Library / Tipiṭaka / တိပိဋက • Tipiṭaka / ဝိဘင္ဂ-မူလဋီကာ • Vibhaṅga-mūlaṭīkā

    ၁၄. သိက္ခာပဒဝိဘင္ဂော

    14. Sikkhāpadavibhaṅgo

    ၁. အဘိဓမ္မဘာဇနီယဝဏ္ဏနာ

    1. Abhidhammabhājanīyavaṇṇanā

    ၇၀၃. ပတိဋ္ဌာနဋ္ဌေနာတိ သမ္ပယောဂဝသေန ဥပနိသ္သယဝသေန စ ဩကာသဘာဝေန။ ပိဋ္ဌပူဝဩဒနကိဏ္ဏနာနာသမ္ဘာရေ ပက္ခိပိတ္ဝာ မဒ္ဒိတ္ဝာ ကတာ သုရာ နာမ။ မဓုကာဒိပုပ္ဖပနသာဒိဖလဥစ္ဆုမုဒ္ဒိကာဒိနာနာသမ္ဘာရာနံ ရသာ စိရပရိဝာသိတာ မေရယံ နာမ, အာသဝောတိ အတ္ထော။

    703. Patiṭṭhānaṭṭhenāti sampayogavasena upanissayavasena ca okāsabhāvena. Piṭṭhapūvaodanakiṇṇanānāsambhāre pakkhipitvā madditvā katā surā nāma. Madhukādipupphapanasādiphalaucchumuddikādinānāsambhārānaṃ rasā ciraparivāsitā merayaṃ nāma, āsavoti attho.

    ၇၀၄. တံသမ္ပယုတ္တတ္တာတိ ဝိရတိသမ္ပယုတ္တတ္တာ, ဝိရတိစေတနာသမ္ပယုတ္တတ္တာ ဝာ။

    704. Taṃsampayuttattāti viratisampayuttattā, viraticetanāsampayuttattā vā.

    ကမ္မပထာ ဧဝာတိ အသဗ္ဗသာဓာရဏေသု ဈာနာဒိကောဋ္ဌာသေသု ကမ္မပထကောဋ္ဌာသိကာ ဧဝာတိ အတ္ထော။ သုရာပာနမ္ပိ ‘‘သုရာပာနံ, ဘိက္ခဝေ, အာသေဝိတံ။ပေ.။ နိရယသံဝတ္တနိက’’န္တိ (အ. နိ. ၈.၄၀) ဝိသုံ ကမ္မပထဘာဝေန အာဂတန္တိ ဝဒန္တိ။ ဧဝံ သတိ ဧကာဒသ ကမ္မပထာ သိယုံ, တသ္မာသ္သ ယထာဝုတ္တေသ္ဝေဝ ကမ္မပထေသု ဥပကာရကတ္တသဘာဂတ္တဝသေန အနုပဝေသော ဒဋ္ဌဗ္ဗော။

    Kammapathā evāti asabbasādhāraṇesu jhānādikoṭṭhāsesu kammapathakoṭṭhāsikā evāti attho. Surāpānampi ‘‘surāpānaṃ, bhikkhave, āsevitaṃ…pe… nirayasaṃvattanika’’nti (a. ni. 8.40) visuṃ kammapathabhāvena āgatanti vadanti. Evaṃ sati ekādasa kammapathā siyuṃ, tasmāssa yathāvuttesveva kammapathesu upakārakattasabhāgattavasena anupaveso daṭṭhabbo.

