅಞ್ಞಂ ಸಬ್ಬಂ ಅಮ್ಬಸಕ್ಕರಪೇತವತ್ಥುಮ್ಹಿ ಆಗತನಯೇನೇವ ವೇದಿತಬ್ಬಂ।
Saṭṭhivassasahassānīti idaṃ seṭṭhiputtapetavatthu. Tassa kā uppatti? Bhagavā sāvatthiyaṃ viharati jetavane. Tena kho pana samayena rājā pasenadi kosalo alaṅkatappaṭiyatto hatthikkhandhavaragato mahatiyā rājiddhiyā mahantena rājānubhāvena nagaraṃ anusañcaranto aññatarasmiṃ gehe uparipāsāde vātapānaṃ vivaritvā taṃ rājavibhūtiṃ olokentiṃ rūpasampattiyā devaccharāpaṭibhāgaṃ ekaṃ itthiṃ disvā adiṭṭhapubbe ārammaṇe sahasā samuppannena kilesasamudācārena pariyuṭṭhitacitto satipi kularūpācārādiguṇavisesasampanne antepurajane sabhāvalahukassa pana duddamassa cittassa vasena tassaṃ itthiyaṃ paṭibaddhamānaso hutvā pacchāsane nisinnassa purisassa ‘‘imaṃ pāsādaṃ imañca itthiṃ upadhārehī’’ti saññaṃ datvā rājagehaṃ paviṭṭho. Aññaṃ sabbaṃ ambasakkarapetavatthumhi āgatanayeneva veditabbaṃ.
ಅಯಂ ಪನ ವಿಸೇಸೋ – ಇಧ ಪುರಿಸೋ ಸೂರಿಯೇ ಅನತ್ಥಙ್ಗತೇಯೇವ ಆಗನ್ತ್ವಾ ನಗರದ್ವಾರೇ ಥಕಿತೇ ಅತ್ತನಾ ಆನೀತಂ ಅರುಣವಣ್ಣಮತ್ತಿಕಂ ಉಪ್ಪಲಾನಿ ಚ ನಗರದ್ವಾರಕವಾಟೇ ಲಗ್ಗೇತ್ವಾ ನಿಪಜ್ಜಿತುಂ ಜೇತವನಂ ಅಗಮಾಸಿ। ರಾಜಾ ಪನ ಸಿರಿಸಯನೇ ವಾಸೂಪಗತೋ ಮಜ್ಝಿಮಯಾಮೇ ಸ-ಇತಿ ನ-ಇತಿ ದು-ಇತಿ ಸೋ-ಇತಿ ಚ ಇಮಾನಿ ಚತ್ತಾರಿ ಅಕ್ಖರಾನಿ ಮಹತಾ ಕಣ್ಠೇನ ಉಚ್ಚಾರಿತಾನಿ ವಿಯ ವಿಸ್ಸರವಸೇನ ಅಸ್ಸೋಸಿ। ತಾನಿ ಕಿರ ಅತೀತೇ ಕಾಲೇ ಸಾವತ್ಥಿವಾಸೀಹಿ ಚತೂಹಿ ಸೇಟ್ಠಿಪುತ್ತೇಹಿ ಭೋಗಮದಮತ್ತೇಹಿ ಯೋಬ್ಬನಕಾಲೇ ಪಾರದಾರಿಕಕಮ್ಮವಸೇನ ಬಹುಂ ಅಪುಞ್ಞಂ ಪಸವೇತ್ವಾ ಅಪರಭಾಗೇ ಕಾಲಂ ಕತ್ವಾ ತಸ್ಸೇವ ನಗರಸ್ಸ ಸಮೀಪೇ ಲೋಹಕುಮ್ಭಿಯಂ ನಿಬ್ಬತ್ತಿತ್ವಾ ಪಚ್ಚಮಾನೇಹಿ ಲೋಹಕುಮ್ಭಿಯಾ ಮುಖವಟ್ಟಿಂ ಪತ್ವಾ ಏಕೇಕಂ ಗಾಥಂ ವತ್ಥುಕಾಮೇಹಿ ಉಚ್ಚಾರಿತಾನಂ ತಾಸಂ ಗಾಥಾನಂ ಆದಿಅಕ್ಖರಾನಿ , ತೇ ಪಠಮಕ್ಖರಮೇವ ವತ್ವಾ ವೇದನಾಪ್ಪತ್ತಾ ಹುತ್ವಾ ಲೋಹಕುಮ್ಭಿಂ ಓತರಿಂಸು।
Ayaṃ pana viseso – idha puriso sūriye anatthaṅgateyeva āgantvā nagaradvāre thakite attanā ānītaṃ aruṇavaṇṇamattikaṃ uppalāni ca nagaradvārakavāṭe laggetvā nipajjituṃ jetavanaṃ agamāsi. Rājā pana sirisayane vāsūpagato majjhimayāme sa-iti na-iti du-iti so-iti ca imāni cattāri akkharāni mahatā kaṇṭhena uccāritāni viya vissaravasena assosi. Tāni kira atīte kāle sāvatthivāsīhi catūhi seṭṭhiputtehi bhogamadamattehi yobbanakāle pāradārikakammavasena bahuṃ apuññaṃ pasavetvā aparabhāge kālaṃ katvā tasseva nagarassa samīpe lohakumbhiyaṃ nibbattitvā paccamānehi lohakumbhiyā mukhavaṭṭiṃ patvā ekekaṃ gāthaṃ vatthukāmehi uccāritānaṃ tāsaṃ gāthānaṃ ādiakkharāni , te paṭhamakkharameva vatvā vedanāppattā hutvā lohakumbhiṃ otariṃsu.
