| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
6. сийхасуд̇д̇ам̣
6. Sīhasuttaṃ
78. саавад̇т̇инид̣̇аанам̣ . ‘‘сийхо, бхигкавз, миг̇арааж̇аа сааяанхасамаяам̣ аасаяаа нигкамад̇и; аасаяаа нигкамид̇ваа виж̇амбхад̇и; виж̇амбхид̇ваа саманд̇аа жад̇уд̣̇д̣̇исаа анувилогзд̇и; саманд̇аа жад̇уд̣̇д̣̇исаа анувилогзд̇ваа д̇игкад̇д̇ум̣ сийханаад̣̇ам̣ над̣̇ад̇и; д̇игкад̇д̇ум̣ сийханаад̣̇ам̣ над̣̇ид̇ваа г̇ожарааяа баггамад̇и. яз хи гзжи, бхигкавз, д̇иражчаанаг̇ад̇аа баан̣аа сийхасса миг̇аран̃н̃о над̣̇ад̇о сад̣̇д̣̇ам̣ сун̣анд̇и; язбхуяязна бхаяам̣ сам̣взг̇ам̣ санд̇аасам̣ аабаж̇ж̇анд̇и; б̣илам̣ б̣илаасаяаа бависанд̇и; д̣̇агам̣ д̣̇агаасаяаа бависанд̇и; ванам̣ ванаасаяаа бависанд̇и; аагаасам̣ багкино бхаж̇анд̇и. язби д̇з, бхигкавз, ран̃н̃о нааг̇аа г̇ааманиг̇амарааж̇ад̇хаанийсу, д̣̇ал̣хзхи варад̇д̇зхи б̣ад̣̇д̇хаа, д̇зби д̇аани б̣анд̇ханаани сан̃чинд̣̇ид̇ваа самбад̣̇аалзд̇ваа бхийд̇аа муд̇д̇агарийсам̣ жаж̇амаанаа 1, язна ваа д̇зна ваа балааяанд̇и. звам̣ махид̣̇д̇хиго ко, бхигкавз, сийхо миг̇арааж̇аа д̇иражчаанаг̇ад̇аанам̣ баан̣аанам̣, звам̣ махзсагко, звам̣ махаанубхааво’’.
78. Sāvatthinidānaṃ . ‘‘Sīho, bhikkhave, migarājā sāyanhasamayaṃ āsayā nikkhamati; āsayā nikkhamitvā vijambhati; vijambhitvā samantā catuddisā anuviloketi; samantā catuddisā anuviloketvā tikkhattuṃ sīhanādaṃ nadati; tikkhattuṃ sīhanādaṃ naditvā gocarāya pakkamati. Ye hi keci, bhikkhave, tiracchānagatā pāṇā sīhassa migarañño nadato saddaṃ suṇanti; yebhuyyena bhayaṃ saṃvegaṃ santāsaṃ āpajjanti; bilaṃ bilāsayā pavisanti; dakaṃ dakāsayā pavisanti; vanaṃ vanāsayā pavisanti; ākāsaṃ pakkhino bhajanti. Yepi te, bhikkhave, rañño nāgā gāmanigamarājadhānīsu, daḷhehi varattehi baddhā, tepi tāni bandhanāni sañchinditvā sampadāletvā bhītā muttakarīsaṃ cajamānā 2, yena vā tena vā palāyanti. Evaṃ mahiddhiko kho, bhikkhave, sīho migarājā tiracchānagatānaṃ pāṇānaṃ, evaṃ mahesakkho, evaṃ mahānubhāvo’’.
