| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೩. ಸಿಕ್ಖಾನಿಸಂಸಸುತ್ತಂ
3. Sikkhānisaṃsasuttaṃ
೨೪೫. ‘‘ಸಿಕ್ಖಾನಿಸಂಸಮಿದಂ, ಭಿಕ್ಖವೇ, ಬ್ರಹ್ಮಚರಿಯಂ ವುಸ್ಸತಿ ಪಞ್ಞುತ್ತರಂ ವಿಮುತ್ತಿಸಾರಂ ಸತಾಧಿಪತೇಯ್ಯಂ। ಕಥಞ್ಚ, ಭಿಕ್ಖವೇ, ಸಿಕ್ಖಾನಿಸಂಸಂ ಹೋತಿ? ಇಧ, ಭಿಕ್ಖವೇ, ಮಯಾ ಸಾವಕಾನಂ ಆಭಿಸಮಾಚಾರಿಕಾ ಸಿಕ್ಖಾ ಪಞ್ಞತ್ತಾ ಅಪ್ಪಸನ್ನಾನಂ ಪಸಾದಾಯ ಪಸನ್ನಾನಂ ಭಿಯ್ಯೋಭಾವಾಯ। ಯಥಾ ಯಥಾ, ಭಿಕ್ಖವೇ, ಮಯಾ ಸಾವಕಾನಂ ಆಭಿಸಮಾಚಾರಿಕಾ ಸಿಕ್ಖಾ ಪಞ್ಞತ್ತಾ ಅಪ್ಪಸನ್ನಾನಂ ಪಸಾದಾಯ ಪಸನ್ನಾನಂ ಭಿಯ್ಯೋಭಾವಾಯ ತಥಾ ತಥಾ ಸೋ ತಸ್ಸಾ ಸಿಕ್ಖಾಯ ಅಖಣ್ಡಕಾರೀ ಹೋತಿ ಅಚ್ಛಿದ್ದಕಾರೀ ಅಸಬಲಕಾರೀ ಅಕಮ್ಮಾಸಕಾರೀ, ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು।
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘ಪುನ ಚಪರಂ, ಭಿಕ್ಖವೇ, ಮಯಾ ಸಾವಕಾನಂ ಆದಿಬ್ರಹ್ಮಚರಿಯಿಕಾ ಸಿಕ್ಖಾ ಪಞ್ಞತ್ತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ। ಯಥಾ ಯಥಾ, ಭಿಕ್ಖವೇ, ಮಯಾ ಸಾವಕಾನಂ ಆದಿಬ್ರಹ್ಮಚರಿಯಿಕಾ ಸಿಕ್ಖಾ ಪಞ್ಞತ್ತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ ತಥಾ ತಥಾ ಸೋ ತಸ್ಸಾ ಸಿಕ್ಖಾಯ ಅಖಣ್ಡಕಾರೀ ಹೋತಿ ಅಚ್ಛಿದ್ದಕಾರೀ ಅಸಬಲಕಾರೀ ಅಕಮ್ಮಾಸಕಾರೀ, ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು। ಏವಂ ಖೋ, ಭಿಕ್ಖವೇ, ಸಿಕ್ಖಾನಿಸಂಸಂ ಹೋತಿ।
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘ಕಥಞ್ಚ, ಭಿಕ್ಖವೇ, ಪಞ್ಞುತ್ತರಂ ಹೋತಿ? ಇಧ, ಭಿಕ್ಖವೇ, ಮಯಾ ಸಾವಕಾನಂ ಧಮ್ಮಾ ದೇಸಿತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ। ಯಥಾ ಯಥಾ, ಭಿಕ್ಖವೇ, ಮಯಾ ಸಾವಕಾನಂ ಧಮ್ಮಾ ದೇಸಿತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ ತಥಾ ತಥಾಸ್ಸ ತೇ ಧಮ್ಮಾ ಪಞ್ಞಾಯ ಸಮವೇಕ್ಖಿತಾ ಹೋನ್ತಿ। ಏವಂ ಖೋ, ಭಿಕ್ಖವೇ, ಪಞ್ಞುತ್ತರಂ ಹೋತಿ।
