| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஸீலஸுத்தவண்ணனா
3. Sīlasuttavaṇṇanā
213. ததியே து³ஸ்ஸீலோதி அஸீலோ நிஸ்ஸீலோ. ஸீலவிபன்னோதி விபன்னஸீலோ பி⁴ன்னஸங்வரோ. பமாதா³தி⁴கரணந்தி பமாத³காரணா. இத³ஞ்ச ஸுத்தங் க³ஹட்டா²னங் வஸேன ஆக³தங், பப்³ப³ஜிதானம்பி பன லப்³ப⁴தேவ . க³ஹட்டோ² ஹி யேன யேன ஸிப்பட்டா²னேன ஜீவிகங் கப்பேதி, யதி³ கஸியா, யதி³ வணிஜ்ஜாய, பாணாதிபாதாதி³வஸேன பமத்தோ தங் தங் யதா²காலங் ஸம்பாதே³துங் ந ஸக்கோதி, அத²ஸ்ஸ மூலங் வினஸ்ஸதி. மாகா⁴தகாலேபி பாணாதிபாதங் அதி³ன்னாதா³னாதீ³னி ச கரொந்தோ த³ண்ட³வஸேன மஹதிங் போ⁴க³ஜானிங் நிக³ச்ச²தி. பப்³ப³ஜிதோ து³ஸ்ஸீலோ பமாத³காரணா ஸீலதோ பு³த்³த⁴வசனதோ ஜா²னதோ ஸத்தஅரியத⁴னதோ ச ஜானிங் நிக³ச்ச²தி. க³ஹட்ட²ஸ்ஸ ‘‘அஸுகோ அஸுககுலே ஜாதோ து³ஸ்ஸீலோ பாபத⁴ம்மோ பரிச்சத்தஇத⁴லோகபரலோகோ ஸலாகப⁴த்தமத்தம்பி ந தே³தீ’’தி சதுபரிஸமஜ்ஜே² பாபகோ கித்திஸத்³தோ³ அப்³பு⁴க்³க³ச்ச²தி. பப்³ப³ஜிதஸ்ஸ ‘‘அஸுகோ நாஸக்கி² ஸீலங் ரக்கி²துங் பு³த்³த⁴வசனங் க³ஹேதுங், வேஜ்ஜகம்மாதீ³ஹி ஜீவதி, ச²ஹி அகா³ரவேஹி ஸமன்னாக³தோ’’தி ஏவங் அப்³பு⁴க்³க³ச்ச²தி.
213. Tatiye dussīloti asīlo nissīlo. Sīlavipannoti vipannasīlo bhinnasaṃvaro. Pamādādhikaraṇanti pamādakāraṇā. Idañca suttaṃ gahaṭṭhānaṃ vasena āgataṃ, pabbajitānampi pana labbhateva . Gahaṭṭho hi yena yena sippaṭṭhānena jīvikaṃ kappeti, yadi kasiyā, yadi vaṇijjāya, pāṇātipātādivasena pamatto taṃ taṃ yathākālaṃ sampādetuṃ na sakkoti, athassa mūlaṃ vinassati. Māghātakālepi pāṇātipātaṃ adinnādānādīni ca karonto daṇḍavasena mahatiṃ bhogajāniṃ nigacchati. Pabbajito dussīlo pamādakāraṇā sīlato buddhavacanato jhānato sattaariyadhanato ca jāniṃ nigacchati. Gahaṭṭhassa ‘‘asuko asukakule jāto dussīlo pāpadhammo pariccattaidhalokaparaloko salākabhattamattampi na detī’’ti catuparisamajjhe pāpako kittisaddo abbhuggacchati. Pabbajitassa ‘‘asuko nāsakkhi sīlaṃ rakkhituṃ buddhavacanaṃ gahetuṃ, vejjakammādīhi jīvati, chahi agāravehi samannāgato’’ti evaṃ abbhuggacchati.