ರಾಜಾ ಪನ ತಂ ಸದ್ದಂ ಸುತ್ವಾ ಭೀತತಸಿತೋ ಸಂವಿಗ್ಗೋ ಲೋಮಹಟ್ಠಜಾತೋ ತಂ ರತ್ತಾವಸೇಸಂ ದುಕ್ಖೇನ ವೀತಿನಾಮೇತ್ವಾ ವಿಭಾತಾಯ ರತ್ತಿಯಾ ಪುರೋಹಿತಂ ಪಕ್ಕೋಸಾಪೇತ್ವಾ ತಂ ಪವತ್ತಿಂ ಕಥೇಸಿ। ಪುರೋಹಿತೋ ರಾಜಾನಂ ಭೀತತಸಿತಂ ಞತ್ವಾ ಲಾಭಗಿದ್ಧೋ ‘‘ಉಪ್ಪನ್ನೋ ಖೋ ಅಯಂ ಮಯ್ಹಂ ಬ್ರಾಹ್ಮಣಾನಞ್ಚ ಲಾಭುಪ್ಪಾದನುಪಾಯೋ’’ತಿ ಚಿನ್ತೇತ್ವಾ ‘‘ಮಹಾರಾಜ, ಮಹಾ ವತಾಯಂ ಉಪದ್ದವೋ ಉಪ್ಪನ್ನೋ, ಸಬ್ಬಚತುಕ್ಕಂ ಯಞ್ಞಂ ಯಜಾಹೀ’’ತಿ ಆಹ। ರಾಜಾ ತಸ್ಸ ವಚನಂ ಸುತ್ವಾ ಅಮಚ್ಚೇ ಆಣಾಪೇಸಿ ‘‘ಸಬ್ಬಚತುಕ್ಕಯಞ್ಞಸ್ಸ ಉಪಕರಣಾನಿ ಸಜ್ಜೇಥಾ’’ತಿ। ತಂ ಸುತ್ವಾ ಮಲ್ಲಿಕಾ ದೇವೀ ರಾಜಾನಂ ಏವಮಾಹ – ‘‘ಕಸ್ಮಾ, ಮಹಾರಾಜ, ಬ್ರಾಹ್ಮಣಸ್ಸ ವಚನಂ ಸುತ್ವಾ ಅನೇಕಪಾಣವಧಹಿಂಸನಕಕಿಚ್ಚಂ ಕಾತುಕಾಮೋಸಿ, ನನು ಸಬ್ಬತ್ಥ ಅಪ್ಪಟಿಹತಞಾಣಚಾರೋ ಭಗವಾ ಪುಚ್ಛಿತಬ್ಬೋ? ಯಥಾ ಚ ತೇ ಭಗವಾ ಬ್ಯಾಕರಿಸ್ಸತಿ, ತಥಾ ಪಟಿಪಜ್ಜಿತಬ್ಬ’’ನ್ತಿ। ರಾಜಾ ತಸ್ಸಾ ವಚನಂ ಸುತ್ವಾ ಸತ್ಥು ಸನ್ತಿಕಂ ಗನ್ತ್ವಾ ತಂ ಪವತ್ತಿಂ ಭಗವತೋ ಆರೋಚೇಸಿ। ಭಗವಾ ‘‘ನ, ಮಹಾರಾಜ, ತತೋನಿದಾನಂ ತುಯ್ಹಂ ಕೋಚಿ ಅನ್ತರಾಯೋ’’ತಿ ವತ್ವಾ ಆದಿತೋ ಪಟ್ಠಾಯ ತೇಸಂ ಲೋಹಕುಮ್ಭಿನಿರಯೇ ನಿಬ್ಬತ್ತಸತ್ತಾನಂ ಪವತ್ತಿಂ ಕಥೇತ್ವಾ ತೇಹಿ ಪಚ್ಚೇಕಂ ಉಚ್ಚಾರೇತುಂ ಆರದ್ಧಗಾಥಾಯೋ –
Rājā pana taṃ saddaṃ sutvā bhītatasito saṃviggo lomahaṭṭhajāto taṃ rattāvasesaṃ dukkhena vītināmetvā vibhātāya rattiyā purohitaṃ pakkosāpetvā taṃ pavattiṃ kathesi. Purohito rājānaṃ bhītatasitaṃ ñatvā lābhagiddho ‘‘uppanno kho ayaṃ mayhaṃ brāhmaṇānañca lābhuppādanupāyo’’ti cintetvā ‘‘mahārāja, mahā vatāyaṃ upaddavo uppanno, sabbacatukkaṃ yaññaṃ yajāhī’’ti āha. Rājā tassa vacanaṃ sutvā amacce āṇāpesi ‘‘sabbacatukkayaññassa upakaraṇāni sajjethā’’ti. Taṃ sutvā mallikā devī