| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஸீலஸுத்தவண்ணனா
2. Sīlasuttavaṇṇanā
12. து³தியே ஸம்பன்னஸீலாதி பரிபுண்ணஸீலா. ஸம்பன்னபாதிமொக்கா²தி பரிபுண்ணபாதிமொக்கா². பாதிமொக்க²ஸங்வரஸங்வுதாதி பாதிமொக்க²ஸங்வரஸீலேன ஸங்வுதா பிஹிதா உபேதா ஹுத்வா விஹரத². ஆசாரகோ³சரஸம்பன்னாதி ஆசாரேன ச கோ³சரேன ச ஸம்பன்னா ஸமுபாக³தா ப⁴வத². அணுமத்தேஸு வஜ்ஜேஸூதி அணுப்பமாணேஸு தோ³ஸேஸு. ப⁴யத³ஸ்ஸாவினோதி தானி அணுமத்தானி வஜ்ஜானி ப⁴யதோ த³ஸ்ஸனஸீலா. ஸமாதா³ய ஸிக்க²த² ஸிக்கா²பதே³ஸூதி ஸப்³ப³ஸிக்கா²கொட்டா²ஸேஸு ஸமாதா³தப்³ப³ங் ஸமாதா³ய க³ஹெத்வா ஸிக்க²த². ‘‘ஸம்பன்னஸீலானங்…பே॰… ஸிக்கா²பதே³ஸூ’’தி எத்தகேன த⁴ம்மக்கா²னேன ஸிக்க²த்தயே ஸமாதா³பெத்வா சேவ படிலத்³த⁴கு³ணேஸு ச வண்ணங் கதெ²த்வா இதா³னி உத்தரி காதப்³ப³ங் த³ஸ்ஸெந்தோ கிமஸ்ஸாதிஆதி³மாஹ. தத்த² கிமஸ்ஸாதி கிங் ப⁴வெய்ய.
12. Dutiye sampannasīlāti paripuṇṇasīlā. Sampannapātimokkhāti paripuṇṇapātimokkhā. Pātimokkhasaṃvarasaṃvutāti pātimokkhasaṃvarasīlena saṃvutā pihitā upetā hutvā viharatha. Ācāragocarasampannāti ācārena ca gocarena ca sampannā samupāgatā bhavatha. Aṇumattesu vajjesūti aṇuppamāṇesu dosesu. Bhayadassāvinoti tāni aṇumattāni vajjāni bhayato dassanasīlā. Samādāya sikkhatha sikkhāpadesūti sabbasikkhākoṭṭhāsesu samādātabbaṃ samādāya gahetvā sikkhatha. ‘‘Sampannasīlānaṃ…pe… sikkhāpadesū’’ti ettakena dhammakkhānena sikkhattaye samādāpetvā ceva paṭiladdhaguṇesu ca vaṇṇaṃ kathetvā idāni uttari kātabbaṃ dassento kimassātiādimāha. Tattha kimassāti kiṃ bhaveyya.
யதங் சரேதி யதா² சரந்தோ யதோ ஹோதி ஸங்யதோ, ஏவங் சரெய்ய. ஏஸ நயோ ஸப்³ப³த்த². அச்சே²தி நிஸீதெ³ய்ய. யதமேனங் பஸாரயேதி யங் அங்க³பச்சங்க³ங் பஸாரெய்ய, தங் யதங் ஸங்யதமேவ கத்வா பஸாரெய்ய. உத்³த⁴ந்தி உபரி. திரியந்தி மஜ்ஜ²ங். அபாசீனந்தி அதோ⁴. எத்தாவதா அதீதா பச்சுப்பன்னா அனாக³தா ச பஞ்சக்க²ந்தா⁴ கதி²தா. யாவதாதி பரிச்சே²த³வசனங். ஜக³தோ க³தீதி லோகஸ்ஸ நிப்ப²த்தி. ஸமவெக்கி²தா ச த⁴ம்மானங், க²ந்தா⁴னங் உத³யப்³ப³யந்தி ஏதேஸங் ஸப்³ப³லோகே அதீதாதி³பே⁴தா³னங் பஞ்சக்க²ந்த⁴த⁴ம்மானங் உத³யஞ்ச வயஞ்ச ஸமவெக்கி²தா. ‘‘பஞ்சக்க²ந்தா⁴னங் உத³யங் பஸ்ஸந்தோ பஞ்சவீஸதி லக்க²ணானி பஸ்ஸதி, வயங் பஸ்ஸந்தோ பஞ்சவீஸதி லக்க²ணானி பஸ்ஸதீ’’தி வுத்தேஹி ஸமபஞ்ஞாஸாய லக்க²ணேஹி ஸம்மா அவெக்கி²தா ஹோதி. சேதோஸமத²ஸாமீசிந்தி சித்தஸமத²ஸ்ஸ அனுச்ச²விகங் படிபத³ங். ஸிக்க²மானந்தி படிபஜ்ஜமானங், பூரயமானந்தி அத்தோ². பஹிதத்தோதி பேஸிதத்தோ. ஆஹூதி கத²யந்தி. ஸேஸமெத்த² உத்தானமேவ. இமஸ்மிங் பன ஸுத்தே ஸீலங் மிஸ்ஸகங் கதெ²த்வா கா³தா²ஸு கீ²ணாஸவோ கதி²தோ.
Yataṃ careti yathā caranto yato hoti saṃyato, evaṃ careyya. Esa nayo sabbattha. Accheti nisīdeyya. Yatamenaṃ pasārayeti yaṃ aṅgapaccaṅgaṃ pasāreyya, taṃ yataṃ saṃyatameva katvā pasāreyya. Uddhanti upari. Tiriyanti majjhaṃ. Apācīnanti adho. Ettāvatā atītā paccuppannā anāgatā ca pañcakkhandhā kathitā. Yāvatāti paricchedavacanaṃ. Jagatogatīti lokassa nipphatti. Samavekkhitā ca dhammānaṃ, khandhānaṃ udayabbayanti etesaṃ sabbaloke atītādibhedānaṃ pañcakkhandhadhammānaṃ udayañca vayañca samavekkhitā. ‘‘Pañcakkhandhānaṃ udayaṃ passanto pañcavīsati lakkhaṇāni passati, vayaṃ passanto pañcavīsati lakkhaṇāni passatī’’ti vuttehi samapaññāsāya lakkhaṇehi sammā avekkhitā hoti. Cetosamathasāmīcinti cittasamathassa anucchavikaṃ paṭipadaṃ. Sikkhamānanti paṭipajjamānaṃ, pūrayamānanti attho. Pahitattoti pesitatto. Āhūti kathayanti. Sesamettha uttānameva. Imasmiṃ pana sutte sīlaṃ missakaṃ kathetvā gāthāsu khīṇāsavo kathito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஸீலஸுத்தங் • 2. Sīlasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ஸீலஸுத்தவண்ணனா • 2. Sīlasuttavaṇṇanā