    သတ္တဣတ္ထိပုရိသာရမ္မဏတာ တထာဂဟိတသင္ခာရာရမ္မဏတာယ ဒဋ္ဌဗ္ဗာ။ ‘‘ပဉ္စ သိက္ခာပဒာ ပရိတ္တာရမ္မဏာ’’တိ ဟိ ဝုတ္တံ။ ‘‘သဗ္ဗာပိ ဟိ ဧတာ ဝီတိက္ကမိတဗ္ဗဝတ္ထုံ အာရမ္မဏံ ကတ္ဝာ ဝေရစေတနာဟိ ဧဝ ဝိရမန္တီ’’တိ (ဝိဘ. အဋ္ဌ. ၇၀၄) စ ဝက္ခတီတိ။

    Sattaitthipurisārammaṇatā tathāgahitasaṅkhārārammaṇatāya daṭṭhabbā. ‘‘Pañca sikkhāpadā parittārammaṇā’’ti hi vuttaṃ. ‘‘Sabbāpi hi etā vītikkamitabbavatthuṃ ārammaṇaṃ katvā veracetanāhi eva viramantī’’ti (vibha. aṭṭha. 704) ca vakkhatīti.

    ဂောရူပသီလကော ပကတိဘဒ္ဒော။ ကာကဏိကမတ္တသ္သ အတ္ထာယာတိအာဒိ လောဘဝသေန မုသာကထနေ ဝုတ္တံ။ ဒောသဝသေန မုသာကထနေ စ နိဋ္ဌပ္ပတ္တော သင္ဃဘေဒော ဂဟိတော။ ဒောသဝသေန ပရသ္သ ဗ္ယသနတ္ထာယ မုသာကထနေ ပန တသ္သ တသ္သ ဂုဏဝသေန အပ္ပသာဝဇ္ဇမဟာသာဝဇ္ဇတာ ယောဇေတဗ္ဗာ, မန္ဒာဓိမတ္တဗ္ယသနိစ္ဆာဝသေန စ။ နိသ္သဂ္ဂိယထာဝရဝိဇ္ဇာမယိဒ္ဓိမယာ သာဟတ္ထိကာဏတ္တိကေသ္ဝေဝ ပဝိသန္တီတိ ဒ္ဝေ ဧဝ ဂဟိတာ။

    Gorūpasīlako pakatibhaddo. Kākaṇikamattassa atthāyātiādi lobhavasena musākathane vuttaṃ. Dosavasena musākathane ca niṭṭhappatto saṅghabhedo gahito. Dosavasena parassa byasanatthāya musākathane pana tassa tassa guṇavasena appasāvajjamahāsāvajjatā yojetabbā, mandādhimattabyasanicchāvasena ca. Nissaggiyathāvaravijjāmayiddhimayā sāhatthikāṇattikesveva pavisantīti dve eva gahitā.

    ပဉ္စပိ ကမ္မပထာ ဧဝာတိ စေတနာသင္ခာတံ ပရိယာယသီလံ သန္ဓာယ ဝုတ္တံ, ဝိရတိသီလံ ပန မဂ္ဂကောဋ္ဌာသိကန္တိ။ တေသံ ပနာတိ သေသသီလာနံ။

    Pañcapi kammapathā evāti cetanāsaṅkhātaṃ pariyāyasīlaṃ sandhāya vuttaṃ, viratisīlaṃ pana maggakoṭṭhāsikanti. Tesaṃ panāti sesasīlānaṃ.

    ၇၁၂. ‘‘ကောဋ္ဌာသဘာဝေနာ’’တိ ဝုတ္တံ, ‘‘ပတိဋ္ဌာနဘာဝေနာ’’တိ ပန ဝတ္တဗ္ဗံ။ ဧတ္ထ ပန သိက္ခာပဒဝာရေ ပဟီနပဉ္စာဘဗ္ဗဋ္ဌာနသ္သ အရဟတော ဝိရမိတဗ္ဗဝေရသ္သ သဗ္ဗထာ အဘာဝာ ကိရိယေသု ဝိရတိယော န သန္တီတိ န ဥဒ္ဓဋာ, သေက္ခာနံ ပန ပဟီနပဉ္စဝေရတ္တေပိ တံသဘာဂတာယ ဝေရဘူတာနံ အကုသလာနံ ဝေရနိဒာနာနံ လောဘာဒီနဉ္စ သဗ္ဘာဝာ ဝိရတီနံ ဥပ္ပတ္တိ န န ဘဝိသ္သတိ။ အကုသလသမုဋ္ဌိတာနိ စ ကာယကမ္မာဒီနိ တေသံ ကာယဒုစ္စရိတာဒီနိ ဝေရာနေဝ, တေဟိ စ တေသံ ဝိရတိယော ဟောန္တေဝ, ယတော နဖလဘူတသ္သပိ ဥပရိမဂ္ဂတ္တယသ္သ အဋ္ဌင္ဂိကတာ ဟောတိ။ သိက္ခာဝာရေ စ အဘာဝေတဗ္ဗတာယ ဖလဓမ္မာပိ န သိက္ခိတဗ္ဗာ, နာပိ သိက္ခိတသိက္ခသ္သ ဥပ္ပဇ္ဇမာနာ ကိရိယဓမ္မာတိ န ကေစိ အဗ္ယာကတာ သိက္ခာတိ ဥဒ္ဓဋာ။

