| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. સીલબ્બતસુત્તં
8. Sīlabbatasuttaṃ
૭૯. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં આનન્દં ભગવા એતદવોચ – ‘‘સબ્બં નુ ખો, આનન્દ, સીલબ્બતં જીવિતં બ્રહ્મચરિયં ઉપટ્ઠાનસારં સફલ’’ન્તિ? ‘‘ન ખ્વેત્થ, ભન્તે, એકંસેના’’તિ. ‘‘તેન હાનન્દ, વિભજસ્સૂ’’તિ.
79. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘sabbaṃ nu kho, ānanda, sīlabbataṃ jīvitaṃ brahmacariyaṃ upaṭṭhānasāraṃ saphala’’nti? ‘‘Na khvettha, bhante, ekaṃsenā’’ti. ‘‘Tena hānanda, vibhajassū’’ti.
‘‘યઞ્હિસ્સ 1, ભન્તે, સીલબ્બતં જીવિતં બ્રહ્મચરિયં ઉપટ્ઠાનસારં સેવતો અકુસલા ધમ્મા અભિવડ્ઢન્તિ કુસલા ધમ્મા પરિહાયન્તિ, એવરૂપં સીલબ્બતં જીવિતં બ્રહ્મચરિયં ઉપટ્ઠાનસારં અફલં. યઞ્ચ ખ્વાસ્સ 2, ભન્તે, સીલબ્બતં જીવિતં બ્રહ્મચરિયં ઉપટ્ઠાનસારં સેવતો અકુસલા ધમ્મા પરિહાયન્તિ, કુસલા ધમ્મા અભિવડ્ઢન્તિ, એવરૂપં સીલબ્બતં જીવિતં બ્રહ્મચરિયં ઉપટ્ઠાનસારં સફલ’’ન્તિ. ઇદમવોચ આયસ્મા આનન્દો; સમનુઞ્ઞો સત્થા અહોસિ.
‘‘Yañhissa 3, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā abhivaḍḍhanti kusalā dhammā parihāyanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ aphalaṃ. Yañca khvāssa 4, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā parihāyanti, kusalā dhammā abhivaḍḍhanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ saphala’’nti. Idamavoca āyasmā ānando; samanuñño satthā ahosi.
અથ ખો આયસ્મા આનન્દો ‘‘સમનુઞ્ઞો મે સત્થા’’તિ, ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કામિ. અથ ખો ભગવા અચિરપક્કન્તે આયસ્મન્તે આનન્દે ભિક્ખૂ આમન્તેસિ – ‘‘સેખો, ભિક્ખવે, આનન્દો; ન ચ પનસ્સ સુલભરૂપો સમસમો પઞ્ઞાયા’’તિ. અટ્ઠમં.
Atha kho āyasmā ānando ‘‘samanuñño me satthā’’ti, uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā acirapakkante āyasmante ānande bhikkhū āmantesi – ‘‘sekho, bhikkhave, ānando; na ca panassa sulabharūpo samasamo paññāyā’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૮. સીલબ્બતસુત્તવણ્ણના • 8. Sīlabbatasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮. સીલબ્બતસુત્તવણ્ણના • 8. Sīlabbatasuttavaṇṇanā