அவிஸாரதோ³தி க³ஹட்டோ² தாவ ‘‘அவஸ்ஸங் ப³ஹூனங் ஸன்னிபாதட்டா²னே கோசி மம கம்மங் ஜானிஸ்ஸதி, அத² மங் நிக்³க³ண்ஹிஸ்ஸந்தி வா, ராஜகுலஸ்ஸ வா த³ஸ்ஸந்தீ’’தி ஸப⁴யோ உபஸங்கமதி. மங்குபூ⁴தோ ச பதிதக்க²ந்தோ⁴ அதோ⁴முகோ² அங்கு³ட்ட²கேன பூ⁴மிங் கஸந்தோ நிஸீத³தி, விஸாரதோ³ ஹுத்வா கதே²துங் ந ஸக்கோதி. பப்³ப³ஜிதோபி ‘‘ப³ஹூ பி⁴க்கூ² ஸன்னிபதிதா, அவஸ்ஸங் கோசி மம கம்மங் ஜானிஸ்ஸதி, அத² மே உபோஸத²ம்பி பவாரணம்பி ட²பெத்வா ஸாமஞ்ஞா சாவெத்வா நிக்கட்³டி⁴ஸ்ஸந்தீ’’தி ஸப⁴யோ உபஸங்கமதி, விஸாரதோ³ ஹுத்வா கதே²துங் ந ஸக்கோதி. ஏகச்சோ பன து³ஸ்ஸீலோபி த³ப்பிதோ விய சரதி, ஸோபி அஜ்ஜா²ஸயேன மங்கு ஹோதியேவ.
Avisāradoti gahaṭṭho tāva ‘‘avassaṃ bahūnaṃ sannipātaṭṭhāne koci mama kammaṃ jānissati, atha maṃ niggaṇhissanti vā, rājakulassa vā dassantī’’ti sabhayo upasaṅkamati. Maṅkubhūto ca patitakkhandho adhomukho aṅguṭṭhakena bhūmiṃ kasanto nisīdati, visārado hutvā kathetuṃ na sakkoti. Pabbajitopi ‘‘bahū bhikkhū sannipatitā, avassaṃ koci mama kammaṃ jānissati, atha me uposathampi pavāraṇampi ṭhapetvā sāmaññā cāvetvā nikkaḍḍhissantī’’ti sabhayo upasaṅkamati, visārado hutvā kathetuṃ na sakkoti. Ekacco pana dussīlopi dappito viya carati, sopi ajjhāsayena maṅku hotiyeva.
ஸம்மூள்ஹோ காலங் கரோதீதி தஸ்ஸ ஹி மரணமஞ்சே நிபன்னஸ்ஸ து³ஸ்ஸீலகம்மங் ஸமாதா³ய வத்திதட்டா²னங் ஆபாத²ங் ஆக³ச்ச²தி. ஸோ உம்மீலெத்வா இத⁴லோகங் பஸ்ஸதி, நிம்மீலெத்வா பரலோகங். தஸ்ஸ சத்தாரோ அபாயா உபட்ட²ஹந்தி, ஸத்திஸதேன ஸீஸே பஹரியமானோ விய ஹோதி. ஸோ ‘‘வாரேத² வாரேதா²’’தி விரவந்தோ மரதி. தேன வுத்தங் – ‘‘ஸம்மூள்ஹோ காலங் கரோதீ’’தி. பஞ்சமபத³ங் உத்தானமேவ. ஆனிஸங்ஸகதா² வுத்தவிபரியாயேன வேதி³தப்³பா³.
Sammūḷho kālaṃ karotīti tassa hi maraṇamañce nipannassa dussīlakammaṃ samādāya vattitaṭṭhānaṃ āpāthaṃ āgacchati. So ummīletvā idhalokaṃ passati, nimmīletvā paralokaṃ. Tassa cattāro apāyā upaṭṭhahanti, sattisatena sīse pahariyamāno viya hoti. So ‘‘vāretha vārethā’’ti viravanto marati. Tena vuttaṃ – ‘‘sammūḷho kālaṃ karotī’’ti. Pañcamapadaṃ uttānameva. Ānisaṃsakathā vuttavipariyāyena veditabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸீலஸுத்தங் • 3. Sīlasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-10. ஸீலஸுத்தாதி³வண்ணனா • 3-10. Sīlasuttādivaṇṇanā
