| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஸிக்கா²னிஸங்ஸஸுத்தவண்ணனா
3. Sikkhānisaṃsasuttavaṇṇanā
245. ததியே ஸிக்கா² ஆனிஸங்ஸா எத்தா²தி ஸிக்கா²னிஸங்ஸங். பஞ்ஞா உத்தரா எத்தா²தி பஞ்ஞுத்தரங். விமுத்தி ஸாரோ எத்தா²தி விமுத்திஸாரங். ஸதி ஆதி⁴பதெய்யா எத்தா²தி ஸதாதி⁴பதெய்யங். ஏதேஸங் ஹி ஸிக்கா²தி³ஸங்கா²தானங் ஆனிஸங்ஸாதீ³னங் அத்தா²ய வுஸ்ஸதீதி வுத்தங் ஹோதி. ஆபி⁴ஸமாசாரிகாதி உத்தமஸமாசாரிகா. வத்தவஸேன பஞ்ஞத்தஸீலஸ்ஸேதங் அதி⁴வசனங். ததா² ததா² ஸோ தஸ்ஸா ஸிக்கா²யாதி ததா² ததா² ஸோ ஸிக்கா²காமோ பி⁴க்கு² தஸ்மிங் ஸிக்கா²பதே³.
245. Tatiye sikkhā ānisaṃsā etthāti sikkhānisaṃsaṃ. Paññā uttarā etthāti paññuttaraṃ. Vimutti sāro etthāti vimuttisāraṃ. Sati ādhipateyyā etthāti satādhipateyyaṃ. Etesaṃ hi sikkhādisaṅkhātānaṃ ānisaṃsādīnaṃ atthāya vussatīti vuttaṃ hoti. Ābhisamācārikāti uttamasamācārikā. Vattavasena paññattasīlassetaṃ adhivacanaṃ. Tathā tathā so tassā sikkhāyāti tathā tathā so sikkhākāmo bhikkhu tasmiṃ sikkhāpade.
ஆதி³ப்³ரஹ்மசரியிகாதி மக்³க³ப்³ரஹ்மசரியஸ்ஸ ஆதி³பூ⁴தானங் சதுன்னங் மஹாஸீலானமேதங் அதி⁴வசனங். ஸப்³ப³ஸோதி ஸப்³பா³காரேன. த⁴ம்மாதி சதுஸச்சத⁴ம்மா. பஞ்ஞாய ஸமவெக்கி²தா ஹொந்தீதி ஸஹவிபஸ்ஸனாய மக்³க³பஞ்ஞாய ஸுதி³ட்டா² ஹொந்தி. விமுத்தியா பு²ஸிதா ஹொந்தீதி அரஹத்தப²லவிமுத்தியா ஞாணப²ஸ்ஸேன பு²ட்டா² ஹொந்தி. அஜ்ஜ²த்தங்யேவ ஸதி ஸூபட்டி²தா ஹோதீதி நியகஜ்ஜ²த்தேயேவ ஸதி ஸுட்டு² உபட்டி²தா ஹோதி. பஞ்ஞாய அனுக்³க³ஹெஸ்ஸாமீதி விபஸ்ஸனாபஞ்ஞாய அனுக்³க³ஹெஸ்ஸாமி. பஞ்ஞாய ஸமவெக்கி²ஸ்ஸாமீதி இதா⁴பி விபஸ்ஸனாபஞ்ஞா அதி⁴ப்பேதா. பு²ஸிதங் வா த⁴ம்மங் தத்த² தத்த² பஞ்ஞாய அனுக்³க³ஹெஸ்ஸாமீதி எத்த² பன மக்³க³பஞ்ஞாவ அதி⁴ப்பேதா.
Ādibrahmacariyikāti maggabrahmacariyassa ādibhūtānaṃ catunnaṃ mahāsīlānametaṃ adhivacanaṃ. Sabbasoti sabbākārena. Dhammāti catusaccadhammā. Paññāya samavekkhitā hontīti sahavipassanāya maggapaññāya sudiṭṭhā honti. Vimuttiyā phusitā hontīti arahattaphalavimuttiyā ñāṇaphassena phuṭṭhā honti. Ajjhattaṃyeva sati sūpaṭṭhitā hotīti niyakajjhatteyeva sati suṭṭhu upaṭṭhitā hoti. Paññāya anuggahessāmīti vipassanāpaññāya anuggahessāmi. Paññāyasamavekkhissāmīti idhāpi vipassanāpaññā adhippetā. Phusitaṃ vā dhammaṃ tattha tattha paññāya anuggahessāmīti ettha pana maggapaññāva adhippetā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸிக்கா²னிஸங்ஸஸுத்தங் • 3. Sikkhānisaṃsasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2-3. ஆபத்திப⁴யஸுத்தாதி³வண்ணனா • 2-3. Āpattibhayasuttādivaṇṇanā
