| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[152] 2. син̇г̇аалаж̇аад̇агаван̣н̣анаа
[152] 2. Siṅgālajātakavaṇṇanā
асамзгкид̇агамманд̇анд̇и ид̣̇ам̣ сад̇т̇аа гуудааг̇аарасаалааяам̣ вихаранд̇о взсааливаасигам̣ згам̣ нхаабид̇абуд̇д̇ам̣ аараб̣бха гат̇зси. д̇асса гира бид̇аа рааж̇уунам̣ рааж̇ород̇хаанам̣ рааж̇агумаараанам̣ рааж̇агумааригаанан̃жа массугаран̣агзсасан̣табанаадтабад̣̇адтабанаад̣̇ийни саб̣б̣агижжаани гарод̇и сад̣̇д̇хо басанно д̇исаран̣аг̇ад̇о самаад̣̇иннабан̃жасийло, анд̇аранд̇арз сад̇т̇у д̇хаммам̣ сун̣анд̇о гаалам̣ вийд̇инаамзд̇и. со згасмим̣ д̣̇ивасз рааж̇анивзсанз гаммам̣ гаад̇ум̣ г̇ажчанд̇о ад̇д̇ано буд̇д̇ам̣ г̇ахзд̇ваа г̇ад̇о. со д̇ад̇т̇а згам̣ д̣̇зважчараабадибхааг̇ам̣ алан̇гад̇абадияад̇д̇ам̣ лижчавигумааригам̣ д̣̇исваа гилзсавасзна бадиб̣ад̣̇д̇хажид̇д̇о худ̇ваа бид̇араа сад̣̇д̇хим̣ рааж̇анивзсанаа нигкамид̇ваа ‘‘зд̇ам̣ гумааригам̣ лабхамаано ж̇ийвиссаами, алабхамаанасса мз зд̇т̇зва маран̣а’’нд̇и аахаарубажчзд̣̇ам̣ гад̇ваа ман̃жагам̣ бариссаж̇ид̇ваа нибаж̇ж̇и.
Asamekkhitakammantanti idaṃ satthā kūṭāgārasālāyaṃ viharanto vesālivāsikaṃ ekaṃ nhāpitaputtaṃ ārabbha kathesi. Tassa kira pitā rājūnaṃ rājorodhānaṃ rājakumārānaṃ rājakumārikānañca massukaraṇakesasaṇṭhapanaaṭṭhapadaṭṭhapanādīni sabbakiccāni karoti saddho pasanno tisaraṇagato samādinnapañcasīlo, antarantare satthu dhammaṃ suṇanto kālaṃ vītināmeti. So ekasmiṃ divase rājanivesane kammaṃ kātuṃ gacchanto attano puttaṃ gahetvā gato. So tattha ekaṃ devaccharāpaṭibhāgaṃ alaṅkatapaṭiyattaṃ licchavikumārikaṃ disvā kilesavasena paṭibaddhacitto hutvā pitarā saddhiṃ rājanivesanā nikkhamitvā ‘‘etaṃ kumārikaṃ labhamāno jīvissāmi, alabhamānassa me ettheva maraṇa’’nti āhārupacchedaṃ katvā mañcakaṃ parissajitvā nipajji.