rājānaṃ evamāha – ‘‘kasmā, mahārāja, brāhmaṇassa vacanaṃ sutvā anekapāṇavadhahiṃsanakakiccaṃ kātukāmosi, nanu sabbattha appaṭihatañāṇacāro bhagavā pucchitabbo? Yathā ca te bhagavā byākarissati, tathā paṭipajjitabba’’nti. Rājā tassā vacanaṃ sutvā satthu santikaṃ gantvā taṃ pavattiṃ bhagavato ārocesi. Bhagavā ‘‘na, mahārāja, tatonidānaṃ tuyhaṃ koci antarāyo’’ti vatvā ādito paṭṭhāya tesaṃ lohakumbhiniraye nibbattasattānaṃ pavattiṃ kathetvā tehi paccekaṃ uccāretuṃ āraddhagāthāyo –
೮೦೨.
802.
‘‘ಸಟ್ಠಿವಸ್ಸಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ।
‘‘Saṭṭhivassasahassāni, paripuṇṇāni sabbaso;
ನಿರಯೇ ಪಚ್ಚಮಾನಾನಂ, ಕದಾ ಅನ್ತೋ ಭವಿಸ್ಸತಿ॥
Niraye paccamānānaṃ, kadā anto bhavissati.
೮೦೩.
803.
‘‘ನತ್ಥಿ ಅನ್ತೋ ಕುತೋ ಅನ್ತೋ, ನ ಅನ್ತೋ ಪಟಿದಿಸ್ಸತಿ।
‘‘Natthi anto kuto anto, na anto paṭidissati;
ತಥಾ ಹಿ ಪಕತಂ ಪಾಪಂ, ತುಯ್ಹಂ ಮಯ್ಹಞ್ಚ ಮಾರಿಸಾ॥
Tathā hi pakataṃ pāpaṃ, tuyhaṃ mayhañca mārisā.
೮೦೪.
804.
‘‘ದುಜ್ಜೀವಿತಮಜೀವಿಮ್ಹ, ಯೇ ಸನ್ತೇ ನ ದದಮ್ಹಸೇ।
‘‘Dujjīvitamajīvimha, ye sante na dadamhase;
ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ॥
Santesu deyyadhammesu, dīpaṃ nākamha attano.
೮೦೫.
805.
‘‘ಸೋಹಂ ನೂನ ಇತೋ ಗನ್ತ್ವಾ, ಯೋನಿಂ ಲದ್ಧಾನ ಮಾನುಸಿಂ।
‘‘Sohaṃ nūna ito gantvā, yoniṃ laddhāna mānusiṃ;
ವದಞ್ಞೂ ಸೀಲಸಮ್ಪನ್ನೋ, ಕಾಹಾಮಿ ಕುಸಲಂ ಬಹು’’ನ್ತಿ॥ –
Vadaññū sīlasampanno, kāhāmi kusalaṃ bahu’’nti. –
ಪರಿಪುಣ್ಣಂ ಕತ್ವಾ ಕಥೇಸಿ।
Paripuṇṇaṃ katvā kathesi.
೮೦೨. ತತ್ಥ ಸಟ್ಠಿವಸ್ಸಸಹಸ್ಸಾನೀತಿ ವಸ್ಸಾನಂ ಸಟ್ಠಿಸಹಸ್ಸಾನಿ। ತಸ್ಮಿಂ ಕಿರ ಲೋಹಕುಮ್ಭಿನಿರಯೇ ನಿಬ್ಬತ್ತಸತ್ತೋ ಅಧೋ ಓಗಚ್ಛನ್ತೋ ತಿಂಸಾಯ ವಸ್ಸಸಹಸ್ಸೇಹಿ ಹೇಟ್ಠಿಮತಲಂ ಪಾಪುಣಾತಿ, ತತೋ ಉದ್ಧಂ ಉಗ್ಗಚ್ಛನ್ತೋಪಿ ತಿಂಸಾಯ ಏವ ವಸ್ಸಸಹಸ್ಸೇಹಿ ಮುಖವಟ್ಟಿಪದೇಸಂ ಪಾಪುಣಾತಿ, ತಾಯ ಸಞ್ಞಾಯ ಸೋ ‘‘ಸಟ್ಠಿವಸ್ಸಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ’’ತಿ ಗಾಥಂ ವತ್ತುಕಾಮೋ ಸ-ಇತಿ ವತ್ವಾ ಅಧಿಮತ್ತವೇದನಾಪ್ಪತ್ತೋ ಹುತ್ವಾ ಅಧೋಮುಖೋ ಪತಿ। ಭಗವಾ ಪನ ತಂ ರಞ್ಞೋ ಪರಿಪುಣ್ಣಂ ಕತ್ವಾ ಕಥೇಸಿ। ಏಸ ನಯೋ ಸೇಸಗಾಥಾಸುಪಿ। ತತ್ಥ ಕದಾ ಅನ್ತೋ ಭವಿಸ್ಸತೀತಿ ಲೋಹಕುಮ್ಭಿನಿರಯೇ ಪಚ್ಚಮಾನಾನಂ ಅಮ್ಹಾಕಂ ಕದಾ ನು ಖೋ ಇಮಸ್ಸ ದುಕ್ಖಸ್ಸ ಅನ್ತೋ ಪರಿಯೋಸಾನಂ ಭವಿಸ್ಸತಿ।
802. Tattha saṭṭhivassasahassānīti vassānaṃ saṭṭhisahassāni. Tasmiṃ kira lohakumbhiniraye nibbattasatto adho ogacchanto tiṃsāya vassasahassehi heṭṭhimatalaṃ pāpuṇāti, tato uddhaṃ uggacchantopi tiṃsāya eva vassasahassehi mukhavaṭṭipadesaṃ pāpuṇāti, tāya saññāya so ‘‘saṭṭhivassasahassāni, paripuṇṇāni sabbaso’’ti gāthaṃ vattukāmo sa-iti vatvā adhimattavedanāppatto hutvā adhomukho pati. Bhagavā pana taṃ rañño paripuṇṇaṃ katvā kathesi. Esa nayo sesagāthāsupi. Tattha kadā anto bhavissatīti lohakumbhiniraye paccamānānaṃ amhākaṃ kadā nu kho imassa dukkhassa anto pariyosānaṃ bhavissati.
೮೦೩. ತಥಾ ಹೀತಿ ಯಥಾ ತುಯ್ಹಂ ಮಯ್ಹಞ್ಚ ಇಮಸ್ಸ ದುಕ್ಖಸ್ಸ ನತ್ಥಿ ಅನ್ತೋ, ನ ಅನ್ತೋ ಪಟಿದಿಸ್ಸತಿ, ತಥಾ ತೇನ ಪಕಾರೇನ ಪಾಪಕಂ ಕಮ್ಮಂ ಪಕತಂ ತಯಾ ಮಯಾ ಚಾತಿ ವಿಭತ್ತಿಂ ವಿಪರಿಣಾಮೇತ್ವಾ ವತ್ತಬ್ಬಂ।
803.Tathā hīti yathā tuyhaṃ mayhañca imassa dukkhassa natthi anto, na anto paṭidissati, tathā tena pakārena pāpakaṃ kammaṃ pakataṃ tayā mayā cāti vibhattiṃ vipariṇāmetvā vattabbaṃ.
