| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. સિક્ખાસુત્તં
5. Sikkhāsuttaṃ
૫. ‘‘યો હિ કોચિ, ભિક્ખવે, ભિક્ખુ વા ભિક્ખુની વા સિક્ખં પચ્ચક્ખાય હીનાયાવત્તતિ, તસ્સ દિટ્ઠેવ 1 ધમ્મે પઞ્ચ સહધમ્મિકા વાદાનુપાતા 2 ગારય્હા ઠાના આગચ્છન્તિ. કતમે પઞ્ચ? સદ્ધાપિ નામ તે નાહોસિ કુસલેસુ ધમ્મેસુ, હિરીપિ નામ તે નાહોસિ કુસલેસુ ધમ્મેસુ, ઓત્તપ્પમ્પિ નામ તે નાહોસિ કુસલેસુ ધમ્મેસુ, વીરિયમ્પિ નામ તે નાહોસિ કુસલેસુ ધમ્મેસુ, પઞ્ઞાપિ નામ તે નાહોસિ કુસલેસુ ધમ્મેસુ. યો હિ કોચિ, ભિક્ખવે, ભિક્ખુ વા ભિક્ખુની વા સિક્ખં પચ્ચક્ખાય હીનાયાવત્તતિ, તસ્સ દિટ્ઠેવ ધમ્મે ઇમે પઞ્ચ સહધમ્મિકા વાદાનુપાતા ગારય્હા ઠાના આગચ્છન્તિ.
5. ‘‘Yo hi koci, bhikkhave, bhikkhu vā bhikkhunī vā sikkhaṃ paccakkhāya hīnāyāvattati, tassa diṭṭheva 3 dhamme pañca sahadhammikā vādānupātā 4 gārayhā ṭhānā āgacchanti. Katame pañca? Saddhāpi nāma te nāhosi kusalesu dhammesu, hirīpi nāma te nāhosi kusalesu dhammesu, ottappampi nāma te nāhosi kusalesu dhammesu, vīriyampi nāma te nāhosi kusalesu dhammesu, paññāpi nāma te nāhosi kusalesu dhammesu. Yo hi koci, bhikkhave, bhikkhu vā bhikkhunī vā sikkhaṃ paccakkhāya hīnāyāvattati, tassa diṭṭheva dhamme ime pañca sahadhammikā vādānupātā gārayhā ṭhānā āgacchanti.
‘‘યો હિ કોચિ, ભિક્ખવે, ભિક્ખુ વા ભિક્ખુની વા સહાપિ દુક્ખેન સહાપિ દોમનસ્સેન અસ્સુમુખો 5 રુદમાનો પરિપુણ્ણં પરિસુદ્ધં બ્રહ્મચરિયં ચરતિ, તસ્સ દિટ્ઠેવ ધમ્મે પઞ્ચ સહધમ્મિકા પાસંસા ઠાના 6 આગચ્છન્તિ. કતમે પઞ્ચ? સદ્ધાપિ નામ તે અહોસિ કુસલેસુ ધમ્મેસુ, હિરીપિ નામ તે અહોસિ કુસલેસુ ધમ્મેસુ, ઓત્તપ્પમ્પિ નામ તે અહોસિ કુસલેસુ ધમ્મેસુ, વીરિયમ્પિ નામ તે અહોસિ કુસલેસુ ધમ્મેસુ, પઞ્ઞાપિ નામ તે અહોસિ કુસલેસુ ધમ્મેસુ. યો હિ કોચિ, ભિક્ખવે, ભિક્ખુ વા ભિક્ખુની વા સહાપિ દુક્ખેન સહાપિ દોમનસ્સેન અસ્સુમુખો રુદમાનો પરિપુણ્ણં પરિસુદ્ધં બ્રહ્મચરિયં ચરતિ, તસ્સ દિટ્ઠેવ ધમ્મે ઇમે પઞ્ચ સહધમ્મિકા પાસંસા ઠાના આગચ્છન્તી’’તિ. પઞ્ચમં.
‘‘Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho 7 rudamāno paripuṇṇaṃ parisuddhaṃ brahmacariyaṃ carati, tassa diṭṭheva dhamme pañca sahadhammikā pāsaṃsā ṭhānā 8 āgacchanti. Katame pañca? Saddhāpi nāma te ahosi kusalesu dhammesu, hirīpi nāma te ahosi kusalesu dhammesu, ottappampi nāma te ahosi kusalesu dhammesu, vīriyampi nāma te ahosi kusalesu dhammesu, paññāpi nāma te ahosi kusalesu dhammesu. Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho rudamāno paripuṇṇaṃ parisuddhaṃ brahmacariyaṃ carati, tassa diṭṭheva dhamme ime pañca sahadhammikā pāsaṃsā ṭhānā āgacchantī’’ti. Pañcamaṃ.
Footnotes:
Related texts:
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬. મહાસુપિનસુત્તવણ્ણના • 6. Mahāsupinasuttavaṇṇanā