ат̇а нам̣ бид̇аа убасан̇гамид̇ваа ‘‘д̇аад̇а, авад̇т̇умхи чанд̣̇арааг̇ам̣ маа гари, хийнаж̇ажжо д̇вам̣ нхаабид̇абуд̇д̇о, лижчавигумааригаа кад̇д̇ияад̇хийд̇аа ж̇аад̇исамбаннаа, на саа д̇уяхам̣ анужчавигаа, ан̃н̃ам̣ д̇з ж̇аад̇иг̇од̇д̇зхи сад̣̇исам̣ гумааригам̣ аанзссаамий’’д̇и ааха. со бид̇у гат̇ам̣ на г̇ан̣хи. ат̇а нам̣ маад̇аа бхаад̇аа бхаг̇иний жуул̣абид̇аа жуул̣амаад̇аад̇и саб̣б̣зби н̃аад̇агаа жзва мид̇д̇асухаж̇ж̇аа жа саннибад̇ид̇ваа сан̃н̃аабзнд̇ааби сан̃н̃аабзд̇ум̣ наасагким̣су. со д̇ад̇т̇зва суссид̇ваа барисуссид̇ваа ж̇ийвид̇агкаяам̣ баабун̣и. ат̇асса бид̇аа сарийрагижжабзд̇агижжаани гад̇ваа д̇анусого ‘‘сад̇т̇аарам̣ ванд̣̇иссаамий’’д̇и б̣ахум̣ г̇анд̇хамаалаавилзбанам̣ г̇ахзд̇ваа махааванам̣ г̇анд̇ваа сад̇т̇аарам̣ бууж̇зд̇ваа ванд̣̇ид̇ваа згаманд̇ам̣ нисинно ‘‘гим̣ ну ко, убаасага, б̣ахууни д̣̇ивасаани на д̣̇иссасий’’д̇и вуд̇д̇з д̇амад̇т̇ам̣ аарожзси. сад̇т̇аа ‘‘на ко, убаасага, ид̣̇аанзва д̇ава буд̇д̇о авад̇т̇усмим̣ чанд̣̇арааг̇ам̣ уббаад̣̇зд̇ваа винаасам̣ баабун̣и, буб̣б̣зби бад̇д̇оязваа’’д̇и вад̇ваа д̇зна яаажид̇о ад̇ийд̇ам̣ аахари.
Atha naṃ pitā upasaṅkamitvā ‘‘tāta, avatthumhi chandarāgaṃ mā kari, hīnajacco tvaṃ nhāpitaputto, licchavikumārikā khattiyadhītā jātisampannā, na sā tuyhaṃ anucchavikā, aññaṃ te jātigottehi sadisaṃ kumārikaṃ ānessāmī’’ti āha. So pitu kathaṃ na gaṇhi. Atha naṃ mātā bhātā bhaginī cūḷapitā cūḷamātāti sabbepi ñātakā ceva mittasuhajjā ca sannipatitvā saññāpentāpi saññāpetuṃ nāsakkhiṃsu. So tattheva sussitvā parisussitvā jīvitakkhayaṃ pāpuṇi. Athassa pitā sarīrakiccapetakiccāni katvā tanusoko ‘‘satthāraṃ vandissāmī’’ti bahuṃ gandhamālāvilepanaṃ gahetvā mahāvanaṃ gantvā satthāraṃ pūjetvā vanditvā ekamantaṃ nisinno ‘‘kiṃ nu kho, upāsaka, bahūni divasāni na dissasī’’ti vutte tamatthaṃ ārocesi. Satthā ‘‘na kho, upāsaka, idāneva tava putto avatthusmiṃ chandarāgaṃ uppādetvā vināsaṃ pāpuṇi, pubbepi pattoyevā’’ti vatvā tena yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о химаванд̇абад̣̇зсз сийхаяонияам̣ ниб̣б̣ад̇д̇и. д̇асса ча ганидтабхаад̇аро згаа жа бхаг̇иний ахоси, саб̣б̣зби ган̃жанаг̇ухааяам̣ васанд̇и. д̇ассаа бана г̇ухааяа авид̣̇уурз раж̇ад̇абаб̣б̣ад̇з згаа палигаг̇ухаа ад̇т̇и, д̇ад̇т̇зго син̇г̇аало васад̇и. абарабхааг̇з сийхаанам̣ маад̇аабид̇аро гааламагам̣су. д̇з бхаг̇иним̣ сийхабод̇игам̣ ган̃жанаг̇ухааяам̣ табзд̇ваа г̇ожарааяа баггамид̇ваа мам̣сам̣ аахарид̇ваа д̇ассаа д̣̇знд̇и. со син̇г̇аало д̇ам̣ сийхабод̇игам̣ д̣̇исваа бадиб̣ад̣̇д̇хажид̇д̇о ахоси. д̇ассаа бана маад̇аабид̇уунам̣ д̇харамаанагаалз