Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೪೧೦. ಸೋಮದತ್ತಜಾತಕಂ (೭-೨-೫)
410. Somadattajātakaṃ (7-2-5)
೧೦೫.
105.
ಸೋ ನ ದಿಸ್ಸತಿ ಮಾತಙ್ಗೋ, ಸೋಮದತ್ತೋ ಕುಹಿಂ ಗತೋ॥
So na dissati mātaṅgo, somadatto kuhiṃ gato.
೧೦೬.
106.
ಭುಮ್ಯಾ ನಿಪತಿತೋ ಸೇತಿ, ಅಮರಾ ವತ ಕುಞ್ಜರೋ॥
Bhumyā nipatito seti, amarā vata kuñjaro.
೧೦೭.
107.
ಅನಗಾರಿಯುಪೇತಸ್ಸ, ವಿಪ್ಪಮುತ್ತಸ್ಸ ತೇ ಸತೋ।
Anagāriyupetassa, vippamuttassa te sato;
ಸಮಣಸ್ಸ ನ ತಂ ಸಾಧು, ಯಂ ಪೇತಮನುಸೋಚಸಿ॥
Samaṇassa na taṃ sādhu, yaṃ petamanusocasi.
೧೦೮.
108.
ಸಂವಾಸೇನ ಹವೇ ಸಕ್ಕ, ಮನುಸ್ಸಸ್ಸ ಮಿಗಸ್ಸ ವಾ।
Saṃvāsena have sakka, manussassa migassa vā;
ಹದಯೇ ಜಾಯತೇ ಪೇಮಂ, ತಂ ನ ಸಕ್ಕಾ ಅಸೋಚಿತುಂ॥
Hadaye jāyate pemaṃ, taṃ na sakkā asocituṃ.
೧೦೯.
109.
ಮತಂ ಮರಿಸ್ಸಂ ರೋದನ್ತಿ, ಯೇ ರುದನ್ತಿ ಲಪನ್ತಿ ಚ।
Mataṃ marissaṃ rodanti, ye rudanti lapanti ca;
ತಸ್ಮಾ ತ್ವಂ ಇಸಿ ಮಾ ರೋದಿ, ರೋದಿತಂ ಮೋಘಮಾಹು ಸನ್ತೋ॥
Tasmā tvaṃ isi mā rodi, roditaṃ moghamāhu santo.
೧೧೦.
110.
ಕನ್ದಿತೇನ ಹವೇ ಬ್ರಹ್ಮೇ, ಮತೋ ಪೇತೋ ಸಮುಟ್ಠಹೇ।
Kanditena have brahme, mato peto samuṭṭhahe;
ಸಬ್ಬೇ ಸಙ್ಗಮ್ಮ ರೋದಾಮ, ಅಞ್ಞಮಞ್ಞಸ್ಸ ಞಾತಕೇ॥
Sabbe saṅgamma rodāma, aññamaññassa ñātake.
೧೧೧.
111.
ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ।
Ādittaṃ vata maṃ santaṃ, ghatasittaṃva pāvakaṃ;
ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ॥
Vārinā viya osiñcaṃ, sabbaṃ nibbāpaye daraṃ.
೧೧೨.
112.
ಅಬ್ಬಹೀ ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ।
Abbahī vata me sallaṃ, yamāsi hadayassitaṃ;
ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ॥
Yo me sokaparetassa, puttasokaṃ apānudi.
೧೧೩.
113.
ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ।
Sohaṃ abbūḷhasallosmi, vītasoko anāvilo;
ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ವಾಸವಾತಿ॥
Na socāmi na rodāmi, tava sutvāna vāsavāti.
ಸೋಮದತ್ತಜಾತಕಂ ಪಞ್ಚಮಂ।
Somadattajātakaṃ pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೪೧೦] ೫. ಸೋಮದತ್ತಜಾತಕವಣ್ಣನಾ • [410] 5. Somadattajātakavaṇṇanā