| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૬. સોખુમ્મસુત્તં
6. Sokhummasuttaṃ
૧૬. ‘‘ચત્તારિમાનિ, ભિક્ખવે, સોખુમ્માનિ. કતમાનિ ચત્તારિ? ઇધ, ભિક્ખવે, ભિક્ખુ રૂપસોખુમ્મેન સમન્નાગતો હોતિ પરમેન; તેન ચ રૂપસોખુમ્મેન અઞ્ઞં રૂપસોખુમ્મં ઉત્તરિતરં વા પણીતતરં વા ન સમનુપસ્સતિ; તેન ચ રૂપસોખુમ્મેન અઞ્ઞં રૂપસોખુમ્મં ઉત્તરિતરં વા પણીતતરં વા ન પત્થેતિ. વેદનાસોખુમ્મેન સમન્નાગતો હોતિ પરમેન; તેન ચ વેદનાસોખુમ્મેન અઞ્ઞં વેદનાસોખુમ્મં ઉત્તરિતરં વા પણીતતરં વા ન સમનુપસ્સતિ; તેન ચ વેદનાસોખુમ્મેન અઞ્ઞં વેદનાસોખુમ્મં ઉત્તરિતરં વા પણીતતરં વા ન પત્થેતિ. સઞ્ઞાસોખુમ્મેન સમન્નાગતો હોતિ પરમેન; તેન ચ સઞ્ઞાસોખુમ્મેન અઞ્ઞં સઞ્ઞાસોખુમ્મં ઉત્તરિતરં વા પણીતતરં વા ન સમનુપસ્સતિ; તેન ચ સઞ્ઞાસોખુમ્મેન અઞ્ઞં સઞ્ઞાસોખુમ્મં ઉત્તરિતરં વા પણીતતરં વા ન પત્થેતિ. સઙ્ખારસોખુમ્મેન સમન્નાગતો હોતિ પરમેન; તેન ચ સઙ્ખારસોખુમ્મેન અઞ્ઞં સઙ્ખારસોખુમ્મં ઉત્તરિતરં વા પણીતતરં વા ન સમનુપસ્સતિ; તેન ચ સઙ્ખારસોખુમ્મેન અઞ્ઞં સઙ્ખારસોખુમ્મં ઉત્તરિતરં વા પણીતતરં વા ન પત્થેતિ. ઇમાનિ ખો, ભિક્ખવે, ચત્તારિ સોખુમ્માની’’તિ.
16. ‘‘Cattārimāni, bhikkhave, sokhummāni. Katamāni cattāri? Idha, bhikkhave, bhikkhu rūpasokhummena samannāgato hoti paramena; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na samanupassati; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na pattheti. Vedanāsokhummena samannāgato hoti paramena; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na samanupassati; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na pattheti. Saññāsokhummena samannāgato hoti paramena; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na samanupassati; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na pattheti. Saṅkhārasokhummena samannāgato hoti paramena; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na samanupassati; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na pattheti. Imāni kho, bhikkhave, cattāri sokhummānī’’ti.
‘‘રૂપસોખુમ્મતં ઞત્વા, વેદનાનઞ્ચ સમ્ભવં;
‘‘Rūpasokhummataṃ ñatvā, vedanānañca sambhavaṃ;
સઞ્ઞા યતો સમુદેતિ, અત્થં ગચ્છતિ યત્થ ચ;
Saññā yato samudeti, atthaṃ gacchati yattha ca;
સઙ્ખારે પરતો ઞત્વા, દુક્ખતો નો ચ અત્તતો.
Saṅkhāre parato ñatvā, dukkhato no ca attato.
‘‘સ વે સમ્મદ્દસો ભિક્ખુ, સન્તો સન્તિપદે રતો;
‘‘Sa ve sammaddaso bhikkhu, santo santipade rato;
ધારેતિ અન્તિમં દેહં, જેત્વા મારં સવાહિનિ’’ન્તિ. છટ્ઠં;
Dhāreti antimaṃ dehaṃ, jetvā māraṃ savāhini’’nti. chaṭṭhaṃ;
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૬. સોખુમ્મસુત્તવણ્ણના • 6. Sokhummasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬. સોખુમ્મસુત્તવણ્ણના • 6. Sokhummasuttavaṇṇanā