огаасам̣ наалад̇т̇а, со сад̇д̇аннамби д̇зсам̣ г̇ожарааяа багганд̇агаалз палигаг̇ухааяа од̇арид̇ваа ган̃жанаг̇ухааяа д̣̇ваарам̣ г̇анд̇ваа сийхабод̇игааяа бурад̇о логаамисабадисам̣яуд̇д̇ам̣ зваруубам̣ рахассагат̇ам̣ гат̇зси – ‘‘сийхабод̇игз, ахамби жад̇уббад̣̇о, д̇вамби жад̇уббад̣̇аа, д̇вам̣ мз баж̇аабад̇ий хохи, ахам̣ д̇з бад̇и бхависсаами, д̇з маяам̣ самаг̇г̇аа саммод̣̇амаанаа васиссаама, д̇вам̣ ид̇о бадтааяа мам̣ гилзсавасзна сан̇г̇ан̣хаахий’’д̇и. саа д̇асса важанам̣ суд̇ваа жинд̇зси – ‘‘аяам̣ син̇г̇аало жад̇уббад̣̇аанам̣ анд̇арз хийно бадигудто жан̣д̣ааласад̣̇исо, маяам̣ уд̇д̇амарааж̇агуласаммад̇аа, зса ко маяаа сад̣̇д̇хим̣ асаб̣бхим̣ ананужчавигам̣ гат̇ам̣ гат̇зд̇и, ахам̣ зваруубам̣ гат̇ам̣ суд̇ваа ж̇ийвид̇зна гим̣ гариссаами, наасааваад̇ам̣ саннируж̇жхид̇ваа мариссаамий’’д̇и. ат̇ассаа зд̇ад̣̇ахоси – ‘‘маяхам̣ звамзва маран̣ам̣ аяуд̇д̇ам̣, бхаад̇игаа д̇аава мз ааг̇ажчанд̇у, д̇зсам̣ гат̇зд̇ваа мариссаамий’’д̇и. син̇г̇аалоби д̇ассаа санд̇игаа бадиважанам̣ алабхид̇ваа ‘‘ид̣̇аани зсаа маяхам̣ гуж̇жхад̇ий’’д̇и д̣̇оманассаббад̇д̇о палигаг̇ухааяам̣ бависид̇ваа нибаж̇ж̇и.
Atīte bārāṇasiyaṃ brahmadatte rajjaṃ kārente bodhisatto himavantapadese sīhayoniyaṃ nibbatti. Tassa cha kaniṭṭhabhātaro ekā ca bhaginī ahosi, sabbepi kañcanaguhāyaṃ vasanti. Tassā pana guhāya avidūre rajatapabbate ekā phalikaguhā atthi, tattheko siṅgālo vasati. Aparabhāge sīhānaṃ mātāpitaro kālamakaṃsu. Te bhaginiṃ sīhapotikaṃ kañcanaguhāyaṃ ṭhapetvā gocarāya pakkamitvā maṃsaṃ āharitvā tassā denti. So siṅgālo taṃ sīhapotikaṃ disvā paṭibaddhacitto ahosi. Tassā pana mātāpitūnaṃ dharamānakāle okāsaṃ nālattha, so sattannampi tesaṃ gocarāya pakkantakāle phalikaguhāya otaritvā kañcanaguhāya dvāraṃ gantvā sīhapotikāya purato lokāmisapaṭisaṃyuttaṃ evarūpaṃ rahassakathaṃ kathesi – ‘‘sīhapotike, ahampi catuppado, tvampi catuppadā, tvaṃ me pajāpatī hohi, ahaṃ te pati bhavissāmi, te mayaṃ samaggā sammodamānā vasissāma, tvaṃ ito paṭṭhāya maṃ kilesavasena saṅgaṇhāhī’’ti. Sā tassa vacanaṃ sutvā cintesi – ‘‘ayaṃ siṅgālo catuppadānaṃ antare hīno paṭikuṭṭho caṇḍālasadiso, mayaṃ uttamarājakulasammatā, esa kho mayā saddhiṃ asabbhiṃ ananucchavikaṃ kathaṃ katheti, ahaṃ evarūpaṃ kathaṃ sutvā jīvitena kiṃ karissāmi, nāsāvātaṃ sannirujjhitvā marissāmī’’ti. Athassā etadahosi – ‘‘mayhaṃ evameva maraṇaṃ ayuttaṃ, bhātikā tāva me āgacchantu, tesaṃ kathetvā marissāmī’’ti. Siṅgālopi tassā santikā paṭivacanaṃ alabhitvā ‘‘idāni esā mayhaṃ kujjhatī’’ti domanassappatto phalikaguhāyaṃ pavisitvā nipajji.
