| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஸோகு²ம்மஸுத்தவண்ணனா
6. Sokhummasuttavaṇṇanā
16. ச²ட்டே² ஸோகு²ம்மானீதி ஸுகு²மலக்க²ணபடிவிஜ்ஜ²னகானி ஞாணானி. ரூபஸோகு²ம்மேன ஸமன்னாக³தோ ஹோதீதி ரூபே ஸண்ஹஸுகு²மலக்க²ணபரிக்³கா³ஹகேன ஞாணேன ஸமன்னாக³தோ ஹோதி. பரமேனாதி உத்தமேன. தேன ச ரூபஸோகு²ம்மேனாதி தேன யாவ அனுலோமபா⁴வங் பத்தேன ஸுகு²மலக்க²ணபரிக்³கா³ஹகஞாணேன. ந ஸமனுபஸ்ஸதீதி நத்தி²பா⁴வேனேவ ந பஸ்ஸதி. ந பத்தே²தீதி நத்தி²பா⁴வேனேவ ந பத்தே²தி. வேத³னாஸோகு²ம்மாதீ³ஸுபி ஏஸேவ நயோ.
16. Chaṭṭhe sokhummānīti sukhumalakkhaṇapaṭivijjhanakāni ñāṇāni. Rūpasokhummena samannāgato hotīti rūpe saṇhasukhumalakkhaṇapariggāhakena ñāṇena samannāgato hoti. Paramenāti uttamena. Tena ca rūpasokhummenāti tena yāva anulomabhāvaṃ pattena sukhumalakkhaṇapariggāhakañāṇena. Na samanupassatīti natthibhāveneva na passati. Na patthetīti natthibhāveneva na pattheti. Vedanāsokhummādīsupi eseva nayo.
ரூபஸோகு²ம்மதங் ஞத்வாதி ரூபக்க²ந்த⁴ஸ்ஸ ஸண்ஹஸுகு²மலக்க²ணபரிக்³கா³ஹகேன ஞாணேன ஸுகு²மதங் ஜானித்வா. வேத³னானஞ்ச ஸம்ப⁴வந்தி வேத³னாக்க²ந்த⁴ஸ்ஸ ச பப⁴வங் ஜானித்வா. ஸஞ்ஞா யதோ ஸமுதே³தீதி யஸ்மா காரணா ஸஞ்ஞாக்க²ந்தோ⁴ ஸமுதே³தி நிப்³ப³த்ததி, தஞ்ச ஜானித்வா. அத்த²ங் க³ச்ச²தி யத்த² சாதி யஸ்மிங் டா²னே நிருஜ்ஜ²தி, தஞ்ச ஜானித்வா. ஸங்கா²ரே பரதோ ஞத்வாதி ஸங்கா²ரக்க²ந்த⁴ங் அனிச்சதாய லுஜ்ஜனபா⁴வேன பரதோ ஜானித்வா. இமினா ஹி பதே³ன அனிச்சானுபஸ்ஸனா கதி²தா. து³க்க²தோ நோ ச அத்ததோதி இமினா து³க்கா²னத்தானுபஸ்ஸனா. ஸந்தோதி கிலேஸஸந்ததாய ஸந்தோ. ஸந்திபதே³ ரதோதி நிப்³பா³னே ரதோ. இதி ஸுத்தந்தே சதூஸு டா²னேஸு விபஸ்ஸனாவ கதி²தா, கா³தா²ஸு லோகுத்தரத⁴ம்மோபீதி.
Rūpasokhummataṃ ñatvāti rūpakkhandhassa saṇhasukhumalakkhaṇapariggāhakena ñāṇena sukhumataṃ jānitvā. Vedanānañca sambhavanti vedanākkhandhassa ca pabhavaṃ jānitvā. Saññā yato samudetīti yasmā kāraṇā saññākkhandho samudeti nibbattati, tañca jānitvā. Atthaṃgacchati yattha cāti yasmiṃ ṭhāne nirujjhati, tañca jānitvā. Saṅkhāre parato ñatvāti saṅkhārakkhandhaṃ aniccatāya lujjanabhāvena parato jānitvā. Iminā hi padena aniccānupassanā kathitā. Dukkhato no ca attatoti iminā dukkhānattānupassanā. Santoti kilesasantatāya santo. Santipade ratoti nibbāne rato. Iti suttante catūsu ṭhānesu vipassanāva kathitā, gāthāsu lokuttaradhammopīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸோகு²ம்மஸுத்தங் • 6. Sokhummasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸோகு²ம்மஸுத்தவண்ணனா • 6. Sokhummasuttavaṇṇanā
