| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૯. સિવથિકસુત્તં
9. Sivathikasuttaṃ
૨૪૯. ‘‘પઞ્ચિમે, ભિક્ખવે, આદીનવા સિવથિકાય 1. કતમે પઞ્ચ? અસુચિ, દુગ્ગન્ધા, સપ્પટિભયા, વાળાનં અમનુસ્સાનં આવાસો, બહુનો જનસ્સ આરોદના – ઇમે ખો, ભિક્ખવે, પઞ્ચ આદીનવા સિવથિકાય.
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘એવમેવં ખો, ભિક્ખવે, પઞ્ચિમે આદીનવા સિવથિકૂપમે પુગ્ગલે. કતમે પઞ્ચ? ઇધ , ભિક્ખવે, એકચ્ચો પુગ્ગલો અસુચિના કાયકમ્મેન સમન્નાગતો હોતિ; અસુચિના વચીકમ્મેન સમન્નાગતો હોતિ; અસુચિના મનોકમ્મેન સમન્નાગતો હોતિ. ઇદમસ્સ અસુચિતાય વદામિ. સેય્યથાપિ સા, ભિક્ખવે, સિવથિકા અસુચિ; તથૂપમાહં, ભિક્ખવે, ઇમં પુગ્ગલં વદામિ.
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘તસ્સ અસુચિના કાયકમ્મેન સમન્નાગતસ્સ, અસુચિના વચીકમ્મેન સમન્નાગતસ્સ, અસુચિના મનોકમ્મેન સમન્નાગતસ્સ પાપકો કિત્તિસદ્દો અબ્ભુગ્ગચ્છતિ. ઇદમસ્સ દુગ્ગન્ધતાય વદામિ. સેય્યથાપિ સા, ભિક્ખવે, સિવથિકા દુગ્ગન્ધા; તથૂપમાહં, ભિક્ખવે, ઇમં પુગ્ગલં વદામિ.
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘તમેનં અસુચિના કાયકમ્મેન સમન્નાગતં, અસુચિના વચીકમ્મેન સમન્નાગતં, અસુચિના મનોકમ્મેન સમન્નાગતં પેસલા સબ્રહ્મચારી આરકા પરિવજ્જન્તિ. ઇદમસ્સ સપ્પટિભયસ્મિં વદામિ. સેય્યથાપિ સા, ભિક્ખવે, સિવથિકા સપ્પટિભયા; તથૂપમાહં, ભિક્ખવે, ઇમં પુગ્ગલં વદામિ.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘સો અસુચિના કાયકમ્મેન સમન્નાગતો, અસુચિના વચીકમ્મેન સમન્નાગતો , અસુચિના મનોકમ્મેન સમન્નાગતો સભાગેહિ પુગ્ગલેહિ સદ્ધિં સંવસતિ. ઇદમસ્સ વાળાવાસસ્મિં વદામિ. સેય્યથાપિ સા , ભિક્ખવે, સિવથિકા વાળાનં અમનુસ્સાનં આવાસો; તથૂપમાહં, ભિક્ખવે, ઇમં પુગ્ગલં વદામિ.
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘તમેનં અસુચિના કાયકમ્મેન સમન્નાગતં, અસુચિના વચીકમ્મેન સમન્નાગતં, અસુચિના મનોકમ્મેન સમન્નાગતં પેસલા સબ્રહ્મચારી દિસ્વા ખીયધમ્મં 3 આપજ્જન્તિ – ‘અહો વત નો દુક્ખં યે મયં એવરૂપેહિ પુગ્ગલેહિ સદ્ધિં સંવસામા’તિ! ઇદમસ્સ આરોદનાય વદામિ. સેય્યથાપિ સા, ભિક્ખવે, સિવથિકા બહુનો જનસ્સ આરોદના; તથૂપમાહં, ભિક્ખવે, ઇમં પુગ્ગલં વદામિ. ઇમે ખો, ભિક્ખવે, પઞ્ચ આદીનવા સિવથિકૂપમે પુગ્ગલે’’તિ. નવમં.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૯. સિવથિકસુત્તવણ્ણના • 9. Sivathikasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૧૦. પઠમદીઘચારિકસુત્તાદિવણ્ણના • 1-10. Paṭhamadīghacārikasuttādivaṇṇanā