ат̇зго сийхабод̇аго махим̣савааран̣аад̣̇ийсу ан̃н̃ад̇арам̣ вад̇хид̇ваа мам̣сам̣ каад̣̇ид̇ваа бхаг̇инияаа бхааг̇ам̣ аахарид̇ваа ‘‘амма, мам̣сам̣ каад̣̇ассуу’’д̇и ааха. ‘‘бхаад̇ига, наахам̣ мам̣сам̣ каад̣̇аами, мариссаамий’’д̇и. ‘‘гим̣ гааран̣аа’’д̇и? саа д̇ам̣ бавад̇д̇им̣ аажигки. ‘‘ид̣̇аани гахам̣ со син̇г̇аало’’д̇и жа вуд̇д̇з палигаг̇ухааяам̣ нибаннам̣ син̇г̇аалам̣ ‘‘аагаасз нибанно’’д̇и ман̃н̃амаанаа ‘‘бхаад̇ига, гим̣ на бассаси, зсо раж̇ад̇абаб̣б̣ад̇з аагаасз нибанно’’д̇и. сийхабод̇аго д̇асса палигаг̇ухааяам̣ нибаннабхаавам̣ аж̇аананд̇о ‘‘аагаасз нибанно’’д̇и сан̃н̃ий худ̇ваа ‘‘маарзссаами на’’нд̇и сийхавзг̇зна багканд̣̇ид̇ваа палигаг̇ухам̣ хад̣̇аязнзва бахари. со хад̣̇аязна палид̇зна д̇ад̇т̇зва ж̇ийвид̇агкаяам̣ бад̇ваа баб̣б̣ад̇абаад̣̇з бад̇и. ат̇аабаро ааг̇ажчи, саа д̇ассаби д̇ат̇зва гат̇зси. соби д̇ат̇зва гад̇ваа ж̇ийвид̇агкаяам̣ бад̇ваа баб̣б̣ад̇абаад̣̇з бад̇и.
Atheko sīhapotako mahiṃsavāraṇādīsu aññataraṃ vadhitvā maṃsaṃ khāditvā bhaginiyā bhāgaṃ āharitvā ‘‘amma, maṃsaṃ khādassū’’ti āha. ‘‘Bhātika, nāhaṃ maṃsaṃ khādāmi, marissāmī’’ti. ‘‘Kiṃ kāraṇā’’ti? Sā taṃ pavattiṃ ācikkhi. ‘‘Idāni kahaṃ so siṅgālo’’ti ca vutte phalikaguhāyaṃ nipannaṃ siṅgālaṃ ‘‘ākāse nipanno’’ti maññamānā ‘‘bhātika, kiṃ na passasi, eso rajatapabbate ākāse nipanno’’ti. Sīhapotako tassa phalikaguhāyaṃ nipannabhāvaṃ ajānanto ‘‘ākāse nipanno’’ti saññī hutvā ‘‘māressāmi na’’nti sīhavegena pakkhanditvā phalikaguhaṃ hadayeneva pahari. So hadayena phalitena tattheva jīvitakkhayaṃ patvā pabbatapāde pati. Athāparo āgacchi, sā tassapi tatheva kathesi. Sopi tatheva katvā jīvitakkhayaṃ patvā pabbatapāde pati.
