| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൬. സോഖുമ്മസുത്തവണ്ണനാ
6. Sokhummasuttavaṇṇanā
൧൬. ഛട്ഠേ സോഖുമ്മാനീതി സുഖുമലക്ഖണപടിവിജ്ഝനകാനി ഞാണാനി. രൂപസോഖുമ്മേന സമന്നാഗതോ ഹോതീതി രൂപേ സണ്ഹസുഖുമലക്ഖണപരിഗ്ഗാഹകേന ഞാണേന സമന്നാഗതോ ഹോതി. പരമേനാതി ഉത്തമേന. തേന ച രൂപസോഖുമ്മേനാതി തേന യാവ അനുലോമഭാവം പത്തേന സുഖുമലക്ഖണപരിഗ്ഗാഹകഞാണേന. ന സമനുപസ്സതീതി നത്ഥിഭാവേനേവ ന പസ്സതി. ന പത്ഥേതീതി നത്ഥിഭാവേനേവ ന പത്ഥേതി. വേദനാസോഖുമ്മാദീസുപി ഏസേവ നയോ.
16. Chaṭṭhe sokhummānīti sukhumalakkhaṇapaṭivijjhanakāni ñāṇāni. Rūpasokhummena samannāgato hotīti rūpe saṇhasukhumalakkhaṇapariggāhakena ñāṇena samannāgato hoti. Paramenāti uttamena. Tena ca rūpasokhummenāti tena yāva anulomabhāvaṃ pattena sukhumalakkhaṇapariggāhakañāṇena. Na samanupassatīti natthibhāveneva na passati. Na patthetīti natthibhāveneva na pattheti. Vedanāsokhummādīsupi eseva nayo.
രൂപസോഖുമ്മതം ഞത്വാതി രൂപക്ഖന്ധസ്സ സണ്ഹസുഖുമലക്ഖണപരിഗ്ഗാഹകേന ഞാണേന സുഖുമതം ജാനിത്വാ. വേദനാനഞ്ച സമ്ഭവന്തി വേദനാക്ഖന്ധസ്സ ച പഭവം ജാനിത്വാ. സഞ്ഞാ യതോ സമുദേതീതി യസ്മാ കാരണാ സഞ്ഞാക്ഖന്ധോ സമുദേതി നിബ്ബത്തതി, തഞ്ച ജാനിത്വാ. അത്ഥം ഗച്ഛതി യത്ഥ ചാതി യസ്മിം ഠാനേ നിരുജ്ഝതി, തഞ്ച ജാനിത്വാ. സങ്ഖാരേ പരതോ ഞത്വാതി സങ്ഖാരക്ഖന്ധം അനിച്ചതായ ലുജ്ജനഭാവേന പരതോ ജാനിത്വാ. ഇമിനാ ഹി പദേന അനിച്ചാനുപസ്സനാ കഥിതാ. ദുക്ഖതോ നോ ച അത്തതോതി ഇമിനാ ദുക്ഖാനത്താനുപസ്സനാ. സന്തോതി കിലേസസന്തതായ സന്തോ. സന്തിപദേ രതോതി നിബ്ബാനേ രതോ. ഇതി സുത്തന്തേ ചതൂസു ഠാനേസു വിപസ്സനാവ കഥിതാ, ഗാഥാസു ലോകുത്തരധമ്മോപീതി.
Rūpasokhummataṃ ñatvāti rūpakkhandhassa saṇhasukhumalakkhaṇapariggāhakena ñāṇena sukhumataṃ jānitvā. Vedanānañca sambhavanti vedanākkhandhassa ca pabhavaṃ jānitvā. Saññā yato samudetīti yasmā kāraṇā saññākkhandho samudeti nibbattati, tañca jānitvā. Atthaṃgacchati yattha cāti yasmiṃ ṭhāne nirujjhati, tañca jānitvā. Saṅkhāre parato ñatvāti saṅkhārakkhandhaṃ aniccatāya lujjanabhāvena parato jānitvā. Iminā hi padena aniccānupassanā kathitā. Dukkhato no ca attatoti iminā dukkhānattānupassanā. Santoti kilesasantatāya santo. Santipade ratoti nibbāne rato. Iti suttante catūsu ṭhānesu vipassanāva kathitā, gāthāsu lokuttaradhammopīti.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൬. സോഖുമ്മസുത്തം • 6. Sokhummasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൬. സോഖുമ്മസുത്തവണ്ണനാ • 6. Sokhummasuttavaṇṇanā