‘‘звамзва ко, бхигкавз, яад̣̇аа д̇ат̇ааг̇ад̇о логз уббаж̇ж̇ад̇и арахам̣ саммаасамб̣уд̣̇д̇хо виж̇ж̇аажаран̣асамбанно суг̇ад̇о логавид̣̇уу ануд̇д̇аро бурисад̣̇аммасаарат̇и сад̇т̇аа д̣̇звамануссаанам̣ б̣уд̣̇д̇хо бхаг̇аваа. со д̇хаммам̣ д̣̇зсзд̇и – ‘ид̇и руубам̣, ид̇и руубасса самуд̣̇аяо, ид̇и руубасса ад̇т̇ан̇г̇амо; ид̇и взд̣̇анаа… ид̇и сан̃н̃аа… ид̇и сан̇каараа… ид̇и вин̃н̃аан̣ам̣, ид̇и вин̃н̃аан̣асса самуд̣̇аяо, ид̇и вин̃н̃аан̣асса ад̇т̇ан̇г̇амо’д̇и. язби д̇з, бхигкавз, д̣̇зваа д̣̇ийгхааяугаа ван̣н̣аванд̇о сукаб̣ахулаа ужжзсу вимаанзсу жирадтид̇игаа д̇зби д̇ат̇ааг̇ад̇асса д̇хаммад̣̇зсанам̣ суд̇ваа язбхуяязна бхаяам̣ сам̣взг̇ам̣ санд̇аасам̣ аабаж̇ж̇анд̇и – ‘анижжаава гира, бхо, маяам̣ самаанаа нижжамхаад̇и аман̃н̃имха. ад̣̇д̇хуваава гира, бхо, маяам̣ самаанаа д̇хувамхаад̇и аман̃н̃имха. асассад̇аава гира, бхо, маяам̣ самаанаа сассад̇амхаад̇и аман̃н̃имха. маяамби гира, бхо, анижжаа ад̣̇д̇хуваа асассад̇аа саггааяабарияаабаннаа’д̇и. звам̣ махид̣̇д̇хиго ко, бхигкавз, д̇ат̇ааг̇ад̇о сад̣̇звагасса логасса, звам̣ махзсагко, звам̣ махаанубхааво’’д̇и. ид̣̇амавожа бхаг̇аваа…бз… зд̇ад̣̇авожа сад̇т̇аа –
‘‘Evameva kho, bhikkhave, yadā tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So dhammaṃ deseti – ‘iti rūpaṃ, iti rūpassa samudayo, iti rūpassa atthaṅgamo; iti vedanā… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti. Yepi te, bhikkhave, devā dīghāyukā vaṇṇavanto sukhabahulā uccesu vimānesu ciraṭṭhitikā tepi tathāgatassa dhammadesanaṃ sutvā yebhuyyena bhayaṃ saṃvegaṃ santāsaṃ āpajjanti – ‘aniccāva kira, bho, mayaṃ samānā niccamhāti amaññimha. Addhuvāva kira, bho, mayaṃ samānā dhuvamhāti amaññimha. Asassatāva kira, bho, mayaṃ samānā sassatamhāti amaññimha. Mayampi kira, bho, aniccā addhuvā asassatā sakkāyapariyāpannā’ti. Evaṃ mahiddhiko kho, bhikkhave, tathāgato sadevakassa lokassa, evaṃ mahesakkho, evaṃ mahānubhāvo’’ti. Idamavoca bhagavā…pe… etadavoca satthā –
‘‘яад̣̇аа б̣уд̣̇д̇хо абхин̃н̃ааяа, д̇хаммажаггам̣ бавад̇д̇аяи;
‘‘Yadā buddho abhiññāya, dhammacakkaṃ pavattayi;
сад̣̇звагасса логасса, сад̇т̇аа аббадибуг̇г̇ало.
Sadevakassa lokassa, satthā appaṭipuggalo.
‘‘саггааяан̃жа нирод̇хан̃жа, саггааяасса жа самбхавам̣;
‘‘Sakkāyañca nirodhañca, sakkāyassa ca sambhavaṃ;
арияан̃жадтан̇г̇игам̣ маг̇г̇ам̣, д̣̇угкуубасамаг̇ааминам̣.
Ariyañcaṭṭhaṅgikaṃ maggaṃ, dukkhūpasamagāminaṃ.
‘‘язби д̣̇ийгхааяугаа д̣̇зваа, ван̣н̣аванд̇о яасассино;
‘‘Yepi dīghāyukā devā, vaṇṇavanto yasassino;
бхийд̇аа санд̇аасамаабаад̣̇ум̣, сийхассзвид̇арз миг̇аа.
Bhītā santāsamāpāduṃ, sīhassevitare migā.
авийд̇ивад̇д̇аа саггааяам̣, анижжаа гира бхо маяам̣;
Avītivattā sakkāyaṃ, aniccā kira bho mayaṃ;
суд̇ваа арахад̇о ваагяам̣, виббамуд̇д̇асса д̇аад̣̇ино’’д̇и. чадтам̣;
Sutvā arahato vākyaṃ, vippamuttassa tādino’’ti. chaṭṭhaṃ;
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 6. сийхасуд̇д̇аван̣н̣анаа • 6. Sīhasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 6. сийхасуд̇д̇аван̣н̣анаа • 6. Sīhasuttavaṇṇanā