звам̣ часуби бхаад̇игзсу мад̇зсу саб̣б̣абажчаа б̣од̇хисад̇д̇о ааг̇ажчи. саа д̇ассаби д̇ам̣ гааран̣ам̣ аарожзд̇ваа ‘‘ид̣̇аани со гухи’’нд̇и вуд̇д̇з ‘‘зсо раж̇ад̇абаб̣б̣ад̇амад̇т̇агз аагаасз нибанно’’д̇и ааха. б̣од̇хисад̇д̇о жинд̇зси – ‘‘син̇г̇аалаанам̣ аагаасз бад̇идтаа наама над̇т̇и, палигаг̇ухааяам̣ нибаннаго бхависсад̇ий’’д̇и. со баб̣б̣ад̇абаад̣̇ам̣ од̇арид̇ваа ча бхаад̇игз мад̇з д̣̇исваа ‘‘имз ад̇д̇ано б̣аалад̇ааяа бариг̇г̇ан̣ханабан̃н̃ааяа абхаавзна палигаг̇ухабхаавам̣ аж̇аанид̇ваа хад̣̇аязна бахарид̇ваа мад̇аа бхависсанд̇и, асамзгкид̇ваа ад̇ид̇урид̇ам̣ гаронд̇аанам̣ гаммам̣ наама зваруубам̣ ход̇ий’’д̇и вад̇ваа батамам̣ г̇аат̇амааха –
Evaṃ chasupi bhātikesu matesu sabbapacchā bodhisatto āgacchi. Sā tassapi taṃ kāraṇaṃ ārocetvā ‘‘idāni so kuhi’’nti vutte ‘‘eso rajatapabbatamatthake ākāse nipanno’’ti āha. Bodhisatto cintesi – ‘‘siṅgālānaṃ ākāse patiṭṭhā nāma natthi, phalikaguhāyaṃ nipannako bhavissatī’’ti. So pabbatapādaṃ otaritvā cha bhātike mate disvā ‘‘ime attano bālatāya pariggaṇhanapaññāya abhāvena phalikaguhabhāvaṃ ajānitvā hadayena paharitvā matā bhavissanti, asamekkhitvā atituritaṃ karontānaṃ kammaṃ nāma evarūpaṃ hotī’’ti vatvā paṭhamaṃ gāthamāha –
3.
3.
‘‘асамзгкид̇агамманд̇ам̣, д̇урид̇аабхинибаад̇инам̣;
‘‘Asamekkhitakammantaṃ, turitābhinipātinaṃ;
саани гаммаани д̇аббзнд̇и, ун̣хам̣важ̇жхохид̇ам̣ мукз’’д̇и.
Sāni kammāni tappenti, uṇhaṃvajjhohitaṃ mukhe’’ti.
д̇ад̇т̇а асамзгкид̇агамманд̇ам̣, д̇урид̇аабхинибаад̇инанд̇и яо буг̇г̇ало яам̣ гаммам̣ гад̇д̇угаамо ход̇и, д̇ад̇т̇а д̣̇осам̣ асамзгкид̇ваа анубад̇хаарзд̇ваа д̇урид̇о худ̇ваа взг̇знзва д̇ам̣ гаммам̣ гаад̇ум̣ абхинибад̇ад̇и багканд̣̇ад̇и бадибаж̇ж̇ад̇и, д̇ам̣ асамзгкид̇агамманд̇ам̣ д̇урид̇аабхинибаад̇инам̣ звам̣ саани гаммаани д̇аббзнд̇и, сожзнд̇и гиламзнд̇и. яат̇аа гим̣? ун̣хам̣важ̇жхохид̇ам̣ мукзд̇и, яат̇аа бхун̃ж̇анд̇зна ‘‘ид̣̇ам̣ сийд̇алам̣ ид̣̇ам̣ ун̣ха’’нд̇и анубад̇хаарзд̇ваа ун̣хам̣ аж̇жхохаран̣ийяам̣ мукз аж̇жхохарид̇ам̣ табид̇ам̣ мукамби ган̣тамби гужчимби д̣̇ахад̇и сожзд̇и гиламзд̇и, звам̣ д̇ат̇ааруубам̣ буг̇г̇алам̣ саани гаммаани д̇аббзнд̇и.