    712. ‘‘Koṭṭhāsabhāvenā’’ti vuttaṃ, ‘‘patiṭṭhānabhāvenā’’ti pana vattabbaṃ. Ettha pana sikkhāpadavāre pahīnapañcābhabbaṭṭhānassa arahato viramitabbaverassa sabbathā abhāvā kiriyesu viratiyo na santīti na uddhaṭā, sekkhānaṃ pana pahīnapañcaverattepi taṃsabhāgatāya verabhūtānaṃ akusalānaṃ veranidānānaṃ lobhādīnañca sabbhāvā viratīnaṃ uppatti na na bhavissati. Akusalasamuṭṭhitāni ca kāyakammādīni tesaṃ kāyaduccaritādīni verāneva, tehi ca tesaṃ viratiyo honteva, yato naphalabhūtassapi uparimaggattayassa aṭṭhaṅgikatā hoti. Sikkhāvāre ca abhāvetabbatāya phaladhammāpi na sikkhitabbā, nāpi sikkhitasikkhassa uppajjamānā kiriyadhammāti na keci abyākatā sikkhāti uddhaṭā.

    အဘိဓမ္မဘာဇနီယဝဏ္ဏနာ နိဋ္ဌိတာ။

    Abhidhammabhājanīyavaṇṇanā niṭṭhitā.

    ၂. ပဉ္ဟပုစ္ဆကဝဏ္ဏနာ

    2. Pañhapucchakavaṇṇanā

    ၇၁၄. သမ္ပတ္တဝိရတိဝသေနာတိ သမ္ပတ္တေ ပစ္စုပ္ပန္နေ အာရမ္မဏေ ယထာဝိရမိတဗ္ဗတော ဝိရတိဝသေနာတိ အတ္ထော။

    714. Sampattavirativasenāti sampatte paccuppanne ārammaṇe yathāviramitabbato virativasenāti attho.

    ပဉ္ဟပုစ္ဆကဝဏ္ဏနာ နိဋ္ဌိတာ။

    Pañhapucchakavaṇṇanā niṭṭhitā.

    သိက္ခာပဒဝိဘင္ဂဝဏ္ဏနာ နိဋ္ဌိတာ။

    Sikkhāpadavibhaṅgavaṇṇanā niṭṭhitā.







    Related texts:



    တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဝိဘင္ဂပာဠိ • Vibhaṅgapāḷi / ၁၄. သိက္ခာပဒဝိဘင္ဂော • 14. Sikkhāpadavibhaṅgo

    အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / သမ္မောဟဝိနောဒနီ-အဋ္ဌကထာ • Sammohavinodanī-aṭṭhakathā
    ၁. အဘိဓမ္မဘာဇနီယဝဏ္ဏနာ • 1. Abhidhammabhājanīyavaṇṇanā
    ၃. ပဉ္ဟာပုစ္ဆကဝဏ္ဏနာ • 3. Pañhāpucchakavaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဝိဘင္ဂ-အနုဋီကာ • Vibhaṅga-anuṭīkā / ၁၄. သိက္ခာပဒဝိဘင္ဂော • 14. Sikkhāpadavibhaṅgo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact