| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಸೇಯ್ಯಾಸುತ್ತಂ
4. Seyyāsuttaṃ
೨೪೬. ‘‘ಚತಸ್ಸೋ ಇಮಾ, ಭಿಕ್ಖವೇ, ಸೇಯ್ಯಾ। ಕತಮಾ ಚತಸ್ಸೋ? ಪೇತಸೇಯ್ಯಾ, ಕಾಮಭೋಗಿಸೇಯ್ಯಾ , ಸೀಹಸೇಯ್ಯಾ, ತಥಾಗತಸೇಯ್ಯಾ। ಕತಮಾ ಚ, ಭಿಕ್ಖವೇ, ಪೇತಸೇಯ್ಯಾ? ಯೇಭುಯ್ಯೇನ, ಭಿಕ್ಖವೇ, ಪೇತಾ ಉತ್ತಾನಾ ಸೇನ್ತಿ; ಅಯಂ ವುಚ್ಚತಿ, ಭಿಕ್ಖವೇ, ಪೇತಸೇಯ್ಯಾ।
246. ‘‘Catasso imā, bhikkhave, seyyā. Katamā catasso? Petaseyyā, kāmabhogiseyyā , sīhaseyyā, tathāgataseyyā. Katamā ca, bhikkhave, petaseyyā? Yebhuyyena, bhikkhave, petā uttānā senti; ayaṃ vuccati, bhikkhave, petaseyyā.
‘‘ಕತಮಾ ಚ, ಭಿಕ್ಖವೇ, ಕಾಮಭೋಗಿಸೇಯ್ಯಾ? ಯೇಭುಯ್ಯೇನ, ಭಿಕ್ಖವೇ, ಕಾಮಭೋಗೀ ವಾಮೇನ ಪಸ್ಸೇನ ಸೇನ್ತಿ; ಅಯಂ ವುಚ್ಚತಿ, ಭಿಕ್ಖವೇ, ಕಾಮಭೋಗಿಸೇಯ್ಯಾ।
‘‘Katamā ca, bhikkhave, kāmabhogiseyyā? Yebhuyyena, bhikkhave, kāmabhogī vāmena passena senti; ayaṃ vuccati, bhikkhave, kāmabhogiseyyā.
‘‘ಕತಮಾ ಚ, ಭಿಕ್ಖವೇ, ಸೀಹಸೇಯ್ಯಾ? ಸೀಹೋ , ಭಿಕ್ಖವೇ, ಮಿಗರಾಜಾ ದಕ್ಖಿಣೇನ ಪಸ್ಸೇನ ಸೇಯ್ಯಂ ಕಪ್ಪೇತಿ, ಪಾದೇ ಪಾದಂ ಅಚ್ಚಾಧಾಯ, ಅನ್ತರಸತ್ಥಿಮ್ಹಿ ನಙ್ಗುಟ್ಠಂ ಅನುಪಕ್ಖಿಪಿತ್ವಾ। ಸೋ ಪಟಿಬುಜ್ಝಿತ್ವಾ ಪುರಿಮಂ ಕಾಯಂ ಅಬ್ಭುನ್ನಾಮೇತ್ವಾ ಪಚ್ಛಿಮಂ ಕಾಯಂ ಅನುವಿಲೋಕೇತಿ। ಸಚೇ, ಭಿಕ್ಖವೇ, ಸೀಹೋ ಮಿಗರಾಜಾ ಕಿಞ್ಚಿ ಪಸ್ಸತಿ ಕಾಯಸ್ಸ ವಿಕ್ಖಿತ್ತಂ ವಾ ವಿಸಟಂ ವಾ, ತೇನ, ಭಿಕ್ಖವೇ, ಸೀಹೋ ಮಿಗರಾಜಾ ಅನತ್ತಮನೋ ಹೋತಿ। ಸಚೇ ಪನ, ಭಿಕ್ಖವೇ, ಸೀಹೋ ಮಿಗರಾಜಾ ನ ಕಿಞ್ಚಿ ಪಸ್ಸತಿ ಕಾಯಸ್ಸ ವಿಕ್ಖಿತ್ತಂ ವಾ ವಿಸಟಂ ವಾ, ತೇನ , ಭಿಕ್ಖವೇ, ಸೀಹೋ ಮಿಗರಾಜಾ ಅತ್ತಮನೋ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ಸೀಹಸೇಯ್ಯಾ।
‘‘Katamā ca, bhikkhave, sīhaseyyā? Sīho , bhikkhave, migarājā dakkhiṇena passena seyyaṃ kappeti, pāde pādaṃ accādhāya, antarasatthimhi naṅguṭṭhaṃ anupakkhipitvā. So paṭibujjhitvā purimaṃ kāyaṃ abbhunnāmetvā pacchimaṃ kāyaṃ anuviloketi. Sace, bhikkhave, sīho migarājā kiñci passati kāyassa vikkhittaṃ vā visaṭaṃ vā, tena, bhikkhave, sīho migarājā anattamano hoti. Sace pana, bhikkhave, sīho migarājā na kiñci passati kāyassa vikkhittaṃ vā visaṭaṃ vā, tena , bhikkhave, sīho migarājā attamano hoti. Ayaṃ vuccati, bhikkhave, sīhaseyyā.
‘‘ಕತಮಾ ಚ, ಭಿಕ್ಖವೇ, ತಥಾಗತಸೇಯ್ಯಾ? ಇಧ, ಭಿಕ್ಖವೇ, ತಥಾಗತೋ ವಿವಿಚ್ಚೇವ ಕಾಮೇಹಿ…ಪೇ॰… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ। ಅಯಂ ವುಚ್ಚತಿ, ಭಿಕ್ಖವೇ, ತಥಾಗತಸೇಯ್ಯಾ। ಇಮಾ ಖೋ, ಭಿಕ್ಖವೇ, ಚತಸ್ಸೋ ಸೇಯ್ಯಾ’’ತಿ। ಚತುತ್ಥಂ।
‘‘Katamā ca, bhikkhave, tathāgataseyyā? Idha, bhikkhave, tathāgato vivicceva kāmehi…pe… catutthaṃ jhānaṃ upasampajja viharati. Ayaṃ vuccati, bhikkhave, tathāgataseyyā. Imā kho, bhikkhave, catasso seyyā’’ti. Catutthaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಸೇಯ್ಯಾಸುತ್ತವಣ್ಣನಾ • 4. Seyyāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪-೭. ಸೇಯ್ಯಾಸುತ್ತಾದಿವಣ್ಣನಾ • 4-7. Seyyāsuttādivaṇṇanā