೮೦೪. ದುಜ್ಜೀವಿತನ್ತಿ ವಿಞ್ಞೂಹಿ ಗರಹಿತಬ್ಬಂ ಜೀವಿತಂ। ಯೇ ಸನ್ತೇತಿ ಯೇ ಮಯಂ ಸನ್ತೇ ವಿಜ್ಜಮಾನೇ ದೇಯ್ಯಧಮ್ಮೇ। ನ ದದಮ್ಹಸೇತಿ ನ ಅದಮ್ಹ। ವುತ್ತಮೇವತ್ಥಂ ಪಾಕಟತರಂ ಕಾತುಂ ‘‘ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ’’ತಿ ವುತ್ತಂ।
804.Dujjīvitanti viññūhi garahitabbaṃ jīvitaṃ. Ye santeti ye mayaṃ sante vijjamāne deyyadhamme. Na dadamhaseti na adamha. Vuttamevatthaṃ pākaṭataraṃ kātuṃ ‘‘santesu deyyadhammesu, dīpaṃ nākamha attano’’ti vuttaṃ.
೮೦೫. ಸೋಹನ್ತಿ ಸೋ ಅಹಂ। ನೂನಾತಿ ಪರಿವಿತಕ್ಕೇ ನಿಪಾತೋ। ಇತೋತಿ ಇಮಸ್ಮಾ ಲೋಹಕುಮ್ಭಿನಿರಯಾ। ಗನ್ತ್ವಾತಿ ಅಪಗನ್ತ್ವಾ। ಯೋನಿಂ ಲದ್ಧಾನ ಮಾನುಸಿನ್ತಿ ಮನುಸ್ಸಯೋನಿಂ ಮನುಸ್ಸತ್ತಭಾವಂ ಲಭಿತ್ವಾ। ವದಞ್ಞೂತಿ ಪರಿಚ್ಚಾಗಸೀಲೋ, ಯಾಚಕಾನಂ ವಾ ವಚನಞ್ಞೂ। ಸೀಲಸಮ್ಪನ್ನೋತಿ ಸೀಲಾಚಾರಸಮ್ಪನ್ನೋ। ಕಾಹಾಮಿ ಕುಸಲಂ ಬಹುನ್ತಿ ಪುಬ್ಬೇ ವಿಯ ಪಮಾದಂ ಅನಾಪಜ್ಜಿತ್ವಾ ಬಹುಂ ಪಹೂತಂ ಕುಸಲಂ ಪುಞ್ಞಕಮ್ಮಂ ಕರಿಸ್ಸಾಮಿ, ಉಪಚಿನಿಸ್ಸಾಮೀತಿ ಅತ್ಥೋ।
805.Sohanti so ahaṃ. Nūnāti parivitakke nipāto. Itoti imasmā lohakumbhinirayā. Gantvāti apagantvā. Yoniṃ laddhāna mānusinti manussayoniṃ manussattabhāvaṃ labhitvā. Vadaññūti pariccāgasīlo, yācakānaṃ vā vacanaññū. Sīlasampannoti sīlācārasampanno. Kāhāmi kusalaṃ bahunti pubbe viya pamādaṃ anāpajjitvā bahuṃ pahūtaṃ kusalaṃ puññakammaṃ karissāmi, upacinissāmīti attho.
ಸತ್ಥಾ ಇಮಾ ಗಾಥಾಯೋ ವತ್ವಾ ವಿತ್ಥಾರೇನ ಧಮ್ಮಂ ದೇಸೇಸಿ, ದೇಸನಾಪರಿಯೋಸಾನೇ ಮತ್ತಿಕಾರತ್ತುಪ್ಪಲಹಾರಕೋ ಪುರಿಸೋ ಸೋತಾಪತ್ತಿಫಲೇ ಪತಿಟ್ಠಹಿ। ರಾಜಾ ಸಞ್ಜಾತಸಂವೇಗೋ ಪರಪರಿಗ್ಗಹೇ ಅಭಿಜ್ಝಂ ಪಹಾಯ ಸದಾರಸನ್ತುಟ್ಠೋ ಅಹೋಸೀತಿ।
Satthā imā gāthāyo vatvā vitthārena dhammaṃ desesi, desanāpariyosāne mattikārattuppalahārako puriso sotāpattiphale patiṭṭhahi. Rājā sañjātasaṃvego parapariggahe abhijjhaṃ pahāya sadārasantuṭṭho ahosīti.
ಸೇಟ್ಠಿಪುತ್ತಪೇತವತ್ಥುವಣ್ಣನಾ ನಿಟ್ಠಿತಾ।
Seṭṭhiputtapetavatthuvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಪೇತವತ್ಥುಪಾಳಿ • Petavatthupāḷi / ೧೫. ಸೇಟ್ಠಿಪುತ್ತಪೇತವತ್ಥು • 15. Seṭṭhiputtapetavatthu