Tattha asamekkhitakammantaṃ, turitābhinipātinanti yo puggalo yaṃ kammaṃ kattukāmo hoti, tattha dosaṃ asamekkhitvā anupadhāretvā turito hutvā vegeneva taṃ kammaṃ kātuṃ abhinipatati pakkhandati paṭipajjati, taṃ asamekkhitakammantaṃ turitābhinipātinaṃ evaṃ sāni kammāni tappenti, socenti kilamenti. Yathā kiṃ? Uṇhaṃvajjhohitaṃ mukheti, yathā bhuñjantena ‘‘idaṃ sītalaṃ idaṃ uṇha’’nti anupadhāretvā uṇhaṃ ajjhoharaṇīyaṃ mukhe ajjhoharitaṃ ṭhapitaṃ mukhampi kaṇṭhampi kucchimpi dahati soceti kilameti, evaṃ tathārūpaṃ puggalaṃ sāni kammāni tappenti.
ид̇и со сийхо имам̣ г̇аат̇ам̣ вад̇ваа ‘‘мама бхаад̇игаа анубааяагусалад̇ааяа ‘син̇г̇аалам̣ маарзссаамаа’д̇и ад̇ивзг̇зна багканд̣̇ид̇ваа саяам̣ мад̇аа, ахам̣ бана зваруубам̣ агад̇ваа син̇г̇ааласса палигаг̇ухааяам̣ нибаннассзва хад̣̇аяам̣ паалзссаамий’’д̇и син̇г̇ааласса аароханаороханамаг̇г̇ам̣ саллагкзд̇ваа д̇ад̣̇абхимуко худ̇ваа д̇игкад̇д̇ум̣ сийханаад̣̇ам̣ над̣̇и, бат̇авияаа сад̣̇д̇хим̣ аагаасам̣ зганиннаад̣̇ам̣ ахоси. син̇г̇ааласса палигаг̇ухааяам̣ нибаннассзва сийд̇ад̇асид̇асса хад̣̇аяам̣ пали, со д̇ад̇т̇зва ж̇ийвид̇агкаяам̣ баабун̣и.
Iti so sīho imaṃ gāthaṃ vatvā ‘‘mama bhātikā anupāyakusalatāya ‘siṅgālaṃ māressāmā’ti ativegena pakkhanditvā sayaṃ matā, ahaṃ pana evarūpaṃ akatvā siṅgālassa phalikaguhāyaṃ nipannasseva hadayaṃ phālessāmī’’ti siṅgālassa ārohanaorohanamaggaṃ sallakkhetvā tadabhimukho hutvā tikkhattuṃ sīhanādaṃ nadi, pathaviyā saddhiṃ ākāsaṃ ekaninnādaṃ ahosi. Siṅgālassa phalikaguhāyaṃ nipannasseva sītatasitassa hadayaṃ phali, so tattheva jīvitakkhayaṃ pāpuṇi.
сад̇т̇аа ‘‘звам̣ со син̇г̇аало сийханаад̣̇ам̣ суд̇ваа ж̇ийвид̇агкаяам̣ бад̇д̇о’’д̇и вад̇ваа абхисамб̣уд̣̇д̇хо худ̇ваа д̣̇уд̇ияам̣ г̇аат̇амааха –
Satthā ‘‘evaṃ so siṅgālo sīhanādaṃ sutvā jīvitakkhayaṃ patto’’ti vatvā abhisambuddho hutvā dutiyaṃ gāthamāha –
4.
4.
‘‘сийхо жа сийханаад̣̇зна, д̣̇ад̣̇д̣̇арам̣ абхинаад̣̇аяи;
‘‘Sīho ca sīhanādena, daddaraṃ abhinādayi;
суд̇ваа сийхасса ниг̇гхосам̣, син̇г̇аало д̣̇ад̣̇д̣̇арз васам̣;
Sutvā sīhassa nigghosaṃ, siṅgālo daddare vasaṃ;
бхийд̇о санд̇аасамаабаад̣̇и, хад̣̇аяан̃жасса абпалий’’д̇и.