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘ಕಥಞ್ಚ , ಭಿಕ್ಖವೇ, ವಿಮುತ್ತಿಸಾರಂ ಹೋತಿ? ಇಧ, ಭಿಕ್ಖವೇ, ಮಯಾ ಸಾವಕಾನಂ ಧಮ್ಮಾ ದೇಸಿತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ। ಯಥಾ ಯಥಾ, ಭಿಕ್ಖವೇ, ಮಯಾ ಸಾವಕಾನಂ ಧಮ್ಮಾ ದೇಸಿತಾ ಸಬ್ಬಸೋ ಸಮ್ಮಾ ದುಕ್ಖಕ್ಖಯಾಯ ತಥಾ ತಥಾಸ್ಸ ತೇ ಧಮ್ಮಾ ವಿಮುತ್ತಿಯಾ ಫುಸಿತಾ ಹೋನ್ತಿ। ಏವಂ ಖೋ, ಭಿಕ್ಖವೇ, ವಿಮುತ್ತಿಸಾರಂ ಹೋತಿ।
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘ಕಥಞ್ಚ, ಭಿಕ್ಖವೇ, ಸತಾಧಿಪತೇಯ್ಯಂ ಹೋತಿ? ‘ಇತಿ ಅಪರಿಪೂರಂ ವಾ ಆಭಿಸಮಾಚಾರಿಕಂ ಸಿಕ್ಖಂ ಪರಿಪೂರೇಸ್ಸಾಮಿ, ಪರಿಪೂರಂ ವಾ ಆಭಿಸಮಾಚಾರಿಕಂ ಸಿಕ್ಖಂ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀ’ತಿ – ಅಜ್ಝತ್ತಂಯೇವ ಸತಿ ಸೂಪಟ್ಠಿತಾ ಹೋತಿ। ‘ಇತಿ ಅಪರಿಪೂರಂ ವಾ ಆದಿಬ್ರಹ್ಮಚರಿಯಿಕಂ ಸಿಕ್ಖಂ ಪರಿಪೂರೇಸ್ಸಾಮಿ, ಪರಿಪೂರಂ ವಾ ಆದಿಬ್ರಹ್ಮಚರಿಯಿಕಂ ಸಿಕ್ಖಂ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀ’ತಿ – ಅಜ್ಝತ್ತಂಯೇವ ಸತಿ ಸೂಪಟ್ಠಿತಾ ಹೋತಿ। ‘ಇತಿ ಅಸಮವೇಕ್ಖಿತಂ ವಾ ಧಮ್ಮಂ ಪಞ್ಞಾಯ ಸಮವೇಕ್ಖಿಸ್ಸಾಮಿ, ಸಮವೇಕ್ಖಿತಂ ವಾ ಧಮ್ಮಂ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀ’ತಿ – ಅಜ್ಝತ್ತಂಯೇವ ಸತಿ ಸೂಪಟ್ಠಿತಾ ಹೋತಿ। ‘ಇತಿ ಅಫುಸಿತಂ ವಾ ಧಮ್ಮಂ ವಿಮುತ್ತಿಯಾ ಫುಸಿಸ್ಸಾಮಿ, ಫುಸಿತಂ ವಾ ಧಮ್ಮಂ ತತ್ಥ ತತ್ಥ ಪಞ್ಞಾಯ ಅನುಗ್ಗಹೇಸ್ಸಾಮೀ’ತಿ – ಅಜ್ಝತ್ತಂಯೇವ ಸತಿ ಸೂಪಟ್ಠಿತಾ ಹೋತಿ। ಏವಂ ಖೋ, ಭಿಕ್ಖವೇ, ಸತಾಧಿಪತೇಯ್ಯಂ ಹೋತಿ। ‘ಸಿಕ್ಖಾನಿಸಂಸಮಿದಂ, ಭಿಕ್ಖವೇ, ಬ್ರಹ್ಮಚರಿಯಂ ವುಸ್ಸತಿ ಪಞ್ಞುತ್ತರಂ ವಿಮುತ್ತಿಸಾರಂ ಸತಾಧಿಪತೇಯ್ಯ’ನ್ತಿ, ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತ’’ನ್ತಿ। ತತಿಯಂ।
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೩. ಸಿಕ್ಖಾನಿಸಂಸಸುತ್ತವಣ್ಣನಾ • 3. Sikkhānisaṃsasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨-೩. ಆಪತ್ತಿಭಯಸುತ್ತಾದಿವಣ್ಣನಾ • 2-3. Āpattibhayasuttādivaṇṇanā