Bhīto santāsamāpādi, hadayañcassa apphalī’’ti.
д̇ад̇т̇а сийход̇и жад̇д̇ааро сийхаа – д̇ин̣асийхо, бан̣д̣усийхо, гаал̣асийхо, сурад̇д̇ахад̇т̇абаад̣̇о гзсарасийход̇и. д̇зсу гзсарасийхо ид̇ха ад̇хиббзд̇о. д̣̇ад̣̇д̣̇арам̣ абхинаад̣̇аяийд̇и д̇зна асанибаад̇асад̣̇д̣̇асад̣̇исзна бхзравад̇арзна сийханаад̣̇зна д̇ам̣ раж̇ад̇абаб̣б̣ад̇ам̣ абхинаад̣̇аяи зганиннаад̣̇ам̣ агааси. д̣̇ад̣̇д̣̇арз васанд̇и палигамиссагз раж̇ад̇абаб̣б̣ад̇з васанд̇о. бхийд̇о санд̇аасамаабаад̣̇ийд̇и маран̣абхаязна бхийд̇о жид̇д̇уд̇раасам̣ аабаад̣̇и. хад̣̇аяан̃жасса абпалийд̇и д̇зна жасса бхаязна хад̣̇аяам̣ палийд̇и.
Tattha sīhoti cattāro sīhā – tiṇasīho, paṇḍusīho, kāḷasīho, surattahatthapādo kesarasīhoti. Tesu kesarasīho idha adhippeto. Daddaraṃ abhinādayīti tena asanipātasaddasadisena bheravatarena sīhanādena taṃ rajatapabbataṃ abhinādayi ekaninnādaṃ akāsi. Daddare vasanti phalikamissake rajatapabbate vasanto. Bhīto santāsamāpādīti maraṇabhayena bhīto cittutrāsaṃ āpādi. Hadayañcassa apphalīti tena cassa bhayena hadayaṃ phalīti.
звам̣ сийхо син̇г̇аалам̣ ж̇ийвид̇агкаяам̣ баабзд̇ваа бхаад̇аро згасмим̣ таанз бадижчаад̣̇зд̇ваа д̇зсам̣ мад̇абхаавам̣ бхаг̇инияаа аажигкид̇ваа д̇ам̣ самассаасзд̇ваа яааваж̇ийвам̣ ган̃жанаг̇ухааяам̣ васид̇ваа яат̇аагаммам̣ г̇ад̇о.
Evaṃ sīho siṅgālaṃ jīvitakkhayaṃ pāpetvā bhātaro ekasmiṃ ṭhāne paṭicchādetvā tesaṃ matabhāvaṃ bhaginiyā ācikkhitvā taṃ samassāsetvā yāvajīvaṃ kañcanaguhāyaṃ vasitvā yathākammaṃ gato.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз убаасаго сод̇аабад̇д̇ипалз бад̇идтахи. ‘‘д̇ад̣̇аа син̇г̇аало нхаабид̇абуд̇д̇о ахоси, сийхабод̇игаа лижчавигумааригаа, ча ганидтабхаад̇аро ан̃н̃ад̇арат̇зраа ахзсум̣, ж̇здтабхаад̇игасийхо бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne upāsako sotāpattiphale patiṭṭhahi. ‘‘Tadā siṅgālo nhāpitaputto ahosi, sīhapotikā licchavikumārikā, cha kaniṭṭhabhātaro aññataratherā ahesuṃ, jeṭṭhabhātikasīho pana ahameva ahosi’’nti.
син̇г̇аалаж̇аад̇агаван̣н̣анаа д̣̇уд̇ияаа.
Siṅgālajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 152. син̇г̇аалаж̇аад̇агам̣ • 152. Siṅgālajātakaṃ
